Ezekiel 33

Mossi MPBU (WẼNNAAM SEBRE 2014)

← Chapter 32 Jump to: Chapter 34 →

1Sẽn-Ka-Saab goma ne maam n yeele:

2«Ninsaala, gom ne f buudã nebã! Yeel-b yaa: ‹Mam sã n kɩt tɩ b wa n na n zab ne tẽngã ne zabr sʋʋga, tɩ tẽngã neb yãk ned a yembr bãmb sʋkã n kɩt t'a yɩ gũuda,

3nin-kãng sã n yãnd tɩ b wat n na n zaba ne tẽngã ne zabr sʋʋga, t'a peeb baorg n keoog nebã,

4ned sã n wʋm baorgã peebg n zãgs keoogrã, tɩ zabr sʋʋgã wa sãam-a, nin-kãng zɩɩmã taal be a meng zugu.

5Bala, yẽnda wʋma baorgã peebgo, n zãgs keoogrã. Woto, yẽnda zɩɩmã taal be a meng zugu. La sẽn sak-a keoogrã n na n fãag a vɩɩm.

6Gũudã sã n neẽ tɩ b wata ne zabr sʋʋgã, t'a ka peeb baorgã n keoog nebã, tɩ zabr sʋʋgã wa sãam neda, ned ning sʋʋgã sẽn na n sãamã kongr taal ka leb n be a meng zug ye. La yaa gũudã la mam na n ning taal nedã kũum yĩnga.

7Foom a ninsaala, mam yãkda foom tɩ f yɩ Israyɛll buudã gũuda. Fo na n kelga m sẽn na n yeel foom bũmb ningã n keoog-b n yeel tɩ yaa maam n yeele.

8Mam sã n yeel nin-wẽng t'a na n kiime, tɩ f ka keoog-a, n yeel-a t'a bas a manesem-wẽngã n paam n vɩɩmde, a na n ki a kongrã pʋga, la mam na n ning foom taal a kũumã yĩnga.

9La foom, fo sã n keoog nin-wẽng a manesem-wẽngã wɛɛngẽ, t'a ka wẽnemd n bas a manesmã, a na n ki a beegrã pʋga, la fo na n fãag f vɩɩm.› »

10«Foom a ninsaala, yeel Israyɛll buudã yaa: Yãmb yetame: ‹Tõnd beegrã ne d yel-wẽnã be d mens zutu, la yaa bãmb yĩng la tõnd be ka n wõosdẽ. Dẽ wã, tõnd na n maana a wãn n vɩɩmde?›

11Yeel-b tɩ maam a Zu-soab a Sẽn-Ka-Saab sẽn vɩ wã wẽendame n yetẽ: ‹Dẽ yĩnga, mam daab yaa tɩ nin-wẽng na ki bɩ, yaa t'a na tek yam n bas a manesem-wẽngã n paam n vɩɩmde! Wẽnemd-y-yã! Wẽnemd-y n bas-y y manesem-wẽngã! Israyɛll buudu, bõe tɩ yãmb tog n ki?›

12Foom a ninsaala, yeel fo buudã neb yaa: ‹Nin-tɩrg tɩrlmã ka na n fãag-a daar ning a sẽn na n beegã ye. La nin-wẽng manesem-wẽngã ka na n lub-a daar ning a sẽn na n wẽnemd n bas a manesem-wẽngã ye. Baa ne nin-tɩrg tɩrlmã, a ka na n tõog n vɩɩmd a sẽn na n maan yel-wẽndã daar ye.›

13Mam sã n yeel tɩ nin-tɩrg na n vɩɩmdame, t'a teeg a tɩrlmã n maan wẽnga, b ka na n leb n tẽeg yẽnda tɩrlem tʋʋmã yell ye. Yẽnda sẽn maan tʋʋm-wẽnsã yĩnga, a na n kiime.

14Mam sã n yeel tɩ nin-wẽng na n kiime, t'a wẽnemd n bas a yel-wẽnã, n maan sẽn zems la sẽn yaa tɩrga,

15yẽnda sã n lebs bũmb ning b sẽn gãneg ne yẽnda wã, la a lebs yẽnda sẽn dag n maan wẽgb n paam bũmb ningã, n sak m tõodã sẽn kõt vɩɩmã, n ka leb n maan sẽn ka tɩrga, a ka na n ki ye, a na n vɩɩmdame.

16B kõn leb n tẽeg yel-wẽn nins yẽnda sẽn dag n maanã ba a yembr yell ye. Yẽnda sẽn maan sẽn zems la sẽn yaa tɩrgã yĩnga, a na n vɩɩmdame.

17Fo buudã neb yetame: ‹Zu-soabã sẽn maandã ka zems ye!› La yaool n yaa bãmb sẽn maandã n ka zemse.

18Nin-tɩrg sã n bas a tɩrlmã n maan sẽn ka tɩrga, a na n kii bõn-kãng yĩnga.

19La nin-wẽng sã n bas a manesem-wẽngã, n sak n maan sẽn zems la sẽn yaa tɩrga, yẽnda na n vɩɩmda bõn-kãng yĩnga.

20La yãmb yetame: ‹Zu-soabã sẽn maandã ka zems ye!› Israyɛll buudu, mam na n kaoo yãmb ned kam fãa bʋʋd wa sẽn zems a yel-manesem.»

21Tõnd sẽn wa n be yembdã tɩ yʋʋm piig la a yiibu, kiuug piig soabã rasem a nu daarã, la ned a yembr paam n põs n yi Zeruzalɛm n wa mam nengẽ n yeel maam yaa: «B reega tẽngã!»

22Nin-kãng sẽn na n wa mam nengẽ wã daar ne yibeoogã ket tɩ beoogo, Zu-soabã sɩɩsa maam zaabr wakate, n kɩt tɩ mam zelemdã lake. Dẽ, mam zelemdã lakame tɩ mam ka leb n yaa muk ye.

23Sẽn-Ka-Saab goma ne maam n yeele:

24«Ninsaala, yaa woto la neb nins sẽn be Israyɛll tẽngã rabood pʋsẽ wã yeta: ‹A Abrahaam rag n yaa a yembre, la a reega tẽngã n sooge. Tõnd yaa neb kʋʋngo, la b kõo tõnd tẽngã tɩ d sooge.›

25Woto yĩnga, bɩ f yeel-b tɩ maam a Zu-soab a Sẽn-Ka-Saab yetame: ‹Yãmb wãbda rũng ne a zɩɩm, la y waoogd wẽn-naandse. Yãmb daagda zɩɩm. La yãmb tẽedame tɩ y na n sooga tẽngã la?

26Yãmb teega y zabr sʋʋse, yãmb maanda yel-beedo, yãmb ned kam fãa maanda rẽgd ne a to paga. La yãmb tẽedame tɩ y na n sooga tẽngã la?›

27Ad fo sẽn na n yeel tɩ bũmb ninga: ‹Zu-soab a Sẽn-Ka-Saab yetame: Hakɩɩka! Mam wẽenda ne m menga, tɩ neb nins sẽn be tẽngã rabood pʋsẽ wã fãa na n paa tãpẽ, la mam na n kɩtame tɩ sẽn be-b wetẽ wã lebg we-rũms rɩɩbo, la bã-loangdg na n kʋʋ sẽn be-b tãms sẽgsẽ wã, ne sẽn be-b tãms bogdẽ wã.

28Mam na n kɩtame tɩ tẽngã lebg zĩ-vɩuʋg zãnga. Yẽnda sẽn wukd a meng ne pãng ningã na n sɛɛme. Israyɛll tãmsã na n sãamame, la ned kõn leb n loog beenẽ ye.

29Mam sã n wa sãam tẽngã zãng n kɩt t'a lebg zĩ-vɩʋʋg zãnga, yel-beed nins fãa b sẽn maanã yĩnga, wakat-kãng la b na n bãng tɩ mam yaa Sẽn-Ka-Saabo.›

30La foom a ninsaala, fo buudã neb gomda fo yell b lalsã seesẽ, la b rotã rig-noyẽ, bãmb ned kam fãa gomda ne a ba-biig n yetẽ: ‹M kotame tɩ y wa kelg koɛɛg sẽn yit Sẽn-Ka-Saab nengẽ!›

31Bãmb kʋʋngã wata fo nengẽ, mam nebã zĩi fo taoore, n kelgd fo goamã, la b ka maand wa fo sẽn yetã ye.› Bala, bãmb gomda no-noom goamã, la b sũyã yaool n pida ne yão-beedo.

32Ne bãmba, fo yaa wa yɩɩn-yɩɩnd sẽn tar koe-noogo, n yɩɩnd ne yʋʋm-teed tɩ noomẽ. Bãmb kelgda fo goamã, la b ka rɩkd-a n ning a nao-kẽndr zug ye. B kelgda f saglsã la b ka tũud ye.

33Bõn-kãens sã n wa wa, la b wa n sɛɛme, la bãmb na yaool n bãng tɩ Wẽnnaam no-rɛɛs n dag n be bãmb sʋka.»

← Chapter 32 Jump to: Chapter 34 →