Matthew 22 — Marwari Bible

4“भळै उणरै दासो ऊं कैहन भेजिया, ‘बुलायोड़ा मिनखौ नै कैवौ, देखौ, म्हैं खाणौ तैयार कर लियौ है, म्हारै पाळयोड़ा पसुओ नै मारन सैंग चीज तैयार है, ब्याव रै खाणै में आओ।’

5“पण मेमाणो नै इणरी परवा कोनीं किनी। कोई आपरै खेत मे, अर कोई आपरै व्यापार मे जाता रिया।

6दूजा मेमाणो राजा रै सेवकों नै पकड़नै उणौनै ठोकया अर उणौनै मारै नोख्या।

7तो राजा नै रीस आई, अर उणै आपरी सेना भेजनै उण हत्यारो रौ नास करयौ, अर उणरै सैहर नै बाळ दियौ।

8“तो उणरै आपरै दासो ऊं कयौ, ‘ब्याव रौ खाणौ तो तैयार है पण बुलायोड़ा मिनख सही कोनीं हा।

9इण वास्तै फांटे माथै जान जितरा मिनख थांनै मिळै, सगळौ नै ब्याव रै खाणै में बुलाए लाओ।’

10जद उण दासो नै सड़को ऊपर जायनै कांई भूंडा कांई भला, जितरा मिळया, सगळौ नै भेळा किया। अर ब्याव रौ घर भरीज ग्यौ।

11“जद राजा मेमाणो नै देखण मांय आयौ, तो उणै उठै एक मिनख नै देख्यौ, जिकौ ब्याव रा कपड़ा कोनीं पेरुड़ा हा।

12राजा वीनैं पूछयौ, ‘हे दोसत, थूं ब्याव रा कपड़ा पेरीए विना एठै क्यूं आ ग्यौ?’ उणरौ मूंडौ बंद हो गियौ।

13“तो राजा सेवकों नै कयौ, ‘इणरा हाथ-पग बांधनै बारै अंधारै मे नोख दो, उठै रोणो अर दांत पीसणो होवै।’

14“क्यूंकै बुलायोड़ा तो घणा हा पण चुणयोड़ा थोड़ा हा।”

15तो फरीसियों जायनै आपस मे विचार करयौ की यीसु नै कीण तरीकै ऊं उणरी कयोड़ी बातां में ही फंसाऔ।

16जद उणौ आपरै चेलौ नै हेरोदियो रै साथै उणरै खनै ओ कैवण भेजियां, “हे गुरु, म्हैं जांणौ हो की थूं साचौ है अर परमेसर रौ मारग सचाई ऊं सिखावै है, अर कीण री परवा नीं करै, क्यूंकै थूं मिनखौ रौ मूंडौ देखन बातां कोनीं करै।

17इण वास्तै म्हौ नै बता थूं कांई सौचे है, रोमियो रौ राजा कैसर नै कर दैणौ सही है या कोनीं?”

18यीसु नै उणरी चाल जांणन कयौ, “हे ढ़ोगियो, म्हनै कयौ जांसो हो?

19कर रौ सिक्‍को म्हनै दिखाओ।” तो वे उणरै खनै एक चांदी रौ सिक्‍को लेन आया।

20यीसु उणौनै पूछयौ, “आ छाप अर नाम किणरौ है?”

21उणौ यीसु नै कयौ, “कैसर रौ।” तो उणै उण ऊं कयौ, “जिकौ कैसर है, ओ कैसर नै दो। अर जिकौ परमेसर रौ है, वो परमेसर नै दे दो।”

22ओ सुणन उणौनै अचूम्बो होयौ, अर उणनै छोड़नै जाता रया।

23उणी दिन सदूकी जिकौ कैवै है की मरयोड़ा रौ पाछौ जी उठणौ है ई कोनीं, उणरै खनै आयनै उणनै पूछयौ,

24“हे गुरु, मूसा कयौ तो की जे कोई मिनख विना औळाद मर जावै, तो उणरौ भाई उणरी लुगाई ऊं ब्याव करन आपरै भाई रै लिए वंस पैदा करै।

25अबै म्हौरै एठै सात भाई हता, पैलौ ब्याव करनै मर ग्यौ, अर औळाद नीं होणै रै कारण आपरी लुगाई नै आपरै भाइयो रै लिए छोड़नै ग्यौ।

26इणी तरैह दूजै अर तीजै बिना औळाद मर गिया अर सातों तांई ओहीज होयो।

27इण सातों रै पछै वां लुगाई ही मर गी।

28क्यूंकै वां सातों री लुगाई हो चुकी ही, आखरी जी उठैला जद वां उण सातों मे ऊं कीण री लुगाई होवैला?”

29यीसु उणनै जबाब दियौ, “थै पवितर सास्तर अर परमेसर री सामरथ कोनीं जांणौ, इण कारण भूल मे पड़ग्या हो।

30क्यूंकै जी उठनै पर वे नीं ब्याव करैला अर नीं ब्याव मे दियौ जावैला पण सरग में परमेसर रै दूतो रै समान होवैला।

31पण मरयोड़ौ में ऊं जी उठया रै बारै मे कांई थै ओ वचन कोनीं पढ़यो जिकौ परमेसर थोरै ऊं कयौ,

32‘म्हैं अबराहम रौ परमेसर, अर इसहाक रौ परमेसर, अर याकूब रौ परमेसर हूं’? वो मरयोड़ौ रौ कोनीं, पण जीवतौ रौ परमेसर है।”

33ओ सुणन लोग उणरै उपदेस ऊं अचूम्बे मे पड़ गिया।

34जद फरीसियों सुण्यौ की यीसु नै सदूकियों रौ मूंडौ बंद कर दियौ, तो वे भेळा होया।

35उण में ऊं एक सास्तरी यीसु नै परखण सारू उणनै पूछयौ,

36“हे गुरु, व्यवस्था मे कोण सी आग्या मोटी है?”

37यीसु उणनै कयौ, “ ‘थूं परमेसर अपणै परभु ऊं सैंग मन अर अपणै सैंग प्रांण अर अपणी सैंग बुद्धि रै साथै परैम राख।’

38मोटी अर पैली आग्या तो आहीज है।

39अर उणी रै जैड़ी आ दूजी भी है की ‘थूं अपणै पड़ोसी ऊं अपणै समान परैम राख।’

40ऐ दो आग्या हैंग व्यवस्था अर भविसयदाताओ रौ आधार है।”

41जद फरीसी भेळा हा, तो यीसु उणौ नै पूछयौ,

42“मसीह रै बारै मे थै कांई सोचो हो? वो किणरौ बेटौ है?” उणौ उण ऊं कयौ, “दाऊद रौ।”

43यीसु उणौ नै पूछयौ, “तो दाऊद आतमा मे होयनै उणनै परभु क्यूं कैवै है? ओ लिखयोड़ो है,

44‘परभु नै, म्हारै परभु ऊं कयौ, “म्हारै जीमणै बैठ, जद तांई की म्हैं थारै बैरियो नै, थारै पगां रै नीचे नीं कर दूं।” ’

45भला, जद दाऊद उणनै परभु कैवै है, तो वो उणरौ बेटौ कीकर हो सकै है?”

46इणरै जबाब मे कोई एक बात नीं कैह सकयौ। उण दिन ऊं किणरी उण ऊं कीं पूछणै री हीमत कोनीं होई।