Hosea 6

Lao Bible 2012 (ພຣະຄຳພີສັກສິ)

← Chapter 5 Jump to: Chapter 7 →

1ປະຊາຊົນເວົ້າວ່າ, “ໃຫ້ພວກເຮົາກັບຄືນໄປຫາພຣະເຈົ້າຢາເວເທາະ ພຣະອົງໄດ້ເຮັດໃຫ້ພວກເຮົາເຈັບປວດ ແຕ່ພຣະອົງຈະຮັກສາພວກເຮົາໃຫ້ດີຢ່າງແນ່ນອນ; ພຣະອົງໄດ້ເຮັດໃຫ້ພວກເຮົາມີບາດແຜ ແຕ່ພຣະອົງຈະພັນບາດແຜໃຫ້.

2ພາຍໃນສອງຫາສາມວັນ ພຣະອົງຈະໃຫ້ພວກເຮົາຄ່ອຍໆດີຂຶ້ນ ແລ້ວພວກເຮົາກໍຈະມີຊີວິດຢູ່ຊ້ອງໜ້າພຣະອົງ.

3ຈົ່ງໃຫ້ພວກເຮົາພະຍາຍາມຮູ້ຈັກພຣະເຈົ້າຢາເວ. ພຣະອົງຈະມາຫາພວກເຮົາຢ່າງແນ່ນອນຕອນຮຸ່ງເຊົ້າ ແລະແນ່ແທ້ ດັ່ງຝົນລະດູໃບໄມ້ປົ່ງ ທີ່ຕົກລົງໃສ່ຜືນແຜ່ນດິນໂລກ.”

4“ເອຟຣາອິມ ແລະຢູດາເອີຍ ເຮົາຈະເຮັດແນວໃດກັບພວກເຈົ້າ? ຄວາມຮັກທີ່ພວກເຈົ້າມີຕໍ່ເຮົານັ້ນ ກໍຈືດຈາງເຫືອດຫາຍໄປຢ່າງໄວວາ ເໝືອນນໍ້າໝອກໃນຕອນເຊົ້າ.

5ເພາະສະນັ້ນ ເຮົາຈຶ່ງໃຊ້ຜູ້ທຳນວາຍຂອງເຮົານຳເອົາການພິພາກສາ ແລະການທຳລາຍມາສູ່ພວກເຈົ້າ. ສິ່ງທີ່ເຮົາຕ້ອງການຈາກພວກເຈົ້ານັ້ນ ກໍເຂົ້າໃຈແລະເຫັນໄດ້ງ່າຍຄື:

6ເຮົາຕ້ອງການໃຫ້ພວກເຈົ້າຮັກເຮົາຢ່າງຈິງໃຈ ບໍ່ແມ່ນນຳສັດມາຖວາຍບູຊາ. ເຮົາຢາກໃຫ້ປະຊາຊົນຂອງເຮົາຮັບຮູ້ພຣະເຈົ້າ ຫລາຍກວ່າທີ່ຈະເຜົາສັດຖວາຍບູຊາ.

7ແຕ່ພໍເມື່ອພວກເຂົາໄດ້ເຂົ້າໄປໃນດິນແດນທີ່ອາດາມ ພວກເຂົາກໍໄດ້ລະເມີດພັນທະສັນຍາ ທີ່ເຮົາໄດ້ມີໄວ້ກັບພວກເຂົານັ້ນ.

8ກີເລອາດເປັນເມືອງທີ່ເຕັມໄປດ້ວຍຄົນຊົ່ວ ແລະອາຊະຍາກອນ.

9ພວກປະໂຣຫິດເປັນດັ່ງກຸ່ມໂຈນທີ່ຄອຍດັກທຳຮ້າຍຄົນ. ແມ່ນແຕ່ຕາມຖະໜົນຫົນທາງໄປສູ່ສະຖານທີ່ຊີເຄມ ກໍມີການຂ້າຟັນລັນແທງກັນ. ພວກເຂົາໄດ້ເຮັດຊົ່ວໂດຍເຈດຕະນາແທ້ໆ

10ເຮົາໄດ້ເຫັນສິ່ງອັນໜ້າຢ້ານຫລາຍໃນຊາດອິດສະຣາເອນ ຄືປະຊາຊົນຂອງເຮົາໄດ້ເຮັດໃຫ້ຕົນເອງເປັນມົນທິນ ໂດຍການຂາບໄຫວ້ຮູບເຄົາຣົບ.

11ສຳລັບພວກເຈົ້າທີ່ເປັນຊາວຢູດານັ້ນ ເຮົາໄດ້ກຳນົດເວລາເພື່ອລົງໂທດພວກເຈົ້າໄວ້ແລ້ວຄືກັນ ສຳລັບສິ່ງທີ່ພວກເຈົ້າກຳລັງເຮັດຢູ່ນັ້ນ.”

← Chapter 5 Jump to: Chapter 7 →