Revelation 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Oˇ ve awˬ hkʼaw‸ nawˉ, miˬguiˬ awˇ ceˍ lo mvuhˇ naw ma tcuh yaˇ awˇ gʼaˇ huˉ chehˇ ve hta‸ ngaˬ gʼa mawˬ ve yoˬ. Yawˇ hui lehˬ, miˬguiˬ hkʼoˆ lo maˇ kʼoˆ, laˇ tsuhˇ gʼuiˬ hkʼoˆ lo maˇ kʼoˆ, suhˆ cehˬ hkʼa peu-eˬ hta‸ maˇ kʼoˆ, mvuhˇ haw maˇ gʼa meuˆ tuˬ miˬguiˬ awˇ ceˍ awˍ hpawˇ lo ve mvuhˇ haw teˇ hpaˍ hta‸ vawˆ tiˍ taˍ ve yoˬ.

2Oˇ htaˇ, awˬ kaˍ awˬ nu mvuhˇ naw ma tcuh yaˇ teˇ gʼaˇ hta‸ ngaˬ gʼa mawˬ ve yoˬ. Yawˇ lehˬ, mvuhˇ nyi tawˆ kuiˬ lo taˆ la leh, te‸ chehˇ ve Gʼuiˬsha ve yinˉ cawˬ taˍ ve yoˬ. Miˬguiˬ leh laˇ tsuhˇ gʼuiˬ hta‸ fawˉ mehˍ tuˬ kanˇ paˆ gʼa taˍ ve mvuhˇ naw ma tcuh yaˇ awˇ gʼaˇ hta‸ yawˇ awˬ hkawˇ bvuhˬ chaweh kuˬ leh kʼoˆ piˇ ve,

3Ngaˬ hui ve Gʼuiˬsha ve awˬ ceˬ teˇ hpaˍ hta‸ naˍ kʼaˍ pui hkʼoˆ lo yinˉ maˇ tcuhˉ piˇ sheˍ ve ceh ceh, miˬguiˬ hta‸ maˇ kʼoˆ, laˇ tsuhˇ gʼuiˬ hta‸ maˇ kʼoˆ, suhˆ cehˬ teˇ hpaˍ hta‸ maˇ kʼoˆ, taˇ fawˉ mehˍ sheˍ teh‸ kʼoˆ piˇ ve yoˬ.

4Yinˉ tcuhˉ taˍ ve chaw hkʼaˬ nyiˇ gʼaˇ cawˬ ve awˬ lawn ngaˬ gʼa kaˇ ve yoˬ. Iˉsaˍreˍlaˆ ve awˬ ceuˬ awˬ hkʼaˇ hkʼa peu-eˬ awˬ hkʼaw lo yinˉ tcuhˉ taˍ ve chaw teˇ shehnˉ awˇ meunˍ awˇ hinˉ gʼaˇ cawˬ ve yoˬ.

5Yuˇda‸ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Ruˇbenˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Gaˆ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ,

6Aˍshaˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Naˍtaˍliˆ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Maˍnaˍseˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ,

7Suˉmonˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Leˍviˆ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Iˉsaˍhkaˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ,

8Zaˍbuˆlonˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Yoˇseh‸ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, Beˍyaˍmenˍ awˬ ceuˬ awˬ hkʼaˇ awˬ hkʼaw lo teˇ meunˍ nyiˇ hinˉ, chaw chi ma ve hta‸ yinˉ tcuhˉ taˍ peuˬ ve yoˬ.

9Oˇ ve awˬ hkʼaw‸ nawˉ ngaˬ nyi leh, mvuhˇ miˬ teˇ peˆ le le awˬ hkʼaw lo maˇ kʼoˆ, awˬ ceuˬ awˬ hkʼaˇ teˇ ceuˬ le le awˬ hkʼaw lo maˇ kʼoˆ, chaw teˇ ceuˬ le le awˬ hkʼaw lo maˇ kʼoˆ, tawˇ hkawˇ teˇ ceuˬ le le awˬ hkʼaw lo maˇ kʼoˆ, chaw teˇ gʼaˇ ka‸ gʼaw maˇ gʼa ve chaw awˬ moˍ lonˉ hta‸ ngaˬ gʼa mawˬ ve yoˬ. Yawˇ hui lehˬ, hpuˉ-ehˍ ve aˉ po‸ zuhˬ ma hta‸ veu‸ deh leh, a shu yawˇ ve la‸ sheh hkʼaw lo tcuhˉ pui meuˇ awˬ kʼaˉ teˇ hpaˍ hta‸ vawˆ taˍ leh, kʼaw jaw awˬ gʼuˇ suhˍ leh Yawˬ ehˉ mehˆ gʼuˇ suhˍ huˉ chehˇ taˍ ve yoˬ.

10Yawˇ hui awˬ hkawˇ bvuhˬ chaweh kuˬ leh kʼoˆ ve, Kʼaw jaw hkʼoˆ lo mui chehˇ ve ngaˬ hui ve Gʼuiˬsha leh Yawˬ ehˉ hta‸ pa taw, htaiˍ hkʼaw‸ ve hta‸ gʼa ve yoˬ teh‸ kʼoˆ ve yoˬ.

11Mvuhˇ naw ma tcuh yaˇ hkʼa peu-eˬ lehˬ, kʼaw jaw hta‸ maˇ kʼoˆ, chaw mawˇ chaw kehˉ teˇ hpaˍ hta‸ maˇ kʼoˆ, a sha‸ te‸ chehˇ ve awˬ ceuˬ awˇ hkeh hta‸ maˇ kʼoˆ, hkʼa caw zuhˇ huˉ taˍ ve yoˬ. Oˇ htaˇ, kʼaw jaw awˬ gʼuˇ suhˍ yawˇ hui boˆ taˍ leh Gʼuiˬsha hta‸ oˉ kʼoˍ pui ve yoˬ.

12Yawˇ hui kʼoˆ ve, A menˬ. Chiˇ mvuh ve teˇ ceuˬ, awˬ me‸ awˬ hponˇ teˇ ceuˬ, cuˇ yiˍ maˍ yiˍ teˇ ceuˬ, yawˇ ve bon hta‸ chiˇ mvuh ve teˇ ceuˬ, yawˆ yan ve teˇ ceuˬ, kanˇ paˆ teˇ ceuˬ leh awˬ gʼaˇ uiˍ ve teˇ ceuˬ ngaˬ hui ve Gʼuiˬsha hta‸ co co taiˍ taiˍ cawˬ piˇ-oˆ. A menˬ teh‸ kʼoˆ ve yoˬ.

13Oˇ htaˇ, chaw mawˇ chaw kehˉ teˇ hpaˍ awˬ hkʼaw lo teˇ gʼaˇ ngaˬ hta‸ kʼoˆ laˇ ve, Hpuˉ-ehˍ ve aˉ po‸ zuhˬ ma hta‸ veu‸ deh ve chaw chi teˇ hpaˍ a shu le. Yawˇ hui hkʼaˬ lo laˬ ve le teh‸ na nyi laˇ ve yoˬ.

14Jawˇmawˇ-oˬ, nawˬ shiˍ ve yoˬ teh‸ ngaˬ yawˇ hta‸ kʼaw‸ kʼoˆ piˇ ve yoˬ. Oˇ htaˇ yawˇ kʼoˆ ve, Chaw chi teˇ hpaˍ lehˬ, uiˍ jaˇ ve tu‸ ve hkanˍ ve awˬ hkʼaw lo tawˆ la leh, a shu yawˇ ve aˉ po‸ zuhˬ ma hta‸ Yawˬ ehˉ ve awˬ suhˍ awˬ hkʼaw lo tsuhˇ hpu taˍ peuˬ ve chaw hui hpeh‸ ve yoˬ.

15Hkʼe te leh yawˇ hui lehˬ, Gʼuiˬsha ve kʼaw jaw awˬ gʼuˇ suhˍ chehˇ taˍ leh, yawˇ ve bon yehˬ lonˉ awˬ hkʼaw lo tanˇ hkuinˇ tanˇ vanˇ yawˇ ve kanˉ hta‸ te chehˇ ve yoˬ. Kʼaw jaw hkʼoˆ lo mui shehˍ hpaˇ lehˬ, yawˇ hui geh chehˇ leh yawˇ hui hta‸ ha‸ shaˉ tuˬ yoˬ.

16Yawˇ hui lehˬ, awˬ hkʼaw‸ nawˉ awˍ maˇ kʼaw‸ meu‸ leh, iˉ kaˆ maˇ kʼaw‸ shiˉ-o. Mvuhˇ cha chiˆ ve hta‸ maˇ kʼoˆ, awˬ kaˍ awˬ nu haw ve chiˆ ve hkʼaˬ ve teˇ ceuˬ hta‸ maˇ kʼoˆ, yawˇ hui maˇ kʼaw‸ gʼa hkanˍ-o.

17Awˬ lawn kʼo, kʼaw jaw awˬ kʼaw ji lo chehˇ taˍ ve Yawˬ ehˉ lehˬ, yawˬ hawˉ ve hkʼa shuˍ shuˍ yawˇ hui hta‸ yawˬ hawˉ shehˍ hpaˇ hpeh‸ tuˬ yoˬ. Yawˇ lehˬ, co ha te‸ piˇ lawˬ ve gʼuiˬ tuˇ teˇ hpaˍ lo yawˇ hui hta‸ sheh kʼai tuˬ yoˬ. Yawˇ hui ve mehˆ gʼuiˬ hkʼa peu-eˬ hta‸ Gʼuiˬsha shiˆ baˬ piˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

← Chapter 6 Jump to: Chapter 8 →