2 Kings 4

Nuer Bible © Bible Society in South Sudan 1998,2012

← Chapter 3 Jump to: Chapter 5 →

1Täämɛ cu ciek raam kɛl kä dayömni göökni ruac kɛ Ɛ-li-cä wee i̱, “Ci cɔwdä min la ja̱ŋdu li̱w. Kä ŋäci jɛ ɛn ɣöö luth ja̱ŋdu Kuoth Nhial, kä ci gua̱n ŋua̱l ben cɛ gaatkä da̱ŋ rɛw ben naŋ ala ja̱a̱ŋkɛ.”

2Kä cu Ɛ-li-cä ciek loc i̱, “Kä ɛŋu bä lät kä ji̱ mɔ? Läri jɛ ɣä. Ɛŋu tëë ji̱ mɔ duëël?” Kä cu ciek ɛ loc i̱, “Ɣän thilɛ mi tëë ɣä duëël, ɛ ni ɣök liɛth.”

3Kä cu Ɛ-li-cä jɛ jiök i̱, “Wër kä ji̱ thieekädu diaal wër thieckɛ kɛ cuɔ̱ɔ̱k ti lɔr rɛydiɛn kä akɛ /cia̱ ti tɔt.

4Kä wër gäk ni rɔ duëël yɛnɛ gaatku, kä pik kɛn cuɔ̱ɔ̱k tɔ̱tɔ̱ diaal. Kä mi wä kɛl wä thia̱a̱ŋ läthni jɛ gekä.”

5Kä cu ciek jiɛn kä Ɛ-li-cä kä cuɛ rɔ wä ga̱k duëël kɛnɛ gaatkɛ. Cukɛ jɛ nöŋ cuɔ̱ɔ̱k kä cuɛ kɛ pik.

6Kä min ci cuɔ̱ɔ̱k thia̱ŋ cuɛ gatdɛ jiök i̱, “No̱ŋni ɣä cuk mi dɔ̱diɛn.” Kä cuɛ jɛ loc i̱, “Thilɛ cuk mi dɔ̱ŋ.” Kä cu liɛɛth lönydɛ cu cuɔ̱ŋ.

7Kä cu ciek raan Kuɔth ben la̱r lär, kä cu raan Kuɔth ɛ jiök i̱ “Wër kɔkni liɛɛth bi ŋua̱lu ben col, kä bia cu tëk kɛ duɔthdiɛn yɛnɛ gaatku.”

8Kɛ cäŋ kɛl cu Ɛ-li-cä wä kä Cu-nem kä cieŋ ciek mi riäŋ riäŋ thi̱n. Kä cuɛ Ɛ-li-cä kuɔ̱k mi̱eth kua̱n. Kä mɔ cɛ wä kɛ duɔ̱ɔ̱p ɛ mɔ la rɔ a ritdɛ thi̱n, bɛ wä mi̱th kɛ kuän.

9Kä cu ciek ɛmɔ cɔwdɛ jiök i̱, “Nɛnɛ täämɛ, ɣän cä ŋa̱c ɛn ɣöö wut ɛla bä dupdan ɛ raan Kuɔth mi lɛy lɛy.

10La̱tnɛ jɛ kä duel nhial mi ba dhaŋ, kɛnɛ kɔm, kɛ lɛmbär la̱th thi̱n, mi wëë wä ben kä kɔn bɛ cu jac ni jɛ.”

11Kɛ cäŋ kɛl cuɛ ben ɛn wi̱ni, kä cuɛ wä lɔ̱ɔ̱ŋ ɛn duëël.

12Kä cuɛ läätdɛ ni Ge-ɣä-dhi jiök i̱, “Cɔl ciek Cu-nem.” Kä min cɛ jɛ cɔl, cu ciek ben cuɔ̱ŋ nhiamdɛ.

13Kä cu Ɛ-li-cä Ge-ɣä-dhi jiök i̱, “Jio̱kni ciek ɛmɔ ɛn ɣöö täämɛ ci riɛkda kɛɛliw ka̱n kä nɛy. Ɛŋu mi ba lät kä ji̱? Tëë kɛ mi dëë la̱t kuäär, kiɛ bo̱o̱th rɛ̈m kɛ kui̱du?” Kä cu ciek ɛ loc i̱, “Ɣän cieŋä rɛy nɛɛnikä.”

14Kä cu Ɛ-li-cä wee, “Kä ɛŋu mi dëë ku lɛ lät kä ji̱?” Kä cu Ge-ɣä-dhi jɛ loc i̱, “Thilɛ jɛ gat, kä cɔwdɛ cɛ dɔŋ.”

15Kä cu Ɛ-li-cä wee, “Cɔlɛ.” Kä min ci Ge-ɣä-dhi jɛ cɔl, cuɛ cuɔ̱ŋ thok duëël.

16Kä cu Ɛ-li-cä wee, “Kɛ gua̱a̱th mi ce̱tkɛ nɛ mi wä ɣɔw rɔ rit bi gat rɔm.” Kä cu ciek wee, “Eey lö raan Kuɔth, kuäärä. /Cu ɣä käc kac.”

17Duundɛ ɣöö cu ciek ruët, cuɛ dap kɛ gat nikɛ gua̱a̱th ëë ci Ɛ-li-cä jɛ la̱r jɛ.

18Kä mëë ci gat piith, cuɛ wä raar cäŋ kɛl wee kä gua̱n rɛy ŋëëri bɛɛl.

19Kä cuɛ gua̱n jiök i̱, “Wi̱cdä, wi̱cdä!” Cu gua̱n läätdɛ jiök i̱ “Kapɛ no̱ŋni jɛ man.”

20Kä min ci läät ɛ kap no̱ŋɛ jɛ man, cu gat nyuur buɔ̱ɔ̱rɛ amäni bua̱k ca̱ŋ, kä cuɛ li̱w.

21Kä cu man ɛ wä tɔ̱a̱c nhial duëël ran Kuɔth, kä cuɛ jɛ ga̱k thi̱n, kä cuɛ ben raar.

22Kä cuɛ cɔwdɛ cɔl, kä cuɛ wee, “Jäk ni ɣä läät kɛɛl kɛnɛ muul kɛl, kɛ ɣöö dëë mal wä kä raan Kuɔth, kä dëë wä luny jɔk.”

23Kä cu cɔwdɛ jɛ loc i̱, “Ɛŋu wi̱i̱ kä jɛ ɛn walɛ mɔ? Kä /ciɛ tëth path kä /ciɛ cäŋ lɔ̱ŋä.” Kä cuɛ loc i̱, “Bɛ rɔ lot.”

24Kä cuɛ muul rialikä kä cuɛ läätdɛ jiök i̱, “Cuac muul. /Cu jäl a määth ɛ ni mi cä la̱r ji̱.”

25Kä cuɛ tɛth piny cuɛ ben kä raan Kuɔth pääm Kar-mɛl Kä min ci raan Kuɔth ɛ nɛn bëëkɛ, cuɛ läätdɛ ni Ge-ɣä-dhi jiök i̱, “Nɛnɛ ni̱mi ɛ ciek Cu-nem.

26Riŋni kɛ pɛ̈th römɛ, kä thiecɛ i̱ mali? Kä mal cɔwdu? Kä mal gat?” Kä cu ciek ɛ loc i̱, “Ɛ mal.”

27Kä min cɛ ben pa̱a̱m kä raan Kuɔth, cuɛ ciökɛ käp. Kä cu Ge-ɣä-dhi ben bëë jɛ ben woc. Duundɛ ɣöö cu raan Kuɔth wee “Pälɛ kä rɔa, tëë rikä mi bɛc kä ci Kuoth Nhial ɛ tëë kä ɣä, /kenɛ jɛ la̱r ɣä.”

28Kä cu ciek wee, “Ɣän ci thiec kɛ gat? Kä /ka̱n ji̱ jiök i̱ cu ɣä kaŋ?”

29Kä cu Ɛ-li-cä Ge-ɣä-dhi jiök i̱, “Pɛ̈thni käni kɛɛtdä kɛ ji̱ kɛɛl kä wër. Kä mi wi̱i̱ röm kɛ raan cu jɛ ner. Kä mi wee tekɛ ram mi neer ji̱, /cu jɛ loc. Kä läthni kɛɛtdä nhiam gatdä.”

30Kä cu man gatdä wee, “Ce̱tnikɛ ciöt Kuɔth Nhial in tëk, kɛ tëkdu, ɣän ci bi päl.” Kä cu Ɛ-li-cä rɔ jiɛc kä cuɛ guɔ̱ɔ̱r.

31Kä cu Ge-ɣä-dhi wä nhiam cuɛ kɛɛt la̱th nhiam gatdä, kä cuɛ thil mi dëë tëk nyoth. Kä cuɛ rɔ rit ro̱mɛ kɛ Ɛ-li-cä, kä cuɛ la̱rɛ i̱, “/Ken gat keer.”

32Kä min ci Ɛ-li-cä ben duëël, cuɛ gat nɛn tɔ̱ɔ̱cä dhaŋädɛ a cɛ li̱w.

33Kä cuɛ wä rɛc cuɛ kɛn da̱ŋ rɛw ga̱k rɛc, kä cuɛ Kuoth Nhial pal.

34Kä cuɛ tɔ̱ɔ̱c puɔ̱ny gatdä, cuɛ thokdɛ la̱th thok gatdä, kä cuɛ tetkɛ la̱th tetnikɛ, kä cuɛ waŋdɛ la̱th muun in cieŋɛ thi̱n, kä min cɛ rɔ riɛny puɔ̱nydɛ, cu puɔ̱ny gatdä leeth.

35Kä cu Ɛ-li-cä rɔ jiɛc cuɛ ja̱l rɛy duëël, kä cuɛ rɔ wä nyɔk kɛ riny puɔ̱nydɛ. Kä cu gat thi̱em nikä bärɔw, kä cuɛ wäŋkɛ lɛp.

36Kä cuɛ Ge-ɣä-dhi cɔl kä cuɛ jiök i̱, “Cɔl ciek Cu-nem.” Kä cuɛ cɔl. Kä min cɛ ben kä jɛ, cuɛ wee, “Naŋ gatdu.”

37Cuɛ ben cuɛ rɔ ben goŋ ciöknikɛ. Kä cuɛ gatdɛ ka̱n kä cuɛ wä raar.

38Kä cu Ɛ-li-cä rɔ nyɔk kɛ ben kä Gil-gal mëë te mun kɛ rɛ̈ɛ̈th. Kä mëë te dayömni göökni nyuurä nhiamdɛ cuɛ läätdɛ jiök i̱, “Läthni dhaar mi di̱i̱t maac. Kä thäli dayömni göökni cuɛy.”

39Kä cu ram kɛl kä kɛ wä rɛy ka̱a̱kni kɛ ɣöö bɛ bɛl wä ma̱a̱t, Kä cuɛ ŋɔ̱a̱r dɔaar jek kä cuɛ dɛykɛ ma̱a̱t, kä cuɛ kɛ ben la̱th rɛy dhar cuɛɛni, kä kui̱cɛ kɛ i̱ kɛ ŋuni.

40Kä cukɛ naath ti̱eth cuɛy kɛ ɣöö bikɛ mi̱th, kä min mi̱thkɛ kɛ cuɛy, cukɛ wee, “Raan Kuɔth, tekɛ mi ci li̱w rɛy dhar!” Kä /ken kɛnɛ lɛ cam.

41Kä cu Ɛ-li-cä wee, “Kä nööŋɛ mi̱eth.” Kä cuɛ jɛ yuɔr rɛy dhar, kä cuɛ wee, “Ti̱ethɛ jɛ naath, kɛ ɣöö bikɛ mi̱th.” Kä cuɛ thil lueŋ rɛy dhar.

42Kä cu raan ben kä Baal-ca-li-caa nöŋɛ raan Kuɔth mi̱eth dɛɛni tin nhiam, jurayni ti jiɛn da̱ŋ rɛw, kɛ wuɔ̱th bɛɛl ti ɣɔ̱ɔ̱c. Kä cu Ɛ-li-cä wee, “Käm ni jɛ nɛy tɔ̱tɔ̱ bikɛ jɛ cam.”

43Duundɛ ɣöö cu läätdɛ wee, “Bä ku lɛ la̱th nhiam nɛɛni ti kuɔ̱r i̱di?” Kä cu Ɛ-li-cä jɛ loc i̱, “Käm ni jɛ naath, bikɛ mi̱th kɛ ɣöö ci Kuoth Nhial ɛ lar i̱, ‘Bikɛ mi̱th kä bɛ tekɛ mi doth.’ ”

44Kä cuɛ jɛ la̱th nhiamdiɛn. Kä cukɛ mi̱th, kä cuɛ te mi doth, ce̱tnikɛ ruac Kuɔth Nhial.

← Chapter 3 Jump to: Chapter 5 →