Revelation 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Oˇ ve awˬ hkʼaw‸ nawˉ, mvuhˇ naw ma lo chaw awˬ moˍ lonˉ ve awˬ hkawˇ bvuhˬ jaˇ ve hkʼa shuˍ shuˍ awˬ hkawˇ bvuhˬ la ve hta‸ ngaˬ gʼa kaˇ ve yoˬ. Awˬ hkawˇ oˇ ve lehˬ, Haˍleˍluˇyaˬ. Htaiˍ hkʼaw‸ ve teˇ ceuˬ, awˬ me‸ awˬ hponˇ teˇ ceuˬ leh, kanˇ paˆ teˇ ceuˬ ngaˬ hui ve Gʼuiˬsha geh ceh tiˉ cawˬ ve yoˬ.

2Awˬ lawn kʼo, yawˇ suhˉ jehˬ ve teˇ hpaˍ lehˬ, hteˇ jaˇ cawˇ jaˇ ve yoˬ. Meh maˬ lanˉ lonˉ haˉ chawˇ haˉ paˆ te ve pa taw, miˬguiˬ yaˇ hui luˬ kʼai ve yoˬ. Hkʼe te leh, Gʼuiˬsha yawˇ hta‸ suhˉ taˆ leh, Gʼuiˬsha ve awˬ ceˬ teˇ hpaˍ ve awˬ suhˍ hta‸ yuˬ sheˆ ve awˬ pon yawˇ hta‸ kʼaw‸ te hkʼaw‸ piˇ ve yoˬ, teh‸ kuˬ ve yoˬ.

3Yawˇ hui kʼaw‸ kʼoˆ ve, Haˍleˍluˇyaˬ, venˇ oˇ ve aˬ miˍ mvuhˇ hkʼawˇ lehˬ, co co taiˍ taiˍ taˆ-e chehˇ ve yoˬ, teh‸ kʼoˆ ve yoˬ.

4Oˇ htaˇ, chaw mawˇ chaw kehˉ nyiˇ chi awˇ gʼaˇ leh a sha‸ te‸ chehˇ ve awˬ ceuˬ awˇ hkeh lehˬ, boˆ sheˬ leh, kʼaw jaw hkʼoˆ lo mui chehˇ ve Gʼuiˬsha hta‸ oˉ kʼoˍ pui leh, A menˬ, haˍleˍluˇyaˬ teh‸ kʼoˆ ve yoˬ.

5Kʼaw jaw lo awˬ hkawˇ tawˆ la leh kʼoˆ ve, Gʼuiˬsha ve awˬ ceˬ hpeh‸ ve, yawˇ hta‸ yawˆ yan ve chaw uiˍ chaw i hkʼa peu-eˬ-oˬ, ngaˬ hui ve Gʼuiˬsha hta‸ chiˇ mvuh-o, teh‸ kʼoˆ ve yoˬ.

6Peuˬ leh, chaw awˬ moˍ lonˉ ve awˬ hkawˇ hkʼa shuˍ shuˍ, iˉ kaˆ gʼuiˬ baˇ maˇ jaˇ ve awˬ hkawˇ hkʼa shuˍ shuˍ leh, mvuhˇ tawˍ hehnˇ jaˇ ve awˬ hkawˇ hkʼa shuˍ shuˍ ngaˬ gʼa kaˇ ve yoˬ. Awˬ hkawˇ oˇ ve chi hkʼe kʼoˆ ve, Haˍleˍluˇyaˬ. Kanˇ paˆ uiˍ jaˇ ve ngaˬ hui ve Jawˇmawˇ Gʼuiˬsha uˉ peunˍ ve yoˬ.

7Ngaˬ hui gʼaˇ hte‸ ha lehˬ ha kʼa te-a veuˬ. Ngaˬ hui yawˇ hta‸ chiˇ uiˍ chiˇ mvuh piˇ-a veuˬ. Awˬ lawn kʼo, Yawˬ ehˉ la‸ kʼawˍ toˆ ve awˬ yanˇ gaˬ la peuˬ. Yawˇ hta‸ heuˆ tuˬ ve yaˇ miˇ lehˬ, yawˇ awˬ to hta‸ gu taˍ peuˬ.

8Yaˇ miˇ oˇ ve lehˬ, awˬ gʼeuˆ ba ve kehˬ da‸ jaˇ ve hpa hpu hta‸ veu‸ deh tuˬ a hkaw-anˬ gʼa ve yoˬ. Hpa hpu oˇ ve lehˬ, Hkri‸ yaˇ teˇ hpaˍ te taˍ ve hteˇ ve cawˇ ve kanˉ teˇ hpaˍ hpeh‸ ve yoˬ, teh‸ awˬ hkawˇ oˇ ve kuˬ ve yoˬ.

9Peuˬ leh mvuhˇ naw ma tcuh yaˇ ngaˬ hta‸ kʼoˆ laˇ ve, Chi hta‸ bvuh‸ taˍ-o‸. Yawˬ ehˉ ve hkehˉ caˇ kuiˬ lo kʼai tuˬ kuˬ taˍ ve chaw teˇ hpaˍ lehˬ, awˬ bon uiˍ ve yoˬ teh‸ kʼoˆ ve yoˬ. Peuˬ leh, Tawˇ hkawˇ chi teˇ hpaˍ lehˬ, awˬ tehˬ awˬ na Gʼuiˬsha ve tawˇ hkawˇ hpeh‸ ve yoˬ teh‸, ngaˬ hta‸ kʼoˆ laˇ ve yoˬ.

10Oˇ htaˇ, yawˇ hta‸ oˉ kʼoˍ pui tuˬ, yawˇ ve hkui sheh awˬ paˇ lo ngaˬ boˆ taˍ ve yoˬ. Ya‸ hkʼaˇ, yawˇ ngaˬ hta‸ kʼoˆ laˇ ve, Chi hkʼe taˇ te. Nawˬ leh Yeˍsuˆ awˬ pon shaˉ hkiˆ hkanˍ ve nawˬ ve awˬ viˉ awˬ nyi teˇ hpaˍ geh ngaˬ awˬ ceˬ hpeh‸ ve yoˬ. Gʼuiˬsha hta‸ oˉ kʼoˍ pui-o. Awˬ lawn kʼo, Yeˍsuˆ shaˉ hkiˆ hkanˍ ve teˇ ceuˬ lehˬ, Gʼuiˬsha ve tcuh kaˍ paˍ hui hta‸ dawˇ pawnˍ piˇ ve yoˬ teh‸ kʼoˆ laˇ ve yoˬ.

11Oˇ htaˇ ngaˬ nyi leh, mvuhˇ naw ma hpaw taˍ ve hta‸ ngaˬ gʼa mawˬ ve yoˬ. Hpuˉ-ehˍ ve iˉ mvuhˇ teˇ hkeh cawˬ leh, ciˇ shehˍ hpaˇ lehˬ, Ka ti‸ yeˬ leh Hteˇ ve cawˇ ve awˬ shehˍ hpaˇ hpeh‸ ve yoˬ. Hteˇ ve cawˇ ve awˬ hkʼaw lo yawˇ suhˉ jehˬ leh ma‸ bawˆ ve yoˬ.

12Yawˇ ve mehˆ shiˍ lehˬ, aˬ miˍ ha hpeh‸ leh, yawˇ ve oˉ kʼoˍ hta‸ shi uˉ tcuhˍ maˇ maˇ hkʼawˆ taˍ ve yoˬ. Yawˇ hta‸ awˬ meh teˇ maˬ bvuh‸ taˍ ve yoˬ. Awˬ meh oˇ ve hta‸ yawˇ awˬ to maˇ heˆ kʼo, chaw teˇ gʼaˇ ka‸ maˇ shiˍ.

13Awˬ suhˍ awˬ hkʼaw lo tuˍ taˍ peuˬ ve aˉ po‸ zuhˬ ma hta‸ yawˇ veu‸ deh ve yoˬ. Yawˇ ve awˬ meh lehˬ, Gʼuiˬsha ve tawˇ hkawˇ teh‸ kʼoˆ ve yoˬ.

14Mvuhˇ naw ma ve ma‸ moˍ ma‸ cuˇ teˇ hpaˍ lehˬ, hpuˉ-ehˍ ve iˉ mvuhˇ hta‸ ciˇ leh yawˇ awˬ hkʼaˇ suh kʼai ve yoˬ. Yawˇ hui lehˬ, hpuˉ-ehˍ ve leh da‸ kehˬ ve hpa hpu hta‸ veu‸ deh ve yoˬ.

15Mvuhˇmiˬ teˇ hpaˍ hta‸ chaw tuˬ, yawˇ ve maw‸ kʼaw awˬ hkʼaw lo tcuhˆ ve aˉ htaw tawˆ la ve yoˬ. Yawˇ lehˬ, sho juˇ fuiˍ hta‸ yehˇ leh yawˇ hui hta‸ uˉ peunˍ tuˬ yoˬ. Kanˇ paˆ uiˍ jaˇ ve Gʼuiˬsha ve nyi ma zuhˆ jaˇ ve a pehˉ meuˇ gʼuiˬ nyiˉ kuiˬ hta‸ yawˇ naˆ tuˬ yoˬ.

16Yawˇ ve aˉ po‸ zuhˬ ma leh yawˇ ve pfuhˬ teh hta‸ awˬ meh chi hkʼe bvuh‸ taˍ ve, Hkunˉ hawˉ hkanˇ awˬ hkʼoˆ Hkunˉ hawˉ hkanˇ leh, jawˇmawˇ awˬ hkʼoˆ Jawˇmawˇ teh‸ bvuh‸ taˍ ve yoˬ.

17Oˇ htaˇ, mvuhˇ naw ma tcuh yaˇ teˇ gʼaˇ mvuhˇ nyi awˬ hkʼaw lo huˉ chehˇ ve hta‸ ngaˬ gʼa mawˬ ve yoˬ. Mvuhˇ naw ma awˬ kʼaw ji lo poˬ chehˇ ve ngaˆ hkʼa peu-eˬ hta‸ yawˇ awˬ hkawˇ bvuhˬ chaweh kuˬ leh kʼoˆ piˇ ve, Laˬ-o‸, Gʼuiˬsha ve hti caˇ hti dawˬ ve pawehˇ lonˉ awˬ hkʼaw lo hpawnˬ la-o.

18Hkunˉ hawˉ hkanˇ teˇ hpaˍ ve awˬ shaˍ, ma‸ poˍ lonˉ teˇ hpaˍ ve awˬ shaˍ, awˬ gʼaˇ uiˍ ve chaw hui ve awˬ shaˍ, iˉ mvuhˇ leh ciˇ shehˍ hpaˇ hui ve awˬ shaˍ, vuiˬ taˍ ve awˬ ceˬ hui ve awˬ shaˍ, ponˬ ve chaw hui ve awˬ shaˍ, uiˍ ve i ve chaw hkʼa peu-eˬ ve awˬ shaˍ hta‸ caˇ la-o teh‸ kʼoˆ ve yoˬ.

19Oˇ htaˇ, haiˬ ve to nuˇ to shaˆ maˇ kʼoˆ, miˬguiˬ ve hkunˉ hawˉ hkanˇ teˇ hpaˍ leh yawˇ hui ve ma‸ moˍ teˇ hpaˍ maˇ kʼoˆ, iˉ mvuhˇ ciˇ ve teˇ gʼaˇ leh yawˇ ve ma‸ moˍ hta‸ bawˆ da‸ tuˬ, yawˇ hui hpawnˬ da‸ chehˇ ve hta‸ ngaˬ gʼa mawˬ ve yoˬ.

20Oˇ htaˇ, haiˬ ve to nuˇ to shaˆ hta‸ hpeh yuˬ leh, maˇ heˆ heˆ ve tcuh kaˍ paˍ hta‸ htawˇ yawˇ geh teˇ geh hpeh yuˬ ve yoˬ. Maˇ heˆ heˆ ve tcuh kaˍ paˍ oˇ ve lehˬ, haiˬ ve to nuˇ to shaˆ ve yinˉ hta‸ hkanˍ yuˬ leh yawˇ ve shaˉ ho‸ hta‸ oˉ kʼoˍ pui ve chaw teˇ hpaˍ hta‸ heˍ yuˬ beˬ yuˬ tuˬ, haiˬ ve to nuˇ to shaˆ mehˆ gʼuˇ suhˍ awˬ heˆ teˇ hpaˍ hta‸ te maˍ piˇ paˍ teˇ gʼaˇ yoˬ. Aˬ miˍ to‸ chehˇ ve ma‸ shiˉ gʼuiˬ po awˬ hkʼaw lo yawˇ huiˉ maˬ hta‸ awˬ te‸ te‸ baˬ keu ve yoˬ.

21Iˉ mvuhˇ ciˇ shehˍ hpaˇ ve maw‸ kʼaw awˬ hkʼaw lo tawˆ la ve aˉ htaw lehˬ, cawˬ taˍ sheˍ ve chaw teˇ hpaˍ hta‸ chaw pehˍ ve yoˬ. Ngaˆ hkʼa peu-eˬ yawˇ hui ve awˬ shaˍ hta‸ hkʼa bvuhˆ caˇ ve yoˬ.

← Chapter 18 Jump to: Chapter 20 →