Matthew 27 — Marwari Bible

9तो जिकौ वचन यिर्मयाह भविसयदाता रै कयोड़ो हो वो पूरौ होयौ, “उणौ वे तीस सिक्‍का लिया अर वो ऐ सिक्‍का है जिणनै इजरायल रै लोगां उणरी कीमत मे लेणे रै लिए तैय किया हा।

10अर ज्यूं परभु म्हनै आग्या दी ही व्यौंही उणौनै उण सिक्‍को ऊं कुम्हार रै खेत नै मोल में ले लियौ।”

11जद यीसु हाकिम रै सांमै ऊभौ हो तो हाकिम उणनै पूछयौ, “कांई थूं यहूदियो रौ राजा है?” यीसु उणनै कयौ, “थूं आप ही कैह रियौ है।”

12जद परधान याजकौ अर लोगां रा मुखिया उण माथै दोस लगा रिया हा, तो उण कोई जबाब कोनीं दियौ।

13इण कारण पिलातुस उणनै कयौ, “कांई थूं सुणै कोनीं ऐ थांरै विरोध में कितरी गवाईयों दे रिया है?”

14पण यीसु उणनै एक बात रौ भी जबाब कोनीं दियौ, इण ऊं हाकिम नै घणौ अचूम्बो होयो।

15हाकिम री आ रीत ही की उण तैंवार में लोगां रै वास्तै किणी एक बंदी नै जीण नै वे चावै हा, छोड़ देता हा।

16उण वगत उणरै उठै बरअब्बा नाम रौ एक मांनयोड़ो बंदी हो।

17जद भीड़ भेळी होई, तो पिलातुस उणौ नै कयौ, “थै किणनै चावौ की म्हैं थौरे वास्तै छोड़ दूं? बरअब्बा नै, या यीसु नै जे मसीह कहीजै है?”

18क्यूंकै वो जांणतौ हो की उणौनै यीसु नै अपणै जळण रै कारण पकड़ायौ है।

19पिलातुस न्याव री गधी माथै बैठौ हो तो उणरी लुगाई वीनै संदेस भेज्यौ, “थूं उण धरमी रै मामले में हाथ मती घाते, क्यूंकै म्हैं आज सपनै में उणरै कारण घणौ दु:ख उठायौ है।”

20परधान याजकौ अर बुढ़ियों लोगां नै समझाया की वे बरअब्बा नै छुड़ावै अर यीसु रौ नास करावै।

21हाकिम उणौनै पूछयौ, “इण दोनूं में ऊं कीण नै चावौ हो की म्हैं थौरे वास्तै छोड़ दूं?” उणौ कयौ, “बरअब्बा नै।”

22पिलातुस उणौ नै पूछयौ, “पछै यीसु नै, जिकौ मसीह कहीजै है, इणरौ कांई करूं?” सैंगो उणनै कयौ, “वो सूली ऊपर चढ़ायौ जावै।”

23पिलातुस कयौ, “कांई, इण कौणसो गुनों कियो?” पण वे भळै भी चिला-चिलायनै कैवण लागा, “वो सूली ऊपर चढ़ायौ जावै।”

24जद पिलातुस देख्यौ की कांई ठीक होणै वाळौ नीं है, उलटो झगड़ौ वदैह रियौ है, तो उणै पांणी लेन भीड़ रै सांमै आपरा हाथ धोया अर कयौ, “म्हैं इण धरमी रै खून ऊं निरदोस हूं, थै इज जांणौ।”

25सैंग लोगां जबाब दियौ, “इणरौ खून म्हौ माथै अर म्हांरी औळाद माथै होवै!”

26इण माथै उणै बरअब्बा नै उणौरै लिए छोड़ दियौ, अर यीसु रै कोड़ा लगान सूंप दियौ, की सूली ऊपर चढ़ायौ जावै।

27तो पिलातुस रै सिपाईयो यीसु नै किले में ले जान सगळी पलटन उणरै च्यांरूमेर भेळी की,

28अर उणरै गाभा उतारनै उणनै लाल रंग रौ चोगो पैरायौ,

29अर कांटो रौ मुगट गूंथनै उणरै माथे ऊपर राखियौ, अर उणरै जीवणे हाथ में डंडों पकड़ा दियौ अर उणरै आगै गोडा टेकन उणरी मजाक उडानै लाग्या अर कयौ, “हे यहूदियो रा राजा, नमस्कार!”

30अर उणरै माथै थूकण लागा, अर वोहीज डंडों लेन उणरै माथे ऊपर ठोकण लाग्या।

31जद वे उणरी मजाक करनै रिया तो वो चोगो उण ऊपर ऊं उतारनै पाछा उणरा गाभा उणनै पैराया, अर सूली ऊपर चढ़ानै ले गिया।

32सैहर ऊं निकळते वेळा कुरैन रौ रैवण वाळौ समौन नाम रौ एक मिनख मिळयो, अर उणौ इणनै यीसु री सूली उठान ले चलनै सारू मजबूर करयौ।

33वे उण जगा पूगया जिकौ गुलगुता या खोपड़ी री जगा कहीजै है।

34उणौ पित मिळायोड़ो अंगूररस पीण सारू दियौ, पण उणै चाखनै पीणो नीं चाहयौ।

35तो उणौ उणनै सूली पर चढ़ायौ, अर परची नोख नै उणरा गाभा बांट लिया,

36अर उठै बैठनै उणरौ पेहरो देवण लाग्या।

37अर उणरौ दोसपत्र उणरै माथे रै थोड़ो ऊपर चिपका दियौ, की “ओ यहूदियो रौ राजा यीसु है”।

38तो उणरै साथै दो डाकू एक जीमणी तरफ अर एक डावी, सूली ऊपर चढ़ाया गिया।

39उठै आण-जाण वाळा मिनख यीसु री निंदा करता होया अर माथो हिलाता होया

40ओ कैवता हा, “हे मिंदर ढ़ावण वाळा अर तीन दिनां में पाछौ बणा देण वाळा, अपणै आप नै बचा। जे थूं परमेसर रौ बेटौ है, तो सूली ऊं नीचे उतर आ”।

41इण तरीकै ऊं परधान याजकौ भी सास्तरी अर बुढ़ियों रै साथै मजाक करनै कैवता हा,

42“इण दूजौ नै बचाया, अर अपणै आप नै कोनीं बचा सकै। ओ तो ‘इजरायल रौ राजा’ है अबै सूली ऊपर ऊं उतर आवै तो म्हौ विसवास करौ।

43उणै परमेसर ऊपर विसवास राखियौ है, जे वो इणनै चावै है तो अबै उणनै छोड़ा दे, क्यूंकै उणै कयौ हो, ‘म्हैं परमेसर रौ बेटौ हूं।’ ”

44इण तरैह डाकू भी जिकौ इणरै साथै सूली पर चढ़ाया गिया हा, उणरी निंदा करता हा।

45दोपार बारैह बजे ऊं लेन तीन बजे तांई उण सगळै परदेस में अंधारौ हो गियो हो।

46लगभग तीन बजे में यीसु जोर ऊं पुकारनै कयौ, “एली, एली, लमा सबक्तनी?” अरथ “हे म्हारै परमेसर, हे म्हारै परमेसर, थै क्यूं म्हनै छोड़ दियौ?”

47जे उठै ऊभा हा, उणमे ऊं कितौ ई ओ सुणन कयौ, “वो तो एलियाह नै पुकारै है।”

48उणमे ऊं एक तुरत दौड़नै रुई लेन खाटी अंगूरो में डूबोन डंडें में लगान उणै यीसु नै सूंपायो।

49दूजौ कयौ “रैण दो, देखौ एलियाह उणनै बचाणै आवै है की कोनीं।”

50तो यीसु नै ऊंची आवाज ऊं पुकार नै अपणौ प्रांण छोड़ दियौ।

51उणी वेळा मिंदर रौ परदो ऊपर ऊं नीचे तांई फाटनै दो टुकड़ा हो गिया, धरती कांप उठी, चटानों फाट गी,

52कबरौ खुलगी अर घणा पवितर लोगां रौ सरीर पाछौ जी उठयौ।

53अर यीसु जी उठनै रै पछै वे कबरौ में ऊं निकळनै पवितर सैहर यरुसलेम में गिया अर घणौ नै दिखाई दिया।

54तो सूबेदार अर जे उणरै साथै यीसु रौ पेहरो देता हा, भूकम्प अर जिकौ कीं होयौ देखनै डर गिया अर कैवण लागा, “साचौ ओ परमेसर रौ बेटौ हो!”

55उठै घणी लुगाईयां जिकौ गलील ऊं यीसु री सेवा करती होई उणरै साथै आई ही, आगौ ऊं देख री ही।

56उणमे मरियम मगदलीनी, अर याकूब अर योसेस री मां मरियम, अर जबदी रै बेटौ री मां ही।

57जद सांझ हुई तो यूसुफ अरिमतिया रौ एक धनवान मिनख, जिकौ आप ही यीसु रौ चेलौ हो, आयौ।

58उणै पिलातुस रै खनै जायनै यीसु री लास मांगी। तो पिलातुस दैणै री आग्या दी।

59यूसुफ नै लास लेयनै उणै नवी उजळी चादर में लपेटी,

60अर उणनै अपणी नवी कबर में राखी जे उणै चटान में खोदाई ही, अर कबर रै द्वार ऊपर मोटो भाठौ लुढ़कान चाल दियौ।

61मरियम मगदलीनी अर वो दूजी मरियम उठै कबर रै सांमै बैठी ही।

62दूजै दिन जिकौ तैयारी रै दिन रै बाद रौ दिन हो, परधान याजकौ अर फरीसी पिलातुस रै खनै भेळा होयनै कयौ,

63“हे महाराज, म्हौ नै याद है की उण धोखेबाज जद जीवतौ हो, कयौ हो, ‘म्हैं तीन दिन रै पछै जी उठूंला।’

64इण वास्तै आग्या दे की तीजै दिन तांई रुखाळी की जावै, ऐड़ौ नीं होवै की उणरा चेला आयनै उणनै छांनै ऊं ले जावै अर लोगां ऊं कैवै, ‘वो मरयोड़ौ में ऊं जी उठयौ है।’ जे ऐड़ौ हो गियौ तो ओ धोखो पैलै वाळै ऊं बूरो होवैला।”

65पिलातुस उणनै कयौ, “सिपाई नै लेयनै जाओ, अपणी समझ रै अनुसार रूखाळी करौ।”

66वे सिपाईयो नै साथै लेयनै गियौ, अर भाठै ऊपर मोहर लगान कबर री रूखाळी की।