1 Kings 7 — Lao Bible 2012 (ພຣະຄຳພີສັກສິ)

1ກະສັດໂຊໂລໂມນຍັງໄດ້ສ້າງວັງສຳລັບຕົນເອງ ແລະເພິ່ນໄດ້ໃຊ້ເວລາເຖິງສິບສາມປີຈຶ່ງສ້າງສຳເລັດ.

2ເພິ່ນສ້າງຫ້ອງໂຖງແຫ່ງດົງເລບານອນ ຊຶ່ງຍາວສີ່ສິບສີ່ແມັດ ກວ້າງຊາວສອງແມັດ ແລະສູງສິບສາມແມັດເຄິ່ງ. ມີເສົາໄມ້ແປກສາມແຖວ ແຖວລະສິບຫ້າເສົາ ຊຶ່ງມີຂື່ເປັນໄມ້ແປກກາດໃສ່ເສົາເຫຼົ່ານີ້. ສ່ວນເພດານແມ່ນໄດ້ເຮັດດ້ວຍໄມ້ແປກທັງນັ້ນ ຊຶ່ງຕໍ່ອອກໄປຮອດເພດານຫ້ອງໄວ້ເຄື່ອງຂອງ ແລະມີເສົາຄໍ້າ.

4ແຕ່ລະຝາທັງສອງເບື້ອງມີປ່ອງຢ້ຽມສາມປ່ອງ.

5ຂອບປະຕູແລະຂອບປ່ອງຢ້ຽມທັງຫລາຍ ເປັນຮູບສີ່ຫລ່ຽມຍາວ. ປ່ອງຢ້ຽມສາມປ່ອງຂອງແຕ່ລະຝາປິ່ນໜ້າໃສ່ກັນ.

6ຫ້ອງໂຖງລະຫວ່າງເສົາຍາວຊາວສອງແມັດ ກວ້າງສິບສາມແມັດເຄິ່ງ ແລະລະບຽງທາງໜ້າກໍມີຫລັງຄາແລະມີເສົາຄໍ້າ.

7ຫ້ອງບັນລັງ ຊຶ່ງເອີ້ນອີກວ່າຫ້ອງຕັດສິນຄວາມ ເປັນບ່ອນທີ່ກະສັດໂຊໂລໂມນຕັດສິນຄະດີຕ່າງໆ. ຫ້ອງນີ້ປູແລະແອ້ມດ້ວຍໄມ້ແປກຕັ້ງແຕ່ພື້ນຈົນຈຸເພດານ.

8ບໍຣິເວນທີ່ກະສັດໂຊໂລໂມນຢູ່ນັ້ນແມ່ນໄດ້ສ້າງຂຶ້ນໃນເດີ່ນອີກແຫ່ງໜຶ່ງ ທີ່ທາງເບື້ອງຫລັງຂອງຫ້ອງຕັດສິນຄວາມ. ຫ້ອງນີ້ແມ່ນໄດ້ສ້າງແບບດຽວກັບຕົວຕຶກອື່ນໆ. ເພິ່ນໄດ້ສ້າງເຮືອນແບບດຽວກັນນີ້ໃຫ້ເມຍຂອງເພິ່ນ ຜູ້ທີ່ເປັນລູກສາວຂອງກະສັດແຫ່ງເອຢິບ.

9ຫໍໂຮງຕ່າງໆພ້ອມທັງເດີ່ນໃຫຍ່ແມ່ນໄດ້ສ້າງດ້ວຍຫີນອັນມີຄ່າ ທີ່ເລືອກສັນຢ່າງດີຕັ້ງແຕ່ພື້ນຖານຂອງຕຶກຈົນເຖິງຂອບຫລັງຄາ. ຫີນນີ້ໄດ້ຕັດມາຈາກບໍ່ຫີນ ແລະວັດແທກທັງຂ້າງໃນ ແລະທັງຂ້າງນອກ ແລະໃຊ້ເລື່ອຍຕັດ.

10ພື້ນຖານຕ່າງໆແມ່ນສ້າງດ້ວຍຫີນກ້ອນໃຫຍ່ ຊຶ່ງໄດ້ຕັດມາຈາກບໍ່ຫີນ. ບາງກ້ອນກໍຍາວໄດ້ສີ່ຫາຫ້າແມັດ.

11ຢູ່ເທິງຫີນເຫຼົ່ານີ້ມີຫີນຢ່າງອື່ນອີກທີ່ໄດ້ຕັດອອກມາ ຕາມຂະໜາດແລະມີຂື່ເປັນໄມ້ແປກ.

12ເດີ່ນຂອງຣາຊວັງ, ເດີ່ນຂ້າງໃນຂອງວິຫານຂອງພຣະເຈົ້າຢາເວ ແລະຫ້ອງຊື່ກັບທາງເຂົ້າພຣະວິຫານມີກຳແພງເປັນຫີນ ຄືລຽນຫີນທີ່ຕັດນັ້ນສາມກ້ອນເປັນຊັ້ນໜຶ່ງ ແລະແຕ່ລະຊັ້ນກໍໄດ້ວາງໄມ້ຂາງທີ່ເປັນໄມ້ແປກໃສ່.

13ກະສັດໂຊໂລໂມນໄດ້ສົ່ງຄົນໄປນຳເອົາຊາຍຄົນໜຶ່ງ; ຊາຍຄົນນີ້ຊື່ວ່າຮູຣາມ ຊ່າງສີມືຜູ້ທີ່ອາໄສຢູ່ໃນເມືອງຕີເຣ. ລາວເປັນຊ່າງສີມືທີ່ຊຳນິຊຳນານກ່ຽວກັບທອງສຳຣິດ.

14ພໍ່ຂອງລາວ ເປັນໄທເມືອງຕີເຣ ຜູ້ທີ່ໄດ້ຕາຍໄປແລ້ວນັ້ນ ກໍເປັນຊ່າງສີມືກ່ຽວກັບທອງສຳຣິດເໝືອນກັນ. ແມ່ຂອງລາວເປັນຄົນມາຈາກເຜົ່າເນັບທາລີ. ຮູຣາມເປັນຊ່າງສີມືທີ່ມີສະຕິປັນຍາ ແລະເປັນຜູ້ມີປະສົບການ. ລາວໄດ້ສະໜອງຕາມຄຳເຊີນຂອງກະສັດໂຊໂລໂມນ ທີ່ໃຫ້ລາວຮັບຜິດຊອບວຽກງານກ່ຽວກັບທອງສຳຣິດທັງໝົດ.

15ຮູຣາມຫລໍ່ເສົາທອງສຳຣິດສອງຕົ້ນ ແຕ່ລະຕົ້ນສູງແປດແມັດ ແລະລວງອ້ອມ ມີຫ້າແມັດສາມສິບເຊັນ. ເສົານີ້ຕັ້ງຢູ່ທີ່ທາງເຂົ້າຂອງພຣະວິຫານ.

16ລາວຍັງໄດ້ເຮັດຫົວເສົາສອງອັນໃສ່ເທິງຈອມເສົາ ແຕ່ລະອັນສູງໄດ້ສອງແມັດຊາວເຊັນ.

17ຈອມເສົາແຕ່ລະອັນແມ່ນເອ້ດ້ວຍສາຍສ້ອຍທີ່ຖັກເປັນລວດລາຍ

18ແລະໝາກພິລາທີ່ເຮັດດ້ວຍທອງສຳຣິດສອງແຖວ.

19ຫົວເສົານີ້ເປັນເໝືອນຮູບດອກບົວສູງໜຶ່ງແມັດແປດສິບເຊັນ.

20ເພິ່ນເອົາຫົວເສົານີ້ວາງໃສ່ບ່ອນມົນທົນ ຊຶ່ງຢູ່ເທິງສາຍສ້ອຍທີ່ຕົບແຕ່ງ, ແຕ່ລະ ຫົວເສົາມີຮູບໝາກພິລາສອງຮ້ອຍຮູບລຽນອ້ອມເປັນສອງແຖວ.

21ຮູຣາມໄດ້ຕັ້ງເສົາສອງຕົ້ນນີ້ຂຶ້ນຕໍ່ໜ້າທາງເຂົ້າຂອງພຣະວິຫານ. ເສົາຢູ່ທາງດ້ານໃຕ້ຊື່ວ່າຢາກິນ ແລະເສົາຢູ່ທາງດ້ານເໜືອຊື່ວ່າໂບອາດ.

22ທີ່ເທິງຈອມຫົວເສົາມີຮູບດອກບົວເປັນທອງສຳຣິດ. ດັ່ງນັ້ນ ວຽກງານການສ້າງເສົາຈຶ່ງສຳເລັດເສັດສິ້ນລົງ.

23ຮູຣາມຍັງໄດ້ເຮັດຂັນທອງສຳຣິດສູງສອງແມັດຊາວເຊັນ ປາກກວ້າງສີ່ແມັດສີ່ສິບເຊັນ ແລະລວງອ້ອມສິບສາມແມັດຊາວເຊັນ.

24ຢູ່ອ້ອມຂອບນອກຂອງຂັນ ມີຮູບໝາກນໍ້າເຕົ້າທອງສຳຣິດສອງແຖວ ທີ່ຫລໍ່ຕິດກັບຂັນ.

25ຂັນນີ້ວາງໃສ່ເທິງຮູບງົວທອງສຳຣິດສິບສອງໂຕ ທີ່ປິ່ນໜ້າອອກນອກ. ແຕ່ລະສາມໂຕໃດໄດ້ອວ່າຍໜ້າອອກໄປສູ່ແຕ່ລະທິດທາງ.

26ຂັນນີ້ໜາໄດ້ເຈັດເຊັນເຄິ່ງ. ຂອບຂັນຄືກັບຂອບຈອກ ຊຶ່ງທາງນອກແກະສະຫລັກເໝືອນກັບດອກບົວ. ຂັນໜ່ວຍນີ້ບັນຈຸນໍ້າໄດ້ສີ່ໝື່ນລິດ.

27ຮູຣາມຍັງໄດ້ສ້າງກວຽນທອງສຳຣິດສິບຄັນ, ແຕ່ລະຄັນຍາວໜຶ່ງແມັດແປດສິບເຊັນ ແລະກວ້າງໜຶ່ງແມັດແປດສິບເຊັນ ແລະສູງໜຶ່ງແມັດສາມສິບເຊັນ.

28ກວຽນນີ້ແມ່ນເຮັດດ້ວຍແຜ່ນທອງສຳຣິດເປັນຮູບສີ່ຫລ່ຽມແລະໃສ່ຂອບ.

29ແຜ່ນເຫຼົ່ານີ້ມີຮູບສິງ, ຮູບງົວ ແລະເຄຣຸບ. ຢູ່ຕາມຂອບທາງເທິງ ແລະທາງລຸ່ມຂອງຮູບສິງ ແລະຮູບງົວມີຮູບພວງມະໄລຢ່າງງົດງາມ.

30ກວຽນແຕ່ລະຄັນມີລໍ້ທອງສຳຣິດສີ່ລໍ້ ແລະມີເພົາເປັນທອງສຳຣິດ. ທີ່ແຈທັງສີ່ນັ້ນເປັນທອງສຳຣິດຄໍ້າອ່າງໄວ້; ເຄື່ອງຄໍ້ານີ້ໄດ້ຕົບແຕ່ງດ້ວຍກົງຈັກສັບເປັນລວດລາຍ.

31ຢູ່ເທິງກວຽນມີຂອບມົນໆສຳລັບຕັ້ງອ່າງ ຊຶ່ງສູງສີ່ສິບຫ້າເຊັນ ນັບຈາກຂ້າງເທິງຂອງກວຽນລົງໄປ ແລະເລິກລົງໄປສິບແປດເຊັນ. ຂອບນີ້ໄດ້ແກະສະຫລັກເປັນລວດລາຍອ້ອມຮອບ.

32ກົງລໍ້ທັງສີ່ທີ່ຢູ່ລຸ່ມຖັງສູງຫົກສິບຫົກເຊັນ ແລະມີເພົາເປັນທ່ອນດຽວກັນກັບກວຽນ.

33ລໍ້ທັງໝົດເໝືອນກັບລໍ້ລົດຮົບ; ເພົາ, ກົງ, ດີ້ວ ແລະດຸມລໍ້ແມ່ນເຮັດດ້ວຍທອງສຳຣິດທັງໝົດ.

34ກວຽນແຕ່ລະຄັນມີຂາຄໍ້າສີ່ຂາທີ່ແຈເບື້ອງລຸ່ມຂອງມັນ ຊຶ່ງເປັນທ່ອນດຽວກັນກັບກວຽນ.

35ຢູ່ເທິງປາກກວຽນແຕ່ລະຄັນມີແຂບອ້ອມ ຍາວໄດ້ຊາວສອງເຊັນ. ຂາຄໍ້າແລະແຜ່ນຝາດ້ານຂ້າງແມ່ນເຮັດເປັນທ່ອນດຽວກັນກັບກວຽນ.

36ຂາຄໍ້າແລະແຜ່ນເຫຼົ່ານີ້ໄດ້ຄວັດແກະສະຫລັກເຄຣຸບ, ຮູບສິງ ແລະຮູບຕົ້ນຕານ ບໍ່ວ່າບ່ອນໃດທີ່ເປັນວ່າງກໍມີຮູບພວງມະໄລອ້ອມຢູ່ໄປທົ່ວ.

37ຮູຣາມໄດ້ສ້າງກວຽນທັງໝົດຢ່າງນີ້ ຄືທຸກຄັນແມ່ນເປັນແບບດຽວກັນໝົດ ແລະມີຂະໜາດຮູບຮ່າງຢ່າງດຽວກັນ.

38ຮູຣາມເຮັດອ່າງສິບໜ່ວຍ. ອ່າງໜ່ວຍໜຶ່ງສຳລັບກວຽນລຳໜຶ່ງ. ແຕ່ລະໜ່ວຍກວ້າງໜຶ່ງແມັດແປດສິບເຊັນ ແລະບັນຈຸນໍ້າໄດ້ແປດຮ້ອຍລິດ.

39ລາວໄດ້ເອົາກວຽນຫ້າລຳຕັ້ງໄວ້ທາງທິດໃຕ້ຂອງພຣະວິຫານ ແລະອີກຫ້າລຳຕັ້ງໄວ້ທາງທິດເໜືອ. ສ່ວນອ່າງທອງສຳຣິດນັ້ນ ລາວໄດ້ເອົາໄປຕັ້ງໄວ້ຢູ່ທີ່ແຈທາງທິດຕາເວັນອອກຂອງພຣະວິຫານ.

40ຮູຣາມຍັງໄດ້ເຮັດໝໍ້, ຊວ້ານ ແລະຖ້ວຍ. ລາວສ້າງທຸກສິ່ງ ສຳລັບວິຫານຂອງພຣະເຈົ້າຢາເວໃຫ້ກະສັດໂຊໂລໂມນເປັນທີ່ສຳເລັດ. ລາວໄດ້ສ້າງສິ່ງດັ່ງຕໍ່ໄປນີ້: ເສົາສອງຕົ້ນ ຫົວເສົາຮັບເພດານສອງອັນທີ່ເປັນຮູບຖ້ວຍ ສາຍສ້ອຍທີ່ຖັກເປັນລາຍຮູບໂສ້ຂອງແຕ່ລະເສົາ ຮູບໝາກພິລາທອງສຳຣິດສີ່ຮ້ອຍໜ່ວຍ ແຖວລະຮ້ອຍໜ່ວຍເປັນສອງແຖວອ້ອມແຕ່ລະເສົາ ກວຽນສິບລຳ ອ່າງສິບໜ່ວຍ ຂັນໃຫຍ່ ຮູບງົວສິບສອງໂຕສຳລັບຄໍ້າຂັນໃຫຍ່ ໝໍ້, ຊ້ວານ ແລະຖ້ວຍ. ເຄື່ອງທຸກຢ່າງສຳລັບພຣະວິຫານຂອງພຣະເຈົ້າຢາເວທີ່ຮູຣາມໄດ້ເຮັດໃຫ້ກະສັດໂຊໂລໂມນນັ້ນ ເປັນທອງສຳຣິດທີ່ຂັດຢ່າງດີທັງນັ້ນ.

46ກະສັດໄດ້ສັ່ງໃຫ້ເຮັດສິ່ງເຫຼົ່ານີ້ທີ່ໂຮງຫລອມ ຢູ່ລະຫວ່າງເມືອງຊຸກໂກດ ແລະເມືອງຊາເຣທານໃນຮ່ອມພູຈໍແດນ.

47ກະສັດໂຊໂລໂມນບໍ່ໄດ້ຊັ່ງຕວງເບິ່ງເຄື່ອງທອງສຳຣິດເຫຼົ່ານີ້ ເພາະມັນມີຫລາຍໂພດ. ດັ່ງນັ້ນ ຈຶ່ງບໍ່ຮູ້ວ່າມັນຊັ່ງໄດ້ເທົ່າໃດແທ້.

48ກະສັດໂຊໂລໂມນຍັງໄດ້ເຮັດເຄື່ອງໃຊ້ໃນວິຫານຂອງພຣະເຈົ້າຢາເວດ້ວຍຄຳ ມີດັ່ງນີ້: ແທ່ນບູຊາ, ໂຕະສຳລັບໃສ່ເຂົ້າຈີ່ຖວາຍແກ່ພຣະເຈົ້າ,

49ໂຕະຮອງຕີນຕະກຽງສິບໜ່ວຍຕັ້ງຢູ່ຕໍ່ໜ້າບ່ອນສັກສິດທີ່ສຸດ ຄືຫ້າໜ່ວຍຢູ່ທາງໃຕ້ ແລະອີກຫ້າໜ່ວຍຢູ່ທາງເໜືອ; ດອກໄມ້, ຕະກຽງ ແລະເຄື່ອງຄີບ;

50ຈອກ, ມີດຕັດສຳລັບຕັດໃສ້ຕະກຽງ, ຊາມ, ຖ້ວຍສຳລັບໃສ່ເຄື່ອງຫອມ, ໝໍ້ສຳລັບໃສ່ຖ່ານໄຟແດງ, ບານພັບປະຕູບ່ອນສັກສິດທີ່ສຸດ ແລະບານພັບປະຕູທາງນອກພຣະວິຫານ. ສິ່ງເຫຼົ່ານີ້ໄດ້ໃຊ້ຄຳເຮັດທັງໝົດ.

51ເມື່ອກະສັດໂຊໂລໂມນເຮັດທຸກສິ່ງສຳລັບວິຫານຂອງພຣະເຈົ້າຢາເວສຳເລັດລົງແລ້ວ ເພິ່ນໄດ້ນຳເອົາເງິນ, ຄຳ ແລະເຄື່ອງໃຊ້ຕ່າງໆທີ່ກະສັດດາວິດພໍ່ຂອງຕົນໄດ້ອຸທິດຖວາຍນັ້ນ ໄປມ້ຽນໄວ້ຢູ່ໃນຫ້ອງເກັບເຄື່ອງຂອງວິຫານຂອງພຣະເຈົ້າຢາເວ.