1 Kings 4

Lao Bible 2012 (ພຣະຄຳພີສັກສິ)

← Chapter 3 Jump to: Chapter 5 →

1ເຈົ້າໂຊໂລໂມນເປັນກະສັດຂອງຊົນຊາດອິດສະຣາເອນທັງໝົດ

2ແລະບັນດາຂ້າຣາຊການຊັ້ນຜູ້ໃຫຍ່ຂອງເພິ່ນມີດັ່ງນີ້: ອາຊາຣີຢາ ລູກຊາຍຂອງຊາດົກເປັນປະໂຣຫິດ.

3ເອລີໂຮເຣັບແລະອາຮີຢາ ລູກຊາຍຂອງຊີຊາເປັນເລຂາທິການປະຈຳຣາຊວັງ. ເຢໂຮຊາຟັດ ລູກຊາຍຂອງອາຮີລຸດເປັນຜູ້ບັນທຶກ.

4ເບນາອີຢາ ລູກຊາຍຂອງເຢໂຮຍອາດາເປັນຜູ້ບັນຊາການກອງທັບ. ຊາດົກແລະອາບີອາທາເປັນພວກປະໂຣຫິດ.

5ອາຊາຣີຢາ ລູກຊາຍຂອງນາທານເປັນຫົວໜ້າຜູ້ປົກຄອງແຂວງຕ່າງໆ. ປະໂຣຫິດຊາບຸດ ລູກຊາຍຂອງນາທານເປັນທີ່ປຶກສາຂອງກະສັດ.

6ອາຮີຊາເປັນຜູ້ກຳກັບບັນດາຄົນຮັບໃຊ້ຢູ່ໃນວັງ. ອາໂດນີຣາມ ລູກຊາຍຂອງອັບດາເປັນຜູ້ຄວບຄຸມແຮງງານ.

7ກະສັດໂຊໂລໂມນໄດ້ແຕ່ງຕັ້ງຜູ້ປົກຄອງແຂວງສິບສອງຄົນໄວ້ຢູ່ໃນປະເທດອິດສະຣາເອນ. ພວກນີ້ເປັນພວກທີ່ຈັດສະບຽງອາຫານຈາກທ້ອງຖິ່ນຂອງຕົນ ສຳລັບກະສັດແລະສຳນັກຂອງເພິ່ນ. ແຕ່ລະຄົນຕ້ອງຮັບຜິດຊອບຈັດຫາສະບຽງອາຫານໃຫ້ກຸ້ມເດືອນໜຶ່ງຕໍ່ປີ.

8ຕໍ່ໄປນີ້ ແມ່ນລາຍຊື່ຂອງພວກຂ້າຣາຊການສິບສອງຄົນ ແລະເຂດທ້ອງຖິ່ນທີ່ພວກເຂົາຮັບຜິດຊອບມີດັ່ງນີ້: ເບນເຮີ ຮັບຜິດຊອບເຂດເນີນພູເອຟຣາອິມ.

9ເບັນເດເກ ຮັບຜິດຊອບເມືອງມາກາດ, ຊາອານບິມ, ເບັດເຊເມດ, ເອໂລນ ແລະເບັດຮານານ.

10ເບັນເຮເສັດ ຮັບຜິດຊອບເມືອງອາຣຸບໂບດ, ໂສໂກ ແລະເຂດແດນເຮເຟທັງໝົດ.

11ເບນາບີນາດາບ ຜູ້ທີ່ແຕ່ງງານກັບຕາຟາດ ລູກສາວຂອງກະສັດໂຊໂລໂມນ ຮັບຜິດຊອບອານາເຂດເມືອງໂດເຣທັງໝົດ.

12ບາອານາ ລູກຊາຍຂອງອາຮີລຸດ ຮັບຜິດຊອບເມືອງຕາອານັກ, ເມກິດໂດ ແລະທົ່ວທັງອານາເຂດໃກ້ກັບເມືອງເບັດເຊອານໃກ້ເມືອງຊາເຣທານ ທາງທິດໃຕ້ເມືອງຢິດຊະເຣນ ແລະຈາກເມືອງເບັດເຊອານຈົນເຖິງອາເບັນເມໂຮລາແລະເມືອງໂຢກເມອາມ.

13ເບັນເກເບ ຮັບຜິດຊອບເມືອງຣາໂມດກີເລອາດ ໝູ່ບ້ານຕ່າງໆໃນກີເລອາດທີ່ເປັນຂອງຕະກຸນຢາອີ ເຊື້ອສາຍຄົນໜຶ່ງຂອງມານາເຊ ແລະອານາເຂດອັກໂກບຢູ່ໃນບາຊານຫົກສິບເມືອງໃຫຍ່ ຊຶ່ງລ້ວນແຕ່ມີປ້ອມປ້ອງກັນອັນແໜ້ນໜາ ທັງມີກອນປະຕູເມືອງທີ່ເຮັດດ້ວຍທອງສຳຣິດ.

14ອາຮີນາດາບ ລູກຊາຍຂອງອິດໂດ ຮັບຜິດຊອບເຂດທ້ອງຖິ່ນມະຫານາອິມ.

15ອາຮີມາອາດ ຜູ້ທີ່ໄດ້ແຕ່ງງານກັບນາງບາເສມາດ ລູກສາວອີກຄົນໜຶ່ງຂອງກະສັດໂຊໂລໂມນ ຮັບຜິດຊອບເຂດແດນເນັບທາລີ.

16ບາອານາ ລູກຊາຍຂອງຮູຊາຍ ຮັບຜິດຊອບອານາເຂດອາເຊ ແລະເມືອງເບອາໂລດ;

17ເຢໂຮຊາຟັດ ລູກຊາຍຂອງປາຣູອາ ຮັບຜິດຊອບເຂດແດນອິດຊາຄາ.

18ຊີເມອີ ລູກຊາຍຂອງເອລາ ຮັບຜິດຊອບເຂດແດນເບັນຢາມິນ.

19ເກເບ ລູກຊາຍຂອງອູຣິ ຮັບຜິດຊອບອານາເຂດກີເລອາດຊຶ່ງເຈົ້າສີໂຫນກະສັດຂອງຊາວອາໂມ ແລະເຈົ້າໂອກກະສັດຂອງຊາວບາຊານໄດ້ເປັນຜູ້ປົກຄອງມາກ່ອນ. ນອກຈາກສິບສອງຄົນນີ້ ຍັງມີຜູ້ກວດຣາຊການຄົນໜຶ່ງທີ່ເບິ່ງແຍງໃນດິນແດນຢູດາຍ.

20ປະຊາຊົນຊາວອິດສະຣາເອນແລະຊາວຢູດາມີຈຳນວນຫລວງຫລາຍ ດັ່ງເມັດຊາຍຕາມຝັ່ງທະເລ; ພວກເຂົາກິນແລະດື່ມຢ່າງຊົມຊື່ນຍິນດີ.

21ອານາຈັກຂອງກະສັດໂຊໂລໂມນລວມເອົາທັງຊົນຊາດຕ່າງໆ ຕັ້ງແຕ່ແມ່ນໍ້າເອີຟຣັດໄປຈົນເຖິງດິນແດນຂອງປະເທດເອຢິບ. ພວກນີ້ເສຍສ່ວຍແລະຍອມຢູ່ໃຕ້ອຳນາດຕະຫລອດຊົ່ວຊີວິດຂອງເພິ່ນ.

22ສະບຽງອາຫານທີ່ກະສັດໂຊໂລໂມນຕ້ອງການໃນແຕ່ລະມື້ມີດັ່ງນີ້: ແປ້ງລະອຽດຫົກໂຕນ, ອາຫານສິບສອງໂຕນ,

23ງົວຕຸ້ຍພີສິບໂຕ, ງົວລ້ຽງຈາກທົ່ງນາຊາວໂຕ, ແກະໜຶ່ງຮ້ອຍໂຕ. ນອກຈາກນີ້ ຍັງມີກວາງ, ມັ່ງ, ໂອງ ແລະໄກ່ໂຕອ້ວນພີ.

24ກະສັດໂຊໂລໂມນໄດ້ປົກຄອງດິນແດນທັງໝົດ ທາງທິດຕາເວັນຕົກຂອງແມ່ນໍ້າເອີຟຣັດ ຕັ້ງແຕ່ທິບສາໄປຈົນເຖິງເມືອງກາຊາທາງທິດຕາເວັນຕົກ. ກະສັດທຸກຄົນທີ່ປົກຄອງຢູ່ທາງທິດຕາເວັນຕົກຂອງແມ່ນໍ້າເອີຟຣັດ ຕ່າງກໍຍອມຢູ່ໃຕ້ອຳນາດຂອງກະສັດໂຊໂລໂມນ ແລະເພິ່ນເອງກໍຢູ່ຢ່າງສະຫງົບສຸກກັບປະເທດໃກ້ຄຽງທັງໝົດ.

25ຕາບໃດທີ່ກະສັດໂຊໂລໂມນຍັງມີຊີວິດຢູ່ ປະຊາຊົນທົ່ວທັງຢູດາຍ ແລະອິດສະຣາເອນຕ່າງກໍຢູ່ກັນຢ່າງປອດໄພ, ແຕ່ລະຄອບຄົວກໍມີສວນອະງຸ່ນ ແລະສວນໝາກເດື່ອເທດເປັນຂອງຕົນເອງ.

26ກະສັດໂຊໂລໂມນຍັງມີມ້າສຳລັບລົດຮົບສີ່ໝື່ນໂຕ ແລະມີທະຫານມ້າສິບສອງພັນຄົນ.

27ພວກຜູ້ປົກຄອງສິບສອງຄົນຕ່າງກໍຮັບໜ້າທີ່ໃນແຕ່ລະເດືອນ ເພື່ອລຳລຽງສະບຽງອາຫານໃຫ້ກະສັດໂຊໂລໂມນແລະທຸກຄົນທີ່ກິນຢູ່ໃນວັງ. ພວກເຂົາຈັດສົ່ງທຸກສິ່ງໃຫ້ຕາມທີ່ເພິ່ນຕ້ອງການ.

28ຜູ້ປົກຄອງແຕ່ລະຄົນຍັງໄດ້ແບ່ງປັນເຂົ້າເດືອຍ ແລະເຟືອງຂອງຕົນ ສຳລັບມ້າປະຈຳລົດຮົບ ແລະສຳລັບໃຫ້ສັດໃຊ້ໃນບ່ອນຕ່າງໆຕາມທີ່ຕ້ອງການ.

29ພຣະເຈົ້າໄດ້ໂຜດປະທານສະຕິປັນຍາກັບຄວາມເຂົ້າໃຈຢ່າງພິເສດ ແລະຄວາມຮູ້ຢ່າງລົ້ນເຫລືອໃຫ້ແກ່ກະສັດໂຊໂລໂມນ.

30ກະສັດໂຊໂລໂມນສະຫລາດກວ່າ ພວກນັກປາດຊາວຕາເວັນອອກ ຫລືພວກນັກປາດໃນປະເທດເອຢິບ.

31ເພິ່ນເປັນຜູ້ສະຫລາດກວ່າຄົນທັງປວງ ຄືສະຫລາດກວ່າຊາວເອທານ, ຊາວເອຊະຣາ, ຊາວເຮມານ, ຊາວການໂກນ ແລະຊາວດາກດາ, ບັນດາລູກຊາຍຂອງມາໂຮນ ແລະຊື່ສຽງຂອງເພິ່ນກໍຊ່າລືໄປທົ່ວປະເທດໃກ້ຄຽງ.

32ເພິ່ນໄດ້ແຕ່ງສຸພາສິດສາມພັນບົດ ແລະແຕ່ງເພງໜຶ່ງພັນຫ້າບົດ.

33ເພິ່ນໄດ້ບັນລະຍາຍເຖິງເລື່ອງຕົ້ນໄມ້ແລະພືດຜົນຕ່າງໆ ນັບແຕ່ຕົ້ນແປກທີ່ພູເລບານອນ ຈົນເຖິງຕົ້ນຫູສົບທີ່ເກີດຂຶ້ນຕາມກຳແພງ; ເພິ່ນເວົ້າເຖິງເລື່ອງສັດ, ນົກ, ສັດເລືອຄານ ແລະປາ.

34ບັນດາກະສັດທົ່ວທັງແຜ່ນດິນໂລກ ທີ່ໄດ້ຍິນເຖິງຄວາມສະຫລາດຂອງກະສັດໂຊໂລໂມນ ຕ່າງກໍໄດ້ສົ່ງຄົນມາຟັງສະຕິປັນຍາຂອງເພິ່ນ.

← Chapter 3 Jump to: Chapter 5 →