Revelation 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Oˇ htaˇ, laˇ tsuhˇ gʼuiˬ awˬ hkʼaw lo haiˬ ve to nuˇ to shaˆ teˇ hkeh tawˆ la ve hta‸ ngaˬ gʼa mawˬ ve yoˬ. Yawˇ lehˬ, awˬ hkaw teˇ chi maˬ cawˬ leh oˉ kʼoˍ suhˍ shiˍ cawˬ ve yoˬ. Awˬ hkaw teˇ hpaˍ hta‸ shi uˉ tcuhˍ teˇ chi shiˍ hkʼawˆ taˍ ve yoˬ. Gʼuiˬsha hta‸ maˇ shawˍ maˇ caˆ kʼoˆ ve awˬ meh teˇ hpaˍ, yawˇ ve oˉ kʼoˍ teˇ hpaˍ hta‸ bvuh‸ taˍ ve yoˬ.

2Ngaˬ gʼa mawˬ ve haiˬ ve to nuˇ to shaˆ oˇ ve lehˬ, laˇ ku-i hta‸ shuˍ ve yoˬ. Yawˇ ve hkui sheh lehˬ, yehˬ miˉ tawˍ hkui sheh hta‸ shuˍ leh, yawˇ ve maw‸ kʼaw lehˬ, laˇ caˬ shiˉ maw‸ kʼaw hta‸ shuˍ ve yoˬ. Cawˇ shehˍ ma lehˬ, haiˬ ve to nuˇ to shaˆ oˇ ve hta‸ kanˇ paˆ piˇ leh, yawˇ ve kʼaw jaw hkʼoˆ lo mui tcuh leh uˉ peunˍ tcuh ve yoˬ.

3Haiˬ ve to nuˇ to shaˆ ve oˉ kʼoˍ teˇ shiˍ lehˬ, suh law‸ law‸ dawˆ hkʼaw taˍ ve hta‸ ngaˬ gʼa mawˬ ve yoˬ. Ya‸ hkʼaˇ, naˬ kuiˬ awˬ hkʼaw oˇ ve kʼaw‸ na-e la leh, miˬ guiˬ yaˇ hkʼa peu-eˬ haiˬ ve to nuˇ to shaˆ oˇ ve hta‸ anˇ jaˇ leh awˬ hkʼaˇ suh kʼai ve yoˬ.

4Haiˬ ve to nuˇ to shaˆ hta‸ kanˇ paˆ piˇ shehˍ hpaˇ cawˇ shehˍ ma hta‸ yawˇ hui oˉ kʼoˍ pui ve yoˬ. Haiˬ ve to nuˇ to shaˆ hta‸ htawˇ yawˇ hui oˉ kʼoˍ pui leh kʼoˆ ve, Haiˬ ve to nuˇ to shaˆ chi hta‸ a shu shuˍ da‸ ve le. A shu yawˇ hta‸ bawˆ da‸ hpeh‸ tuˬ le teh‸ kʼoˆ ve yoˬ.

5Yawˇ hta‸ tawˇ uiˍ tawˇ mvuh yaw tcuh leh, Gʼuiˬsha hta‸ maˇ shawˍ maˇ caˆ kʼoˆ tcuh ve yoˬ. Awˇ chi nyiˇ ha pa hkʼa gaˬ kanˉ te tuˬ, yawˇ hta‸ a hkaw-anˬ piˇ ve yoˬ.

6Gʼuiˬsha hta‸ maˇ shawˍ maˇ caˆ kʼoˆ tuˬ, haiˬ ve to nuˇ to shaˆ yawˇ ve maw‸ kʼaw ngaˉ leh, Gʼuiˬsha ve awˬ meh hta‸ maˇ kʼoˆ, yawˇ ve chehˇ kuiˬ hta‸ maˇ kʼoˆ, mvuhˇ naw ma yaˇ hta‸ maˇ kʼoˆ, haiˬ ve to nuˇ to shaˆ oˇ ve maˇ shawˍ maˇ caˆ kʼoˆ ve yoˬ.

7Hkri‸ yaˇ hui hta‸ ma‸ bawˆ leh gʼaˇ hpeh‸ tuˬ, yawˇ a hkaw-anˬ gʼa ve yoˬ. Awˬ ceuˬ awˬ hkʼaˇ teˇ ceuˬ le le, chaw ceuˬ teˇ ceuˬ le le, tawˇ hkawˇ teˇ ceuˬ le le leh mvuhˇmiˬ teˇ peˆ le le awˬ hkʼoˆ hta‸ uˉ peunˍ tuˬ htawˇ a hkaw-anˬ gʼa ve yoˬ.

8Miˬguiˬ hta‸ te hpanˍ htaˇ ka‸ co ti‸ ha ti‸ li‸ awˬ hkʼaw lo awˬ meh maˇ bvuh‸ keu taˍ ve miˬguiˬ yaˇ hkʼa peu-eˬ lehˬ, haiˬ ve to nuˇ to shaˆ oˇ ve hta‸ oˉ kʼoˍ pui tuˬ yoˬ. Li‸ oˇ ve lehˬ, tiˇ pehˍ peuˬ ve Yawˬ ehˉ ve li‸ hpeh‸ ve yoˬ.

9Naˍ paw cawˬ ve chaw hkʼa deh‸ na-o.

10Shu hta‸ hpeh yuˬ ve chaw lehˬ, hpeh yuˬ ve hta‸ gʼa kʼaw‸ hkanˍ tuˬ yoˬ. Aˉ htaw yuˬ leh shu hta‸ chaw pehˍ ve chaw lehˬ, aˉ htaw hta‸ pa taw gʼa suh tuˬ yoˬ. Chi hkʼe te ve hta‸ pa taw, Hkri‸ yaˇ hui hkʼaˬ ma nyi ma yeˬ puiˉ leh hkʼaˬ ma yonˍ puiˉ ve tawˆ la ve yoˬ.

11Miˬguiˬ awˬ hkʼaw lo awˬ kaˍ awˬ nu haiˬ ve to nuˇ to shaˆ teˇ hkeh tawˆ la ve hta‸ ngaˬ gʼa mawˬ ve yoˬ. Yawˇ lehˬ yawˬ ehˉ ve awˬ hkaw hta‸ shuˍ ve awˬ hkaw nyiˇ maˬ cawˬ leh, cawˇ shehˍ ma tawˇ yaw ve hkʼa shuˍ shuˍ yawˇ tawˇ yaw ve yoˬ.

12Haiˬ ve to nuˇ to shaˆ chi teˇ hkeh lehˬ, awˉ lawˉ tawˆ la ve haiˬ ve to nuˇ to shaˆ teˇ hkeh ve kanˇ paˆ hkʼa peu-eˬ hta‸ yuˬ leh yawˇ mehˆ gʼuˇ suhˍ yehˇ ve yoˬ. Suh law‸ law‸ dawˆ hkʼaw taˍ ve naˬ kuiˬ awˬ hkʼaw na-e la peuˬ ve haiˬ ve to nuˇ to shaˆ awˉ lawˉ teˇ hkeh hta‸ miˬguiˬ leh miˬguiˬ hkʼoˆ hkʼa chehˇ ve chaw hui oˉ kʼoˍ pui tuˬ, haiˬ ve to nuˇ to shaˆ nyiˇ hkeh teˇ hkeh te ve yoˬ.

13Uiˍ ve awˬ heˆ teˇ hpaˍ hta‸ yawˇ te maˍ ve yoˬ. Hkʼaˬ hkʼe le teh‸ kʼoˆ kʼo, mvuhˇ naw ma lo te leh miˬ guiˬ hkʼoˆ hkʼa gaˬ, chaw yaˇ mehˆ gʼuˇ suhˍ yawˇ aˬ miˍ hta‸ ce la tcuh ve yoˬ.

14Haiˬ ve to nuˇ to shaˆ awˉ lawˉ teˇ hkeh mehˆ gʼuˇ suhˍ awˬ heˆ teˇ hpaˍ te maˍ tuˬ yawˇ a hkaw-anˬ gʼa taˍ ve hkʼe yawˇ te ve hta‸ pa taw, haiˬ ve to nuˇ to shaˆ nyiˇ hkeh teˇ hkeh lehˬ, miˬguiˬ hkʼoˆ hkʼa chehˇ ve chaw teˇ hpaˍ hta‸ heˍ yuˬ beˬ yuˬ ve yoˬ. Haiˬ ve to nuˇ to shaˆ awˉ lawˉ teˇ hkeh lehˬ, aˉ htaw chaw ve hta‸ gʼa hkanˍ peuˬ htawˇ te‸ chehˇ sheˍ ve yoˬ. Yawˇ ve shaˉ ho‸ hta‸ te tuˬ, miˬguiˬ hkʼoˆ chehˇ ve chaw teˇ hpaˍ hta‸ haiˬ ve to nuˇ to shaˆ nyiˇ hkeh teˇ hkeh kʼoˆ piˇ ve yoˬ.

15Haiˬ ve to nuˇ to shaˆ ve shaˉ ho‸ tawˇ yaw puiˉ tuˬ, shaˉ ho‸ oˇ ve hta‸ te‸ la piˇ hpeh‸ ve kanˇ paˆ hta‸ yawˇ gʼa ve yoˬ. Shaˉ ho‸ oˇ ve hta‸ oˉ kʼoˍ maˇ pui ve chaw teˇ hpaˍ hta‸ yawˇ tiˇ pehˍ tcuh ve yoˬ.

16Chaw uiˍ chaw i maˇ kʼoˆ, chaw paw chaw sha maˇ kʼoˆ, chaw haˍ chaw gʼawˇ maˇ kʼoˆ, ponˬ ve chaw maˇ kʼoˆ, awˬ ceˬ maˇ kʼoˆ, chaw hkʼa peu-eˬ ve la‸ sha paˉ la‸ sheh hta‸ maˇ heˆ kʼo naˍ kʼaˍ pui hta‸ maiˉ taˍ tuˬ, haiˬ ve to nuˇ to shaˆ oˇ ve teˇ hkeh hkanˍ yuˬ tcuh ve yoˬ.

17Awˬ maiˉ maˇ cawˬ ve chaw teˇ gʼaˇ ka‸, mawˇ maˇ gʼa vuiˬ maˇ gʼa hawˇ tuˬ yawˇ te ve yoˬ. Awˬ maiˉ oˇ ve lehˬ, haiˬ ve to nuˇ to shaˆ ve awˬ meh, maˇ heˆ kʼo yawˇ awˬ meh ve nanˍ ba‸ hta‸ kʼoˆ ve yoˬ.

18Chi awˬ hkʼaw lo cuˇ yiˍ gʼa hpeh‸ ve yoˬ. Dawˇ shiˍ puiˉ ve chaw lehˬ, haiˬ ve to nuˇ to shaˆ ve nanˍ ba‸ hta‸ gʼaw nyi shawˍ nyi tcuh-o. Yawˇ ve nanˍ ba‸ lehˬ, chaw teˇ gʼaˇ ve nanˍ ba‸ hpeh‸ leh, nanˍ ba‸ oˇ ve hkaw‸ ha hkaw‸ chi hkaw‸ yoˬ.

← Chapter 12 Jump to: Chapter 14 →