Ezekiel 5

Mossi MPBU (WẼNNAAM SEBRE 2014)

← Chapter 4 Jump to: Chapter 6 →

1Foom a ninsaala, rɩk zabr sʋʋg sẽn dɩte, n tall-a wa barga, n põng f zugã ne f toɛɛngã. Dẽ zugẽ, bɩ f rɩk zɩslem makdga, n mak zoobdã, n weel-a rʋyã.

2B sã n wa gũbg tẽngã n zab n deeg-a n sɛ, bɩ f rɩk zoobdã rʋr a yembr n yõog bugum tẽngã sʋka. La f rɩk rʋr a yembr n kʋʋs ne sʋʋgã n lob n gilg tẽngã. La f rɩk rʋr a yembrã n fãeeg tɩ sebgã rɩke, tɩ mam na n kɩtame tɩ b rig-b ne zabr sʋʋga.

3La fo na n yãka zoobdã bilf n yod f fuugã noore.

4La f leb n yãk bilf n los bugmã pʋg tɩ bugmã rɩ. La bugum n na n yi be n dɩ Israyɛll buudã zãnga.

5Ad Zu-soabã Sẽn-Ka-Saab sẽn yeta: «Zeruzalɛm la woto, mam ning-a-la buud toay-toayã sʋka, la tẽmsã gũbg-a lame.

6La yẽnda kɩɩsa mam noyã ne m no-tũudsã. Yẽnda tʋʋm-wẽnsã yɩɩga tẽms a taabã sẽn gũbg yẽnda wã, bala, bãmb basa mam noyã ne m no-tũudsã.

7La bõn-kãens yĩnga, ad Zu-soab a Sẽn-Ka-Saab sẽn yeta: ‹Yãmb sẽn yik n kɩɩs maam n yɩɩd buud a taabã sẽn gũbg yãmbã, la y ka tũ m noyã ne m no-tũudsã, la y sẽn ka tũ baa buud a taabã sẽn gũbg yãmbã minindã yĩnga,›

8bõn-kãens yĩnga, Zu-soab a Sẽn-Ka-Saab yetame: ‹Gese, mam mengã zabda ne foom, la m na n kao-f bʋʋd buud toay-toayã nifẽ.›

9Mam na n sɩbga foom ne sɩbgr mam sẽn na zɩ n sɩbge, la mam sẽn kõ n tol n leb n sɩbge. La bõn-kãens fãa yaa yel-beed nins fãa fo sẽn maanã yĩnga.

10Yaa rẽ yĩng la m na n kɩt tɩ ba-rãmb wãb b kamba, tɩ kamb wãb b ba-rãmba. Mam na n kaoo yãmb bʋʋd n kɩt tɩ y neb nins sẽn na n kellã sãeeg zĩigã fãa.

11Yãmb sẽn dẽgem mam zĩig ning sẽn welg toorã ne y yel-yoodã, la y yel-beedã yĩnga, mam wẽenda ne m mengã tɩ mam me na n bas-y lame, la m ka na n zoe y nimbãaneg ye. Mam ka na n bas yãmb ned ba a yembr tɩ põs ye.

12Fo nebã sʋka, nin-yɛng neb a tãab sʋk na n kii ne bã-loangdga, bɩ kom. La nin-yɛng neb a tãab sʋk na n kii ne zabr sʋʋga, la mam na n sãeega neb a taabã zĩig zãnga, n kɩt tɩ b rig-b ne zabr sʋʋga.

13Mam na n basame tɩ m sũ-puugrã maan a tʋʋmd ne bãmb n tãag a tɛka, m na n doka m sũurã ne bãmba, tɩ m sũurã yaool n sigi. Woto, bãmb na bãng tɩ yaa maam a Sẽn-Ka-Saab n gom ne bãmb m nonglem-kãsengã pʋgẽ, mam sũurã sẽn na n yik ne bãmb n tãag a tɛkã yĩnga.

14Mam na n kɩtame tɩ fo lebg raboogo, la buud a taabã sẽn gũbg foomã na n yaal-f-la so-loaadbã fãa nifẽ.

15Buud a taabã sẽn gũbg foomã na n yaala foom, la b tʋ foom, la fo na n yɩɩ bũmb sẽn wat ne sũ-sãanga, la saglgo, ne bãmb yĩnga, wakat ning mam sẽn na n sɩbg foom sɩbg-kãsengã, m sũ-yikrã ne m sũ-puugrã pʋgẽ wã. Yaa maam a Sẽn-Ka-Saab n gome.

16Mam sã n wa na n kɩt tɩ komã kẽ bãmb n sãam-b wa b sẽn tãood ned pɛɛmã, mam na n kɩtame tɩ komã wa sãam yãmba. Mam na n waa ne kom n paas tood nins fãa sẽn zoe n paam yãmbã, la m na n deega y rɩɩbã n bas-yã.

17Mam na n kɩtame tɩ kom wa kʋ-yã, la m kɩt tɩ rũm-toos kʋ y kambã. Bã-longds ne zɩɩm daagr na n pɩʋʋga y sʋka, la m na kɩtame tɩ zabr sʋʋg wa kʋ-yã. Yaa maam a Sẽn-Ka-Saab n gome.»

← Chapter 4 Jump to: Chapter 6 →