Revelation 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Oˇ ve awˬ hkʼaw‸ nawˉ, mvuhˇ naw ma lo anˇ tuˬ uiˍ jaˇ ve awˬ kaˍ awˬ nu ve awˬ heˆ teˇ maˬ hta‸ ngaˬ gʼa mawˬ ve yoˬ. Awˬ heˆ oˇ ve lehˬ, fawˉ mehˍ ve suhˍ ceuˬ cawˬ ve mvuhˇ naw ma tcuh yaˇ suhˍ gʼaˇ hpeh‸ ve yoˬ. Fawˉ mehˍ ve oˇ ve teˇ hpaˍ lehˬ, awˬ leh meuˇ ve fawˉ mehˍ ve teˇ hpaˍ hpeh‸ ve yoˬ. Awˬ lawn kʼo, oˇ ve teˇ hpaˍ awˬ hkʼaw lo Gʼuiˬsha nyi ma zuhˆ ve teˇ ceuˬ peu-eˬ ve yoˬ.

2Peuˬ leh, aˬ miˍ leh mehˆ gʼeuˆ hkaw‸ da‸ taˍ ve gʼuiˬ po hta‸ shuˍ ve teˇ ceuˬ hta‸ ngaˬ gʼa mawˬ ve yoˬ. Haiˬ ve to nuˇ to shaˆ leh yawˇ ve awˬ ho‸ awˬ han hta‸ maˇ kʼoˆ, yawˇ awˬ meh ve nanˍ ba‸ hta‸ maˇ kʼoˆ, gʼaˇ peuˬ ve chaw teˇ hpaˍ lehˬ, a shu yawˇ ve la‸ sheh hkʼaw Gʼuiˬsha ve tinˍ hta‸ vawˆ taˍ leh, mehˆ gʼeuˆ gʼuiˬ po awˬ paˇ lo huˉ chehˇ ve yoˬ.

3Yawˇ hui lehˬ, Gʼuiˬsha ve awˬ ceˬ Moˉseˍ ve kʼa muiˬ hkawˇ leh Yawˬ ehˉ ve kʼa muiˬ hkawˇ hta‸ kʼa muiˬ leh kʼoˆ ve, Kanˇ paˆ uiˍ ve Jawˇmawˇ Gʼuiˬsha-oˬ, nawˬ ve kanˉ teˇ hpaˍ lehˬ uiˍ jaˇ da‸ jaˇ ve yoˬ. Chaw ceuˬ hkʼa peu-eˬ ve Hkunˉ hawˉ hkanˇ-oˬ, nawˬ ve ya‸ kʼaw teˇ hpaˍ lehˬ, hteˇ jaˇ cawˇ jaˇ ve yoˬ.

4Jawˇmawˇ-oˬ, nawˬ hta‸ maˇ kawˆ leh nawˬ ve awˬ meh hta‸ maˇ chiˇ uiˍ maˇ chiˇ mvuh ve, a shu cawˬ le. Awˬ lawn kʼo, nawˬ teˇ gʼaˇ ceh tiˉ da‸ kehˬ ve yoˬ. Chaw ceuˬ hkʼa peu-eˬ nawˬ geh laˬ leh nawˬ hta‸ oˉ kʼoˍ pui tuˬ yoˬ. Awˬ lawn kʼo, nawˬ hteˇ lehˍ cawˇ lehˍ te ve teˇ hpaˍ hkʼa tawˍ lehˆ tawˆ la peuˬ, teh‸ kʼoˆ ve yoˬ.

5Oˇ ve awˬ hkʼaw‸ nawˉ ngaˬ nyi leh, shaˉ hkiˆ hpeh‸ ve aˉ po kʼo bon yehˬ lonˉ mvuhˇ naw ma lo hpaw taˍ ve hta‸ ngaˬ gʼa mawˬ ve yoˬ.

6Fawˉ mehˍ ve suhˍ ceuˬ cawˬ ve mvuhˇ naw ma tcuh yaˇ suhˍ gʼaˇ lehˬ, bon yehˬ lonˉ oˇ ve awˬ hkʼaw lo tawˆ la ve yoˬ. Yawˇ hui lehˬ, awˬ gʼeuˆ ba ve kehˬ da‸ jaˇ ve hpa hpu hta‸ veu‸ deh leh, a shu yawˇ ve nyi ma pui hta‸ shi haˍ pi caˆ tsuh‸ taˍ ve yoˬ.

7A sha‸ te‸ chehˇ ve awˬ ceuˬ awˇ hkeh awˬ hkʼaw lo teˇ hkeh lehˬ, mvuhˇ naw ma tcuh yaˇ suhˍ gʼaˇ hta‸ shi mu‸ hkʼu suhˍ shiˍ piˇ ve yoˬ. Shi mu‸ hkʼu oˇ ve teˇ hpaˍ awˬ hkʼaw lo, co co taiˍ taiˍ te‸ chehˇ ve Gʼuiˬ sha ve nyi ma zuhˆ ve teˇ ceuˬ hkʼa biˇ cawˬ taˍ ve yoˬ.

8Oˇ htaˇ, Gʼuiˬsha ve awˬ me‸ awˬ hponˇ leh yawˇ ve kanˇ paˆ hta‸ pa taw, bon yehˬ lonˉ awˬ hkʼaw lo mvuhˇ hkʼawˇ hkʼa biˇ cawˬ ve yoˬ. Mvuhˇ naw ma tcuh yaˇ suhˍ gʼaˇ ve fawˉ mehˍ ve suhˍ ceuˬ maˇ peuˬ ve ceh ceh, chaw teˇ gʼaˇ ka‸ bon yehˬ lonˉ awˬ hkʼaw lo lo‸-e maˇ hpeh‸.

← Chapter 14 Jump to: Chapter 16 →