Zechariah 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Malaika nde e’yo ’yopi ma beri nga emu dika, nga ma oro, kile ’ba ’bani orule o’duasirile.

2Eri nga ’yo ma tia, Mi ndre a’di afani ya? Ma ’yo, Ma ndre ra, mi ne, eri tala pati ruani dria meleru, kopo erini pie drinia, tala erini aziri ’diyi be; tala nde ’diyi ma baka ale be huru ’diyi aziri indi tala alu alu ovupi drinia ’diyi vusi.

3Azini mizeitu pati iri ageinia, alu kopo ma dri ndiria, aziniri eri ma dri ejiria.

4Ma nga e’yo omvi ’yo malaika e’yo ’yopi ma beri ma tia kini, Opi mani la! afa ’diyi a’di afani ya?

5Malaika nde e’yo ’yopi ma beri nga di e’yo omvi ’yo ma tia kini, Mi nini afa ’diyi a’di afani yari ku? Ma ’yo ra, Yo, opi mani.

6Eci nga di e’yo omvi ’yo ma tia kini, ’Diri e’yo Yehovani ’yole Zerubabeli ma tiari, kini: Asikari ma okposi ku, kani okpo ruanisi ku, te Orindi manisi, Yehova asikari ongulumuruniri ’yoni.

7Mi a’di’i ya, oni amboruri la? Mi nga mi oja angu senderu Zerubabeli ma drilia; azini eri nga oni drini ecipi tualuri eji oyuzu kini, Asi anzuru, asi anzuru eri vu!

8’Dinile vini indi e’yo Yehovani eca ma vu kini,

9Zerubabeli ma dri ’ba jo ’diri ma eti ’bo; eri ma drini nga eri denio Mi nga di ni ani kini Yehova asikari ongulumuruni epe ma ti mi vuni.

10A’di onzo ani o’du afa were ’diyinini ya? te yi nga ovu ayikosi, yi nga baka jo abi o’bizuri ndre Zerubabeli ma dria ra. Te afa teka aziri ’diyi yi mile Yehovani, onzupi ’dole ’dale wudrikuru dria ma eselia.

11Ma nga di e’yo omvi, ’yo tinia kini, Mizeitu pati iri tala pati ma kala dri ndiria azini dri ejiria ’diyi a’di afani ya?

12Te ma omvi e’yo tinia pale iririsi kini, Mizeitu pati arakala iri ovupi tala ma ti meleru ’diyi ma kalaa, odu meleru yi ma aliari osupi ’diyi a’di afani ya?

13Eri nga di e’yo omvi ma tia kini, Mi nini afa ’diyi a’di afani yari ku ya? Ma kini, Opimanila,maninikufo!

14Nga di ’yo ani, ’Diyi ’ba iri odu osuzu yi ma dria pa sopi Opi wudrikuruniri ma ageia ’diyi.

← Chapter 3 Jump to: Chapter 5 →