Ezekiel 30

Mossi MPBU (WẼNNAAM SEBRE 2014)

← Chapter 29 Jump to: Chapter 31 →

1Sẽn-Ka-Saab leb n goma ne maam n yeele:

2«Ninsaala, togs pĩnd-n-bãngr goamã! Yeel tɩ maam a Zu-soab a Sẽn-Ka-Saab yetame: ‹Wiis-y n yeel-y-yã: Ad yaa toog daare!›

3Bala, daar n wate, Sẽn-Ka-Saab daarã kolgdame. Yaa sawad-taok daare: na n yɩɩ bu-zẽmsã wakate.

4Zabr sʋʋgã wata Ezɩpt tẽnga. B sã n wa kʋʋd Ezɩpt tẽng nebã, Kuus tẽng nebã na n zĩi ne yɩɩre. B na n zɛɛ Ezɩpt tẽng paoongã, la b na n kõoga a yẽbgrã.

5La Kuus ne Puut la Luud nebã, ne sãamb nins fãa sẽn kalem taab n be Araabi wã, la Libi nebã, ne kaoolã tẽngẽ kambã na n naaga bãmb n pa tãpẽ.› »

6Ade, maam a Sẽn-Ka-Saab yetame: «Ezɩpt tẽngã sẽn teeg-b rãmbã na n paa zabrẽ wã, la yẽnda sẽn wukd a meng ne pãng ningã na n sɛɛme. Bãmb na n paa tãpẽ, sẽn sɩng ne Migdoll n tɩ tãag Siyɛnde. Maam a Zu-soab a Sẽn-Ka-Saab n yeele.»

7Bãmb na n sãama wa tẽms nins sẽn sãamã, la Ezɩpt tẽmsã na n lebga raboodo, wa tẽms nins sẽn yaa raboodã.

8Mam sã n wa ning Ezɩpt tẽngã bugum, la m sãam a sõangdbã fãa, bãmb na bãng tɩ mam yaa Sẽn-Ka-Saabo.

9Badaare, koe-toagsdb na n yii mam nengẽ ne koom kogend n tɩ kɩt tɩ Kuus tẽngã sẽn gãe bãanã rigimdi. Ezɩpt sãoongã daare, bãmb neb kẽer na n zĩi ne yɩɩre. Ad a sẽn wate!

10Ade, Zu-soab a Sẽn-Ka-Saab yetame: «Mam na n tũnuga Babilond dĩm a Nebukatnedzaar n menes Ezɩpt neb kʋʋngã.

11B na n talla yẽnda ne a nebã sẽn yaa nin-toos n yɩɩd buud a taabã n wa kɩt tɩ b sãam tẽngã. Bãmb na n wõ b zabr sʋʋse, n zab ne Ezɩpt tẽngã, n kɩt tɩ tẽngã pid ne kũum.

12Mam na n kʋɩɩsa Nill kʋɩlgã ko-soayã. Mam na n dɩka Ezɩpt nebã n koos ne nin-wẽnse. M na n kɩtame tɩ sãamb wa sãam tẽngã ne bũmb nins fãa sẽn be a pʋgẽ wã. Maam a Sẽn-Ka-Saab n yeele.»

13Ade, Zu-soab a Sẽn-Ka-Saab yetame: «Mam na n menesa wẽn-naandsã la m yiis zĩrẽ wẽnnaam-dãmbã sẽn be Nof tẽngã pʋgã. Naab kõn leb n zĩnd Ezɩpt tẽngã pʋg ye. Mam na n kɩtame tɩ rabeem kẽ Ezɩpt tẽngã.

14Mam na n sãama Patros tẽngã, la m ning Soan tẽngã bugum, la m sɩbg No tẽngã neb kʋʋngã.

15Mam na n sika m sũ-puugrã Sĩn tẽngã sẽn yaa Ezɩpt pãng zĩigã zugu, la m menes No tẽng neb kʋʋngã.

16Mam na n ninga Ezɩpt tẽngã bugum. Sĩn tẽngã nebã na n diga ne rabeem. B na n wãa No tẽng lalsã, la bɛɛbã na n zab n deega Nof tẽngã wĩnto-sʋka.

17Ond tẽngã ne Pi-Besɛt tẽngã kom-bɩɩs na n paa tãpẽ, la b na n talla tẽn-bãmb nebã n tɩ kẽes yembdo.

18Daar ning mam sẽn na n sãam balgr ning Ezɩpt sẽn balg nebã, n kɩt t'a sẽn wukd a meng ne pãng ningã sɛ wã, Takpanees tẽngã na n lebga lik bida. Sawad-taok n na n lud Takpaneese, la b na n talla a tẽmsã neb n tɩ kẽes yembdo.

19Mam na n sɩbga Ezɩpt tẽngã, la b na n bãngame tɩ maam la Sẽn-Ka-Saabo.»

20Yʋʋmd piig la a yembr soabã pʋgẽ, pipi kiuugã rasem a yopoe daarã, Sẽn-Ka-Saab goma ne maam n yeele:

21«Ninsaala, mam kaooga Ezɩpt dĩm a Faarõ kangã! La ned ba a yembr ka wa ne tɩɩm n na n tɩp-a ye! La b ka wa ne pɛɛl sẽn na n vil a kangã t'a leb n paam pãng n tõog n gãd sʋʋg ye.

22Yaa rẽ tɩ maam a Zu-soab a Sẽn-ka-Saab yetẽ: ‹Mam na n zaba ne Faarõ sẽn yaa Ezɩpt rĩmã. Mam na n kaooga a kang ning sẽn tar-a pãngã ne kang ning sẽn zoe n kaoog-a wã, n kɩt t'a zabr sʋʋgã yi a nugẽ n lʋɩ.

23Mam na n sãeega Ezɩpt nebã n kẽes buud a taabã sʋka, m na n kɩtame tɩ b sãeeg n zĩnd tẽms a taabã fãa pʋse.

24Mam na n paasa Babilond dĩmã kams pãnga, la m dɩk m zabr sʋʋgã n ning a nugẽ. Mam na n kaoo Ezɩpt dĩmã kamsã, t'a wõos Babilond dĩmã taoor wa ned sẽn dat n ki.

25Mam na n paasa Babilond dĩmã kams pãnga, la Ezɩpt rĩm a Faarõ kamsã pãng na n sɛɛme.

26Mam na n sãeega Ezɩpt nebã n kẽes buud a taabã sʋka, m na n kɩtame tɩ b sãeeg n zĩnd tẽms a taabã fãa pʋse. Woto, b na n bãngame tɩ yaa maam la Sẽn-Ka-Saabo.»

← Chapter 29 Jump to: Chapter 31 →