Acts 6

Mazanderani WMB (کتاب مقدس به زبان مازندرانی - گویش غربی)

← Chapter 5 Jump to: Chapter 7 →

1هون روزا گه شاگِردِن ویشتَر وونِسِنِه، یَهودیِنِ یونانی زِوون، یَهودیِنِ عبرانی زِوونی جا شکایت داشتِنِه گه وِشونی بیوِه زَناکِنِنِ سَرچِش نَیرنِه و وِشونی هر روزِ غذایی سهمِ دِرِس نَدِنِنِه.

2پس هون دِوازِه تا رَسول، دِشتِه شاگِردِنِ شی کَفا بَخونِسِنِه و بُتِنِه: «دِرِس نیِه اَما مَردِنی غذا هادائَنی سِه، خِدایی کَلامی تَعلیم هادائَنِ وِل هاکِنیم.

3اِی بِرارِن، هَینِسه شی میِن هَفت نَفَر گه خِش نومِنِه و خِدایی روح و حکمتی جا پِرِنِه رِه انتخاب هاکِنین تا وِشونِه هَین کاری سَر بِلیم.

4ولی اَما شِرِه دِعا هاکِردَن و خِدایی کلامی خِدمتی سِه وقف کِمِّی.»

5اونچی گه رَسولِن بُتِنِه هَمه ای نَظر خِب بیمو، و هَین آدَمِنِ انتخاب هاکِردِنِه: استیفان مَردی گه روح القُدُس و ایمونی جا پِر وِه، فیلیپُس، پْروخُرُس، نیکانُر، تیمُن، پارمِناس، و نیکُلائوس گه اَنطاکیِه ای دِلِه یَهودی بَوِه وِه.

6هَین مَرداکِنِنِ رَسولِنی وَر بیاردِنِه و رَسولِن وِشونی سِه دِعا هاکِردِنِه و وِشونی سَر دَس بِشتِنِه و اونانِه هَین خِدمتی سَر بِشتِنِه.

7پس خِدایی کَلام هَمه جا اعلام وونِسِه و اورشلیمی دِلِه ای شاگِردِن خِیلی زیاد وونِسِنِه، و یَهودی کاهِنِنی جا یَتِه گَتِ جماعَت ایمون بیاردِنِه.

8استیفان فیض و قِوَّتی جا پِر وِه و قومی دِلِه خِیلی عجیبِ کارا و معجِزات کِردِه.

9هون موقِه چَن نفر یَتِه عبادتگاهی جا گه اونی اِسم ’آزاد بَوِه ایشونی عبادتگاه‘ وِه، گه قیرَوانی یَهودیِنی جا و اِسکندریِه و کیلیکیه و آسیایی مَنطقِه ای جا هَم وِنِه، اِستیفانی هَمرا بَحث هاکِردِنِه.

10ولی اِستیفان هون حِکمت و خِدایی روحی هَمرا گه گَب زووِه، هیچکی نَتِنِسِه وی پِش هِرِسِه.

11پَس وِشون یَواشک چَن نَفَرِ خَلوتِ جا بَوِردِنِه و وِشونِه اَنتریک هاکِردِنِه تا بُئِن: «اَما بِشنُسِمی گه اِستیفان، موسای پیغمبر و خِدارِه کِفر گِتِه.»

12وِشون مَردِن و مشایخ و توراتی مَلِّمِنی علِیه استیفانِ پِر هاکِردِنِه، و اونان استیفانی سَر بَریختِنِه، وِرِه هَماسینِه و شورایی وَر بَوِردِنِه.

13وِشون چَن تا دِردِرو شاهِد هَم بیاردِنِه گه گِتِنِه: «هَین آدَم هَین کاری جا دَس نَکِشِنِه و هَمِش مِقدَّسِ مَعبَد و شریعتِ بَد گِنِه.

14چون اَما شِه بِشنُسِمی گه گِتِه هَین عیسای ناصِری هَین مَعبَدِ لی دِنِه و رَسم و رسومی رِه گه موسی اَمارِه هادا، عَوَض کِنِّه.»

15هَمون موقِه، دِشتِه اونانیگه شورایی دِلِه نیشت وِنِه و استیفانِ زِل بَزو وِنِه، بَئینِه گه اِستیفانی دیم هِتی یَتِه فِرشته ای دیمی تَرا بَوِه.

← Chapter 5 Jump to: Chapter 7 →