Revelation 17

Lahu Bible Edited © Thailand Bible Society and Bible Society of Myanmar, 2010, 2020.

← Chapter 16 Jump to: Chapter 18 →

1Oˇ htaˇ, mu‸ hkʼu suhˍ shiˍ cawˬ ve mvuhˇ naw ma tcuh yaˇ suhˍ gʼaˇ awˬ hkʼaw lo teˇ gʼaˇ laˬ leh ngaˬ hta‸ kʼoˆ laˇ ve, Laˬ-o‸. Iˉ kaˆ maˇ ve awˬ hkʼoˆ hta‸ mui chehˇ ve meh maˬ lanˉ lonˉ hta‸ suhˉ jehˬ ve teˇ ceuˬ ngaˬ nawˬ hta‸ maˍ laˇ tuˬ yoˬ.

2Miˬguiˬ hkʼoˆ chehˇ ve hkunˉ hawˉ hkanˇ teˇ hpaˍ lehˬ, yawˇ geh haˉ chawˇ haˉ paˆ te peuˬ ve yoˬ. Miˬguiˬ hkʼoˆ chehˇ ve chaw teˇ hpaˍ lehˬ, a pehˉ meuˇ gʼuiˬ dawˬ bvuhˆ ve hkʼe, yawˇ ve haˉ chawˇ haˉ paˆ te ve teˇ ceuˬ hta‸ dawˬ bvuhˆ peuˬ teh‸ kʼoˆ laˇ ve yoˬ.

3Oˇ htaˇ, Awˬ ha hpu awˬ hkʼaw lo mvuhˇ naw ma tcuh yaˇ oˇ ve ngaˬ hta‸ heh puiˉ hkʼaw shiˍ kʼai ve yoˬ. Nyiˉ-ehˍ ve haiˬ ve to nuˇ to shaˆ awˬ hkʼoˆ lo yaˇ miˇ teˇ gʼaˇ mui chehˇ ve hta‸ ngaˬ gʼa mawˬ ve yoˬ. Haiˬ ve to nuˇ to shaˆ oˇ ve lehˬ, oˉ kʼoˍ suhˍ shiˍ leh awˬ hkaw teˇ chi maˬ cawˬ leh, Gʼuiˬsha hta‸ maˇ shawˍ maˇ caˆ kʼoˆ ve awˬ meh teˇ hpaˍ hkʼa biˇ cawˬ ve yoˬ.

4Yaˇ miˇ oˇ ve lehˬ, nyi naˆ meuˉ lehˍ ve leh nyiˉ-ehˍ ve veu‸ kʼaˇ hta‸ veu‸ deh leh, shi, haˉ pui shehnˉ leh piˉ ko-eˍ shehnˉ teˇ hpaˍ tcuhˉ taˍ ve yoˬ. Yawˇ haˉ chawˇ haˉ paˆ te ve hta‸ caˉ da‸ ve maˇ da‸ maˇ kehˬ ve awˬ ceuˬ teˇ hpaˍ leh, cha‸ naˬ tuˬ te ve awˬ ceuˬ teˇ hpaˍ hkʼa biˇ cawˬ taˍ ve shi kawˆ hta‸ yawˇ vawˆ taˍ ve yoˬ.

5Yawˇ ve naˍ kʼaˍ pui hta‸ tcuhˉ kuiˬ naˉ jaˇ ve awˬ meh chi hkʼe bvuh‸ taˍ ve yoˬ. Uiˍ ve Baˍbuˍlonˍ venˇ lehˬ, meh maˬ lanˉ teˇ hpaˍ ve awˬ e leh miˬguiˬ ve cha‸ chiˆ ve teˇ hpaˍ ve awˬ e hpeh‸ ve yoˬ teh‸ bvuh‸ taˍ ve yoˬ.

6Yaˇ miˇ oˇ ve lehˬ, Hkri‸ yaˇ hui ve awˬ suhˍ hta‸ maˇ kʼoˆ, Yeˍsuˆ awˬ pon shaˉ hkiˆ hkanˍ paˍ hui ve awˬ suhˍ hta‸ maˇ kʼoˆ, dawˬ bvuhˆ gʼuˇ ve hta‸ ngaˬ gʼa mawˬ ve yoˬ. Ngaˬ yawˇ hta‸ mawˬ ve teˇ yanˇ, maˇ maˇ anˇ jaˇ ve yoˬ.

7Oˇ htaˇ mvuhˇ naw ma tcuh yaˇ oˇ ve teˇ gʼaˇ ngaˬ hta‸ kʼoˆ laˇ ve, Aˬ hto‸ ma te nawˬ anˇ ve le. Yaˇ miˇ oˇ ve awˬ lawn maˇ kʼoˆ, oˉ kʼoˍ suhˍ shiˍ leh awˬ hkaw teˇ chi maˬ cawˬ ve yawˇ hta‸ pfuhˇ kʼai ve haiˬ ve to nuˇ to shaˆ awˬ lawn maˇ kʼoˆ, tcuhˉ kuiˬ naˉ ve teˇ ceuˬ ngaˬ nawˬ hta‸ kʼaoˍ maˍ laˇ tuˬ yoˬ.

8Nawˬ gʼa mawˬ ve haiˬ ve to nuˇ to shaˆ lehˬ, ponˬ laˬ htaˇ cawˬ ve ka‸, chi beu‸ maˇ cawˬ. Yawˇ lehˬ maˇ maw maw kʼo, leh kuiˬ maˇ cawˬ ve miˬ kʼoˍ awˬ hkʼaw lo tawˆ la leh, luˬ kuiˬ sheˆ kuiˬ lo gʼa lo‸-e tuˬ yoˬ. Mvuhˇ kawˍ miˬ ya‸ htaˇ ka‸ co ti‸ ha ti‸ li‸ awˬ hkʼaw lo awˬ meh maˇ bvuh‸ keu taˍ ve miˬguiˬ hkʼoˆ chehˇ ve chaw teˇ hpaˍ lehˬ, haiˬ ve to nuˇ to shaˆ hta‸ gʼa mawˬ ve teˇ yanˇ, anˇ jaˇ tuˬ yoˬ. Awˬ lawn kʼo, ponˬ laˬ htaˇ yawˇ cawˬ ve ka‸, chi beu‸ maˇ cawˬ leh, awˬ hkʼaw‸ nawˉ kʼaw‸ cawˬ la tuˬ ve hta‸ pa taw yoˬ.

9Awˬ lawn chi hta‸ shiˍ tuˬ cuˇ yiˍ hkʼa biˇ cawˬ ve nyi ma hta‸ loˍ ve yoˬ. Oˉ kʼoˍ oˇ ve suhˍ shiˍ lehˬ, yaˇ miˇ mui taˍ ve hkʼaw suhˍ shiˍ hpeh‸ ve yoˬ.

10Hkunˉ hawˉ hkanˇ suhˍ gʼaˇ htawˇ hpeh‸ ve yoˬ. Ngaˇ gʼaˇ lehˬ, ce kʼai peuˬ. Chi beu‸ teˇ gʼaˇ chehˇ taˍ sheˍ ve yoˬ. Teˇ gʼaˇ lehˬ, maˇ gaˬ la sheˍ. Yawˇ gaˬ la ve teˇ yanˇ, teˇ hkui ceh tiˉ gʼa chehˇ tuˬ yoˬ.

11Ponˬ laˬ htaˇ cawˬ ve ka‸, chi beu‸ maˇ cawˬ ve haiˬ ve to nuˇ to shaˆ lehˬ, hiˉ gʼaˇ teˇ gʼaˇ hpeh‸ ve yoˬ. Ya‸ hkʼaˇ, suhˍ gʼaˇ hta‸ yawˇ caˉ da‸ ve yoˬ. Yawˇ lehˬ, luˬ kuiˬ sheˆ kuiˬ lo gʼa lo‸-e tuˬ yoˬ.

12Nawˬ gʼa mawˬ ve awˬ hkaw teˇ chi maˬ lehˬ, mvuhˇmiˬ hta‸ maˇ gʼa uˉ peunˍ sheˍ ve hkunˉ hawˉ hkanˇ teˇ chi gʼaˇ hpeh‸ ve yoˬ. Ya‸ hkʼaˇ, yawˇ hui lehˬ haiˬ ve to nuˇ to shaˆ geh teˇ geh hkunˉ hawˉ hkanˇ ve aˉ yaˇ hta‸ teˇ naˍ riˍ hkʼa gaˬ gʼa tuˬ yoˬ.

13Hkunˉ hawˉ hkanˇ oˇ ve teˇ hpaˍ lehˬ, nyi ma teˇ shiˍ tiˉ taˍ leh, haiˬ ve to nuˇ to shaˆ hta‸ a shu yawˇ ve kanˇ paˆ leh a shu yawˇ ve aˉ yaˇ chiˇ a‸ piˇ ve yoˬ.

14Yawˇ hui lehˬ, Yawˬ ehˉ hta‸ bawˆ da‸ tuˬ yoˬ. Ya‸ hkʼaˇ, Yawˬ ehˉ yawˇ hui hta‸ gʼaˇ tuˬ yoˬ. Awˬ lawn kʼo, yawˇ lehˬ jawˇ mawˇ awˬ hkʼoˆ Jawˇmawˇ hpeh‸ leh, hkunˉ hawˉ hkanˇ awˬ hkʼoˆ Hkunˉ hawˉ hkanˇ hpeh‸ ve yoˬ. Yawˇ geh teˇ geh chehˇ ve chaw teˇ hpaˍ lehˬ, kuˬ yuˬ taˍ ve chaw, leuˆ yuˬ taˍ ve chaw leh, ka ti‸ yeˬ ve chaw teˇ hpaˍ hpeh‸ ve yoˬ teh‸, ngaˬ hta‸ kʼoˆ laˇ ve yoˬ.

15Mvuhˇ naw ma tcuh yaˇ oˇ ve ngaˬ hta‸ teˇ pawˆ kʼaw‸ kʼoˆ laˇ ve, Nawˬ gʼa mawˬ ve meh maˬ lanˉ mui chehˇ ve iˉ kaˆ oˇ ve teˇ hpaˍ lehˬ, chaw ceuˬ teˇ hpaˍ, chaw awˬ moˍ lonˉ teˇ hpaˍ, mvuhˇmiˬ teˇ hpaˍ leh, tawˇ hkawˇ laiˉ ceuˬ yaw ve chaw teˇ hpaˍ hpeh‸ ve yoˬ.

16Nawˬ gʼa mawˬ ve awˬ hkaw teˇ chi maˬ leh haiˬ ve to nuˇ to shaˆ lehˬ, meh maˬ lanˉ hta‸ canˇ tuˬ yoˬ. Yawˇ hui lehˬ, yawˇ hta‸ gawˬ cu gawˬ pehˆ hpeh‸ piˇ lawˬ leh, awˬ kʼu nyi te piˇ tuˬ yoˬ. Yawˇ ve awˬ shaˍ hta‸ yawˇ hui caˇ leh, yawˇ hta‸ aˬ miˍ tuˉ baˬ tuˬ yoˬ.

17Awˬ lawn kʼo, Gʼuiˬsha nyi ma cawˇ ve hta‸ yawˇ hui te tuˬ, yawˇ hui ve nyi ma hta‸ Gʼuiˬsha dawˇ pawnˍ piˇ ve yoˬ. Gʼuiˬ sha ve tawˇ hkawˇ biˇ la htaˇ hkʼa gaˬ, yawˇ hui lehˬ nyi ma teˇ shiˍ tiˉ taˍ ve awˬ hkʼaw lo haiˬ ve to nuˇ to shaˆ hta‸ a shu yawˇ ve aˉ yaˇ chiˇ a‸ piˇ tuˬ, Gʼuiˬ sha chi hkʼe dawˇ pawnˍ piˇ ve yoˬ.

18Nawˬ gʼa mawˬ ve yaˇ miˇ teˇ gʼaˇ lehˬ, miˬ guiˬ ve hkunˉ hawˉ hkanˇ teˇ hpaˍ hta‸ uˉ peunˍ ve venˇ lonˉ hpeh‸ ve yoˬ teh‸, ngaˬ hta‸ kʼoˆ laˇ ve yoˬ.

← Chapter 16 Jump to: Chapter 18 →