Matthew 26 — Marwari Bible

24म्हैं, मिनख रै बेटे नै तो मरणौ ही है ज्यूं उणरै बारै में लिख्यौ है, पण उण मिनख रै लिए हाय है जिणरै जरियै म्हैं मिनख रौ बेटौ धोखे ऊं पकड़ायौ जावूंला। जे उण मिनख रौ जनम नीं होतो, तो उणरै लिए भलौ होतो।”

25तो उणनै धोखे ऊं पकड़ानैवाळौ यहूदा कयौ, “हे रब्‍बी, कांई वो म्हैं हूं?” यीसु उणनै कयौ, “थूं कैह रियौ।”

26जद वे खा रिया हा तो यीसु नै रोटी ली, अर आसीस मांग नै तोड़ी, अर चेलौ नै देन कयौ, “लौ खाओ, आ म्हारी देह है।”

27पछै उण कटोरो लेन धन्यवाद कियो, अर उणौनै देन कयौ, “थै सैंग इण में ऊं पीयो,

28क्यूंकै ओ वाचा रौ म्हारौ वो लोई है, जिकौ घणौ रै वास्तै पापों री माफी रै वास्तै बहायौ जावै है।

29म्हैं थौरे ऊं कहूं की अंगूर रौ रस उण दिन तांई कदैई नीं पीऊंला, जैड़ी तांई थौरे साथै अपणै परम पिता रै राज में नयो नीं पीऊं।”

30भजन गाणें रै पछै वे जैतून रै भाखर ऊपर जाता रिया।

31तो यीसु उणौ नै कयौ, “थै सैंग आज री रात म्हारै कारण ठोकर खाओला, क्यूंकै लिख्यौ है, ‘म्हैं गवाळे नै मारूंला, अर टोळे री लरड़ियां तितर बितर हो जावैला।’

32पण म्हैं आप जी उठनै रै पछै थौरे ऊं पैला गलील में जाऊंला।”

33इण वास्तै पतरस वीनैं कयौ, “जे सैंग थांरै बारै में ठोकर खावै तो खावै, पण म्हैं कदैई ठोकर नीं खाऊंला।”

34यीसु उण नै कयौ, “म्हैं थांरै ऊं साचौ कहूं की आज री रात कुंकड़े रै बांग दैणै ऊं पैला, थूं म्हनै तीन वार ओळखणै ऊं मना करैला।”

35पतरस उणनै कयौ, “जे म्हनै थांरै साथै मरणौ भी पड़ै, तौभी म्हैं थांनै कदैई अस्वीकार नीं करूंला।” अर ऐड़ौ सैंग चेलौ भी कयौ।

36तो यीसु आपरै चेलौ रै साथै गतसमने नाम री एक जगा ऊपर आया अर आपरै चेलौ ऊं कैवण लाग्या, “एठैज बैठा रीजो, जैड़ी तांई म्हैं उठै जान पराथना करूं।”

37वो पतरस अर जबदी रै दोनो बेटौ नै साथै लेन ग्या, अर उदास अर व्याकुल होणै लाग्या।

38तो यीसु उणौ नै कयौ, “म्हारौ जी घणौ उदास है, एठै तांई की म्हारौ प्रांण निकळ रियौ है। थै एठैज ठैरौ अर म्हारै साथै जागता रौ।”

39पछै वो थोड़ा आगै चालन गोडा टेक नै आ पराथना की, “हे म्हारा पिता, जे हो सकै तो ओ दुख रौ कटोरो म्हारै ऊं टळ जावै। तौभी ज्यूं म्हैं चावूं व्योह नीं, पण ज्यूं थूं चावै व्यौंही होवै।”

40पछै वो चेलौ रै खनै आन उणौनै सूतोड़ा देख नै पतरस ऊं कयौ, “कांई थै म्हारै साथै एक घड़ी भी नीं जाग सकया?

41जागता रौ, अर पराथना करता रौ की थै परीकसा में नीं पड़ो। आतमा तो तैयार है, पण सरीर कमजोर है।”

42पछै उणरै दूजी वार जान आ पराथना की, “हे म्हारै पिता, जे ओ म्हारै दुख रौ कटोरो पीए बिना कोनीं हट सकै तो थांरी इछा पूरी होवै।”

43तो यीसु आन उणौनै भळै सोयोड़ा देख्यां, क्यूंकै उणरी आंखे ऊंग ऊं भरयोड़ी ही।

44उणौनै छोड़ नै वो भळै जातौ रियौ, अर उणी सबदो में भळै तीजी वार पराथना की।

45तो वो चेलौ रै खनै आन उणौ नै कयौ, “कांई थै अबै तांई सूता हो, अर आराम करौ हो? देखौ, वो घड़ी आयगी है, अर म्हैं, मिनख रौ बेटौ पापियो रै हाथ पकड़ायौ जावूंला।

46उठो, चालौ। देखौ, म्हारौ पकड़ाणै वाळौ नैड़ौ आ गियौ है।”

47वो ओ कैह रियौ हो की यहूदा जिकौ बारैह में ऊं एक है आयौ, अर उणरै साथै परधान याजकौ अर लोगां रै बुढ़ियों री घणी भीड़, तरवारो अर लाठियां लेन आई।

48विसवासघाती उणनै ओ कैन इछारौ दियौ हो, “म्हैं जीणनै चूमूं ला वोहीज यीसु है अर उणनै पकड़ लिजो।”

49अर तुरत यीसु रै खनै आन कयौ, “हे रब्‍बी, नमस्कार!” अर उणनै घणौ चूमयो।

50यीसु उणनै कयौ, “हे दोसत, जीण कांम रै वास्तै थूं आयौ है, उणनै कर ले।” तो वे खनै आन यीसु नै पकड़ लियौ।

51यीसु रै साथियो में ऊं एक नै आपरी तरवार निकाळी अर महायाजक रै दास ऊपर चलान उण रौ कांन उडा दियौ।

52तो यीसु उणनै कयौ, “अपणी तरवार म्यांन में राख दे, क्यूंकै जिकौ तरवार चलाई वे सैंग तरवार ऊं नास किया जावैला।

53कांई थूं जांणै कोनीं की म्हैं अपणै पिता ऊं विनती कर सकूं हूं, अर वो सरगदूतो री बारैह पलटन ऊं घणी म्हारै खनै अबार भेज दैला?

54पण पवितर सास्तर री लिखयोड़ी बातां यूंही कीकर पूरी होवैला? इण बातां रौ पूरौ होणौ जरुरी है।”

55उण वगत यीसु नै भीड़ ऊं कयौ, “कांई थै तरवारो अर लाठियां लेन म्हनै डाकू रै ज्यूं पकड़नै रै वास्तै निकळिया हो? म्हैं रोज मिंदर में बैठन उपदेस देतो हो, जद तो थै म्हनै कोनीं पकड़यौ।

56पण ओ सैंग इण वास्तै होयौ है की भविसयदाता रा वचन पूरा होवै।” तो सैंग चेला उणनै छोड़नै नाह गिया।

57तो यीसु नै पकड़नै वाळा उणनै काइफा नाम रौ महायाजक रै खनै लेन गिया, जठै सास्तरी अर बुढ़ियां भेळा होया हा।

58पतरस आगौ ई आगौ उणौरै लारै लारै महायाजक रै आंगणै तांई गियौ, अर मांयनै जायनै परिणाम देखणै रै वास्तै नौकरो रै साथै बैठ गियौ।

59परधान याजकौ अर हैंग महासभा यीसु नै मार नोखणै रै वास्तै उणरै विरोध में झूठी गवाई री सौध में हा,

60पण घणा झूठा गवाई आया पछै भी नीं पायो। आखरी में दो जणा आया,

61अर कयौ, “इण कयौ है की, परमेसर रौ मिंदर ढ़ा सकूं हूं अर तीन दिन में बणा सकूं हूं।”

62तो महायाजक ऊभौ होन यीसु नै कयौ, “कांई थूं कोई जबाब कोनीं दे? ऐ लोग थांरै विरोध में कांई गवाई दैवै है?”

63पण यीसु कीं नीं बोलियां। तो महायाजक उणनै कयौ, “म्हैं थनै जीवते परमेसर री सौगन देवूं हूं की जे थूं परमेसर रौ बेटौ मसीह है, तो म्हौ नै कैह दे।”

64यीसु उणनै कयौ, “थै आप ही कैह दियौ। म्हैं थांनै ओ भी कैह रियौ हूं की अबै ऊं थै म्हनै, मिनख रै बेटे नै सर्वसक्तिमान परमेसर रै जीमणै ओर बैठौ, अर आभै रै बादळो ऊपर आवतौ देखोला।”

65इण कारण महायाजक आपरा गाभा फाड़या अर कयौ, “इण परमेसर रौ अपमांन करयौ है, अबै म्हौ नै गवाई री जरुत कोनीं? देखौ, थै अबार आ निंदा सुणी हो!

66थै कांई सोचो हो?” उणौ जबाब दियौ, “ओ प्रांण डंड रै लायक है।”

67तो उणौ उणरै मूंडै माथै थूकयौ अर उणरै मुक्‍का ठोकया, दूजौ भी थप्पड़ों मारी अर कयौ,

68“हे मसीह, म्हौ नै भविसयवांणी करन बता की थनै कीण ठोकयो?”

69पतरस बाहर आंगणै में बैठौ हो की एक दासी उणरै खनै आई अर कयौ, “थूं भी यीसु गलीली रै साथै हो।”

70उण सैंगो रै सांमै मना किनी, “म्हैं कोनीं जांणूं थूं कांई कैह री है।”

71जद वो बाहर फाटक री तरफ गियौ, तो दूजी दासी उणनै देख लियौ अर उठै रै लोगां नै कयौ, “ओ भी तो यीसु नासरी रै साथै हो।”

72पतरस सौगन खान भळै मना किनी, “म्हैं उण मिनख नै कोनीं जांणूं।”

73थोड़ी देर पछै लोगां नै जे उठै ऊभा हा, पतरस रै खनै आन कयौ, “सचमुच थूं भी उणमे ऊं एक है, क्यूंकै थांरी बोली थांरा भेद खोले है।”

74तो वो कोसनै अर सौगन खाणै लागौ, “म्हैं उण मिनख नै कोनीं जांणूं।” अर तुरत कुंकड़े बांग दीनी।

75तो पतरस नै यीसु री कयोड़ी बात याद आई। “कुंकड़े रै बांग दैणै ऊं पैला थूं तीन बार म्हारौ इन्कार करैला।” अर वो बाहर जायनै जोर-जोर ऊं रोयो।