Matthew 13 — Marwari Bible

15क्यूंकै इण लोगां रौ मन मोटो हो गियौ है, अर वे कांनो ऊं ऊंचौ सुणै है अर वे आपरी आंखे बंद कर ली है। कठैई ऐड़ौ नीं हो की वे आंखों ऊं देखे, अर कांनो ऊं सुणै अर मन ऊं हमजे, वे पाछा मुड़न परा आवै तो म्हैं उणौनै सावळ कर दूं।’

16पण धन्य है थोरी आंखे, की वे देखे है। अर थोरा कांन की वे सुणै है।

17“क्यूंकै म्हैं थोरै ऊं साचौ कहूं हूं की घणा भविसयदाता अर धरमी चावता हा की जिकौ बातां थै देखौ हो, अर सुणौ हो उणनै वे देखे अर सुणै, पण ऐड़ौ कोनीं होयौ।

18“अबै थै बीज बोणे वाळै री कहाणी रौ अरथ सुणौ:

19जिकौ कोई राज्य रा वचन सुणन नीं हमजयो, वीणरै मन मे जे कीं ई बोयो गियौ हो, उणनै वो सैतान आन खोन लेन जावै है। ओ वोहीज बीज है, जिकौ मारग रै किनारै बोयो गियौ हो।

20अर जिकौ पथरीली धरती ऊपर बोयो गियौ, वो ओ है, जिकौ वचन सुणन तुरत आंणंद ऊं मांन लेवे है।

21पण अपणै मे जड़ नीं राखनै रै कारण वो थोड़े दिन रौ है, अर वचन रै कारण जे परेसानी अर सताव आवै है, तो तुरत विसवास ऊं हट जावै है।

22जिकौ झाड़ियौ मे बोयो गियौ, वो ओ है, जिकौ वचन नै सुणै है, पण इण संसार री चिंता अर धन रौ लालच वचन नै दबावे है, अर वो फळ कोनीं लावै।

23जिकौ बड़िया जमीन मे बोयो गियौ, वो ओ है, जिकौ वचन नै सुणन समझै है, अर फळ लावै है। कोई सौ गुणा, कोई साठ गुणा, अर कोई तीस गुणा।”

24यीसु उणौ नै एक और कहाणी सुणाई, “सरग रा राज्य उण मिनख रै तरैह है जिणै आपरै खेत मे बड़िया बीज बोयो।

25पण जद लोग सो रिया हा तो उणौरा दुसमी आन गेहूं रै बीच मे जंगळी बीज बौएन जातौ रियौ।

26जद उगनै बालै बारै निकळी, तो जंगळी दाणा रा बून्ठा भी दिखाई दिया।

27इण घरो रै दासो नै आन उणौ नै कयौ, अरै मालिक, कांई थै अपणै खेत मे बड़िया बीज कोनीं बोयो हो? पछै जंगळी दाणे रौ बून्ठो उणमे कठै ऊं आया?

28मालिक नौकर नै कयौ, ‘ओ किणी दुसमी रौ कांम है।’ नौकरो मालिक नै कयौ, ‘थोरी कांई इछा है, की म्हैं जायनै उणनै भेळौ कर लौ?’

29मालिक कयौ, ‘कोनीं, ऐड़ौ नीं होवै की जंगळी दाणा रा बून्ठा उखाड़ते वगत उणरै साथै गेहूंं ई उखाड़ दो।

30काटनै तांई दोनो नै एक साथै ऊभा रैवण दो, अर काटनै रै विळा म्हैं काटनैवाळौ ऊं कैवूंला की पैलै जंगळी दाणा रा बून्ठा भेळा करन जळाणे रै लिए उणरा पुळा बांध दो, अर गेहूं नै म्हारै गोदाम मे भेळा करौ।’ ”

31यीसु उणौनै एक और कहाणी सुणाई, “सरग रौ राज राई रै एक दाणे रै ज्यूं है, जीणे किणी मिनख लेन आपरै खेत मे बो दियौ।

32वो हैंग बीजों ऊं छोटौ तो होवै है पण जद मोटो हो जावै है तो हैंग सागपात ऊं मोटो हो जावै है, अर ऐड़ौ झाड़ बण जावै है की आकास रा पंखेरू आन उणरी डाळियो माथै बसेरौ करै है।”

33यीसु एक और कहाणी उणौनै सुणाई “सरग रौ राज खमीर रै ज्यूं है जिणरौ किणी लुगाई नै थोड़ो सो खमीर लेन घणै सारे आटे मे मिळान राख दियौ अर वो सगळौ आटो खमीर हो गियो।”

34ऐ सगळी बातां यीसु नै कहाणियो मे लोगां ऊं कही, अर विना कहाणी वो उणौ ऊं कीं भी नीं कैवता हा,

35जिकौ वचन भविसयदाता रै दवारा कियोड़ौ हो, वो पूरौ होवै, “म्हैं कहाणी कैवण रै लिए अपणौ मूंडौ खोलुंला। म्हैं उण बातां नै जिकौ जगत री सरूआत ऊं लुकयोड़ी री है परगट करूंला।”

36तो वो भीड़ नै छोड़नै घर मे आयौ, अर उणरै चेलौ नै उणरै खनै आन कयौ, “खेत रै जंगळी दाणे री कहाणी म्हौ नै हमजा दो।”

37यीसु उणौनै जबाब दियौ, “हखरा बीज बोणेवाळो म्हैं, मिनख रौ बेटौ है।

38खेत संसार है, हखरा बीज राज्य री संतान, अर जंगळी बीज सैतान री संतान है।

39जिण दुसमी नै विनै बोयो वो सैतान है। कटनी दुनिया रौ अंत है, अर काटणवाळौ सरगदूत है।

40ज्यूं ई जंगळी दाणा भेळा करै अर जळाया जावै है यूं ई जगत रै अंत मे होवैला।

41म्हैं, मिनख रौ बेटौ आपरै सरगदूतो नै मेले ला, अर वे उणरै राज मे ऊं सगळै ठोकर रै कारण बणणवाळौ नै अर खोटा कांम करणैवाळौ नै भेळा करैला,

42अर वांनै अग्‍नि री कुंड मे नोखेला, उठै रोवेला अर दांत पीसेला।

43उण वगत धरमी आपरै पिता रै राज मे सूरज री तरैह चमकैला। जिणरा कांन होवै वो सुण ले।

44“सरग रौ राज खेत मे छिपयोड़े खजानै रै ज्यौ है, जिणै किणी मिनख नै मिळियौ अर वो मिनख उणनै उठैज खेत में छुपा दियौ, अर राजी होन आपरौ हैंग बेच दियौ अर उण खेत नै ही मोल लियौ।

45“सरग रौ राज एक व्यापारी ज्यूं है, जिकौ बड़िया मोतियो री खोज मे हा।

46जद उणनै एक मूंगौ मोती मिळयो तो वो आपरौ सगळौ बेच दियौ अर उणनै मोल लियौ।

47“सरग रौ राज उण मोटे जाळ रै ज्यौ है जिकौ समंदर मे नोखे, अर हर तरैह री मछलियो फस जावै।

48अर जद जाळ भरीज जावै, तो मछुआरा उणौनै किनारै ऊपर खींच लावै, अर बैठन बड़िया-बड़िया तो बरतनो मे भेळी की अर निकमी फेंक दी।

49जगत रै अंत मे ऐड़ौ इज होवैला। सरगदूत आन दुस्टो नै धरमियो ऊं अलग करैला,

50अर दुस्टो नै अग्‍नि रै कुंड मे फेंकेला, जठै वे रोवेला अर दांत पीसेला।”

51यीसु आपरै चेलौ नै कयौ, “कांई थै ऐ सगळी बातां समझीं?” उणौनै उण ऊं कयौ, “हां।”

52यीसु उणनै कयौ, “इण वास्तै हरैक सास्तरी जिकौ सरग रै राज रौ चेलौ बण्यौ है, उण घर रै मालिक ज्यौ है जिकौ आपरै गोदाम ऊं नवी अर पुराणी चीजों निकाळै है।”

53जद यीसु ऐ हैंग कहाणी कैह चुकया, तो उठै ऊं जाता रिया।

54अर आपरै हेर नासरत मे आन उणरै पराथना घर मे उणौनै ऐड़ौ उपदेस दैणै लागा की वे अचूम्बो करन कैवण लागा, “इणनै ओ ग्यांन अर सामरथ रा कांम कठै ऊं मिळिया?

55कांई ओ सुथार रौ बेटौ कोनीं? अर कांई इणरी मां रौ नाम मरियम अर इणरै भाइयो रौ नाम याकूब, यूसुफ, समौन अर यहूदा कोनीं?

56अर कांई इणरी सैंग बेनां अपांरै बीच मे कोनीं रैवै? पछै इणनै ओ सगळौ ग्यांन कठै ऊं मिळियौ?”

57इण तरैह उणौ इणरै कारण ठोकर खाई, पण यीसु उणौनै कयौ, “भविसयदाता रौ आपरै देस आपरै घर नै छोड़नै कठैई अपमांन कोनीं होवै।”

58अर यीसु उठै उणौरै अविसवास रै कारण घणा सामरथ रा कांम कोनीं करया।