Jeremiah 41

Norwegian 1938

← Chapter 40 Jump to: Chapter 42 →

1Men i den sjuande månaden kom Ismael son åt Netanja Elisamason, ein mann av kongsætti, ein av stormennene åt kongen, og ti menner med han til Gedalja Akikamsson i Mispa, og dei fekk seg mat saman der i Mispa.

2Då stod Ismael Netanjason upp, og dei ti mennene som var med han, og dei slo Gedalja, son åt Akikam Safansson, i hel med sverd - han drap han som Babel-kongen hadde sett til å styra landet.

3Ismael slo og i hel alle dei jødane som var hjå Gedalja i Mispa, og dei kaldearane som fanst der, stridsmennene.

4Andre dagen etter han hadde drepe Gedalja, og fyrr nokon visste det endå,

5kom det menner frå Sikem, frå Silo og Samaria, åtti i alt, med avraka skjegg og sundrivne klæde og med merke rispa i holdet, og dei hadde med seg matoffer og røykjelse til å bera fram i Herrens hus.

6Og Ismael Netanjason gjekk ut imot dei frå Mispa, og han gjekk og gret. Då han møtte dei, sa han til dei: Kom med til Gedalja Akikamsson!

7Men då dei var komne inn i byen, tok Ismael Netanjason og dei mennene som var med han, og drap dei og kasta dei i brunnen.

8Men millom dei var det ti menner som sa til Ismael: Drep oss ikkje! For me hev forråd gøymde ute på marki: kveite og bygg og olje og honning. Då let han dei vera og drap dei ikkje saman med brørne deira.

9Brunnen som Ismael kasta liki i av alle dei menner som han hadde drepe umfram Gedalja, var den same som kong Asa hadde laga då han hadde ufred med Baesa, Israels-kongen; den fyllte Ismael Netanjason med drepne menner.

10So førde Ismael burt heile leivningen av folket i Mispa, kongsdøtterne og alt folket som var att i Mispa, og som Nebusaradan, hovdingen for livvakti, hadde sett Gedalja Akikamsson yver - dei førde Ismael Netanjason burt fangar og gav seg på vegen, vilde fara yver til Ammons-borni.

11Men då Johanan Kareahsson og alle herhovdingane som var med han, høyrde um alle dei illverki som Ismael Netanjason hadde gjort,

12tok dei alle mennene sine og drog av stad og vilde strida mot Ismael Netanjason, og dei fann han attmed det store vatnet i Gibeon.

13Då alt folket som var med Ismael, såg Johanan Kareahsson og alle herhovdingane som var med han, vart dei glade;

14og alt folket som Ismael hadde ført fangar frå Mispa, snudde og gjekk attende til Johanan Kareahsson.

15Men Ismael Netanjason slapp undan frå Johanan med åtte mann og for til Ammons-borni.

16Johanan Kareahsson og alle herhovdingane som var med han, tok då med seg alle som var att av folket, dei frå Mispa som han hadde vunne att frå Ismael Netanjason, etter Ismael hadde drepe Gedalja Akikamsson, både stridsmenner og kvinnor og born og hirdmenner, som han hadde ført attende frå Gibeon.

17Dei drog av stad, men stana i Kimham-herbyrget attmed Betlehem og vilde sidan halda fram med ferdi til Egyptarland

18- for kaldearane skuld; for dei var redde dei, av di Ismael Netanjason hadde drepe Gedalja Akikamsson som Babel-kongen hadde sett til å styra i landet.

← Chapter 40 Jump to: Chapter 42 →