Acts 13

Mazanderani WMB (کتاب مقدس به زبان مازندرانی - گویش غربی)

1اَنطاکیِه ای کلیسایی دِلِه مَلِّمِن و پیغمبَرِن دَوِنِه: بَرنابا، شَمعون مَعروف به نیجِر، لوکیوسِ قیرَوانی، مَنائِن گه هیرودیسِ حاکمی ناتَنی بِرار وِه، و شائول.

2موقِه ای گه وِشون روزِه وِنِه و دِ خِدارِه پَرَسِش کِردِنِه، روح القُدُس بُتِه: «بَرنابا و شائولِ هون کاری سِه گه مِن وِشونِه دعوت هاکِردِمِه، سیوا هاکِنین.»

3اَزما، بعد از روزِه و دِعا، هون دِتایی سَر دَس بِشتِنِه و وِشونِه سَفری سِه راهی هاکِردِنِه.

4هَینجوری، هون دِتا گه روح القُدُسی طرفی جا بَرِسانی بَوِه وِنِه، سِلوکیه ای بَندری سِه بوردِنِه و اوجِه ای جا کَشتی ای هَمرا قبرِسی سِه بَرِسینِه.

5وختی سَلامیسی شَهری دِلِه بوردِنِه، یَهودیِنی عبادتگاهایی دِلِه خِدایی کَلامِ اعلام هاکِردِنِه. اونان ”یوحَنای“ معروف به ”مَرقُسِ“ شی هَمرا بَوِرد وِنِه تا وِشونِه کِمک هاکِنِه.

6وِشون دِشتِه جزیره رِه بَگِرِسِنِه تا پافوسی شَهری سِه بَرِسینِه. اوجِه یَتِه یَهودی مَردی گه وی اِسم باریِشوع وِه رِه بَئینِه گه دِردِرو پیغَمبَر و جادوگر وِه.

7وی رومی فرموندار ’سِرگیوس پولُسی‘ رَفِق وِه. فرموندار گه عاقِلِ مَردی وِه، بَرنابا و شائولِ شی کَفا بَخونِسِه، چون خوایسِه خِدایی کَلامِ بِشنُئِه.

8ولی هون جادوگر گه وی اِسمی معنی عالِم وِه وِشونی هَمرا مِخالِفَت هاکِردِه و تَقلّا کِردِه نِلِه فَرموندار ایمون بیارِه.

9ولی شائول، گه وِرِه پولُس هَم گِتِنِه، روح القُدُسی جا پِر بَوِه، هون مَردی ای چِشی دِلِه رِه هارشیِه و بُتِه:

10«تو اِی اِبلیسی وَچِه، تو اِی دِشتِه خِبیهایی دِشمن، اِی گه مَکر و فَریبی جا پِری، هَینی جا گه خِداوندی راسِ راها رِه وَل هاکِنی دَس نَکِشِنی؟

11دِن گه خِداوندی دَس تی بَزوئَنی سِه تی سَری وَر دَرِه. اِسا کور وونی و تا چَن وَخت آفتابِ نَوینی.» دَرجا، وی چِش تیرِه و تار بَوِه، شی دور چَرخ گیتِه و ینَفَری دِمال گِرِسِه گه وی دَسِ بَیرِه و راهِ وِرِه هَم هادِه.

12وختی فرموندار هَین جریانِ بَئیِه، ایمون بیاردِه، چون تَعلیمی گه خِداوندی خَوَری داوِنِه ای جا بِهت هاکِرد وِه.

13پولس و وی هَمراهِن دَریایی راهی جا، از پافوس پِرجِه ای سِه بوردِنِه گه پامفیلیِه ای مَنطقِه ای دِلِه وِه. ولی اوجِه یوحنای معروف به مَرقُس وِشونی جا سیوا بَوِه و اورشَلیمی سِه دَگِرِسِه.

14ولی وِشون پِرجِه ای جا رَد بَوِنِه و اَنطاکیه پیسیدیه ای مَنطقِه ای سِه بَرِسینِه. مِقَدّسِ شَنبِه روز، عبادتگاهی دِلِه بیمونِه و هِنیشتِنِه.

15بعد از هَینگه تورات و پِیغمبَرِنی نِوِشتِه رِه بَخونِسِنِه، عبادتگاهی رَئیسِن وِشونی سِه پِیغِم بَرسانینِه و بُتِنِه: «بِرارِن، اگه گَبی دارِنی گه مَردِنِ تشویق کِنِّه، بُئین.»

16پولُس هِرِسا و دَسی هَمرا اِشارِه هاکِردِه، بُتِه: «اِی یَهودی مَردِن، و شِما اِی خِداتَرسِن، گوش هادین!

17هَین یَهودی قومی خدا، اَمِه پیرِنِ اِنتخاب هاکِردِه و اَمِه قومِ هون موقِه ای گه وِشون مصری مِلکی دِلِه غریب وِنِه رِه سَربِلَن هاکِردِه و قِوَّتی هَمرا وِشونِه هون مِلکی جا دیرگا بیاردِه،

18و نزیکِ چِل سال صحرایی دِلِه وِشونِه تَحمِل هاکِردِه.

19وی بعد از هَینگه هَفتا قوم گه کَنعانی دِلِه دَوِنِه رِه از بِین بَوِردِه، اونِنی مِلکِ وِشونِه اِرثیِه هادا.

20هَین جریان حِدودِ چار صد و پَنجاه سال طول بَکشیِه. «بعد از هون، خِدا تا سَموئیلِ پِیغَمبری دورِه، داوَرِنِ وِشونِه هادا.

21اَزما وِشون یَتِه پادشاه بَخوایسِنِه و خِدا، شائول، قِیسی ریکا، بنیامینی قَبیلِه ای جارِه وِشونِه هادا، گه چِل سال حِکومت هاکِردِه.

22بعد از هَینگه شائول بَرکِنار بَوِه، داوودِ اِنتخاب هاکِردِه تا وِشونی پادشاه بَوو و وی خَوَری شهادت هادا و بُتِه: ”مِن داوود یِسی ای ریکارِه، مَردی بَئیمِه گه خِیلی می دِل نیشِنِه، وی دِشتِه می خواسِّه رِه بِجا اُرنِه.“

23«خِدا طِبق شی وَعدِه، هَین مَردی ای نَسلی جا، یَهودی قومی سِه یَتِه نِجات دهندِه یَعنی عیسی رِه بیاردِه.

24پِش از هَینگه عیسی بیئِه، یحیی دِشتِه یَهودی مَردِنی سِه توبه ای غِسلِ تَعمیدِ اعلام کِردِه.

25وختی یحیی شی خِدمَتِ تُوم کِردِه، بُتِه: ”مِنِه کی دِنِّنی؟ مِن وی نیمِه، بَلگی وی بعد از مِن اِنِه و مِن حتّی لایق نیمِه وی کُوشی بَنِّ وا هاکِنِم.“

26«اِی بِرارِن، اِی ابراهیمی وَچیلِه ای نَسل، و اِی خِداتَرسِنی گه شِمِه میِن دَرِنِه! هَین نِجاتی پِیغِم اَمِسِه بَرِسانی بَوِه.

27چون اورشلیمی مَردِن و وِشونی گَت گَتِ عیسی رِه نِشناسینِه، و پِیغَمبَرِنی بُتِه ایشونِه گه هر مِقَدّسِ شَنبِه وِشونی سِه بَخونِس وونِسِه رِه نِفَهمِسِنِه. وِشون وی مَحکوم هاکِردنی هَمرا پیغَمبَرِنی بُتِه ایشونِه اَنجام بَرِسانینِه.

28با هَینگه وِشون هیچ دَلیلی وی بَکوشتنی سِه نَنگیتِنِه، پیلاتُسی جا بَخوایسِنِه وِرِه اعدام هاکِنِه.

29و وختی دِشتِه اونچی گه وی خَوَری بَنوِشت بَوِه وِه رِه، اَنجام هادانِه، وِرِه صَلیبی جا جِر بیاردِنِه، مقَبره ای دِلِه بِشتِنِه.

30ولی خِدا وِرِه مِردِگونی جا زینِّه هاکِردِه.

31خِیلی روزا عیسی شِرِه اونانیسِه گه وی هَمرا جلیلی جا اورشلیمی سِه بیمو وِنِه ظاهر هاکِردِه، گه اَلَنم وِشون قومی سِه وی شاهِدِنِنِه.

32«اِسا اَما هَین خَوَرخِشِ شِمارِ دِمی گه خِدا اونچی گه اَمِه پیرِنِ وَعدِه هادا وِه رِه،

33عیسایی زینِّه هاکِردَنی هَمرا، اَمِسِه گه وی وَچیلِمی وَفا هاکِردِه. هَمونجور گه دِوِّمین مَزموری دِلِه بَنوِشت بَوِه: «”تو می ریکائی؛ اَمرِز، مِن تِرِه مولود هاکِردِمِه.“

34«خِدا وِرِه مِردگونی جا زینِّه هاکِردِه تا دِ فسادی سِه نَگِردِه، خِدا هَینجور بُتِه: «‌”مِن مِقَدَّس و مِطمئنِ بَرکات گه داوودِ وعدِه هادا بَوِه، شِمارِ دِمِه.“

35و هَمینجورَم یَت دییَر مَزموری دِلِه گِنِه: «تو نِلنی تی مِقَدَّس، فِسادِ بَوینِه.“

36«داوود بعد از اونگه خِدایی اِراده ای هَمرا شی دورِه ای مَردِنِ خِدمت هاکِردِه، بَمِردِه و شی اَجدادِ مِلحق بَوِه، و فِسادِ بَئیِه.

37ولی اونیگه خِدا وِرِه زینِّه هاکِردِه، فِسادِ نَئیِه.

38«پَس، اِی بِرارِن، دِنّین گه هَین مَردی ای طریق گِناهِنی آمِرزِش شِمارِ اعلام وونِه.

39اِسا هر کی عیسی رِه ایمون بیارِه، وی توسِط صالِح بِشمارِس وونِه، هر اونچی ای دِلِه گه نَتِنِّسِنی موسایی شَریعَتی تَوسِط صالِح بِشمارِس بَووئین.

40پس مِواظِب ووئین پِیغَمبَرِنی هَین بَنوِشت شِمِه سَر نیِه گه گِنِه:

41«”هارشین، اِی کسایی گه مِزاغ چینِنی، بِهت هاکِنین و نابود بَووئین، چون شِمِه روزگاری دِلِه کاری کِمِّه، گه هر چی اونِه شِمِسِه تعریف هاکِنِن هیچ وَخت باوَر نَکِنِنی.“

42وختی پولُس و بَرنابا عِبادَتگاهی جا دیرگا شیوِنِه، مَردِن وِشونی جا خواهِش هاکِردِنِه گه شَنبِه بعدی هَم هَین جَریانی خَوَری وِشونی سِه گَب بَزِنِن.

43بعد از هَینگه جَماعَت عِبادَتگاهی جا بوردِنِه، خِیلی از یَهودیِن و هون خداپَرَسِ مَردِن گه یَهودی بَوِه وِنِه، پولُس و بَرنابایی دِمال راه دَکِتِنِه. پولُس و برنابا هَین دَسِه ای هَمرا گَب بَزونِه و وِشونِه تشویق کِردِنِه گه خِدایی فیضی دِلِه اِدامِه هادِن.

44شَنبِه بَعدی، حِدوداََ، دِشتِه شَهری مَردِن جَم بَوِنِه تا خِداوندی کَلامِ بِشنُئِن.

45ولی وختی یَهودیِن جَماعتیشونِه بَئینِه، حَسودی ای جا پِر بَوِنِه و بی حِرمتی ای هَمرا هر چی پولُس گِتِه رِه مِخالِفَت کِردِنِه.

46اَزما پولُس و بَرنابا جِرأتی هَمرا بُتِنِه: «لازِمِ وِه خِدایی کَلام پِش از هَمه شِمِسِه بُتِه بَوو. ولی وختی اونِه رَد هاکِردِنی و شِرِه اَبَدی زندگی ای لایِق نَئونِسِنی، پَس اَلَن اَما غیرِیَهودیِنی سَمت شومی.

47چون خِداوَند اَمارِه هَینجور بُتِه گه: «”مِن تِرِه غیرِ یَهودیِنی سِه نُور بَساتِمِه، تا نِجاتِ دِنیایی چار سوک بَرِسانی.“

48وختی غیرِیهودیِن هَینِه بِشنُسِنِه، خِشال بَوِنِه و خِداوندی کَلامِ حِرمَت بِشتِنِه، و اونانیگه اَبَدی زندگی ای سِه اِنتخاب بَوِه وِنِه، ایمون بیاردِنِه.

49هَینجوری خِداوندی کَلام دِشتِه هون مَنطقه ای دِلِه دَپیتِه.

50ولی یَهودیِن، متِعَصِب و سَرشِناسِ زَناکِنِن و شهری مَرداکِنِن گه رَهبر وِنِه رِه اَنتِریک هاکِردِنِه و وِشون پولُس و بَرنابا رِه اَذیت و آزار هاکِردِنِه. پس پولُس و بَرنابا رِه هون مَنطقه ای جا دیرگا هاکِردِنِه.

51وِشون هَم هون شَهری خاکِ شی لینگی جا هِلاکِنّینِه و قونیه ای شَهری سِه بوردِنِه.

52شاگِردِن روح القُدُس و خِشالی ای جا پِر وِنِه.

← Chapter 12 Jump to: Chapter 14 →