2 Kings 13

Nuer Bible © Bible Society in South Sudan 1998,2012

← Chapter 12 Jump to: Chapter 14 →

1Kɛ run ruëc Yo-ac gat Ä-ɣɛ̈dh-yaa kuäär Juda ti jiɛn da̱ŋ rɛw wi̱cdɛ diɔ̱k, cu Yɛ-ɣo-a-ɣadh gat Yeɣu a kuäär I-thɛ-rɛl kä Tha-mɛ-ria, kä cuɛ ruëc kɛ run wäl bärɔw.

2Kä cuɛ la̱t ni jiäk waaŋ Kuɔth Nhial, cuɛ guɔ̱ɔ̱r ni dueer Ya-rɔ-baam gat Nɛ-bat mëë jak I-thɛ-rɛl kä dui̱r. /Kenɛ kɛ päl.

3Kä cu Kuɔth Nhial kɛ̈c kɛ I-thɛ-rɛl, kä cuɛ kɛ la̱th tetdä kua̱r Thi-ri-ya ni Ɣä-dha-el kɛnɛ tet Bɛn-a-dad gat Ɣä-dha-el.

4Kä cu Yɛ-ɣo-a-ɣadh Kuoth Nhial pal, kä cu Kuoth jɛ liŋ. Kɛ ɣöö cɛ riɛk I-thɛ-rɛl nɛn, min ca lät kä kɛ ɛ kuäär Thi-ri-ya.

5(Kɛ kui̱c ɛmɔ cu Kuoth Nhial I-thɛ-rɛl moc kɛ kään, kä cukɛ rɔ bar tetni ji̱ Thi-ri-ya. Kä cukɛ cieŋ dho̱rikiɛn ce̱tkɛ ta̱a̱ ëë wen.

6Kä /kenkɛ duer dhɔaar Ya-rɔ-baam päl, mëë ci I-thɛ-rɛl jak kä dui̱r, kä cukɛ guɔ̱ɔ̱r nikɛ. Kä cu puɔ̱ny Ac-tar-te ŋot cuŋä kä Tha-mɛ-ria bä.)

7Kä cuɛ thil rɛm mi di̱i̱t mi cu duɔth kä rɛm Yɛ-ɣo-a-ɣadh, cu duɔth ni jio̱ŋko̱o̱ri ti jiɛn dhieec, kɛ thurbiɛɛli da̱ŋ wäl, kɛ rɛm mi̱ bathdɔɔri wäl. Kɛ ɣöö ci kuäär Thi-ri-ya duɔthkiɛn nor ce̱tnikɛ tup döör.

8Kä cua duɔth lätni Yɛ-ɣo-a-ɣadh gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

9Kä cuɛ li̱w, kä cua jɛ kony kä Tha-mɛ-ria. Kä cu gatdɛ ni Yo-ac ruec kɛ gua̱a̱thdɛ.

10Kɛ run ruec Yo-ac kuäär Juda ti jiɛn diɔ̱k wi̱cdɛ bärɔw, cu Yɛ-ɣo-ac gat Yɛ-ɣo-a-ɣadh a kuäär I-thɛ-rɛl kä Tha-mɛ-ria, kä cuɛ ruec kɛ run bäkɛl.

11Kä cuɛ la̱t ni jiäk bä waaŋ Kuɔth Nhial. /Kenɛ dueer Ya-rɔ-baam gat Nɛ-bat päl, tëë cɛ I-thɛ-rɛl jak kä dui̱r, cuɛ guɔ̱ɔ̱r nikɛ.

12Kä cua duɔth lätni Yɛ-ɣo-ac gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

13Kä cu Yɛ-ɣo-ac li̱w, kä cu Ya-rɔ-baam kuäärɛ ka̱n. Kä cua Yɛ-ɣo-ac kony kɛɛl kɛ kua̱r I-thɛ-rɛl.

14Kä mëë ci Ɛ-li-cä tekɛ juey mi bi jɛ näk, cu Yɛ-ɣo-ac kuäär I-thɛ-rɛl wä kä jɛ. Kä cuɛ wä nhiamdɛ i̱, “Gua̱di̱n! Bum ni ji̱n kä thurbiɛɛli I-thɛ-rɛl kɛnɛ jio̱ŋko̱o̱rikɛ!”

15Kä cu Ɛ-li-cä jɛ jiök i̱, “Käni bäär kɛnɛ dɔwdɛ.” Kä cuɛ kɛ ka̱n.

16Kä cu Ɛ-li-cä jɛ jiök i̱, “Läth ni dɔwdɛ thi̱n.” Kä cuɛ dɔwdɛ la̱th thi̱n. Kä cu Ɛ-li-cä tetdɛ la̱th jɔk tetni kua̱r.

17Kä cuɛ kuäär jiök i̱, “Lɛp wernyin kuec känyä ca̱ŋ.” Kä cuɛ jɛ lɛp. Kä cu Ɛ-li-cä wee, “Yori jɛ.” Kä cuɛ jɛ yuɔr. Kä cu Ɛ-li-cä wee, “Ɛ bäär jucä Kuɔth Nhial, ɛ bäär jucä Thi-ri-ya! Kɛ ɣöö bi nyiëëny kɛ Thi-ri-ya kä Ä-pek amäni mi cikɛ Thum.”

18Kä cuɛ kuäär jiök i̱, “Käni bääri.” Kä cuɛ kɛ ka̱n. Kä cuɛ kuäär I-thɛ-rɛl jiök i̱, “Duäc piny kɛ kɛ.” Cuɛ piny duäc kä diɔ̱ɔ̱k kä cuɛ cu päl.

19Kä cu raan Kuɔth gaak kɛ jɛ, wee i̱, “Deri jɛ duäc nikä dhieec kiɛ kä bäkɛl. Kɛ ɣöö deri Thi-ri-ya däk amäni mi ciɛ thum, kä täämɛ biɛ däk kä diɔ̱ɔ̱k kärɔ.”

20Kä cu Ɛ-li-cä li̱w, kä cukɛ jɛ kony. Kä täämɛ tëë kɛ buɔ̱n ji̱ Mo-ab la mun ben a mackɛ kɛ ruel.

21Kɛ cäŋ kɛl tëë kɛ ji̱ I-thɛ-rɛl ti kuɔnykɛ raan, cu buɔ̱n kɛ pärikä kä cua raan yuɔr kɔ̱k Ɛ-li-cä. Kä niɛ min cɛ cɔ̱w Ɛ-li-cä nyɔt, cuɛ tëk a bɛ cuɔ̱ŋ nikɛ ciökɛ.

22Kä täämɛ cu Ɣä-dha-el kuäär Thi-ri-ya I-thɛ-rɛl ciɛŋ a jiäk kɛ ni̱n Yɛ-ɣo-a-ɣadh diaal.

23Duundɛ ɣöö te Kuoth Nhial kɛ nhök kɛnɛ pälikä kɛ kɛ, kä cuɛ kɛ luäk kɛ kui̱ matdä ruacdɛ kɛnɛ A-bɛ-ram kɛ Ay-dhɛk kɛ Je-kɔb, amäni walɛ /cɛ dëë nhɔk ɛn ɣöö bɛ kɛ däk kiɛ bɛ kɛ tuk nhiamdɛ.

24Kä min ci Ɣä-dha-el kuäär Thi-ri-ya li̱w, cu gatdɛ ni Bɛn-a-dad ruec kɛ gua̱a̱thdɛ.

25Kä cu Yɛ-ɣo-ac gat Yɛ-ɣo-a-ɣadh wi̱i̱ tëë ci Bɛn-a-dad gat Ɣä-dha-el kɛ ka̱n kä gua̱n ni Yɛ-ɣo-a-ɣadh kɛ ko̱r luɔ̱c jɔk. Kä diɔ̱ɔ̱k cu Yɛ-ɣo-ac Bɛn-a-dad joc kä cuɛ wi̱i̱ I-thɛ-rɛl nyɔk kɛ käni.

← Chapter 12 Jump to: Chapter 14 →