Revelation 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to:

1Oˇ htaˇ, Gʼuiˬsha leh Yawˬ ehˉ ve kʼaw jaw lo tawˆ la leh venˇ oˇ ve ya‸ kʼaw lonˉ awˬ kʼaw ji lo yoˬ ya‸ kʼai chehˇ ve, co ha te‸ piˇ lawˬ ve iˉ kaˆ lawˬ yawˇ ngaˬ hta‸ maˍ laˇ ve yoˬ. Iˉ kaˆ oˇ ve lehˬ, kehˬ da‸ jaˇ ve haˉ pui keh-oˬ hta‸ shuˍ ve yoˬ.

2Iˉ kaˆ lawˬ oˇ ve nyiˇ hpawˇ hpawˇ lo co ha te‸ piˇ lawˬ ve iˉ shiˍ cehˬ cawˬ ve yoˬ. Iˉ shiˍ cehˬ oˇ ve lehˬ, awˬ shiˍ teˇ chi nyiˇ ceuˬ naw‸ leh, ha pa teˇ maˬ le le awˬ shiˍ naw‸ ve yoˬ. Awˬ hpa‸ teˇ hpaˍ lehˬ, chaw ceuˬ teˇ hpaˍ ve naˬ ve gawˬ ve hta‸ na-e la piˇ tuˬ awˬ pon yoˬ.

3Awˬ hkʼaw‸ nawˉ kʼo, teˇ ceuˬ ka‸ hkeu ve hta‸ maˇ gʼa hkanˍ. Venˇ oˇ ve awˬ hkʼaw lo Gʼuiˬsha leh Yawˬ ehˉ ve kʼaw jaw cawˬ leh, yawˇ ve awˬ ceˬ teˇ hpaˍ yawˇ hta‸ oˉ kʼoˍ pui tuˬ yoˬ.

4Yawˇ hui lehˬ, yawˇ ve mehˆ hpfuhˇ hta‸ gʼa mawˬ leh, yawˇ hui ve naˍ kʼaˍ pui lo yawˇ ve awˬ meh cawˬ taˍ tuˬ yoˬ.

5Awˬ hkʼaw‸ nawˉ kʼo, mvuhˇ hpeu‸ ve teˇ ceuˬ maˇ kʼaw‸ cawˬ. Kawˆ faiˇ awˬ gʼeuˆ hta‸ maˇ kʼoˆ, mvuhˇ nyi awˬ gʼeuˆ hta‸ maˇ kʼoˆ, yawˇ hui maˇ loˍ. Awˬ lawn kʼo, Jawˇmawˇ Gʼuiˬsha lehˬ, yawˇ hui hta‸ awˬ gʼeuˆ ba piˇ tuˬ yoˬ. Yawˇ hui lehˬ, co co taiˍ taiˍ gʼa uˉ peunˍ tuˬ yoˬ.

6Mvuhˇ naw ma tcuh yaˇ teˇ pawˆ kʼaw‸ kʼoˆ ve, Tawˇ hkawˇ chi teˇ hpaˍ lehˬ, ka ti‸ yeˬ leh hteˇ ve cawˇ ve tawˇ hkawˇ hpeh‸ ve yoˬ. Gʼuiˬsha ve tcuh kaˍ paˍ hui ve nyi ma hta‸ uˉ peunˍ ve Jawˇmawˇ Gʼuiˬsha lehˬ maˇ maw maw hpeh‸ la tuˬ ve awˬ ceuˬ teˇ hpaˍ yawˇ ve awˬ ceˬ teˇ hpaˍ hta‸ maˍ piˇ tuˬ, yawˇ ve mvuhˇ naw ma tcuh yaˇ hta‸ peu laˇ peuˬ ve yoˬ.

7Nyi loˬ, ngaˬ haˆ haˆ laˬ tuˬ yoˬ. Li‸ chi awˬ hkʼaw lo bvuh‸ taˍ ve Gʼuiˬsha ve tcuh kaˍ paˍ ve tawˇ hkawˇ hta‸ na yuˬ leh te ve chaw lehˬ, awˬ bon uiˍ ve yoˬ teh‸, ngaˬ hta‸ kʼoˆ laˇ ve yoˬ.

8Ngaˬ awˬ to Yoˇhanˬ lehˬ, awˬ ceuˬ chi teˇ hpaˍ hta‸ gʼa kaˇ gʼa mawˬ ve yoˬ. Chi teˇ hpaˍ hta‸ gʼa kaˇ gʼa mawˬ peuˬ hkaw‸ nawˉ, ngaˬ hta‸ maˍ laˇ ve mvuhˇ naw ma tcuh yaˇ teˇ gʼaˇ hta‸ oˉ kʼoˍ pui tuˬ, yawˇ ve hkui paˇ lo ngaˬ boˆ taˍ ve yoˬ.

9Yawˇ kʼoˆ ve, Chi hkʼe taˇ te. Ngaˬ htawˇ nawˬ geh teˇ geh awˬ ceˬ hpeh‸ ve yoˬ. Nawˬ ve awˬ viˉ awˬ nyi hpeh‸ ve Gʼuiˬsha ve tcuh kaˍ paˍ hui geh maˇ kʼoˆ, li‸ chi awˬ hkʼaw lo bvuh‸ taˍ ve tawˇ hkawˇ hta‸ na yuˬ leh te ve chaw hui geh maˇ kʼoˆ, yawˇ hui geh teˇ geh htawˇ ngaˬ awˬ ceˬ hpeh‸ ve yoˬ. Gʼuiˬsha hta‸ oˉ kʼoˍ pui-o teh‸, ngaˬ hta‸ kʼoˆ laˇ ve yoˬ.

10Peuˬ leh yawˇ ngaˬ hta‸ kʼaw‸ kʼoˆ laˇ ve, Li‸ chi awˬ hkʼaw lo bvuh‸ taˍ ve Gʼuiˬsha ve tcuh kaˍ paˍ ve tawˇ hkawˇ hta‸ yinˉ taˇ tcuhˉ.

11Maˇ hteˇ maˇ cawˇ ve chaw lehˬ, maˇ hteˇ maˇ cawˇ ve hta‸ te piˇ sheˍ. Cha‸ chiˆ ve chaw lehˬ, cha‸ chiˆ ve hta‸ te piˇ sheˍ. Hteˇ ve cawˇ ve chaw lehˬ, hteˇ ve cawˇ ve hta‸ te piˇ sheˍ. Da‸ kehˬ ve chaw lehˬ, da‸ kehˬ ve hta‸ te piˇ sheˍ.

12Nyi loˬ, ngaˬ haˆ haˆ laˬ tuˬ yoˬ. Chaw teˇ gʼaˇ le le, a shu yawˇ te taˍ ve hta‸ keunˍ da‸ ve hkʼe piˇ tuˬ, la‸ shawnˍ hta‸ ngaˬ yuˬ laˬ tuˬ yoˬ.

13Ngaˬ lehˬ Aˍlaˍhpaˆ leh Awˇmeˍgaˆ hpeh‸ ve yoˬ. Awˬ hkuiˉ puiˍ leh awˬ leh meuˇ htawˇ ngaˬ hpeh‸ ve yoˬ. Awˉ lawˉ peuˇ ve awˬ ceuˬ ka‸, awˬ leh meuˇ ve awˬ ceuˬ ka‸ hpeh‸ ve yoˬ.

14Co ha te‸ piˇ lawˬ ve iˉ shiˍ cehˬ lo laˬ tuˬ a hkaw-anˬ gʼa tuˬ leh, lanˇ venˇ yehˬ miˉ awˬ hkʼaw lo gʼa lo‸-e tuˬ awˬ pon, a shu yawˇ ve aˉ po‸ zuhˬ ma hta‸ tsuhˇ baˬ ve chaw lehˬ, awˬ bon uiˍ ve yoˬ.

15Awˬ baˬ hpawˇ lo lehˬ, hpuiˇ hkʼe ve chaw, neˇ te ve chaw, haˉ chawˇ haˉ paˆ te ve chaw, shu hta‸ tiˇ pehˍ ve chaw, shaˉ ho‸ hta‸ oˉ kʼoˍ pui ve chaw leh, heˍ ve hta‸ tiˉ te gaˇ leh heˍ chehˇ ve chaw hkʼa peu-eˬ chehˇ taˍ ve yoˬ.

16Ngaˬ Yeˍsuˆ lehˬ, Hkri‸ yaˇ awˬ moˍ teˇ hpaˍ awˬ pon awˬ ceuˬ chi teˇ hpaˍ nawˬ hui hta‸ shaˉ hkiˆ hkanˍ tuˬ, ngaˬ ve mvuhˇ naw ma tcuh yaˇ hta‸ peu laˇ ve yoˬ. Ngaˬ lehˬ, Daˍviˆ ve awˬ geu leh awˬ ceuˬ awˬ hkʼaˇ hpeh‸ ve yoˬ. Awˬ gʼeuˆ ba hehnˇ jaˇ ve peuˬ tawˆ htawˇ ngaˬ hpeh‸ ve yoˬ.

17Awˬ ha hpu leh awˬ hpawˇ heuˆ tuˬ ve yaˇ miˇ haˉ kʼoˆ ve, Laˬ-o‸. Gʼa kaˇ ve chaw htawˇ, Laˬ-o‸ teh‸ shu hta‸ kʼoˆ piˇ-oˆ. Iˉ kaˆ shiˉ ve chaw laˬ piˇ lawˬ-o‸. Dawˬ gaˇ ve chaw hkʼaˬ ve teˇ gʼaˇ maˇ kʼoˆ, awˬ hpfuhˇ maˇ piˇ leh co ha te‸ piˇ lawˬ ve iˉ kaˆ hta‸ dawˬ piˇ lawˬ-o‸.

18Li‸ chi awˬ hkʼaw lo bvuh‸ taˍ ve Gʼuiˬsha ve tcuh kaˍ paˍ ve tawˇ hkawˇ hta‸ gʼa kaˇ ve chaw teˇ gʼaˇ le le hta‸ ngaˬ chi hkʼe shaˍ ti‸ pe‸ laˇ ve yoˬ. Awˬ ceuˬ chi teˇ hpaˍ hta‸ chaw teˇ gʼaˇ gʼaˇ htehˍ piˇ ve kʼo, li‸ chi awˬ hkʼaw lo bvuh‸ taˍ ve fawˉ mehˍ ve teˇ hpaˍ Gʼuiˬsha yawˇ hta‸ kʼaw‸ htehˍ piˇ tuˬ yoˬ.

19Gʼuiˬsha ve tcuh kaˍ paˍ ve tawˇ hkawˇ bvuh‸ taˍ ve li‸ chi awˬ hkʼaw lo tawˇ hkawˇ teˇ hpaˍ hpaˍ hta‸ chaw teˇ gʼaˇ gʼaˇ yuˬ baˬ ve kʼo, li‸ chi awˬ hkʼaw lo bvuh‸ taˍ ve awˬ ceuˬ teˇ hpaˍ, co ha te‸ piˇ lawˬ ve iˉ shiˍ cehˬ leh da‸ kehˬ ve venˇ awˬ hkʼaw lo yawˇ gʼa tuˬ ve teˇ hpaˍ hta‸ Gʼuiˬsha yuˬ baˬ tuˬ yoˬ.

20Awˬ lawn chi teˇ hpaˍ hta‸ shaˉ hkiˆ hkanˍ shehˍ hpaˇ kʼoˆ ve, Awˬ tehˬ awˬ na ngaˬ haˆ haˆ laˬ tuˬ yoˬ teh‸ kʼoˆ ve yoˬ. A menˬ, Jawˇmawˇ Yeˍsuˆ-oˬ, laˬ-o‸.

21Jawˇmawˇ Yeˍsuˆ ve awˬ bon awˬ shinˉ lehˬ, Hkri‸ yaˇ hui geh cawˬ piˇ-oˆ.

← Chapter 21 Jump to: