2 Kings 24

Nuer Bible © Bible Society in South Sudan 1998,2012

← Chapter 23 Jump to: Chapter 25 →

1Kɛ ni̱n ruecdɛ cu kuäär Bɛ̈-bi-lɔn ni Nɛ-bu-kad-nɛ-dhar wec ka̱n, kä cu Yɛ-ɣo-ya-kim a ja̱ŋdɛ kɛ run diɔ̱k. Duundɛ ɣöö cuɛ rɔ luɔ̱c Nɛ-bu-kad-nɛ-dhar.

2Kä cu Kuoth Nhial ji̱ Bɛ̈-bi-lɔn kɛnɛ bun ji̱ Kɛ̈l-da-ya kɛnɛ ji̱ Thi-ri-ya, kɛ ji̱ Mo-ab, kɛ ji̱ A-mon, jäk kä Juda, kɛ ɣöö ba wä däk, ce̱tnikɛ ruac Kuɔth Nhial ëë latdɛ kɛ thok gööknikɛ.

3Kɛ thuɔ̱k cu nɔmɔ ben kä Juda ce̱tnikɛ ruac Kuɔth Nhial, cɛ kɛ woc muun in cieŋɛ thi̱n kɛ kui̱ dui̱rä Ma-na-thɛ ce̱tnikɛ tëë diaal tëë cɛ la̱t,

4kɛ kui̱ riɛm ëë cɛ wuɔ̱th piny baaŋ. Kä cɛ Jɛ-ru-tha-lɛm thiäŋ kɛ riɛm baaŋ, kä /ci Kuoth Nhial jɛ bi pälikä.

5Kä cua duɔth lätni Yɛ-ɣo-ya-kim diaal tëë cɛ la̱t gɔ̱a̱r rɛy buɔk kuɛ̈ɛ̈ni kua̱ri Juda.

6Kä cu Yɛ-ɣo-ya-kim li̱w, kä cu gatdɛ ni Yɛ-ɣo-ya-kin ruëc kɛ gua̱a̱thdɛ.

7Kä /ken kuäär I-jëp lɛ luny muun kɛ ɣöö ca ti diaal ka̱n kä jɛ ɛ kuäär Bɛ̈-bi-lɔn tëë la nyin I-jëp, a känɛ ni tɔ̱ɔ̱rä I-jëp a wä ni kiir Yu-pɛ-ree-tidh.

8Mëë took Yɛ-ɣo-ya-kin kuäär tëë kɛ run wäl bädäk kä cuɛ ruëc kä Jɛ-ru-tha-lɛm kɛ Päth diɔ̱k. Kä cɔalkɛ man i̱ Nɛ-uc-ta nya Ɛl-na-than kä Jɛ-ru-tha-lɛm.

9Kä cuɛ la̱t ni jiäk nhiam Kuɔth Nhial, ce̱tnikɛ tëë diaal tëë ci gua̱nikɛ la̱t.

10Ɛn guäth ɛ mɔ cu ji̱ kɔar Nɛ-bu-kad-nɛ-dhar kuäär Bɛ̈-bi-lɔn Jɛ-ru-tha-lɛm ben go̱l.

11Kä min ci ji̱ kɔarɛ wec go̱l, cuɛ ben wi̱c ɛn Nɛ-bu-kad-nɛ-dhar.

12Kä cu Yɛ-ɣo-ya-kin rɔ ka̱m kuäär Bɛ̈-bi-lɔn, jɛn kɛnɛ man, kɛ bööth dhɔaarɛ, kɛ ji̱ kɔarɛ. Cu kuäär Bɛ̈-bi-lɔn jɛ la̱th yieenä kɛ bädäk runi ruecdɛ.

13Kä cu kuäär Bɛ̈-bi-lɔn nyin luaak Kuɔth Nhial diaal kɛnɛ nyin duëël kua̱r naŋ, kä cuɛ kuak luaak Kuɔth Nhial diaal tin la da̱a̱p tëë la̱tkɛ ɛ Thɔ-lo-mon kuäär I-thɛ-rɛl ce̱tkɛ mëë ci Kuoth Nhial ɛ la̱r jɛ tiath.

14Kä cuɛ Jɛ-ru-tha-lɛm pɛc kɛɛliw. Kua̱rkɛ diaal kɛnɛ ji̱ ko̱o̱r, kɛ ta̱a̱th diaal, kɛnɛ bel, nɛy ti bathdɔɔri wäl. Cu duɔth ni ji̱ ruɔ̱ɔ̱p kärɔ.

15Kä cu Nɛ-bu-kad-nɛ-dhar Yɛ-ɣo-ya-kin, pɛ̈c kä Bɛ̈-bi-lɔn. Kä cuɛ man kua̱r kɛnɛ män kɛ, kɛ ji̱ kɔarɛ, kɛ bööth wec ka̱n kä Jɛ-ru-tha-lɛm cuɛ kɛ naŋ kä Bɛ̈-bi-lɔn ala pɛ̈ɛ̈c bä.

16Kä cu kuäär Bɛ̈-bi-lɔn ji̱ ko̱o̱r diaal ti bathdɔɔri bärɔw, kɛ ta̱a̱th, kɛnɛ bel ti bathdɔɔr nööŋ kä Bɛ̈-bi-lɔn ala pɛ̈ɛ̈c, kɛn diaal kɛ ji̱ ko̱o̱r ti̱n bum.

17Kä cu kuäär Bɛ̈-bi-lɔn gua̱nlen Yɛ-ɣo-ya-kin ni Ma-tan-yaa kuany ala kuäär kɛ gua̱a̱th Yɛ-ɣo-ya-kin, kä cuɛ ciötdɛ ri̱t i̱ Dhid-ki-yaa.

18Kä mëë took Dhid-ki-yaa kuäär tëë kɛ run ti jiɛn da̱ŋ rɛw wi̱cdɛ kɛl, kä cuɛ ruëc kä Jɛ-ru-tha-lɛm kɛ run wäl kɛl, kä cɔalkɛ man i̱ Ä-mu-tal nya Yir-mɛ-yaa kä Lib-na.

19Kä cuɛ la̱t ni jiäk nhiam Kuɔth Nhial, ce̱tkɛ tëë diaal tëë ci Yɛ-ɣo-ya-kim kɛ la̱t.

20Kɛ ɣöö cu kɛ̈c Kuɔth Nhial ben kä Jɛ-ru-tha-lɛm kɛnɛ Juda kä cuɛ kɛ woc muun in cieŋɛ thi̱n.

← Chapter 23 Jump to: Chapter 25 →