Jeremiah 27

Norwegian 1938

← Chapter 26 Jump to: Chapter 28 →

1I den fyrste tidi som Sedekias, Josiasson var konge i Juda, kom dette ordet til Jeremias frå Herren:

2So sa Herren til meg: Gjer deg band og åk, og legg dei på nakken din!

3Send dei so til kongen i Edom og til kongen i Moab og til kongen yver Ammons-borni og til kongen i Tyrus og til kongen i Sidon med dei sendemennene som kjem til Jerusalem til Sedekias, Juda-kongen,

4og bed dei segja til herrane sine: So segjer Herren, allhers Gud, Israels Gud: So skal de segja til herrane dykkar:

5Eg hev gjort jordi, menneskja og dyri på jordi med mi store kraft og min strake arm, og eg gjev henne til den eg tykkjer er den rette.

6Og no hev eg gjeve alle desse landi i hendene på Nebukadnesar, Babel-kongen, tenaren min; jamvel dyri på marki hev eg gjeve han, so dei kann tena han.

7Og alle folkeslagi skal tena han og sonen hans og sonesonen hans, til dess tidi for hans land og kjem; då skal mange folkeslag og store kongar gjera han til træl.

8Og det folket og det riket som ikkje vil tena han, Nebukadnesar, Babel-kongen, og som ikkje vil bøygja nakken sin under Babel-kongens åk, det folket vil eg heimsøkja med sverd og svolt og sott, segjer Herren, til eg fær gjort ende på dei ved hans hand.

9Og de no - lyd ikkje på profetane dykkar og spåmennene dykkar og på draumane dykkar og på varseltydarane og trollmennene dykkar, som segjer til dykk: De kjem ikkje til å tena Babel-kongen!

10For lygn er det dei spår åt dykk; so eg lyt flytja dykk frå landet dykkar og driva dykk burt, og de lyt ganga til grunns.

11Men det folket som bøygjer nakken sin under Babel-kongens åk og tener han, det vil eg lata vera i fred i landet sitt, segjer Herren, so dei kann dyrka det og bu i det.

12Og til Sedekias, Juda-kongen, tala eg alle dei same ordi og sa: Bøyg nakken dykkar under Babel-kongens åk og ten han og folket hans, so skal de få leva.

13Kvi vil de døy, du og folket ditt, for sverd, av svolt og i sott, so som Herren hev tala um det folket som ikkje vil tena Babel-kongen?

14Lyd ikkje på ordi åt dei profetane som segjer til dykk: De kjem ikkje til å tena Babel-kongen! For lygn er det dei spår åt dykk;

15eg hev ikkje sendt dei, segjer Herren, men dei spår lygn i mitt namn, so eg lyt driva dykk burt og de lyt ganga til grunns, de og profetane som spår åt dykk.

16Og til prestane og heile dette folket tala eg og sa: So segjer Herren: Lyd ikkje på ordi åt profetane dykkar når dei spår åt dykk og segjer: Sjå, gognene i Herrens hus vert no snart flutte heim att frå Babel! For lygn er det dei spår åt dykk.

17Lyd ikkje på dei, men ten Babel-kongen, so skal de få leva. Kvi skal denne byen verta til ei audn?

18Men er dei profetar og hev Herrens ord, so kann dei beda Herren, allhers Gud, at ikkje dei gognene som er att i Herrens hus og i Juda-kongens hus og i Jerusalem, må koma til Babel.

19For so segjer Herren, allhers Gud, um sulone, koparhavet, og fotstykki og alle hine treng som endå er att i denne byen,

20dei som Nebukadnesar, Babel-kongen, ikkje tok då han førde Jekonja Jojakimsson, Juda-kongen, i utlægd frå Jerusalem til Babel i lag med alt storfolket i Juda og Jerusalem -

21ja, so segjer Herren, allhers Gud, Israels Gud, um dei gognene som er att i Herrens hus og i Juda-kongens hus og i Jerusalem:

22Til Babel skal dei verta flutte, og der skal dei vera alt til den dagen eg ser etter dei, segjer Herren, og fører dei upp og let dei koma attende til denne staden.

← Chapter 26 Jump to: Chapter 28 →