Revelation 7

Lao Bible 2012 (ພຣະຄຳພີສັກສິ)

← Chapter 6 Jump to: Chapter 8 →

1ຫລັງຈາກນັ້ນ ຂ້າພະເຈົ້າໄດ້ເຫັນເທວະດາສີ່ຕົນ ຢືນຢູ່ໃນທິດທັງສີ່ຂອງແຜ່ນດິນໂລກ ຫ້າມລົມທັງສີ່ທິດບໍ່ໃຫ້ພັດໃສ່ແຜ່ນດິນ ຫລືໃສ່ທະເລ ຫລືໃສ່ຕົ້ນໄມ້ໃດໆ.

2ແລະຂ້າພະເຈົ້າໄດ້ເຫັນເທວະດາອີກຕົນໜຶ່ງ ປາກົດຂຶ້ນຈາກທິດຕາເວັນອອກ ຖືຕາປະທັບຂອງພຣະເຈົ້າອົງຊົງພຣະຊົນຢູ່. ເທວະດາຕົນນັ້ນ ໄດ້ຮ້ອງສຽງດັງໃສ່ເທວະດາທັງສີ່ ຜູ້ທີ່ພຣະເຈົ້າໃຫ້ມີສິດອຳນາດທຳລາຍແຜ່ນດິນໂລກແລະທະເລນັ້ນ.

3ເທວະດາຕົນນັ້ນກ່າວວ່າ, “ຢ່າທຳລາຍແຜ່ນດິນ ທະເລ ຫລືຕົ້ນໄມ້ ຈົນກວ່າເຮົາຈະປະທັບຕາ ໃສ່ໜ້າຜາກຂອງບັນດາຜູ້ຮັບໃຊ້ຂອງພຣະເຈົ້າຂອງພວກເຮົາເສຍກ່ອນ.”

4ແລະຂ້າພະເຈົ້າໄດ້ຍິນວ່າ ຈຳນວນຜູ້ທີ່ໄດ້ຮັບການປະທັບຕາຂອງພຣະເຈົ້າໃສ່ໜ້າຜາກນັ້ນ ມີແສນສີ່ໝື່ນສີ່ພັນຄົນ. ຄົນເຫຼົ່ານີ້ມາຈາກສິບສອງຕະກຸນໃນພວກອິດສະຣາເອນ.

5ຈາກຕະກຸນຢູດາ ມີໜຶ່ງໝື່ນສອງພັນຄົນ, ຈາກຕະກຸນຣູເບັນ ມີໜຶ່ງໝື່ນສອງພັນຄົນ, ຈາກຕະກຸນກາດ ມີໜຶ່ງໝື່ນສອງພັນຄົນ,

6ຈາກຕະກຸນອາເຊ ມີໜຶ່ງໝື່ນສອງພັນຄົນ, ຈາກຕະກຸນເນັບທາລີ ມີໜຶ່ງໝື່ນສອງພັນຄົນ, ຈາກຕະກຸນມານາເຊ ມີໜຶ່ງໝື່ນສອງພັນຄົນ,

7ຈາກຕະກຸນຊີເມໂອນ ມີໜຶ່ງໝື່ນສອງພັນຄົນ, ຈາກຕະກຸນເລວີ ມີໜຶ່ງໝື່ນສອງພັນຄົນ, ຈາກຕະກຸນອິດຊາຄາ ມີໜຶ່ງໝື່ນສອງພັນຄົນ,

8ຈາກຕະກຸນເຊບູໂລນ ມີໜຶ່ງໝື່ນສອງພັນຄົນ, ຈາກຕະກຸນໂຢເຊັບ ມີໜຶ່ງໝື່ນສອງພັນຄົນ, ຈາກຕະກຸນເບັນຢາມິນ ມີໜຶ່ງໝື່ນສອງພັນຄົນ.

9ຫລັງຈາກນັ້ນ ຂ້າພະເຈົ້າໄດ້ເຫັນປະຊາຊົນຫລວງຫລາຍຈົນນັບບໍ່ຖ້ວນ, ພວກເຫຼົ່ານີ້ ມາຈາກທຸກປະເທດ, ທຸກເຜົ່າ, ທຸກຊົນຊາດ, ທຸກພາສາ, ຄົນເຫຼົ່ານີ້ນຸ່ງເສື້ອຄຸມສີຂາວ ຖືກ້ານຕານຢືນຢູ່ຕໍ່ໜ້າບັນລັງ ແລະ ຊ້ອງໜ້າພຣະເມສານ້ອຍ.

10ພວກເຂົາເປັ່ງສຽງຮ້ອງວ່າ, “ຄວາມລອດພົ້ນຂຶ້ນຢູ່ກັບພຣະເຈົ້າຂອງພວກເຮົາ ຜູ້ຊົງປະທັບຢູ່ເທິງພຣະຣາຊບັນລັງ ແລະ ຂຶ້ນກັບພຣະເມສານ້ອຍ.”

11ແລະເທວະດາທັງໝົດທີ່ຢືນອ້ອມພຣະຣາຊບັນລັງ ອ້ອມພວກອາວຸໂສ ອ້ອມສິ່ງທີ່ມີຊີວິດທັງສີ່ນັ້ນ ໄດ້ພາກັນກົ້ມຂາບລົງຊ້ອງໜ້າພຣະບັນລັງ ແລະນະມັດສະການພຣະເຈົ້າ

12ໂດຍກ່າວວ່າ, “ອາແມນ ຄຳສັນລະເສີນ, ສະຫງ່າຣາສີ, ສະຕິປັນຍາ, ຄຳໂມທະນາຂອບພຣະຄຸນ, ກຽດຕິຍົດ, ຣິດອຳນາດ ແລະຣິດເດດ ຈົ່ງເປັນຂອງພຣະເຈົ້າຂອງພວກຂ້ານ້ອຍຕະຫລອດຊົ່ວນິຣັນດອນເທີ້ນ ອາແມນ.”

13ແລ້ວຜູ້ໜຶ່ງໃນພວກອາວຸໂສ ໄດ້ຖາມຂ້າພະເຈົ້າວ່າ, “ພວກທີ່ນຸ່ງເສື້ອຄຸມສີຂາວນັ້ນແມ່ນໃຜ ແລະມາຈາກໃສ?”

14ຂ້າພະເຈົ້າໄດ້ຕອບຜູ້ນັ້ນວ່າ, “ທ່ານເອີຍ, ທ່ານເອງກໍຮູ້ຢູ່ແລ້ວ.” ຜູ້ນັ້ນຈຶ່ງບອກຂ້າພະເຈົ້າວ່າ, “ຄົນເຫຼົ່ານີ້ ແມ່ນພວກທີ່ໄດ້ຜ່ານການຖືກຂົ່ມເຫັງຢ່າງໜັກ ພວກເຂົາໄດ້ຊຳລະເສື້ອລ່າມຂອງພວກເຂົາໃຫ້ຂາວສະອາດ ດ້ວຍເລືອດຂອງພຣະເມສານ້ອຍ.

15ດັ່ງນັ້ນ ພວກເຂົາຈຶ່ງໄດ້ຢືນຢູ່ຕໍ່ໜ້າພຣະຣາຊບັນລັງຂອງພຣະເຈົ້າ ແລະບົວລະບັດຮັບໃຊ້ພຣະອົງໃນພຣະວິຫານ ທັງກາງເວັນແລະກາງຄືນ ແລະພຣະອົງຜູ້ທີ່ປະທັບຢູ່ເທິງພຣະຣາຊບັນລັງນັ້ນ ຈະຊົງສະຖິດຢູ່ນຳແລະປົກປ້ອງຄຸ້ມຄອງພວກເຂົາ.

16ພວກເຂົາຈະບໍ່ອຶດເຂົ້າຢາກນໍ້າອີກຕໍ່ໄປຈັກເທື່ອ, ຕາເວັນຫລືແສງແດດອັນຮ້ອນກ້າ ຈະບໍ່ເຜົາໄໝ້ພວກເຂົາ,

17ເພາະພຣະເມສານ້ອຍທີ່ປະທັບຢູ່ທ່າມກາງພຣະຣາຊບັນລັງນັ້ນ ຈະເປັນພຣະຜູ້ລ້ຽງຂອງພວກເຂົາ. ພຣະອົງຈະຊົງນຳພວກເຂົາໄປເຖິງບໍ່ນໍ້າພຸແຫ່ງຊີວິດ. ແລະພຣະເຈົ້າຈະຊົງເຊັດນໍ້າຕາທຸກຢົດຈາກຕາຂອງພວກເຂົາ.”

← Chapter 6 Jump to: Chapter 8 →