Zechariah 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1E’yo eceza Yehovani Israeli ma e’yosiri: Yehova ’bu ajapi, nyaku ma eti e’dopi, orineli ’bani ’bapi eri ma aliari ’yo ’dini:

2Mi lu, ma nga Yerusalemuni ’ba okelea atizu ani paraparariru, ’ba dria ageinia kuru ’diyi ma dria; e’yo ’diri nga ovu Yuda ma dria indi o’du ari’bani Yerusalemuni acezu kururisi.

3Eri nga emu eca o’du ’dasi ’dini, ma nga Yerusalemuni ’ba oni nzizaru teriru suru dria dri; ’ba dria teri ’diri ’dupi ’diyi nga ebi isu yi ma ruaa onzi tu. Te suru dria nyakua ’diyi nga yi oku tualu eri ma ruaa.

4O’du nde ’dasi, Yehova ’yo ra, ma nga akanya dria oco osutasi, ma nga ’ba nzupi driniari fe aza ra. Te ma nga ma mile zi suru Yudani ma dria, ma nga akanya ’bani dria ma mile ofu ra.

5’Ba ’wara Yudaa ’diyi nga ’yo yi ma asia, ’Ba ovupi Yerusalemua ’diyi ovu okpo mani, Yehova asikari ongulumuruni Mungu yiniri ma alia.

6O’du ’dasi ma nga ’ba ’wara Yudaa ’diyi ’ba ekile ajikoa aciolu be eja ma etiarile, kile alaka aci ’izurini anyapati ombele tualu ’diyi ma ti ’balerile; yi nga ’ba dria ovupi ageiniasi kuru ’diyi ove ra, dri ndia azini dri ejia, te Yerusalemuni nga kiri ovu dika ma paria ’dani Yerusalemua.

7Yehovani nga hema Yudani pa oko, ’dini diza; Daudinirini, azini ’ba Yerusalemua ’diyini ma ovu ’bazaru ambo aga Yudaniri ra ’dini ku.

8O’du ’dasi Yehovani nga ’ba ovupi Yerusalemua ’diyi ari ra, azini ’ba ovupi okpo kokoru yi ma eselia o’du ’dasiri nga ovu kile Daudile, te; Daudiniri nga ovu kile Mungule, adani kile malaika Yehovanirile yi ma milia.

9Eri nga eca o’du ’dasi ’dini, ma nga suru dria emupi a’di ’dipi Yerusalemu be ’diyi ma dri ja ra.

10Ma nga orindi asi ndrizaniri pi osu matu ’bazaniri be, jo Daudiniri pi ma dria ’ba ovupi Yerusalemua ’diyi be; azini yi nga ma’i yini soleri ndre ra; yi nga owu erisi kile aguni i ma mva alu kodikodiri wulerile, azini yi nga ovu candisi erisi kile ’ba ovupi candisi i ma amurumva ma drasirile.

11O’du ’dasi awu amboruni nga ovu Yerusalemua kile awu Hadadrimonini e’bu Megidonini ma aliarile.

12Angu nde nga wu wu, ori’ba dria alu alu ndu ndu; ori’ba Daudini ’diyi ndu, oku yini ndu; ori’ba, Natanini ’diyi ndu, oku yini yi ndu indi;

13azini ori’ba Levini ’diyi ndu, oku yini ndu; ori’ba ’ba Simeini ndu, oku yini yi ndu indi;

14ori’ba dria acepi ’diyi, ori’ba dria ndu ndu, oku yini pie ndu ndu indi.

← Chapter 11 Jump to: Chapter 13 →