Acts 14

Mazanderani WMB (کتاب مقدس به زبان مازندرانی - گویش غربی)

← Chapter 13 Jump to: Chapter 15 →

1پولُس و بَرنابا قونیه ای شهری دِلِه هَم یَهودی عِبادتگاهی دِلِه بوردِنِه و جوری گَب بَزونِه گه خِیلی از یَهودیِن و یونانیِن ایمون بیاردِنِه.

2ولی یهودیِنی گه ایمون نیارد وِنِه، غیرِیهودیِنِ اَنتریک هاکِردِنِه و وِشونی فکرِ بِرارِنی علِیه، مَسموم هاکِردِنِه.

3پس پولُس و بَرنابا خِیلی زِمِن اوجِه بَمونِسِنِه و جِرأتی هَمرا خِداوندی سِه گَب بَزونِه، خِداوندی گه وِشونِه قِوَّت هادا تا نِشونِه ها بیارِن و مُعجِزات هاکِنِن، هَینجوری شی فیض بَخشِ پِیغِمِ تأیید کِردِه.

4هون شَهری مَردِن دِ دَسِه بَوِنِه؛ یَه دَسِه یَهودیِنی طَرَفدار بَوِنِه و یَه دَسِه رَسولِنی طَرفدار.

5وختی غیرِیَهودیِن و یَهودیِن شی گَت گَتِه ای هَمرا تَصمیم بَیتِنِه گه پولس و برنابا رِه اَذیَت هاکِنِن و سَنگسار هاکِنِن،

6پولُس و بَرنابا هَین جریانی جا خَوَردار بَوِنِه، لِسترِه و دِربه ای سِه گه لیکائونیِه ای شهرایی جا وِه، و هون دور و اطرافی مَنطقِه فِرار هاکِردِنِه.

7و اوجِه خِدایی خَوَرِخِشِ اعلام کِردِنِه.

8لِستْره ای دِلِه یَتِه مَردی نیشت وِه گه نَتِنِّسِه شی لینگِ دِکِت هادِه و هیچ وَخت راه نَشیوِه، چون مادَر زادی چِلِّخ وِه.

9وختی گه پولُس گَب زووِه، وی گوش داوِه. پولُس وِرِه زِل بَزو و بَئیِه هَین ایمونِ دارنِه گه شَفا بَیرِه.

10پولُس بِلَنِ صِدایی هَمرا وِرِه بُتِه: «شی لینگی سَر راس هِرِس!» هون مَردی شی جایی سَر پِرِسا و راه دَکِتِه.

11وختی مَردِن اونچی گه پولُس هاکِرد وِه رِه بَئینِه، لیکائونی ای زوونی هَمرا داد بَزونِه: «خِدایِن آدَمی ای تَرا اَمِه میِن جِر بیمونِه!»

12وِشون بُتِنِه بَرنابا ’زئوس‘ و پولُس ’هِرمِسِه‘. چون پولُس وِه گه گَب زووِه.

13زئوسی کاهِن گه وی مَعبَد شهری دَروازِه ای دیرگا وَر وِه، چَن تا گُو و چَن دَسِه گُل شَهری دَروازِه ای وَر بیاردِه، وی و جَماعت خوایسِنِه وِشونی سِه قِروونی هاکِنِن.

14ولی وختی هون دِتا رَسول، یَعنی بَرنابا و پولُس، هَین کِفرِ بِشنُسِنِه، شی یَقِه رِه جِرد هادانِه و جَماعتی دِلِه بوردِنِه، داد بَزونِه گه:

15«اِی مَردِن، چه هَینجور کِنِنی؟ اَما هَم هِتی شِمِه تَرا، آدَمِمی. اَما خَوَرِخِشِ شِمارِ دِمی تا هَین بیخِدِ کاری جا دَس بَکِشین و زینِّه خِدارِه ایمون بیارین گه آسِمون و زَمین و دریا و اونچی گه اونانی دِلِه دَرِه رِه، خَلق هاکِردِه.

16قَبلاََ خِدا دِشتِه قومیشونِه شی حال وِل هاکِردِه گه هر کِدیم شی راهی پِی بورِن،

17ولی با هَین حال شِرِه بی شَهادت نِشتِه، وی آسِمونی جا وارِش بَرِسانیَن و پِر بارِ فَصلایی بِبَخشیَنی هَمرا، شِمارِ خِبی هاکِردِه، خِیلی خِراک شِمارِ هادا و شِمِه دِلِ خِشالی ای جا پِر هاکِردِه.»

18حتّی هَین گَبایی هَمرا هَم، وِشون سَختی ای هَمرا بَتِنِسِنِه مَردِنی قِروونی هاکِردنی دَمِ بَیرِن.

19ولی یَهودیِنی، اَنطاکیه و قونیه ای شهرایی جا بیمونِه و مَردِنِ شی هَمرا هَمدَس هاکِردِنِه، پولُسِ سَنگسار هاکِردِنِه و هَین گِمونی هَمرا گه بَمِردِه، وِرِه شَهری جا دیرگا بَوِردِنِه.

20ولی وختی شاگِردِن وی دُور جَم بَوِنِه، پولس پِرِسا و شَهری سِه دَگِرِسِه. فَردای هون روز، وی و بَرنابا دِربِه ای شهری سِه راه دَکِتِنِه.

21وِشون هون شَهری دِلِه هَم خَوَرِخِشِ اعلام هاکِردِنِه و خِیلیارِه عیسایی شاگِرد هاکِردِنِه. اَزما لِستْره و قونیه و اَنطاکیه ای سِه دَگِرِسِنِه.

22هون شَهرایی دِلِه شاگِردِنی جانِ قِوَّت هادانِه، وِشونِه تشویق کِردِنِه شی ایمونی دِلِه بَمونِن و نَصیحَت کِردِنِه گه «وِنِه خِیلی مِصیبَتارِه تَحمِل هاکِنیم تا خِدایی پادشاهی ای دِلِه بوریم.»

23وِشون هر کلیسایی دِلِه مشایخی رِه ایموندارِنی سِه بِشتِنِه و دِعا و روزه ای هَمرا وِشونِه خِداوندی گه وِرِه ایمون بیارد وِنِه ای دَس، بِسپارِسِنِه.

24اَزما پیسیدیه ای مَنطقِه ای جا بِگذِشتِنِه و پامفیلیه ای مَنطقِه ای دِلِه بوردِنِه،

25وِشون پِرجِه ای دِلِه خِدایی کَلامِ تعلیم هادانِه و اوجِه ای جا آتّالیایی سِه بوردِنِه.

26آتّالیایی جا کَشتی ای هَمرا اَنطاکیه ای سِه دَگِرِسِنِه، هَموجِه گه ایموندارِن پولُس و بَرنابارِه خِدایی فیضی دَس بِسپارِس وِنِه تا هون کاری رِه هاکِنِن گه اَلَن اونِه اَنجام هادا وِنِه.

27وختی پولُس و بَرنابا اوجِه بَرِسینِه کلیسایی آدَمِنِ جَم هاکِردِنِه، اَی وِشونی سِه بُتِنِه گه خِدا وِشونی هَمرا چیها هاکِردِه و چِتی ایمونی دَرِ غیرِیَهودیِنی سِه پِه هاکِردِه.

28اَزما شاگِردِنی هَمرا خِیلی زِمِن اوجِه بَمونِسِنه.

← Chapter 13 Jump to: Chapter 15 →