Acts 9 — Mazanderani WMB (کتاب مقدس به زبان مازندرانی - گویش غربی)

1ولی سولُس گه خِداوندی شاگِردِنِ تهدید کِردِه و وِشونی بَکوشتَنِ اِدامِه داوِه، کاهِن اعظمی وَر بوردِه

2و ویجا دَمِشقی عِبادتگاهایی سِه نامِه بَخوایسِه تا اونانیگه عیسایی دِمالرُو هَسِّنِه و وِشونِه اَهل طریقت گِتِنِه، چی زَنا و چی مَردی رِه، هَماسِه و اورشلیمی سِه بیارِه.

3راه دِلِه، وختی سولُس دَمِشقی نَزیکی رَسیِه، ناخوکی یَتِه نور آسِمونی جا بیمو و وی دورِه بَیتِه.

4وی بِنِه ای سَر دیم بَخاردِه، یَتِه اَواز بِشنُسِه گه وِرِه گِتِه: «شائول، شائول، چه مِنِه آزار دِنی؟»

5سولُس بُتِه: «خِداوندا، تو کی هَسّی؟» جِواب هادا: «مِن عیسامِه، هَمون گه تو وِره آزار دِنی.

6اِسا، پِرِس و شَهری سِه بور. اوجِه تِرِه گِنِنِه چی وِنِه هاکِنی.»

7سولُسی هَمسَفَرِنی زِوون قِفل بَوِه وِه و اِسّاوِنِه، وِشون اَوازِ اِشنُسِنِه، ولی هیچکسِ نَئینِه.

8سولُس بِنِه ای جا پِرِسا، هر چَن وی چِش وا وِه ولی هیچی نَوینِسِه، پس وی دَسِ بَیتِنِه و وِرِه دَمشقی سِه بَوِردِنِه.

9وی سِه روز کور وِه و هیچی نَخاردِه و نَنوشیِه.

10دَمشقی دِلِه عیسایی شاگرد گه وی اِسم حَنانیا وِه زندگی کِردِه. خِداوَند یَتِه رویایی دِلِه وِرِه بُتِه: «حَنانیا!» جِواب هادا: « بَفرمِه اِی خِداوند.»

11خِداوَند وِرِه بُتِه: «پِرِس و یَتِه کوچه گه وی اِسم ”راسِ“، بور و یهودایی خِنِه ای دِلِه سولُسِ تارسوسی ای سِراغِ بَئیر. وی دِ دعا کِنِّه

12و رویایی دِلِه یَتِه مَردی گه وی اِسم حَنانیا هَسِّه رِه بَئیِه، گه اِنِه و وی سَر دَس اِلنِه تا اَی هَم بَوینِه.»

13ولی حَنانیا جِواب هادا: «خِداوندا، خِیلیایی جا هَین مَردی ای خَوَری بِشنُسِمِه گه تی مِقَدّسِ آدَمِنِ اورشَلیمی دِلِه اَذیت و آزار بَرِسانیِه.

14و هَیجِه هَم گَت گَتِه کاهِنِنی جا هَین اختیارِ دارنِه تا هر کی گه تی اِسمِ ایمون دارنِه رِه هَماسِه.»

15ولی خِداوَند حَنانیارِه بُتِه: «بور، چون هَین مَردی وسیله ایِه گه مِن اِنتخاب هاکِردِمِه تا می اِسمِ غیر یَهودیِن و پادِشاهِن و یَهودی مَردِنِ بَرِسانِّه.

16چون مِن وِرِه هَم دِمِه گه می اِسمی خاطری چَنّی وِنِه عذاب بَکِشِه.»

17پَس حَنانیا راه دَکِتِه و هون خِنِه ای دِلِه بوردِه. شی دَسِ سولُسی سَر بِشتِه، بُتِه: «شائول بِرار، خِداوَند عیسی گه وختی هَیجِه ایموئی راه دِلِه تیسِه ظاهر بَوِه، مِنِه بَرِسانیِه تا شی بینایی رِه اَی هَم بِدَس بیاری و روح القُدُسی جا پِر بَووئی.»

18هَمون موقِه یَچی هِتی پولَکی تَرا شائولی چِشی جا جِر کَتِه و اَی هَم بَتِنِسِه بَوینِه. اَزما پِرِسا و غِسلِ تَعمید بَیتِه و

19غذا بَخاردِه و اَی هَم شی قِوَّت بِدَس بیاردِه. شائول چَن روز شاگِردِنی هَمرا دَمشقی دِلِه دَوِه.

20وی دَرجا یَهودیِنی عبادتگاهایی دِلِه بوردِه و هَین پِیغم گه عیسی خِدایی ریکا هَسِّه رِه شِرو هاکِردِه.

21هر کی وی پِیغِمِ اِشنُسِه مات و مَبهوت وونِسِه و گِتِه: «مَگِه هَین هَمونی نیِه گه اورشلیمی دِلِه اونانی میِن گه عیسایی اِسمِ شی زِوون اُردِنِه آشوب کِردِه. مَگِه هَینِسه هَیجِه نیمو تا وِشونِه هَماسِه و گَت گَتِه کاهِنِنی وَر بَوِرِه؟»

22ولی شائول روز به روز ویشتَر قِوِّت گیتِه و دَمِشقی یَهودیِنی سِه دَلیلی هَمرا ثابِت کِردِه گه عیسی، هَمون مَسیحِ موعود هَسِّه.

23وختی گه خِیلی روزا بِگذِشتِه، یَهودیِن دَسیسِه دَچینِه تا شائولِ بَکوشِن.

24ولی شائول وِشونی دَسیسه ای جا خَوَردار بَوِه. وِشون شُو و روز شَهری دَروازِه ای وَر کِشیک کَشینِه تا وِرِه بَکوشِن.

25ولی شائولی شاگِردِن وِرِه شُوئینِه زَنبیلی دِلِه بِشتِنِه و شَهری دیفاری وِهِری جا وِرِه جِر بَرِسانینِه.

26وختی شائول اورشَلیمی سِه بَرِسیه، خوایسِه شاگِردِنِ مِلحق بَوو، ولی هَمه ویجا تَرسینِه، چون باور نَکِردِنِه وی واقِعاً عیسایی شاگِرد بَوِه وو.

27ولی بَرنابا، شائولِ بَیتِه و رَسولِنی وَر بیاردِه، بُتِه گه چِتی دَمِشقی راهی دِلِه خِداوَندِ بَئیه و چِتی خِداوَند وی هَمرا گَب بَزو و وی چِتی دَمشقی دِلِه شِجاعَتی هَمرا به اِسمِ عیسی تعلیم داوِه.

28پَس شائول وِشونی وَر بیمو و علَنی اورشَلیمی دِلِه رَفت و آمد کِردِه و شَهامتی هَمرا به اِسمِ خِداوند تعلیم داوِه.

29وی یَهودینِ یونانی زِوونی هَمرا گَب زووِه و بَحث کِردِه، ولی وِشونی نیَّت هَین وِه گه وِرِه بَکوشِن.

30وختی بِرارِن هَین جریانی جا خَوَردار بَوِنِه، شائولِ قیصَریه ای شهری سِه بَوِردِنِه و اوجِه ای جا تارسوسی شهری سِه راهی هاکِردِنِه.

31هَینجوری کلیسا دِشتِه یَهودیه و جَلیل و سامره ای دِلِه آرامش بَیتِه و قِوَّت گیتِه. وِشون خداوندی تَرسی دِلِه زندگی کِردِنِه و روح القُدُسی تَشویقی هَمرا وِشونی تِعداد ویشتَر وونِسِه.

32ولی پِطرُس گه دِشتِه مَنطقِه ای دِلِه گِرِسِه، لُدَّه ای مِقَدَّسینی بَئیَنی سِه بوردِه.

33اوجِه یَنَفر گه وی اِسم اینیاس وِه و هَشت سال چِلِّخ و زمینگیر وِه رِه بَئیِه.

34پِطرس وِرِه بُتِه: «اینیاس، عیسی مَسیح تِرِه شَفا دِنِه. پِرِس و شی لارِه جَم هاکِن!» وی دَرجا پِرِسا،

35دشتِه لُدَّه و شارونی مَردِن وِرِه بَئینِه و خِداوندِ ایمون بیاردِنِه.

36یافایی شَهری دِلِه یَتِه شاگرد گه وی اِسم طابیتا وِه زندگی کِردِه. یونانیِنی زِوون طابیتارِه دورکاس گِتِنِه گه وی معنی شیکا هَسِّه. هَین زَنا شِرِه خِبِ کاری سِه وَقف هاکِرد وِه و فَقیرِنی دَسِ گیتِه.

37هون روزا طابیتا مَریض بَوِه و بَمِردِه. پس وی جِنازِه رِه بَشوردِنِه و یَتِه بالاخِنِه ای دِلِه بِشتِنِه.

38چون لُدَّه، یافایی نَزیکی وِه، وختی شاگِردِن بِفَهمِسِنِه پِطرُس لُدَّه ای دِلِه دَرِه، دِ نَفَرِ وی وَر بَرِسانینِه و بُتِنِه: خواهِش کِمّی «دَرجا، اَمِه وَر بیئی.»

39پِطرُس پِرِسا و وِشونی هَمرا بوردِه. وختی اوجِه بَرِسیِه، وِرِه بالاخِنِه ای سِه بَوِردِنِه. بیوِه زَناکِنِن هَمه وی دور جَم بَوِنِه، بِرمِه ای هَمرا لیواسایی گه وختی دورکاس زینِّه وِه وِشونی سِه بَئوت وِه رِه، وِرِه هَم داوِنِه.

40ولی پِطرُس هَمه رِه اِتاقی جا دیرگا هاکِردِه و زِنی بَزو و دِعا هاکِرده. اَزما جِنازِه رِه هارشیِه و بُتِه: «طابیتا، پِرِس!» طابیتا شی چِشِ وا هاکِردِه و وختی پِطرسِ بَئیِه هِنیشتِه.

41پِطرُس طابیتایی دَسِ بَیتِه و وِرِه پِرِسانیِه. اَزما بیوِه زَناکِنِن و اونانیگه عیسی رِه ایمون داشتِنِه رِه داد هاکِردِه و وِرِه زینِّه وِشونی تَحویل هادا.

42هَین خَوَر دِشتِه یافایی دِلِه دَپیتِه و خِیلیا خِداوَندِ ایمون بیاردِنِه.

43پِطرُس هَم خِیلی روزا یافایی دِلِه یَتِه دَبّاغی وَر گه وی اِسم شَمعون وِه بَمونِسِه.