Revelation 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Oˇ ve awˬ hkʼaw‸ nawˉ, awˬ kaˍ awˬ nu mvuhˇ naw ma tcuh yaˇ teˇ gʼaˇ mvuhˇ naw ma lo ya‸ la chehˇ ve hta‸ ngaˬ gʼa mawˬ ve yoˬ. Yawˇ lehˬ, uiˍ ve kanˇ paˆ cawˬ leh, yawˇ ve awˬ me‸ awˬ hponˇ hta‸ pa taw, miˬguiˬ hkʼoˆ awˬ gʼeuˆ ba chehˇ ve yoˬ.

2Yawˇ bvuhˬ chaweh gʼaˇ hte‸ kuˬ leh kʼoˆ ve, Awˬ meh uiˍ ve Baˍbuˍlonˍ venˇ lehˬ paiˍ peuˬ, paiˍ peuˬ. Chehˇ kuiˬ oˇ ve lehˬ, neˇhaiˬ teˇ hpaˍ ve chehˇ kuiˬ leh cha‸ chiˆ ve awˬ ha teˇ ceuˬ le le ve va‸ taˍ kuiˬ hpeh‸ ve yoˬ. Cha‸ chiˆ leh shu cha‸ naˬ ve ngaˆ teˇ ceuˬ le le ve va‸ taˍ kuiˬ ka‸ hpeh‸ ve yoˬ.

3Awˬ lawn kʼo, chaw ceuˬ hkʼa peu-eˬ lehˬ a pehˉ meuˇ gʼuiˬ dawˬ ve hkʼe, yawˇ ve haˉ chawˇ haˉ paˆ te ve teˇ ceuˬ hta‸ dawˬ leh paiˍ peuˬ. Miˬguiˬ ve hkunˉ hawˉ hkanˇ teˇ hpaˍ yawˇ geh haˉ chawˇ haˉ paˆ te peuˬ leh, miˬguiˬ ve tanˇ kaˬ paˍ teˇ hpaˍ lehˬ, yawˇ paw sha jaˇ ve teˇ ceuˬ awˬ hkʼaw lo, yawˇ hui htawˇ paw sha la peuˬ, teh‸ kʼoˆ ve yoˬ.

4Mvuhˇ naw ma lo awˬ kaˍ awˬ nu ve awˬ hkawˇ chi hkʼe kʼoˆ chehˇ ve hta‸ ngaˬ gʼa kaˇ ve, Ngaˬ ve chaw teˇ hpaˍ-oˬ, yawˇ ve venˇbaˆ awˬ hkʼaw lo maˇ gʼa lo‸-e tuˬ maˇ kʼoˆ, yawˇ gʼa hkanˍ ve fawˉ mehˍ ve teˇ hpaˍ hta‸ nawˬ hui maˇ gʼa hkanˍ tuˬ maˇ kʼoˆ, venˇ oˇ ve awˬ hkʼaw lo tawˆ la-o.

5Awˬ lawn kʼo, yawˇ ve venˇbaˆ teˇ hpaˍ lehˬ mvuhˇ naw ma hta‸ daw‸ htaˇ hkʼa gaˬ maˇ jaˇ leh, yawˇ ve maˇ hteˇ maˇ cawˇ ve teˇ hpaˍ hta‸ Gʼuiˬsha dawˇ nawˇ chehˇ ve yoˬ.

6Yawˇ shu hta‸ te piˇ ve hkʼe yawˇ hta‸ kʼaw‸ te hkʼaw‸ piˇ-oˆ. Yawˇ kanˉ te taˍ ve hkʼe, yawˇ hta‸ nyiˇ pun kʼaw‸ te hkʼaw‸ piˇ-oˆ. Kawˆ awˬ hkʼaw lo yawˇ hkaw‸ da‸ taˍ ve teˇ ceuˬ nyiˇ pun hkaw‸ da‸ leh yawˇ hta‸ taw piˇ-oˆ.

7Yawˇ awˬ to hta‸ yawˇ chiˇ uiˍ chiˇ mvuh leh, paw sha jaˇ ve awˬ hkʼaw lo ha lehˬ ha kʼa te peuˬ ve hkʼe taw, yawˇ hta‸ fawˉ mehˍ leh dawˇ haˍ jaˇ ve teˇ ceuˬ yawˇ awˬ hkʼoˆ gaˬ la piˇ-oˆ. Awˬ lawn kʼo, yawˇ ve nyi ma awˬ hkʼaw lo yawˇ kʼoˆ ve, Ngaˬ lehˬ nanˇ hawˉ hkanˇ ma te leh mui chehˇ ve yoˬ. Ngaˬ mehˇchawˇma maˇ heˆ. Dawˇ haˍ ve teˇ ceuˬ hta‸ ngaˬ a ciˉ ka‸ gʼa hpuˇ tuˬ maˇ heˆ teh‸ kʼoˆ ve yoˬ.

8Hkʼe te leh, teˇ nyi tiˉ awˬ hkʼaw lo yawˇ awˬ hkʼoˆ hta‸ suh ve teˇ ceuˬ, paˆ hawˬ ve teˇ ceuˬ leh meu‸ ve kaˆ ve teˇ ceuˬ, fawˉ mehˍ ve chi teˇ hpaˍ gaˬ la leh, aˬ miˍ to‸ baˬ ve hta‸ yawˇ gʼa hkanˍ tuˬ yoˬ. Awˬ lawn kʼo, yawˇ hta‸ suhˉ jehˬ ve Jawˇmawˇ Gʼuiˬsha lehˬ kanˇ paˆ uiˍ jaˇ ve yoˬ, teh‸ kʼoˆ ve yoˬ.

9Venˇ oˇ ve geh haˉ chawˇ haˉ paˆ te leh, paw sha jaˇ ve awˬ hkʼaw lo ha lehˬ ha kʼa te peuˬ ve miˬguiˬ ve hkunˉ hawˉ hkanˇ teˇ hpaˍ lehˬ, venˇ oˇ ve to‸ chehˇ ve mvuhˇ hkʼawˇ hta‸ gʼa mawˬ ve teˇ yanˇ, venˇ oˇ ve awˬ pon yawˇ hui kuˬ hawˬ paˆ hawˬ tuˬ yoˬ.

10Venˇ oˇ ve gʼa hkanˍ ve tu‸ ve hkanˍ ve hta‸ yawˇ hui kawˆ jaˇ ve pa taw, yawˇ hui vuiˇ kuiˬ lo huˉ taˍ leh chi hkʼe kʼoˆ tuˬ yoˬ. Awˬ meh uiˍ leh kanˇ paˆ uiˍ ve Baˍbuˍlonˍ venˇ-oˬ, nawˬ gʼa dawˇ haˍ jaˇ, gʼa dawˇ haˍ jaˇ ve yoˬ. Teˇ naˍ riˍ tiˉ awˬ hkʼaw lo nawˬ hta‸ suhˉ jehˬ ve teˇ ceuˬ gaˬ la peuˬ teh‸ kʼoˆ tuˬ yoˬ.

11Miˬguiˬ ve tanˇ kaˬ paˍ teˇ hpaˍ htawˇ, venˇ oˇ ve awˬ pon kuˬ hawˬ paˆ hawˬ tuˬ yoˬ. Awˬ lawn kʼo, shu yawˇ hui ve mawˇ hta‸ maˇ kʼaw‸ vuiˬ.

12Mawˇ oˇ ve teˇ hpaˍ lehˬ, hpu, shi, haˉ pui shehnˉ, piˉ ko-eˍ shehnˉ, da‸ jaˇ ve hpa hpu, nyi naˆ meuˉ lehˍ ve hpa, pfuhˇ hpa, nyiˉ-ehˍ ve hpa, hawnˉ ve suhˆ teˇ ceuˬ le le, haw ciˬ te taˍ ve mawˇ teˇ ceuˬ le le, awˬ hpfuhˇ hkʼaˆ ve suhˆ te taˍ ve mawˇ teˇ ceuˬ le le, kuiˇ te taˍ ve mawˇ, sho te taˍ ve mawˇ, haˉ pui hpu te taˍ ve mawˇ,

13kʼaw hpeh, hkʼeu hawnˉ, awˬ shaˉ hawnˉ ve awˬ meu-e, naˍ manˇ hawnˉ, lawˇbanˍ, a pehˉ meuˇ gʼuiˬ, naˍ manˇ, meu da‸ ve hkaoˍmonˇ meu-e, caˬ shiˍ, nuˇ, yawˬ, iˉ mvuhˇ, iˉ mvuhˇ lawˬ, awˬ ceˬ leh, chaw yaˇ ve co ha, chi teˇ hpaˍ yoˬ.

14Nawˬ ve nyi ma sheˉ lai jaˇ ve iˉ shiˍ teˇ hpaˍ lehˬ, mehˉ kʼai peuˬ. Mehˬ jaˇ ve caˇ tuˬ leh da‸ jaˇ ve mawˇ jeˬ hkʼa peu-eˬ luˬ kʼai peuˬ leh, awˬ hkʼaw‸ nawˉ teˇ pawˆ ka‸ nawˬ maˇ kʼaw‸ gʼa mawˬ.

15Mawˇ oˇ ve teˇ hpaˍ hta‸ hawˇ ve vuiˬ ve leh venˇ oˇ ve hta‸ pa taw paw sha la ve tanˇ kaˬ paˍ teˇ hpaˍ lehˬ, venˇ oˇ ve gʼa hkanˍ ve tu‸ ve hkanˍ ve hta‸ kawˆ jaˇ ve pa taw, yawˇ hui vuiˇ kuiˬ lo huˉ taˍ tuˬ yoˬ. Yawˇ hui kuˬ hawˬ paˆ hawˬ leh chi hkʼe kʼoˆ tuˬ yoˬ.

16Da‸ jaˇ ve hpa hpu, nyi naˆ meuˉ lehˍ ve hpa leh nyiˉ-ehˍ ve hpa hta‸ veu‸ deh leh, shi, haˉ pui shehnˉ leh piˉ ko-eˍ shehnˉ tcuhˉ taˍ ve awˬ meh uiˍ ve venˇ lehˬ, gʼa dawˇ haˍ jaˇ, gʼa dawˇ haˍ jaˇ ve yoˬ.

17Chi taw taw maˇ jaˇ ve mawˇ jeˬ hkʼa peu-eˬ teˇ naˍ riˍ ceh tiˉ awˬ hkʼaw lo luˬ kʼai peuˬ law leˇ, teh‸ kʼoˆ tuˬ yoˬ. Haw lo‸ kʼoˍ awˬ hoˉ hkʼa peu-eˬ, haw lo‸ kʼoˍ hta‸ ciˇ leh kʼai kʼai laˬ laˬ te ve chaw hkʼa peu-eˬ, haw lo‸ kʼoˍ awˬ hkʼaw lo kanˉ te ve chaw hkʼa peu-eˬ leh, laˇ tsuhˇ gʼuiˬ hpawˇ tanˇ kaˬ te ve chaw hkʼa peu-eˬ lehˬ, vuiˇ kuiˬ lo huˉ taˍ ve yoˬ.

18Venˇ oˇ ve to‸ chehˇ ve mvuhˇ hkʼawˇ hta‸ yawˇ hui gʼa mawˬ ve teˇ yanˇ, Awˬ meh uiˍ ve venˇ chi teˇ venˇ hta‸ shuˍ ve, hkʼaˬ ve teˇ venˇ cawˬ le teh‸ kuˬ ve yoˬ.

19Yawˇ hui lehˬ, a shu yawˇ ve oˉ kʼoˍ hta‸ je‸ meu-e hkaˆ pfuhˍ leh kuˬ hawˬ paˆ hawˬ ve yoˬ. Yawˇ hui kuˬ leh kʼoˆ ve, Awˬ meh uiˍ ve venˇ lehˬ, gʼa dawˇ haˍ jaˇ, gʼa dawˇ haˍ jaˇ ve yoˬ. Venˇ oˇ ve awˬ hkʼaw lo mawˇ jeˬ cawˬ maˇ jaˇ ve pa taw, laˇ tsuhˇ gʼuiˬ awˬ hkʼaw ve haw lo‸ kʼoˍ awˬ shehˍ hpaˇ hkʼa peu-eˬ paw sha la ve yoˬ. Teˇ naˍ riˍ ceh tiˉ awˬ hkʼaw lo venˇ oˇ ve luˬ kʼai peuˬ law leˇ.

20Mvuhˇ naw ma leh da‸ kehˬ ve chaw teˇ hpaˍ, tcuh yaˇ teˇ hpaˍ leh Gʼuiˬsha ve tcuh kaˍ paˍ teˇ hpaˍ-oˬ, venˇ oˇ ve luˬ kʼai peuˬ ve pa taw ha lehˬ chehˇ-oˆ. Awˬ lawn kʼo, nawˬ hui awˬ pon kʼaw‸ te hkʼaw‸ piˇ tuˬ, Gʼuiˬsha lehˬ venˇ oˇ ve hta‸ suhˉ taˆ peuˬ, teh‸ kʼoˆ ve yoˬ.

21Oˇ ve awˬ hkʼaw‸ nawˉ, awˬ gʼaˇ uiˍ ve mvuhˇ naw ma tcuh yaˇ teˇ gʼaˇ lehˬ, haˉ pui mawˍ lonˉ hta‸ shuˍ ve haˉ pui shiˍ hta‸ chiˇ leh, laˇ tsuhˇ gʼuiˬ awˬ hkʼaw lo baˬ keu leh kʼoˆ ve, Chi hkʼa shuˍ shuˍ awˬ meh uiˍ ve Baˍbuˍlonˍ venˇ hta‸ hehnˇ chaweh chiˇ baˬ leh, awˬ hkʼaw‸ nawˉ venˇ oˇ ve hta‸ maˇ kʼaw‸ mawˬ.

22Tinˍ hteˆ ve chaw, kʼa muiˬ hkawˇ kʼa ve chaw, lehˉ lu meuˆ ve chaw leh behˬ heh ma meuˆ ve chaw teˇ hpaˍ te ve awˬ hkawˇ hta‸ nawˬ awˬ hkʼaw lo maˇ kʼaw‸ gʼa kaˇ. La‸ meuˇ te puiˉ ve chaw teˇ gʼaˇ ka‸ nawˬ awˬ hkʼaw lo maˇ kʼaw‸ cawˬ. Haˉ pui mawˍ geuˆ ve awˬ hkawˇ htawˇ, nawˬ awˬ hkʼaw lo maˇ kʼaw‸ gʼa kaˇ.

23Kawˆ faiˇ awˬ gʼeuˆ htawˇ nawˬ awˬ hkʼaw lo maˇ kʼaw‸ gʼa ba. La‸ kʼawˍ toˆ ve chaw haˉ yaˇ miˇ haˉ ve awˬ hkawˇ htawˇ, nawˬ awˬ hkʼaw lo maˇ kʼaw‸ gʼa kaˇ. Awˬ lawn kʼo, nawˬ ve tanˇ kaˬ paˍ teˇ hpaˍ lehˬ, miˬguiˬ hkʼoˆ ve chaw uiˍ chaw mvuh teˇ hpaˍ hpeh‸ ve yoˬ. Nawˬ neˇ te ve hta‸ pa taw, chaw ceuˬ hkʼa peu-eˬ ya‸ kʼai peuˬ.

24Gʼuiˬsha ve tcuh kaˍ paˍ hui ve awˬ suhˍ, da‸ kehˬ ve chaw hui ve awˬ suhˍ leh, miˬ guiˬ hkʼoˆ lo tiˇ pehˍ ve hta‸ gʼa hkanˍ ve chaw hkʼa peu-eˬ ve awˬ suhˍ hta‸ venˇ oˇ ve awˬ hkʼaw lo gʼa mawˬ ve yoˬ, teh‸ mvuhˇ naw ma tcuh yaˇ kʼoˆ ve yoˬ.

← Chapter 17 Jump to: Chapter 19 →