Zechariah 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Eri ece ma dri Yosua atalau, amboru edeta edepiri erini pa soria malaika Yehovani ma milia azini Satanini pa soria eri ma dri ndiria ovuzu eri ma ari’boru.

2Yehova nga ’yo Satani ma tia, Yehova ma ega mi dria, Satani la! E, Yehova Yerusalemuni pepi ’bori ma ega mi dria! ’Di ovuni eja veza ’bani enzele aciasiri ku ya?

3De Yosua su i ruaa bongo ondiruri’i, so pa malaika ma drilia.

4Te eri nga e’yo omvi, nga ’yo ’ba pa sopi eri ma drilia ’diyi ma tia kini, Emi otru bongo ondiru ’diyi eri ruaarisi ra. ’Yo eri ma tia, Mi lu, ma wu onzi mini mi vurisi ’bo, ma nga mi osu bongo aje be tu ’diyisi.

5Te ma nga ’yo ra, Yi ma su oku onyiruri eri ma dria indio ’Dini yi su oku onyiruri eri ma dria ra, su bongo eri ma ruaa indi; de malaika Yehovani so pa ageinia ogogo.

6Te malaika Yehovani nga e’yo azi Yosua tia kini,

7Yehova asikari ongulumuruniri ’yo ’dini: Mi ka nga aci ma vile geria ra, azini mi ka nga azita mani ma ta mba ra, mi di nga ma vile jo ma e’yo li, iriidri mani ma agei te indi, te ma nga mi dri pari fe fizu ’ba pa sopi ma ageia ’diyi ma eselia.

8Mi ma eri curu’do, Yosua atalau amboru edeta edepiri la! mi’i, agyi mini ripi mi drilia ’diyi be, yini ovule ’ba ecetaru ’diyi’irisi: te mi ndre, ma nga ati’bo mani omvele Pati Arakala’iri eji ra.

9Te mi ndre, oni mani ’bale Yosua ma driliari; oni alu ma dria mile aziri: mi lu, ma nga wura pa oni nde ma ruaa ma’i, Yehova asikari ongulumuruni ’yo ra, azini ma nga e’yo onzi angu nde ’darini wu o’du alu ma alia.

10Yehova asikari ongulumuruni kini, o’du nde ’dasi emi dria alu alu nga ’ba i vile jo ejeleari omve zabibu pati etia azini elio pati etia indi.

← Chapter 2 Jump to: Chapter 4 →