Revelation 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Oˇ ve awˬ hkʼaw‸ nawˉ, juˇ fuiˍ taˬ hta‸ shuˍ ve lo taˬ teˇ taˬ ngaˬ hta‸ pe‸ laˇ leh kʼoˆ laˇ ve, Tu loˬ. Gʼuiˬsha ve bon yehˬ lonˉ hta‸ maˇ kʼoˆ, tanˇ kuiˬ hta‸ maˇ kʼoˆ, oˇ kaˬ lo oˉ kʼoˍ pui ve chaw hui hta‸ maˇ kʼoˆ, tehˆ nyi-o.

2Ya‸ hkʼaˇ, bon yehˬ lonˉ awˬ baˬ hpawˇ lo cawˬ ve vanˇ hta‸ teh taˉ sheˍ. Oˇ ve hta‸ taˇ tehˆ nyi. Awˬ lawn kʼo, vanˇ oˇ ve buiˇ shaˆ aˉ naˆ chaw hui hta‸ chiˇ a‸ piˇ peuˬ leh, yawˇ hui lehˬ da‸ kehˬ ve venˇ hta‸ awˇ chi nyiˇ ha pa hkʼa gaˬ naˆ tiˍ taˍ tuˬ yoˬ.

3Ngaˬ ve shaˉ hkiˆ hkanˍ shehˍ hpaˇ nyiˇ gʼaˇ hta‸ ngaˬ kanˇ paˆ piˇ leh, yawˇ huiˉ maˬ lehˬ meh htuˉ pui hpa hta‸ veu‸ deh leh, teˇ hinˉ nyiˇ ha hkaw‸ chi nyi hkʼa gaˬ Gʼuiˬsha ve tawˇ hkawˇ maˍ piˇ tuˬ yoˬ teh‸ kʼoˆ ve yoˬ.

4Yawˇ huiˉ maˬ lehˬ, miˬguiˬ ve Awˬ shehˍ hpaˇ mehˆ gʼuˇ suhˍ lo cawˬ taˍ ve shaˍlonˍ cehˬ nyiˇ cehˬ hpeh‸ leh, kawˆ faiˇ nyiˇ maˬ hpeh‸ ve yoˬ.

5Chaw teˇ gʼaˇ gʼaˇ yawˇ huiˉ maˬ hta‸ naˬ tuˬ te gaˇ ve kʼo, yawˇ huiˉ maˬ ve maw‸ kʼaw awˬ hkʼaw lo aˬ miˍ tawˆ la leh, canˇ paˍ teˇ hpaˍ hta‸ to‸ baˬ tuˬ yoˬ. Chaw teˇ gʼaˇ gʼaˇ yawˇ huiˉ maˬ hta‸ naˬ tuˬ te gaˇ ve kʼo, oˇ hkʼe gʼa suh tuˬ yoˬ.

6Yawˇ huiˉ maˬ lehˬ, Gʼuiˬsha ve tawˇ hkawˇ maˍ chehˇ ve awˬ yanˇ awˬ hkʼaw lo, mvuhˇ yeˬ maˇ laˬ tuˬ mvuhˇ naw ma hta‸ hoˆ taˍ tuˬ ve kanˇ paˆ cawˬ ve yoˬ. Iˉ kaˆ teˇ hpaˍ hta‸ awˬ suhˍ hpeh‸ la piˇ lawˬ tuˬ ka‸ kanˇ paˆ cawˬ ve yoˬ. Yawˇ huiˉ maˬ hkʼaˬ nyiˇ pawˆ te gaˇ ve ka‸, fawˉ mehˍ tuˬ ve teˇ ceuˬ le le miˬguiˬ hkʼoˆ gaˬ la piˇ tuˬ ve htawˇ kanˇ paˆ cawˬ ve yoˬ.

7Yawˇ huiˉ maˬ shaˉ hkiˆ hkanˍ peuˬ hkʼaw‸ nawˉ, leh kuiˬ maˇ cawˬ ve miˬ kʼoˍ awˬ hkʼaw lo tawˆ la ve haiˬ ve to nuˇ to shaˆ lehˬ, yawˇ huiˉ maˬ hta‸ bawˆ da‸ tuˬ yoˬ. Bawˆ da‸ ve teˇ yanˇ, yawˇ huiˉ maˬ hta‸ gʼaˇ leh tiˇ pehˍ tuˬ yoˬ.

8Yawˇ huiˉ maˬ ve awˬ to hta‸ venˇ lonˉ ve ya‸ kʼaw hpuiˇ lo teh taˍ tuˬ yoˬ. Venˇ oˇ ve lehˬ, yawˇ huiˉ maˬ ve Awˬ shehˍ hpaˇ la‸ ka hkʼoˆ lo hkanˍ suh kuiˬ venˇ hpeh‸ leh, tawˇ veˆ yehˇ kʼo, Sawˉdonˍ leh Eˇjiˇtu‸ teh‸ kʼoˆ ve yoˬ.

9Oˇ htaˇ, chaw ceuˬ teˇ hpaˍ awˬ hkʼaw lo maˇ kʼoˆ, awˬ ceuˬ awˬ hkʼaˇ awˬ hkʼaw lo maˇ kʼoˆ, tawˇ hkawˇ laiˉ ceuˬ yaw ve chaw ceuˬ teˇ hpaˍ awˬ hkʼaw lo maˇ kʼoˆ, mvuhˇmiˬ teˇ hpaˍ awˬ hkʼaw lo maˇ kʼoˆ, chaw chi teˇ hpaˍ lehˬ, shehˆ nyi teˇ sha gʼuˇ hkʼa gaˬ yawˇ huiˉ maˬ ve awˬ to hta‸ hpoˆ nyi tuˬ yoˬ. Yawˇ huiˉ maˬ hta‸ shu ca tuˍ piˇ tuˬ yawˇ hui tawˍ taˍ tuˬ yoˬ.

10Miˬguiˬ hkʼoˆ lo chehˇ ve chaw teˇ hpaˍ lehˬ, yawˇ huiˉ maˬ suh ve pa taw ha lehˬ jaˇ leh, ha lehˬ ha kʼa te tuˬ yoˬ. Yawˇ hui teˇ gʼaˇ leh teˇ gʼaˇ la‸ shawnˍ piˇ da‸ tuˬ yoˬ. Awˬ lawn kʼo, Gʼuiˬsha ve tcuh kaˍ paˍ oˇ ve nyiˇ gʼaˇ lehˬ, miˬguiˬ hkʼoˆ lo chehˇ ve chaw teˇ hpaˍ hta‸ nyi ma sho‸ sha‸ jaˇ tuˬ te piˇ peuˬ.

11Shehˆ nyi teˇ sha gʼuˇ ponˬ peuˬ hkʼaw‸ nawˉ, Gʼuiˬsha awˬ hkʼaw lo tawˆ la ve a sha‸ te‸ piˇ lawˬ ve awˬ shaˉ yawˇ huiˉ maˬ awˬ hkʼaw lo lo‸-e leh, yawˇ huiˉ maˬ tu huˉ ve yoˬ. Yawˇ huiˉ maˬ hta‸ gʼa mawˬ ve chaw hui lehˬ, kawˆ jaˇ ve yoˬ.

12Oˇ htaˇ, mvuhˇ naw ma lo awˬ hkawˇ bvuhˬ la leh kʼoˆ ve, Choˬ kaˬ lo taˆ la-o teh‸ yawˇ huiˉ maˬ hta‸ kʼoˆ piˇ ve awˬ hkawˇ hta‸ yawˇ huiˉ maˬ gʼa kaˇ ve yoˬ. Yawˇ huiˉ maˬ ve canˇ paˍ teˇ hpaˍ mehˆ gʼuˇ suhˍ moˬ awˬ hkʼaw lo yawˇ huiˉ maˬ mvuhˇ naw ma hkʼoˆ lo taˆ-e ve yoˬ.

13Awˬ yanˇ oˇ ve awˬ hkʼaw lo miˬ hiˆ jaˇ leh, venˇ oˇ ve teˇ chi pun teˇ pun paˆ ce ve yoˬ. Miˬ hiˆ ve oˇ ve awˬ hkʼaw lo chaw suhˍ hinˉ gʼaˇ suh ve yoˬ. Cawˬ taˍ sheˍ ve chaw teˇ hpaˍ kawˆ jaˇ leh mvuhˇ naw ma ve Gʼuiˬ sha hta‸ chiˇ uiˍ chiˇ mvuh piˇ ve yoˬ.

14Dawˇ haˍ tuˬ uiˍ jaˇ ve nyiˇ ceuˬ teˇ ceuˬ lehˬ peuˬ ve yoˬ. Nyi loˬ, dawˇ haˍ tuˬ uiˍ jaˇ ve shehˆ ceuˬ teˇ ceuˬ haˆ haˆ gaˬ la tuˬ yoˬ.

15Oˇ htaˇ, mvuhˇ naw ma tcuh yaˇ suhˍ gʼaˇ teˇ gʼaˇ behˬ heh ma meuˆ ve teˇ yanˇ, mvuhˇ naw ma hkʼoˆ lo bvuhˬ jaˇ ve awˬ hkawˇ teˇ hpaˍ tawˆ la leh kʼoˆ ve, Miˬguiˬ ve mvuhˇ miˬ lehˬ, ngaˬ hui ve Jawˇmawˇ Gʼuiˬsha ve mvuhˇmiˬ leh yawˇ ve Hkri‸ ve mvuhˇ miˬ hpeh‸ la peuˬ. Yawˇ lehˬ co co taiˍ taiˍ uˉ peunˍ tuˬ yoˬ teh‸ kʼoˆ ve yoˬ.

16Oˇ htaˇ, Gʼuiˬsha mehˆ gʼuˇ suhˍ a shu yawˇ ve kʼaw jaw hkʼoˆ mui chehˇ ve chaw mawˇ chaw kehˉ nyiˇ chi awˇ gʼaˇ mehˆ hpfuhˇ miˬ chaˇ hkʼoˆ boˆ taˍ leh Gʼuiˬ sha hta‸ oˉ kʼoˍ pui leh kʼoˆ ve,

17Ponˬ laˬ htaˇ ka‸, chi beu‸ ka‸ te‸ chehˇ taˍ ve, kanˇ paˆ hkʼa biˇ cawˬ ve Jawˇmawˇ Gʼuiˬsha-oˬ, nawˬ lehˬ uiˍ jaˇ ve kanˇ paˆ hta‸ yuˬ leh chi beu‸ uˉ peunˍ ve pa taw, nawˬ ve bon hta‸ ngaˬ hui chiˇ mvuh ve yoˬ.

18Mvuhˇmiˬ teˇ hpaˍ nyi ma zuhˆ jaˇ leh, nawˬ htawˇ nyi ma zuhˆ la peuˬ. Suh taˍ peuˬ ve chaw teˇ hpaˍ hta‸ suhˉ jehˬ tuˬ awˬ yanˇ gaˬ la peuˬ. Nawˬ ve awˬ ceˬ hpeh‸ ve tcuh kaˍ paˍ teˇ hpaˍ hta‸ maˇ kʼoˆ, Hkri‸ yaˇ teˇ hpaˍ hta‸ maˇ kʼoˆ, nawˬ ve awˬ meh hta‸ yawˆ yan ve, uiˍ ve i ve chaw hkʼa peu-eˬ hta‸ maˇ kʼoˆ, awˬ bon piˇ tuˬ awˬ yanˇ gaˬ la peuˬ. Miˬguiˬ hta‸ te luˬ ve chaw teˇ hpaˍ hta‸ te luˬ piˇ tuˬ ka‸ awˬ yanˇ gaˬ la peuˬ, teh‸ kʼoˆ ve yoˬ.

19Oˇ htaˇ, mvuhˇ naw ma lo Gʼuiˬsha ve bon yehˬ lonˉ hpaw sheˬ leh, bon yehˬ lonˉ awˬ hkʼaw lo yawˇ ve ka ti‸ shaˉ caˆ ta kʼoˍ htaˬ gʼa mawˬ ve yoˬ. Oˇ htaˇ, mvuhˇ tiˉ po-e‸ ba ve, awˬ hkawˇ laiˉ ceuˬ bvuhˬ ve, mvuhˇ tawˍ ve, miˬ hiˆ ve leh vaˇ shiˍ gʼaˇ hte‸ kʼa ve, chi teˇ hpaˍ hpeh‸ la ve yoˬ.

← Chapter 10 Jump to: Chapter 12 →