2 Kings 25

Nuer Bible © Bible Society in South Sudan 1998,2012

← Chapter 24 Jump to:

1Kä kɛ cäŋ kä wäl kä pay wäl kɛ bäŋuan runi ruecdɛ cu Nɛ-bu-kad-nɛ-dhar Jɛ-ru-tha-lɛm mak kɛ rɛmdɛ kɛɛliw, kä cuɛ jɛ go̱l. Kä cukɛ jɛ ta̱th päny mi göl kɛ jɛ.

2Cua wec go̱l amäni wäl kɛl runi ruecä kua̱r ni Dhid-ki-yaa.

3Kɛ bäŋuan ni̱ni kɛ ŋuaan päthni, cu buɔth di̱t rɛy wec, kä cuɛ thil mi cam naathɛ.

4Kä cua päny wec to̱l. Cu kuäär kɛnɛ rɛm kɛɛliw rɔ̱ bar kɛ wäär kɛ duɔ̱ɔ̱p in te kam pa̱nyni da̱ŋ rɛw gekä kakä kua̱r, kä ci ji̱ Bɛ̈-bi-lɔn wec go̱l. Kä cukɛ wä kɛ kui̱ lo̱o̱lä Jɔr-dɛn.

5Duundɛ ɣöö cu rɛm ji̱ Bɛ̈-bi-lɔn kuäär guɔ̱ɔ̱r mäni mëë ca jɛ cop rɛy tɔ̱ɔ̱rä Jɛ-ri-ko. Kä cua rɛmdɛ däkä dɔɔr gekädɛ.

6Kä cukɛ kuäär käp, kä cua jɛ nöŋ kuäär Bɛ̈-bi-lɔn kä Rib-laa, kä cuɛ jɛ kum kɛ Lia̱a̱.

7Kä cua gat Dhid-ki-yaa näk ni nhiamdɛ, kä cua wäŋkɛ lööl raar, kä cua jɛ pua̱t kɛ kuatni, kä cua jɛ naŋ kä Bɛ̈-bi-lɔn.

8Kɛ cäŋ kä bärɔw kä pay dhieec (min la wäl bäŋuan runi ruecä Nɛ-bu-kad-nɛ-dhar kuäär Bɛ̈-bi-lɔn). Cu Nɛ-bu-dhar-dan raan läätdä kua̱r Bɛ̈-bi-lɔn, min la bo̱o̱th yiëëni ben kä Jɛ-ru-tha-lɛm.

9Kä cuɛ luak Kuɔth Nhial kɛnɛ duel kua̱r kɛ ti̱ec Jɛ-ru-tha-lɛm diaal waŋ. Kɛn ti̱ec diaal tin di̱t cuɛ kɛ waŋ.

10Kä cu rɛm Bɛ̈-bi-lɔn ni kɛɛliw in te kɛɛl kɛ bo̱o̱th yiëëni, päny in go̱l Jɛ-ru-tha-lɛm da̱k piny.

11Kä cu duɔth nɛɛni tëë ci duɔth rɛy wec, kɛnɛ duɔth nɛɛni diaal tëë ci wä kä kuäär Bɛ̈-bi-lɔn cu Nɛ-bu-dhar-dan bo̱o̱th yiëëni kɛ naŋ ala pɛ̈ɛ̈c.

12Duundɛ ɣöö cu bo̱o̱th yiëëni ɛ tha̱a̱ŋ nɛɛni tin la can ba̱ny piny kɛ ɣöö ba ka̱a̱k lɔ̱ɔ̱ pith.

13Kä cu ji̱ Bɛ̈-bi-lɔn riäk yieethä min do̱l in te luaak Kuɔth Nhial, kɛnɛ dhaar puɔɔkä tiath, kä cukɛ yiëëth in do̱l kap kä Bɛ̈-bi-lɔn.

14Kä cukɛ cuɔ̱ɔ̱k, kɛnɛ liir, kɛ kueenyni maac, kɛ kuak yieethä min do̱l diaal tin lät kɛ naath rɛy luaak Kuɔth Nhial ka̱n,

15Cu mäni kɔ̱ɔ̱li maac, kɛnɛ took. Kä cuɛ tin diaal tin la da̱a̱p kɛnɛ tin la ciɛk in bo̱r ka̱n bä.

16Kä cuɛ yiëëth in do̱l täth ni dhaar puɔɔkä kɛnɛ wääthni da̱ŋ rɛw, kɛ cuɔ̱ɔ̱ŋ tëë ci Thɔ-lo-mon kɛ lät ni luak Kuɔth Nhial a ti ca luäŋ kɛ thëm.

17Kä bär wääthä kɛl ɛ jua̱th tetni da̱ŋ wäl bädäk, kä te wi̱cdɛ kɛ kum yieethä min do̱l. Kä bär kumä ɛ jua̱th tetni da̱ŋ diɔ̱k. Kä ca kɛt ce̱tkɛ jɔk jua̱a̱th, kä ca win kɛɛliw kɛ yiëëth in do̱l. Kä cua jɛn ta̱a̱ wääthä min dɔ̱ŋ ɛ nɔ bä ca kɛt ce̱tkɛ jɔk jua̱a̱th.

18Kä cu bo̱o̱th yiëëni bo̱o̱th palä min di̱i̱t ni Thɛ-ra-yaa, kɛnɛ bo̱o̱th palä min rɛwdɛ ni Dhɛ-pɛ̈n-yaa, kɛ gueec thuɔk kal da̱ŋ diɔ̱k naŋ ala pɛ̈ɛ̈c.

19Kä cuɛ raan kɔar kua̱r min la naath ɛ bo̱o̱th ko̱o̱r, kɛnɛ ji̱ yiën kua̱r da̱ŋ dhieec ti te rɛy wec, kɛ bolith bo̱o̱thä rɛ̈m min la naath a car, kɛ nɛy ti jiɛn bäkɛl ti kɔ̱ŋ ti ca jek rɛy wi̱c naŋ ala pɛ̈ɛ̈c bä.

20Kä cu Nɛ-bu-dhar-dan kɛn diaal naŋ, cuɛ kɛ nöŋ kuäär Bɛ̈-bi-lɔn kä Rib-laa.

21Kä cu kuäär Bɛ̈-bi-lɔn kɛ näk kä Rib-laa muun Ä-math. Inɔ cua ji̱ Juda naŋ ala pɛ̈ɛ̈c muundiɛn.

22Kä cu Nɛ-bu-kad-nɛ-dhar kuäär Bɛ̈-bi-lɔn Gɛ-dɛ̈l-yaa gat Ä-ɣi-kam, gat Ca-pan kuany ala rueec nɛɛni tëë cɛ ba̱ny kä Juda.

23Kä mëë ca jɛ liŋ ɛ bööth rɛmni diaal kɛ nɛɛkiɛn ɛn ɣöö ci kuäär Bɛ̈-bi-lɔn Gɛ-dɛ̈l-yaa kuany ala rueec, cukɛ ben kä Gɛ-dɛ̈l-yaa kɛ nɛɛkiɛn kä Midh-pa, I-ca-mel gat Nɛ-thɛ̈n-yaa, kɛ Yo-ɣa-nan gat Ka-re-ɛ̈k, kɛ Thɛ-ra-yaa gat Tɛ̈n-ɣu-mɛth raan Nɛ-to-path, kɛ Yɛ̈-ä-dhɛ̈n-yaa min la gat ran Maaka.

24Kä cu Gɛ-dɛ̈l-yaa rɔ ya̱ckɛ wëë i̱, “/Cuarɛ dual kɛ bööth ji̱ Bɛ̈-bi-lɔn. Cieŋɛ wec, kä la̱tdɛ kuäär Bɛ̈-bi-lɔn ikä, bi gɔaa ni jɛn kɛ yɛ.”

25Duundɛ ɣöö kɛ bärɔw päthni, cu I-ca-mel gat Nɛ-thɛ̈n-yaa, gat Ɛli-cama raan thuɔk duëël kuäärä, ben kɛ nɛy da̱ŋ wäl, cuɛ Gɛ-dɛ̈l-yaa näk kɛnɛ ji̱ Juda, kɛ ji̱ Bɛ̈-bi-lɔn tëë te kɛɛl kɛ jɛ kä Midh-pa.

26Kä cu nɛy diaal amäni gaat, kɛ bööth rɛmni rɔ bar kä I-jëp. Kɛ ɣöö dualkɛ kɛ ji̱ Bɛ̈-bi-lɔn.

27Kɛ cäŋ kä jiɛn da̱ŋ rɛw wi̱cdɛ bärɔw kä pay wäl rɛw kɛ ruɔ̱n jiɛn diɔ̱k wi̱cdɛ bärɔw mëë pɛckɛ Yɛ-ɣo-ya-kin kuäär Juda, mëë took Ɛ-wil-mɛ-ro-dɛ̈k kuäär Bɛ̈-bi-lɔn kuäär. Cuɛ Yɛ-ɣo-ya-kin kuäär Juda lony duëël yieenä.

28Kä cuɛ ruac agɔaa kɛ jɛ, kä cuɛ ka̱m kɔm mi leny kɔamni kua̱ri tin te kɛɛl kɛ jɛ ni wen kä Bɛ̈-bi-lɔn.

29Kä cu Yɛ-ɣo-ya-kin bieyni duëël yieenä woc. Kä cuɛ la mi̱thɛ kɛɛl kɛ kuäär ni ciaŋ.

30Kä la kuäär jɛ a moc yio̱w ni ciaŋ, ce̱tnikɛ ni̱n teekädɛ.

← Chapter 24 Jump to: