Zechariah 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1O’du ’dasi yi a’di ma tini nga ovu zizaru jo Daudini pi dri ’ba ovupi Yerusalemua ’diyi be, e’yo onzisi, e’yo alatara kokorurisi indi.

2Te eri nga eca o’du ’dasi ’dini, Yehova asikari ongulumuruni ’yo ra, ma nga wura inzile inzi ’diyi ma ru ini angu nderiasi ra, ’ba ngani yi ma e’yo ega dika ku; azini ma nga fe nabi pi orindi onzi pie ma fu angu nde ma aliasi ra.

3Eri nga eca ’dini, ’ba azinini nga ini kiri e’yo nabiru ondriria, eri ma ati pi andri be eri tipi ’diyi nga ’yo tinia, Mi ngani ovu idriru ku, mini e’yo inzoru ’diyi ’yole Yehova ma rusirisi. Ata pi andri be eri tipi ’diyi nga di eri so lekeke ra erini e’yo nabiru ondriria.

4Eri nga eca o’du ’dasi ’dini, nabi dria nga ovu drinzasi, ’ba dria alu alu ndreta yini ndrelerisi, erini e’yo nabiru ondriria; yi ngani bongo ’beza anyapa ’bikoruri su ’ba ma dri icizu ani ku,

5te eri nga ’yo, Ma ovuni nabini ku, ma ’ba amvuni; mani ovule ati’boru engazu gbu mvaasirisi.

6’Ba alu nga ’yo tinia, Nyibileko mi dri eselia ’diyi ngonini ya? Eri di nga e’yo omvi, ’Diyi ndra bani ma cozu mani ovuria ma agyi vile joa ’diyi.

7Mi oru o’duarisi, sei la, ’ba mani kabilo ocepiri ma ruaa, azini ’ba ovupi ma agyiruri ma ruaa, Yehova asikari ongulumuruni ’yo ra. Mi ’di ’ba kabilo ocepiri, te kabilo yi nga ovu erezaru; ma nga ma dri oja kabilo nyiri nyiri ’diyi ma ruaa.

8Eri nga eca ’dini, angu nde ma alia dria, Yehova ’yo ra, esele iri alenia ’diyi nga ovu lizaru, yi nga mira ra, te esele nari nga ace alenia ’dani.

9Te ma nga esele na nderi eji aci aliasi, ma nga yi rua ede kile yini dahabu edelerile, ma nga yi o’bi yini mele o’bilerile. Yi nga ma ru omve, ma nga yi ma o’duko eri ra. Ma nga ’yo, Yi ’ba mani; te yi alu alu nga ’yo ra, Yehovani Mungu mani.

← Chapter 12 Jump to: Chapter 14 →