Matthew 12

Marwari Bible

1उण वेळा यीसु सब्त रै दिन खेतो मांयनै ऊं जा रिया हा, अर उणरै चेलौ नै भूख लागी तो वे खेत मांय ऊं गेहूं री बालै तोड़ नै खावण लाग गा।

2फरीसियों नै ओ देखनै उण ऊं कयौ, “देख थारा चेला वो कांम करै, जिकौ सब्त रै दिन करणौ व्यवस्था रै खिलाफ है।”

3यीसु उणौनै कयौ, “कांई थै पढ़ियो कोनीं, की दाऊद नै, जद वो अर वारां साथी भूखा होया तो कांई करयौ?

4वो कीकर परमेसर रै मिंदर मे गिया अर वो अर उणरा साथी भेट री रोटियां खाई। कायदे ऊं इण रोटियो नै खाणै री इजाजत याजकौ रै अलावा किणी नै कोनीं ही।

5या थै व्यवस्था मे कोनीं पढ़ियो, की याजक आराम रै दिन मिंदर मे कांम करनै आराम रै दिन रौ नियम नै तोड़े फिर भी उणनै कोई कीं नीं कैवै?

6पण म्हैं थांनै कहूं, की एठै वो है, जिकौ मिंदर ऊं भी मोटो है।

7जे थै इणरौ अरथ जांणता, ‘म्हैं दया ऊं खुस होवूं हूं, बलिदान ऊं कोनीं,’ तो थै निरदोस नै दोसी कोनीं ठैराता।

8क्यूंकै म्हैं मिनख रौ बेटौ तो आराम रै दिन रौ भी परभु हूं।”

9उठै ऊं चालन वो यहूदी पराथना घर में आया।

10उठै एक मिनख हो, जिणरौ हाथ सुखोड़ो हो। उणौ यीसु ऊपर दोस लगाणै रै वास्तै कईक लोगां नै पूछयौ, “कांई आराम रै दिन सावळ करणौ ठीक है?”

11यीसु उणौनै कयौ, “थोरै मांय ऊं ऐड़ौ कुण है, जिणरी एक इज लरड़ी है, अर वा सब्त रै दिन खाडा मांय पड़ जावै, अर वो उणनै बारै नीं काढ़ै?

12एक मिनख लरड़ी ऊं कितौ मूंगो है। इण वास्तै आराम रै दिन भलाई करणी कायदे रै अनुसार ठीक है।”

13तो यीसु उण मिनख ऊं कयौ, “थारौ हाथ आगै कर।” वो हाथ आगै कियो, अर उणरौ हाथ दूजोड़ा हाथ ज्यूं सावळ हो गियो।

14तो फरीसियों नै बारै जायनै उणरै खिलाफ एको करयौ की इणनै कीण तरैह ऊं नास करौ।

15यीसु उणौरी चाल नै जांणनै उठै ऊं जाता रिया। घणा ई लोग उणरै लारै वहीर हो गिया, अर वो सगळौ नै सावळ करया,

16अर उणौनै चेताया के म्हारौ कीण ऊं मत कहीजौ,

17ताकी जिकौ वचन यसायाह भविसयदाता रै कियोड़ौ हो, वो पूरौ होवै:

18“ओ म्हारौ सेवक है जिणनै म्हैं टाळियो, जिण ऊं म्हैं हेत राखूं, जिण माथै म्हैं भरोसौ करूं, म्हारी आतमा उण माथै उतारूं ला, अर वो सगळौ लोगां नै न्याव रौ संदेस दैला।

19वो लड़ाई अर हाका नीं करैला, गळी रै मांय उणरी आवाज कोई नीं सुणैला।

20वो किसरयौड़े सरकंडे नै नीं तोड़ेला, अर धुआं काढ़ती बती नै नीं बुझावैला, जद तांई वो न्याव माथै जीत नीं पावै।

21अर सगळां लोग उण रै नाम री आस राखैला।”

22जद लोग उणरै खनै एक दुस्टआतमा लागयोड़ो मिनख नै लेन आया जिकौ आन्धो अर गूंगो हो, अर यीसु उणनै सावळ करयौ, जिण ऊं उणनै दिखण लागौ अर वो बोलणै ई लाग गो।

23सगळी भीड़ अचूम्बो करयौ अर कैवण लागा, “कठैई ओ दाऊद रौ छोरौ तो नीं है?”

24पण जद फरीसी आ बात सुणी तो कयौ, “ओ तो दुस्टआतमा रौ राजकुमार बालजबूल री मदद ऊं दुस्ट आतमा नै बारै निकाळै।”

25यीसु उणौरै मन री बात नै जांणनै उणौनै कयौ, “हरैक राज जिण मांय फूट होवै, वो बिखर जावैला, अर हरैक नगर अर घराणौ जिण मांय फूट होवै, वो कदैई ऊभौ नीं हो सकै।

26अर सैतान ई सैतान नै बारै काढ़ै, तो वो खुद रौ ई दुसमी हो जावै। पछै उणरौ राज कीकर ऊभौ होवैला?

27अर जे म्हैं बालजबूल री मदद ऊं दुस्टआतमा नै बारै निकाळूं, तो थौरा लोग कीण री मदद ऊं दुस्ट आतमा बारै निकाळै? इण वास्तै वे इज थौरो न्याव करैला।

28पण जे म्हैं परमेसर री आतमा ऊं दुस्ट आतमाओ नै बारै निकाळूं, तो परमेसर रौ राज थोरै नैड़ौ आयग्यौ है।

29“अर कीकर कोई मिनख किणी लांठा मिनख रै घर मांय घुस अर उणरौ माल लूट सकै जद तांई पैली वो उण लांठा मिनख नै बांध नीं ले। तद वो उणरै घर नै लूट सकै।

30“जिकौ म्हारै साथै नीं है वो म्हारौ दुसमी है, अर जिकौ म्हारै साथै भेळौ नीं करै वो बिखेरे है।

31इण वास्तै म्हैं थांनै कहूं के मिनखां रौ हैंग तरैह रौ पाप अर अपमांन माफ कियो जावैला, पण पवितर आतमा रौ अपमांन माफ नीं कियो जावैला।

32जिकौ ई म्हैं मिनख रै बेटा रै विरोध मांय कोई बात कैवैला, उणरौ ओ गुनाह माफ कियो जा सकै, पण जिकौ ई कोई पवितर आतमा रै विरोध मांय कीं कैवैला, उणरौ ओ गुनाह नीं तो इण जुग में अर नीं आणवाळै जुग मांय माफ कियो जावैला।

33“जे रुंखड़ौ चौखौ है, तो उणरा फळ भी चौखौ है, जे रुंखड़ौ निकमो है, तो उणरा फळ भी निकमो है। क्यूंकै रुंखड़ौ आपरै फळ ऊं इज ओळखिजै।

34अरै सांप रा बच्चौ, थै कोजा व्‍हेर चौखी बातां कीकर के सकौ? क्यूंकै जिकौ मन मांय है, वो इज मूंडा माथै आवै।

35भलौ मिनख मन रा भला भंडार ऊं भली बातां काढ़ै, अर कोजो मिनख कोजा भंडार ऊं कोजी बातां काढ़ै।

36अर म्हैं थांनै कैवूं के जिकौ-जिकौ निकमी बातां मिनख कैवैला, न्याव रै दिन वांनै हरैक बातां रौ लेखो देवणो है।

37क्यूंकै थूं थांरै मूंडै री बातां रै कारण निरदोस अर थांरै मूंडै री बातां रै कारण इज गुनेगार बणायौ जावैला।”

38इण वगत कईक सास्तरी, अर फरीसी उणनै कयौ, “हे गुरु, म्हौ थौरे ऊं एक निसाणी देखणी चावौ हो।”

39यीसु उणौनै जबाब दियौ, “इण जुग रा पापी अर व्यभिचार लोग निसाणी जोवे है, पण योना भविसयदाता रै निसाणी नै छोड़नै कोई दूजी निसाणी उणौनै नीं दी जावैला।

40योना तीन रात-दिन महामछली रै पेट मे रियौ, यूंही म्हैं, मिनख रा बेटा तीन रात-दिन धरती मांय रैवैला।

41नीनवे रा लोग न्याव रै दिन इण जुग रै लोगां रै साथै उठनै थांनै दोसी ठैरावैला, क्यूंकै उणौ योना रा परचार सुणन मन फिरायो। पण, एठै वो है जिकौ योना ऊं ई मोटो है।

42दखण री राणी न्याव रै दिन इण जुग रै लोगां रै साथै उठनै थांनै दोसी ठैरावैला, क्यूंकै वो सुलैमान रा ग्यांन सुणणै रै वास्तै धरती रै आखरी तांई आई। पण, एठै वो है जिकौ सुलैमान ऊं ई मोटो है।

43“जद दुस्ट आतमा मिनख मे ऊं निकळ जावै है, तो रिंदरोही मे आराम ढ़ूंढ़ती फिरै है, मगर मिळै कोनीं।

44पछै कैवै, ‘म्हैं अपणै उणीज घर मे जठै ऊं निकळी ही, पाछी जाऊंला।’ अर पाछी जायनै खाली, साफ सुथरो अर सजायोड़ो पावै है।

45पछै वां जान अपणै ऊं और भूंडी सात आतमाओ नै अपणै साथ ले आवै है, अर वे उणमे रैवास करै है, अर उण मिनख री दसा पैला ऊं ई बुरी हो जावै है। इण जुग रै बुरै लोगां री दसा ई ऐड़ी ही होवैला।”

46जद वो भीड़ ऊं बातां कर ई रिया हा, तद उणरी मां अर भाई बारै ऊभा हा अर उण ऊं बातां करणा चावै हा।

47किणी नै उण ऊं कयौ, “देख थांरी मां अर थारौ भाई बारै ऊभा है, अर थांरै ऊं बातां करणी चावै है।”

48ओ सुणन उणरै कैवनवाळै नै जबाब दियौ, “कुण है म्हारी मां? अर कुण है म्हारौ भाई?”

49अर अपणै चेलौ री तरफ हाथ बतान कयौ, “देखौ, म्हारी मां अर म्हारा भाई ऐ है।

50क्यूंकै जिकौ कोई म्हारै सरगिए पिता री इछा ऊपर चालै, वोहीज म्हारौ भाई, अर म्हारी बेन, अर म्हारी मां है।”

← Chapter 11 Jump to: Chapter 13 →