Revelation 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Yinˉ tcuhˉ taˍ ve suhˍ maˬ teˇ maˬ hta‸ Yawˬ ehˉ hpaw ve teˇ yanˇ, naˍ riˍ teˇ hkawehˇ hkʼe mvuhˇ naw ma hkʼoˆ lo ta‸ iˉ gawˬ lehˍ hpeh‸ sheˬ ve yoˬ.

2Oˇ htaˇ, Gʼuiˬsha mehˆ gʼuˇ suhˍ huˉ chehˇ ve mvuhˇ naw ma tcuh yaˇ suhˍ gʼaˇ hta‸ ngaˬ gʼa mawˬ ve yoˬ. Yawˇ hui hta‸ behˬ heh ma suhˍ maˬ piˇ ve yoˬ.

3Shi mu‸ hkʼu shi taˍ ve, awˬ kaˍ awˬ nu mvuhˇ naw ma tcuh yaˇ teˇ gʼaˇ laˬ leh, tanˇ kuiˬ awˬ paˇ lo huˉ taˍ ve yoˬ. Kʼaw jaw awˬ gʼuˇ suhˍ cawˬ taˍ ve shi te taˍ ve tanˇ kuiˬ awˬ hkʼoˆ lo, Hkri‸ yaˇ hkʼa peu-eˬ ve bon lawˬ hkawˇ geh teˇ geh tanˇ piˇ tuˬ, sha hawnˉ ve maˇ maˇ yawˇ hta‸ piˇ ve yoˬ.

4Oˇ htaˇ, mvuhˇ naw ma tcuh yaˇ ve la‸ sheh awˬ hkʼaw lo cawˬ ve sha hawnˉ ve mvuhˇ hkʼawˇ lehˬ, Hkri‸ yaˇ hui ve bon lawˬ hkawˇ geh teˇ geh Gʼuiˬsha mehˆ gʼuˇ suhˍ taˆ-e ve yoˬ.

5Mvuhˇ naw ma tcuh yaˇ oˇ ve lehˬ, mu‸ hkʼu oˇ ve hta‸ yuˬ leh, tanˇ kuiˬ lo cawˬ ve aˬ miˍ hkʼa biˇ keu peuˬ hkʼaw‸ nawˉ, miˬguiˬ hkʼoˆ lo baˬ keu ve yoˬ. Oˇ htaˇ, mvuhˇ tawˍ tawˍ ve, awˬ hkawˇ laiˉ ceuˬ bvuhˬ ve, mvuhˇ tiˉ po-e‸ ba ve leh, miˬ hiˆ ve, chi teˇ hpaˍ hpeh‸ la ve yoˬ.

6Behˬ heh ma suhˍ maˬ cawˬ ve mvuhˇ naw ma tcuh yaˇ suhˍ gʼaˇ lehˬ, behˬ heh ma meuˆ tuˬ gu taˍ ve yoˬ.

7Awˉ lawˉ peuˇ ve mvuhˇ naw ma tcuh yaˇ teˇ gʼaˇ behˬ heh ma meuˆ ve teˇ yanˇ, awˬ suhˍ hkaw‸ da‸ taˍ ve vaˇ shiˍ leh aˬ miˍ, miˬ guiˬ hkʼoˆ lo ce la ve yoˬ. Miˬguiˬ shehˆ pun teˇ pun hta‸ maˇ kʼoˆ, suhˆ cehˬ shehˆ pun teˇ pun hta‸ maˇ kʼoˆ, nawˉ-ehˍ ve mvuh‸ hkʼa peu-eˬ hta‸ maˇ kʼoˆ, aˬ miˍ to‸ baˬ ve yoˬ.

8Mvuhˇ naw ma tcuh yaˇ nyiˇ gʼaˇ teˇ gʼaˇ behˬ heh ma meuˆ ve teˇ yanˇ, aˬ miˍ to‸ chehˇ ve hkʼaw pui lonˉ hta‸ shuˍ ve awˬ ceuˬ hta‸ laˇ tsuhˇ gʼuiˬ awˬ hkʼaw lo baˬ keu ve yoˬ. Laˇ tsuhˇ gʼuiˬ shehˆ pun teˇ pun lehˬ, awˬ suhˍ hpeh‸ la ve yoˬ.

9Laˇ tsuhˇ gʼuiˬ awˬ hkʼaw lo cawˬ ve te‸ chehˇ ve awˬ ceuˬ shehˆ pun teˇ pun suh ve yoˬ. Haw lo‸ kʼoˍ teˇ hpaˍ htawˇ, shehˆ pun teˇ pun luˬ kʼai ve yoˬ.

10Mvuhˇ naw ma tcuh yaˇ shehˆ gʼaˇ teˇ gʼaˇ behˬ heh ma meuˆ ve teˇ yanˇ, aˬ miˍ tuˉ taˍ ve hkʼa shuˍ shuˍ to‸ chehˇ ve meu‸ keu shiˍ lonˉ teˇ shiˍ mvuhˇ naw ma hkʼoˆ lo ce la leh, iˉ kaˆ lawˬ shehˆ pun teˇ pun awˬ hkʼoˆ hta‸ maˇ kʼoˆ, gʼuiˬ tuˇ teˇ hpaˍ awˬ hkʼoˆ hta‸ maˇ kʼoˆ, ce la ve yoˬ.

11Meu‸ keu shiˍ oˇ ve lehˬ, Hkʼaˇ ve suhˆ meh ve yoˬ. Iˉ kaˆ shehˆ pun teˇ pun lehˬ, hkʼaˇ ve suhˆ awˬ gʼuiˬ hpeh‸ la leh, iˉ kaˆ hkʼaˇ jaˇ ve pa taw, chaw maˇ maˇ suh ve yoˬ.

12Mvuhˇ naw ma tcuh yaˇ awˇ gʼaˇ teˇ gʼaˇ behˬ heh ma meuˆ ve teˇ yanˇ, mvuhˇ nyi shehˆ pun teˇ pun, ha pa shehˆ pun teˇ pun leh, meu‸ keu shiˍ teˇ hpaˍ shehˆ pun teˇ pun luˬ kʼai ve pa taw, yawˇ hui ve awˬ gʼeuˆ shehˆ pun teˇ pun naˆ ho‸ kʼai ve yoˬ. Mvuhˇ law‸ kʼaw shehˆ pun teˇ pun awˬ gʼeuˆ maˇ ba leh, mvuhˇ hpeu‸ shehˆ pun teˇ pun htawˇ oˇ ve hkʼa shuˍ shuˍ awˬ gʼeuˆ maˇ ba ve yoˬ.

13Oˇ htaˇ ngaˬ nyi leh, mvuhˇ naw ma awˬ kʼaw ji lo aˉ ceˬ lonˉ teˇ hkeh poˬ chehˇ ve yoˬ. Yawˇ awˬ hkawˇ bvuhˬ chaweh kuˬ leh kʼoˆ ve, Cawˬ taˍ sheˍ ve mvuhˇ naw ma tcuh yaˇ shehˆ gʼaˇ behˬ heh ma meuˆ tuˬ ve awˬ hkawˇ hta‸ pa taw, miˬguiˬ hkʼoˆ lo chehˇ ve chaw teˇ hpaˍ gʼa dawˇ haˍ jaˇ tuˬ yoˬ, gʼa dawˇ haˍ jaˇ tuˬ yoˬ, gʼa dawˇ haˍ jaˇ tuˬ yoˬ teh‸ kʼoˆ ve hta‸ ngaˬ gʼa kaˇ ve yoˬ.

← Chapter 7 Jump to: Chapter 9 →