Revelation 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Mvuhˇ naw ma tcuh yaˇ ngaˇ gʼaˇ teˇ gʼaˇ behˬ heh ma meuˆ ve teˇ yanˇ, mvuhˇ naw ma lo te leh miˬguiˬ hkʼoˆ hkʼa gaˬ ce kʼai peuˬ ve meu‸ keu shiˍ teˇ shiˍ hta‸ ngaˬ gʼa mawˬ ve yoˬ. Leh kuiˬ maˇ cawˬ ve miˬ kʼoˍ ve shawˇ yawˇ hta‸ piˇ ve yoˬ.

2Oˇ htaˇ, leh kuiˬ maˇ cawˬ ve miˬ kʼoˍ oˇ ve hta‸ yawˇ hpaw ve yoˬ. Aˬ miˍ buiˬ hpfuh lonˉ ve mvuhˇ hkʼawˇ hkʼa shuˍ shuˍ, miˬ kʼoˍ oˇ ve awˬ hkʼaw lo mvuhˇ hkʼawˇ tawˆ la leh, miˬ kʼoˍ ve mvuhˇ hkʼawˇ hta‸ pa taw mvuhˇ nyi naˆ ho‸ hpeh‸ la leh, mvuhˇ haw awˬ hkʼaw lo htawˇ naˆ ho‸ hpeh‸ la ve yoˬ.

3Mvuhˇ hkʼawˇ oˇ ve awˬ hkʼaw lo paˉ ce‸ teˇ hpaˍ tawˆ la leh, miˬguiˬ hkʼoˆ lo ya‸ la ve yoˬ. Miˬguiˬ hkʼoˆ lo cawˬ ve aˉ ci ku taw‸ ma ve kanˇ paˆ hkʼa shuˍ shuˍ, yawˇ hui hta‸ kanˇ paˆ piˇ ve yoˬ.

4Miˬguiˬ hkʼoˆ lo cawˬ ve mvuh‸ hta‸ maˇ kʼoˆ, awˬ hpa‸ nawˉ lehˍ cawˬ ve hkʼa peu-eˬ hta‸ maˇ kʼoˆ, suhˆ cehˬ hkʼa peu-eˬ hta‸ maˇ kʼoˆ, maˇ gʼa te luˬ teh‸ yawˇ hui hta‸ tawˇ piˇ ve yoˬ. Naˍ kʼaˍ pui hta‸ Gʼuiˬsha ve yinˉ maˇ tcuhˉ taˍ ve chaw hui hta‸ ceh tiˉ gʼa te luˬ ve yoˬ teh‸ tawˇ piˇ ve yoˬ.

5Chaw yaˇ hui hta‸ tiˇ pehˍ tuˬ yawˇ hui a hkaw-anˬ maˇ gʼa. Ya‸ hkʼaˇ, ha pa ngaˇ maˬ hkʼa gaˬ fawˉ mehˍ piˇ tuˬ a hkaw-anˬ gʼa ve yoˬ. Yawˇ hui fawˉ mehˍ ve hta‸ gʼa hkanˍ ve lehˬ, aˉ ci ku taw‸ ma chaw hta‸ che‸ leh naˬ ve hkʼa shuˍ shuˍ, fawˉ mehˍ ve hta‸ gʼa hkanˍ ve yoˬ.

6Awˬ yanˇ oˇ ve awˬ hkʼaw lo, chaw yaˇ hui lehˬ suh ve teˇ ceuˬ hta‸ ca ve ka‸, ca maˇ mawˬ. Yawˇ hui suh gaˇ jaˇ ve htawˇ, suh ve teˇ ceuˬ yawˇ hui lo hpaw tawˆ-e tuˬ yoˬ.

7Paˉ ce‸ oˇ ve teˇ hpaˍ ve awˬ ho‸ awˬ han lehˬ, ma‸ bawˆ tuˬ awˬ pon gu taˍ ve iˉ mvuhˇ teˇ hpaˍ hta‸ shuˍ ve yoˬ. Shi uˉ tcuhˍ hta‸ shuˍ ve awˬ ceuˬ yawˇ hui ve oˉ kʼoˍ hta‸ hkʼawˆ taˍ ve yoˬ. Yawˇ hui ve mehˆ hpfuhˇ lehˬ, chaw yaˇ ve mehˆ hpfuhˇ hta‸ shuˍ ve yoˬ.

8Yawˇ hui ve uˉ hkeh mvuh lehˬ, yaˇ miˇ ve uˉ hkeh mvuh hta‸ shuˍ leh, yawˇ hui ve ciˬ lehˬ, laˇ caˬ shiˉ ve ciˬ hta‸ shuˍ ve yoˬ.

9Yawˇ hui ve nyi ma pui htanˬ tuˬ ve lehˬ, sho te taˍ ve nyi ma pui htanˬ tuˬ hta‸ shuˍ ve yoˬ. Yawˇ hui ve toˍ la‸ kʼuˉ awˬ hkawˇ bvuhˬ ve lehˬ, ma‸ bawˆ kuiˬ lo gʼaˇ hte‸ kʼai chehˇ ve iˉ mvuhˇ lawˬ maˇ jaˇ ve awˬ hkawˇ hta‸ shuˍ ve yoˬ.

10Yawˇ hui ve awˬ mehˍ tu lehˬ, aˉ ci ku taw‸ ma ve awˬ mehˍ tu hta‸ shuˍ leh, awˬ viˇ htawˇ cawˬ ve yoˬ. Chaw yaˇ hui hta‸ ha pa ngaˇ maˬ hkʼa gaˬ fawˉ mehˍ tuˬ, yawˇ hui ve awˬ mehˍ tu awˬ hkʼaw lo kanˇ paˆ cawˬ ve yoˬ.

11Yawˇ hui ve hkunˉ hawˉ hkanˇ lehˬ, leh kuiˬ maˇ cawˬ ve miˬ kʼoˍ ve tcuh yaˇ yoˬ. Yawˇ ve awˬ meh lehˬ, Heˍbrehˇ hkawˇ kʼo Aˍbaˍdonˍ, Heˍlaˍsaˆ hkawˇ kʼo Aˍpawˇliˍonˍteh‸ kʼoˆ ve yoˬ.

12Dawˇ haˍ tuˬ uiˍ jaˇ ve awˉ lawˉ peuˇ ve teˇ ceuˬ lehˬ peuˬ ve yoˬ. Nyi loˬ, dawˇ haˍ tuˬ uiˍ jaˇ ve nyiˇ ceuˬ kʼaw‸ laˬ tuˬ sheˍ ve yoˬ.

13Mvuhˇ naw ma tcuh yaˇ hkaw‸ gʼaˇ teˇ gʼaˇ behˬ heh ma meuˆ ve teˇ yanˇ, Gʼuiˬ sha mehˆ gʼuˇ suhˍ lo cawˬ ve shi te taˍ ve tanˇ kuiˬ ve awˬ hkaw awˍ lehˇ awˬ hkʼaw lo awˬ hkawˇ tawˆ la ve hta‸ ngaˬ gʼa kaˇ ve yoˬ.

14Awˬ hkawˇ oˇ ve lehˬ chi hkʼe kʼoˆ ve, Uˇhpaˍraˆ gʼuiˬ ma lonˉ awˬ paˇ lo hpeh tiˍ taˍ ve mvuhˇ naw ma tcuh yaˇ awˇ gʼaˇ hta‸ hpui hpehˇ-oˆ teh‸, behˬ heh ma cawˬ taˍ ve mvuhˇ naw ma tcuh yaˇ hkaw‸ gʼaˇ teˇ gʼaˇ hta‸ kʼoˆ piˇ ve yoˬ.

15Hkʼe te leh, chaw yaˇ shehˆ pun teˇ pun hta‸ tiˇ pehˍ tuˬ awˬ pon gu taˍ ve mvuhˇ naw ma tcuh yaˇ awˇ gʼaˇ hta‸ hpui hpehˇ piˇ ve yoˬ. Mvuhˇ naw ma tcuh yaˇ oˇ ve awˇ gʼaˇ lehˬ, naˍ riˍ, awˬ nyi, ha pa, awˬ hkʼaw‸, awˬ yanˇ chi awˬ pon Gʼuiˬsha yawˇ hui hta‸ gu taˍ ve yoˬ.

16Iˉ mvuhˇ ciˇ ve ma‸ yaˇ hkʼaˬ nyiˇ gʼaˇ cawˬ ve hta‸ ngaˬ gʼa kaˇ ve yoˬ. Yawˇ hui lehˬ, nyiˇ ha lanˬ cawˬ ve yoˬ.

17Ngaˬ gʼa mawˬ chehˇ ve awˬ ha awˬ hkʼaw lo, iˉ mvuhˇ teˇ hpaˍ leh ciˇ shehˍ hpaˇ teˇ hpaˍ hta‸ ngaˬ chi hkʼe gʼa mawˬ ve yoˬ. Ciˇ shehˍ hpaˇ teˇ hpaˍ veu‸ deh ve nyi ma pui htanˬ tuˬ lehˬ, aˬ miˍ hkʼe nyiˉ-ehˍ ve, naw hpui ve leh, ma‸ shiˉ hkʼe shiˉ-ehˍ cawˬ ve yoˬ. Iˉ mvuhˇ teˇ hpaˍ ve oˉ kʼoˍ lehˬ, laˇ caˬ shiˉ ve oˉ kʼoˍ hta‸ shuˍ leh, yawˇ hui ve maw‸ kʼaw awˬ hkʼaw lo aˬ miˍ ha, aˬ miˍ mvuhˇ hkʼawˇ leh ma‸ shiˉ tawˆ la chehˇ ve yoˬ.

18Yawˇ hui ve maw‸ kʼaw awˬ hkʼaw lo tawˆ la ve aˬ miˍ ha, aˬ miˍ mvuhˇ hkʼawˇ leh ma‸ shiˉ, fawˉ mehˍ ve chi shehˆ ceuˬ hta‸ pa taw, chaw yaˇ shehˆ pun teˇ pun gʼa suh ve yoˬ.

19Awˬ lawn kʼo, iˉ mvuhˇ teˇ hpaˍ ve kanˇ paˆ lehˬ, yawˇ hui ve maw‸ kʼaw awˬ hkʼaw leh awˬ mehˍ tu awˬ hkʼaw lo cawˬ ve yoˬ. Yawˇ hui ve awˬ mehˍ tu lehˬ, vuiˬ hta‸ shuˍ leh oˉ kʼoˍ ka‸ cawˬ ve yoˬ. Shu hta‸ te naˬ piˇ tuˬ, oˉ kʼoˍ oˇ ve hta‸ yawˇ hui yehˇ ve yoˬ.

20Fawˉ mehˍ ve oˇ ve shehˆ ceuˬ hta‸ pa taw maˇ gʼa suh leh cawˬ taˍ sheˍ ve chaw teˇ hpaˍ lehˬ, a shu yawˇ la‸ sheh te taˍ ve kanˉ teˇ hpaˍ hta‸ maˇ dawˇ hpfuhˆ. Neˇ teˇ hpaˍ hta‸ oˉ kʼoˍ pui ve teˇ ceuˬ hta‸ maˇ kʼoˆ, shi, hpu, kuiˇ, haˉ pui leh suhˆ te taˍ ve shaˉ ho‸ teˇ hpaˍ hta‸ oˉ kʼoˍ pui ve teˇ ceuˬ hta‸ maˇ kʼoˆ, yawˇ hui maˇ baˬ taˉ. Shaˉ ho‸ oˇ ve teˇ hpaˍ lehˬ, maˇ mawˬ puiˉ, maˇ kaˇ puiˉ, ya‸ kʼaw maˇ toˇ puiˉ ve yoˬ.

21Chaw oˇ ve teˇ hpaˍ lehˬ, shu hta‸ tiˇ pehˍ ve maˇ kʼoˆ, neˇ te ve maˇ kʼoˆ, haˉ chawˇ haˉ paˆ te ve maˇ kʼoˆ, shu ve mawˇ hta‸ hkʼawˇ ve maˇ kʼoˆ, chi teˇ hpaˍ hta‸ htawˇ yawˇ hui maˇ dawˇ hpfuhˆ.

← Chapter 8 Jump to: Chapter 10 →