1 Kings 6

Lao Bible 2012 (ພຣະຄຳພີສັກສິ)

← Chapter 5 Jump to: Chapter 7 →

1ຫລັງຈາກທີ່ປະຊາຊົນຊາວອິດສະຣາເອນໄດ້ອອກມາຈາກປະເທດເອຢິບເປັນເວລາສີ່ຮ້ອຍແປດສິບປີແລ້ວ ໃນຣາຊການປີທີສີ່ ຂອງກະສັດໂຊໂລໂມນແຫ່ງຊາດອິດສະຣາເອນ ຄືເດືອນທີສອງອັນກົງກັບເດືອນຊີເຟ ເພິ່ນໄດ້ເລີ່ມຕົ້ນສ້າງວິຫານຂອງພຣະເຈົ້າຢາເວ.

2ຂ້າງໃນວິຫານຂອງພຣະເຈົ້າຢາເວທີ່ກະສັດໂຊໂລໂມນສ້າງມີລວງຍາວຊາວເຈັດແມັດ; ກວ້າງເກົ້າແມັດ ແລະສູງສິບສາມແມັດເຄິ່ງ.

3ຫ້ອງຊື່ທາງປະຕູເຂົ້າເລິກສີ່ແມັດເຄິ່ງ ແລະກວ້າງເກົ້າແມັດ ຊຶ່ງກວ້າງເທົ່າກັບຕົວພຣະວິຫານ.

4ສ່ວນຝາກຳແພງຂອງພຣະວິຫານ ເພິ່ນໄດ້ສ້າງວົງກົບປ່ອງຢ້ຽມ ກວ້າງທາງດ້ານໃນ, ແຕ່ແຄບທາງດ້ານນອກ.

5ດ້ານຂ້າງແລະດ້ານຫລັງພຣະວິຫານຕໍ່ຈາກລະບຽງດ້ານຂ້າງນອກ ເພິ່ນໄດ້ສ້າງຫ້ອງສາມຊັ້ນ ຊຶ່ງແຕ່ລະຊັ້ນສູງສອງແມັດຊາວເຊັນ.

6ຫ້ອງຊັ້ນລຸ່ມກວ້າງສອງແມັດຊາວເຊັນ; ຫ້ອງຊັ້ນກາງກວ້າງສອງແມັດເຈັດສິບເຊັນ ແລະຫ້ອງຊັ້ນເທິງກວ້າງສາມແມັດສິບເຊັນ. ຝາຂອງພຣະວິຫານໃນແຕ່ລະຊັ້ນບາງກວ່າຊັ້ນລຸ່ມຂຶ້ນໄປ ເພື່ອວ່າແຕ່ລະຫ້ອງຈະຕໍ່ກັນໂດຍບໍ່ຕ້ອງໃຊ້ໄມ້ຂາງ.

7ຫີນທີ່ສ້າງພຣະວິຫານນີ້ໄດ້ຈັດຕຽມມາຈາກບ່ອນຂຸດຫີນ ເພື່ອວ່າໃນຂະນະທີ່ກຳລັງທຳການກໍ່ສ້າງຢູ່ນັ້ນ ຈະບໍ່ໄດ້ມີສຽງດັງຂອງຄ້ອນຕີ, ຂວານ ຫລືເຄື່ອງມືຕ່າງໆທີ່ເປັນເຫຼັກ.

8ທາງເຂົ້າຫ້ອງຊັ້ນລຸ່ມ ທີ່ຕໍ່ຕົວພຣະວິຫານອອກໄປສູ່ທາງໃຕ້ຂອງພຣະວິຫານນີ້ ມີຂັ້ນໄດຂຶ້ນໄປຫາຊັ້ນທີສອງ ແລະຊັ້ນທີສາມ.

9ສະນັ້ນ ກະສັດໂຊໂລໂມນຈຶ່ງສ້າງພຣະວິຫານສຳເລັດລົງ. ເພິ່ນໃຊ້ໄມ້ແປກເຮັດຂື່ແລະເພດານ.

10ຊານຂອງຫ້ອງສາມຊັ້ນແຕ່ລະຊັ້ນ ທີ່ຕໍ່ຕົວພຣະວິຫານອອກໄປສູງສອງແມັດຊາວເຊັນ ຊຶ່ງສ້າງຕິດຝາຂອງພຣະວິຫານໂດຍໃຊ້ໄມ້ແປກເປັນໄມ້ຂາງ.

11ພຣະເຈົ້າຢາເວໄດ້ກ່າວແກ່ກະສັດໂຊໂລໂມນວ່າ,

12“ຖ້າເຈົ້າປະຕິບັດຕາມກົດບັນຍັດ ແລະຄຳສັ່ງທຸກຂໍ້ຂອງເຮົາ ເຮົາຈະປະຕິບັດຕໍ່ເຈົ້າຕາມຄຳສັນຍາທີ່ເຮົາໄດ້ມີໄວ້ກັບດາວິດພໍ່ຂອງເຈົ້າ.

13ເຮົາຈະຢູ່ກັບປະຊາຊົນຊາວອິດສະຣາເອນຂອງເຮົາ ໃນວິຫານທີ່ເຈົ້າກຳລັງສ້າງຢູ່ນີ້ ແລະເຮົາຈະບໍ່ປະຖິ້ມພວກເຂົາຈັກເທື່ອ.”

14ດັ່ງນັ້ນ ກະສັດໂຊໂລໂມນຈຶ່ງໄດ້ສ້າງພຣະວິຫານສຳເລັດຮຽບຮ້ອຍ.

15ຝາຂ້າງໃນຂອງພຣະວິຫານ ຕັ້ງແຕ່ພື້ນຈົນຈຸເພດານແມ່ນເຮັດດ້ວຍແປ້ນໄມ້ແປກ ແລະພື້ນກໍປູດ້ວຍໄມ້ສົນ.

16ຫ້ອງທາງໃນເອີ້ນວ່າ ຫ້ອງສັກສິດທີ່ສຸດໄດ້ສ້າງຢູ່ທາງຫລັງພຣະວິຫານຊຶ່ງຍາວໄດ້ເກົ້າແມັດ ແລະຂັ້ນດ້ວຍແປ້ນໄມ້ແປກຕັ້ງແຕ່ພື້ນຈົນຈຸເພດານ.

17ຫ້ອງທີ່ຢູ່ຕໍ່ໜ້າຫ້ອງສັກສິດທີ່ສຸດຍາວສິບແປດແມັດ.

18ສ່ວນແປ້ນໄມ້ແປກກໍຖືກແກະສະຫລັກລວດລາຍເປັນຮູບໝາກນໍ້າເຕົ້າແລະຮູບດອກໄມ້; ຝາຂ້າງໃນທັງໝົດແມ່ນແອ້ມດ້ວຍໄມ້ແປກເພື່ອບໍ່ໃຫ້ເຫັນຫີນ.

19ຫ້ອງຊັ້ນໃນທາງຫລັງພຣະວິຫານ ແມ່ນໄດ້ສ້າງໃຫ້ເປັນບ່ອນໄວ້ຫີບພັນທະສັນຍາຂອງພຣະເຈົ້າຢາເວ.

20ຫ້ອງຊັ້ນໃນນີ້ຍາວເກົ້າແມັດ ກວ້າງເກົ້າແມັດ ສູງເກົ້າແມັດ ແລະໂອບດ້ວຍຄຳນໍ້າໜຶ່ງ. ສ່ວນແທ່ນບູຊາກໍແອ້ມດ້ວຍໄມ້ແປກ.

21ທາງຂ້າງໃນຂອງພຣະວິຫານແມ່ນໄດ້ໃຊ້ຄຳໂອບ ແລະມີໂສ້ຄຳຂວາງຂັ້ນທາງເຂົ້າຫ້ອງຊັ້ນໃນຂອງພຣະວິຫານ ຊຶ່ງຫ້ອງນີ້ກໍໄດ້ໃຊ້ຄຳໂອບເຊັ່ນດຽວກັນ.

22ທົ່ວທັງພາຍໃນຂອງພຣະວິຫານໄດ້ໃຊ້ຄຳໂອບ ລວມທັງແທ່ນບູຊາໃນຫ້ອງສັກສິດທີ່ສຸດນັ້ນດ້ວຍ.

23ເພິ່ນສ້າງເຄຣຸບ ສອງຕົນດ້ວຍໄມ້ໝາກກອກເທດ ແລະປະໄວ້ໃນຫ້ອງສັກສິດທີ່ສຸດ, ແຕ່ລະຕົນສູງສີ່ແມັດສີ່ສິບເຊັນ.

24ເຄຣຸບທັງສອງຕົນນີ້ມີຮູບຮ່າງຂະໜາດດຽວກັນ. ແຕ່ລະຕົນມີປີກສອງປີກ ແຕ່ລະປີກຍາວສອງແມັດຊາວເຊັນ ເພື່ອວ່າໃຫ້ໄລຍະແຕ່ສົ້ນປີກເບື້ອງໜຶ່ງໄປຫາສົ້ນປີກອີກເບື້ອງໜຶ່ງ ຍາວສີ່ແມັດສີ່ສິບເຊັນ.

27ເພິ່ນວາງເຄຣຸບທັງສອງນີ້ໄວ້ຄຽງຂ້າງກັນໃນຫ້ອງສັກສິດທີ່ສຸດ ເພື່ອປີກຂອງສັດທັງສອງຕົນນີ້ຈະຈຸໃສ່ກັນ ກົງກັບໃຈກາງຂອງຫ້ອງ ແລະໃຫ້ປີກອີກຂ້າງໜຶ່ງນັ້ນຈຸຝາ.

28ເຄຣຸບທັງສອງຕົນນີ້ແມ່ນໄດ້ໃຊ້ຄຳໂອບ.

29ຝາຫ້ອງໂຖງກັບຫ້ອງຊັ້ນໃນທັງໝົດໃນພຣະວິຫານໄດ້ແກະສະຫລັກເປັນຮູບເຄຣຸບ, ຮູບຕົ້ນຕານ ແລະຮູບດອກໄມ້.

30ແມ່ນແຕ່ພື້ນຂອງພຣະວິຫານກໍໃຊ້ຄຳປູ.

31ປະຕູສອງຊັ້ນເຮັດດ້ວຍໄມ້ໝາກກອກເທດ ຊຶ່ງເປັນປະຕູຂັ້ນທາງເຂົ້າຫ້ອງສັກສິດທີ່ສຸດ; ຈອມປະຕູກໍເປັນຮູບໂຄ້ງປາຍແຫລມ.

32ເພິ່ນໄດ້ສ້າງບານປະຕູທັງສອງນີ້ດ້ວຍໄມ້ໝາກກອກເທດແກະສະຫລັກຮູບເຄຣຸບ, ຮູບຕົ້ນຕານ ແລະຮູບດອກໄມ້. ປະຕູ, ເຄຣຸບ ແລະຮູບຕົ້ນຕານ ລ້ວນແຕ່ໃຊ້ຄຳໂອບທັງໝົດ.

33ສ່ວນຂອບປະຕູທາງເຂົ້າຫ້ອງໂຖງນັ້ນເປັນຮູບສີ່ຫລ່ຽມຍາວ ແລະເຮັດດ້ວຍໄມ້ໝາກກອກເທດ.

34ມີປະຕູພັບສອງອັນເຮັດດ້ວຍໄມ້ສົນ

35ແລະເອ້ດ້ວຍຮູບເຄຣຸບ, ຮູບຕົ້ນຕານ ແລະຮູບດອກໄມ້ ຊຶ່ງບັນດາຊ່າງໄດ້ໃຊ້ຄຳໂອບເທົ່າກັນໝົດ.

36ຢູ່ຕໍ່ໜ້າພຣະວິຫານ ເພິ່ນໄດ້ສ້າງເດີ່ນອ້ອມດ້ວຍກຳແພງ ລຽນຫີນສາມກ້ອນເປັນຊັ້ນໜຶ່ງ ແລະທຸກຊັ້ນໃດ ກໍໄດ້ສອດໄມ້ຂາງທີ່ເປັນໄມ້ແປກໃສ່.

37ກະສັດໂຊໂລໂມນໄດ້ສ້າງພື້ນຖານຂອງພຣະວິຫານຂອງພຣະເຈົ້າຢາເວໃນເດືອນທີສອງ ອັນກົງກັບເດືອນຊີເຟ ໃນຣາຊການປີທີສີ່ຂອງເພິ່ນ.

38ການສ້າງພຣະວິຫານໄດ້ສຳເລັດລົງຢ່າງຮຽບຮ້ອຍ ຕາມແຜນການທີ່ໄດ້ກະໄວ້ ໃນເດືອນທີແປດອັນກົງກັບເດືອນບູເລ ໃນຣາຊການປີທີສິບເອັດຂອງກະສັດໂຊໂລໂມນ. ກະສັດໂຊໂລໂມນໄດ້ໃຊ້ເວລາເຈັດປີໃນການສ້າງພຣະວິຫານນີ້.

← Chapter 5 Jump to: Chapter 7 →