Matthew 21

Marwari Bible

1जद यीसु अर उणरा चेला यरुसलेम रै खनै जैतून भाखर रै नजीक बैतफगै गांव रै खनै आया, तो यीसु दो चेलौ नै ओ कैहन भेज्या,

2“सांमै वाळै गांव में जाओ। उठै पूगते ही एक गधी बांधियोड़ी है अर उणरै साथै थांनै गधी रौ बचियो मिळेला। उणनै खोलनै म्हारै खनै ले आओ।

3जे थोरै ऊं कोई पूछै तो कैवणौ की इणरी परभु नै जरुत है, तो वो इणनै थौरे साथै भेज दैला।”

4ओ इण वास्तै होयौ की जिकौ भविसयदाता री तरफ ऊं कयौ गियौ हो, वो पूरौ होयौ,

5“सिय्योन री बेटी नै कैवौ, ‘देख, थांरौ राजा थांरै खनै आवै है। वो भला है, अर गधे ऊपर बैठौ है, अर वो गधी रै बचिये ऊपर है।’ ”

6चेलौ जायनै, ज्यूं यीसु कयौ हो त्यूं ही कियो।

7अर गधी रै बचिये नै लायनै, उणरै ऊपर आपरा गाभा राख्या, अर वो उण बचिये माथै बैठग्या।

8तो घणा लोगां आपरा गाभा मारग में बिछाया, अर दूजै लोगां दरखतो ऊं डाळियो वाढ़नै मारग में बिछाई।

9जिकौ लोग यीसु रै आगै चाल रिया हा अर जे लोग उणरै लारै चाल रिया हा सगळा लोग ओ नारो लगा रिया हा, “दाऊद री औळाद रौ होसना, धन्य है वो जिकौ परभु रै नाम ऊं आवै है! सरग में परमेसर रौ होसना।”

10जद यीसु यरुसलेम में पूगिया तो सगळै सैहर में हलचल मचगी, अर लोग कैवण लागा, “औ कुण है?”

11लोगां कयौ, “औ गलील रै नासरत सैहर रौ भविसयदाता यीसु है।”

12यीसु नै परमेसर रै मिंदर में जायनै उण सगळौ नै, जिकौ मिंदर में लेण-देण कर रिया हा, उणौनै बारै निकाळ दिया, अर विदेसी रूपियौ नै बदलन वाळौ रा पीढ़ा अर कबूड़ा बेचनैवाळौ री चौकियां ऊंधी कर दी।

13अर यीसु कयौ, “लिख्यौ है, ‘म्हारौ घर पराथना रौ घर कैलावैला’ पण थै उणनै डाकूओ रौ अडो बणा दियौ।”

14तो आंधा अर लंगड़ा मिंदर में उणरै खनै आया, अर यीसु उणौनै सावळ करया।

15पण जद परधान याजकौ अर सास्तरियों नै इणरा चमतकार देखियां अर टाबरां मिंदर में “दाऊद री औळाद रौ होसना” बोलता सुणीया, तो वे रीसे बळया।

16अर यीसु नै कैवण लाग्या, “कांई थूं सुणै है की ऐ कांई कैवै है, यीसु उणौनै कयौ, हां। कांई थै औ कदैई कोनीं पढ़यो, ‘छोरौ अर दूध पीवता टाबरां रै मूंडै ऊं थै आपरौ गुणगान कराओ’?”

17तो यीसु उणनै छोड़नै सैहर रै बारै बैतनिय्याह गियौ अर रात उठैज रियौ।

18सवार रै वैळा जद यीसु सैहर जातै वैळा उणनै भूख लागी।

19सड़क रै किनारै अंजीर रौ एक रुंखड़ौ देखनै यीसु उणरै खनै ग्यौ, अर पतौ नै छोड़ उणमे कीं नीं पायो उण ऊं कयौ, “आज ऊं थांरै में कदैई फळ नीं लागै।” अर अंजीर रौ दरखत तुरत सूख गियौ।

20औ देखनै चेलौ नै अचूम्बो होयौ अर उणौ कयौ, “औ अंजीर रौ दरखत तुरत कीकर सूख गियौ?”

21यीसु उणौनै जबाब दियौ, “म्हैं थौरे ऊं साचौ कहूं, जे थै विसवास राखौ अर वैम मत करौ, तो थै नीं कैवल ओ करौला जे म्हैं अंजीर रै दरखत रौ करयौ है, बल्कि इण भाखर नै भी केवोला, ‘उखड़ जा, अर समंदर में जा पड़’, तो वो हो जावैला।

22अर जे कई थै पराथना में विसवास ऊं मांगोला तो वो सैंग थांनै मिळैला।”

23यीसु मिंदर में जायनै उपदेस दे रिया हा, तो परधान याजकौ अर लोगां रै नेताओं उणरै खनै आयनै पूछयौ, “थूं ओ कांम किणरै अधिकार ऊं करै है? अर थनै औ अधिकार कीणै दियौ है?”

24यीसु उणौनै जबाब दियौ, “म्हैं ई थौरे ऊं एक बात पूछूं। जे वो म्हनै बतादोला, तो म्हैं ई थांनै बता दूंला की ओ कांम कीण रै अधिकार ऊं करूं हूं।

25यूहन्‍ना रौ बतिस्मो कठै ऊं हो? सरग री तरफ ऊं या मिनखौ री तरफ ऊं?” तो वे आपस में बात करणै लाग्या, “जे म्हौ कैवौ ‘सरग री तरफ ऊं’, तो वो अपांनै कैवैला, ‘पछै थै उणरौ विसवास क्यूं कोनीं कियो?’

26अर जे कैवै ‘मिनखौ री तरफ ऊं’, तो अपांनै भीड़ रौ डर है, क्यूंकै वे सैंग यूहन्‍ना नै भविसयदाता मांनै है।”

27इण वास्तै उणौ यीसु नै जबाब दियौ, “म्हौ कोनीं जांणौ।” यीसु ई उणौनै कियो, “तो म्हैं ई थांनै कोनीं बताऊं की ओ कांम कीण अधिकार ऊं करूं हूं।

28“थै कांई सोचो हो? किणी मिनख रै दो बेटा हा, उणै पैलै रै खनै जायनै कियो, ‘हे बेटा, आज अंगूर री बाड़ी में कांम कर।’

29उणै जबाब दियौ, ‘म्हैं कोनीं जाऊंला,’ पण पछै पछतावो करनै जातौ रियौ।

30पछै पिता नै दूजै बेटे रै खनै जायनै ज्यूं ही कियो। बेटे जबाब दियौ, ‘जी हां जाऊं हूं,’ पण कोनीं गियौ।

31इण दोनूं में ऊं कीणै पिता री इछा पूरी किनी?” उणौ कियो, “पैलै नै।” यीसु उणौनै कयौ, “म्हैं थौरे ऊं साचौ कहूं की चुंगी लेणवाळा अर वेसयाओ थौरे ऊं पैला परमेसर रै राज में परवेस करै है।

32क्यूंकै यूहन्‍ना बतिस्मो देणवाळौ धरम रा मारग बतातौ थौरे खनै आयौ तो भी थै उणरौ विसवास कोनीं कियो। पण चुंगी लेणवाळा अर वेसयाओ नै उणरौ विसवास करयौ, अर थै औ देखणै पछै ई कोनीं पछताया की उणरौ विसवास कर लेता।

33“एक दूजी कहाणी सुणौ। एक जमीदार हो, जीणे अंगूरो री बाड़ी लगाई, उणरै च्यांरूमेर बाड़ किनी, अर अंगूरो रौ रस निकालनै कुंड खोदयौ अर रूखाळी करण वास्तै गुमट बणायां, अर करसा नै उणरौ ठैको देन परदेस जातौ रियौ।

34जद फळ रौ वगत नैड़ौ आयौ, तो उणै आपरै दासो नै उणरा फळ लेणे रै सारू करसा रै खनै भेजियां।

35“पण करसा उणरै दासो नै पकड़नै किणी नै ठोकियो, अर किणी नै मार दियौ, अर किणी रै भाठा ठोकिया।

36पछै उणै पैलौ ऊं करते घणा दासो नै भेजियां अर उणौ उणौरै साथै ई त्योंही कियो।

37आखरी में उणै आपरै बेटे नै उणौरै खनै ओ सौच नै भेज्यौ की ‘वे म्हारै बेटे रौ आदर करैला।’

38“पण करसा बेटे नै देखनै आपस में कयौ, ‘औ तो वारिस है। आओ इणनै मार दो अर इणरी जायदाद ऊपर कब्जो कर लो।’

39अर उणौ उणनै पकड़ नै अंगूरो री बाड़ी ऊं बारै निकाळनै मार दियौ।

40“इण वास्तै जद अंगूरो री बाड़ी रौ मालिक आवैला, तो उण करसा रै साथै कांई करैला?”

41उणौ उणनै कयौ, “वो उण बुरै लोगां री बुरी रीत ऊं नास करैला, अर अंगूरो री बाड़ी रौ ठैको दूजै करसा नै दैला, जिकौ वगत ऊपर फळ रौ हिस्सो दियौ करैला।”

42यीसु उणौनै कयौ, “कांई थै कदैई पवितर सास्तर में औ कोनीं पढ़ियो। ‘जीण भाठै नै कारीगरो निकमो ठैरायौ हो, वोहीज खूंणै रौ भाठौ बण गियौ। औ परभु री तरफ ऊं होयौ, अर म्हांरी निजर में अदभुत है’?

43“इण वास्तै म्हैं थौरे ऊं कहूं की परमेसर रौ राज थौरे ऊं ले लियौ जावैला अर ऐड़ै देसो नै जिकौ उणरौ फळ लावै उणौनै दियौ जावैला।

44जिकौ इण भाठै माथै पड़ैला, वो चकनाचूर हो जावैला। अर जीण माथै ओ भाठौ पड़ैला, उणनै पीस दैला।”

45परधान याजक अर फरीसी यीसु री कहाणियो नै सुणनै समझ गिया की वो उणरै बारै में कैवै है।

46अर उणौ यीसु नै पकड़णौ चाहयौ, पण लोगां ऊं डर रिया हा क्यूंकै वे उणनै भविसयदाता मानता हा।

← Chapter 20 Jump to: Chapter 22 →