Zechariah 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Te ma enga vini ma mile uru dika, ma ndre, mi ne, enyiriko trale trari sa ’bua!

2Eri nga ’yo ma tia, Mi a’du ndre ya? ’Dini ma omvi kini, Ma enyiriko trale trari ndre saja ’bua; oconi wuale kali iri, walani wuale mudri.

3’Yo ma tia ’dini kini, ’Di trita efupi wudrikuru ma dri ’depi piri’i; ’dini enyiriko ma woko alurini ’yolerile ’ba dria alu alu ogu ogupiri nga dri jani, te woko azinirini ’yolerile ’ba dria alu alu oyo sopi nga dri jani.

4Ma nga eri ofu, Yehova asikari ongulumuruni ’yoni, eri nga di fi oguou nde ma joa, azini ’ba oyo sopi inzosi ma rusiri ma joa indi; eri nga te eri vile jo ma alia, nga eri oki, pati pie oni ruania ’diyi pie dria.

5Malaika o’yopi ma beri nga di fu mu, ’yo ma tia kini, Mi enga di mi mile uru curu’do, mi ndre afa i efupi ’diri a’duni yani.

6Ma ’yo kini, Eri a’dini ya? Azini eri ’yo kini, ’Diri imvu obiruni, eri efuni. Eri nga ’yo vini indi, ’Diri e’data yini angu dria ma alia.

7Azini mi lu, yi nga onzi ayaru obi ma ti opizuri ’du uru, de oku indi riria obi nde ma alia!

8Eri nga ’yo, ’Di E’yo Onzini. Nga di oku nde ’be obi alia ra, nga onzi ayaru obi ti opizuri ’be tinia ci.

9’Dini ma enga di ma mile uru, ma ndre, azini mi ne, oku iri efuni! Oli ovu yi ma opilia ci; curu’do isu de yi ovu opile be kile otonoko ma opilele; ’dini yi nga obi nde ’du uru nyaku pi ma esele ’bu beria.

10Ma zi di ani malaika e’yo ’yopi ma beri ma tia, ’Ba ’diyi obi ji ngoa ya?

11Eri ’yo ma tia, Jo sizu eri dri angu Sinariniria; ka si ’bo, yi nga eri ’ba ’dale eri ngulupi ma paria.

← Chapter 4 Jump to: Chapter 6 →