2 Kings 2

Nuer Bible © Bible Society in South Sudan 1998,2012

← Chapter 1 Jump to: Chapter 3 →

1Kä min go̱r Kuoth Nhial ɣöö naŋɛ E-li-yaa nhial kɛ ruɔth, E-li-yaa kɛnɛ Ɛ-li-cä tekɛ dup jiɛnkɛ kä Gil-gal.

2Kä cu E-li-yaa Ɛ-li-cä jiök i̱, “Dothni wa̱nɛ mi, la̱ŋä ni ji̱. Kɛ ɣöö ci Kuoth Nhial ɣä jäk ni kä Beth-ɛl.” Duundɛ ɣöö cu Ɛ-li-cä wee, “Ce̱tnikɛ ciöt Kuɔth Nhial in tëk, kɛnɛ tëkdu, ɣän cä ji̱ bi päl.” Kä cukɛ wä kä Beth-ɛl.

3Kä cu gaat göökni tin te kä Beth-ɛl ben kä Ɛ-li-cä, kä cukɛ jɛ jiök i̱, “Ŋäc i̱ jɛ ɛn walɛ bi Kuoth Nhial kuääru naŋ kä ji̱?” Kä cuɛ loc i̱, “Ŋa̱cä jɛ. /Cuarɛ ruac kɛ kui̱dɛ.”

4Kä cu E-li-yaa Ɛ-li-cä jiök i̱, “Dothni ɛn wa̱nɛ, la̱ŋä ni ji̱. Kɛ ɣöö ci Kuoth Nhial ɣä jäk ni kä Jɛ-ri-ko.” Duundɛ ɣöö cuɛ wee, “Ce̱tnikɛ ciöt Kuɔth Nhial in tëk, kɛnɛ ciötdu ɣän cä ji̱ bi päl.” Kä cukɛ ben kä Jɛ-ri-ko.

5Kä cu gaat göökni tin te kä Jɛ-ri-ko ben kä Ɛ-li-cä, kä cukɛ jɛ jiök i̱, “Ŋäci jɛ ɛn walɛ bi Kuoth Nhial kuääru naŋ kä ji̱?” Kä cuɛ loc i̱, “Ŋa̱cä jɛ. /Cuarɛ ruac kɛ kui̱dɛ.”

6Kä cu E-li-yaa jɛ jiök i̱, “Dothni ɛn wa̱nɛ mi, la̱ŋä ni ji̱. Kɛ ɣöö ci Kuoth Nhial ɣä jäk ni kä Jɔr-dɛn.” Duundɛ ɣöö cuɛ wee “Ce̱tnikɛ ciöt Kuɔth Nhial in tëk, kɛnɛ tëkdu, Ɣän cä ji̱ bi päl.” Kä cukɛ wä kɛn da̱ŋ rɛw.

7Kä cu gaat göökni ti jiɛn dhieec wä bä, kä cukɛ cuɔ̱ŋ ɛ na̱n kä cu kɛn da̱ŋ rɛw cuɔ̱ŋ thok yier Jɔr-dɛn.

8Kä cu E-li-yaa bi̱i̱dɛ ka̱n, kä cuɛ rith, kä cuɛ pi̱ yɔ̱t, kä cu pi̱ rɔ da̱a̱k däär. Cu ti̱ti̱ wä kui̱c ɛmɛ kä cu tin kɔ̱ŋ wä kui̱c in dɔ̱ŋ. Kä cu kɛn da̱ŋ rɛw jiɛth ko̱o̱tdä.

9Kä min cikɛ wä kui̱c cu E-li-yaa Ɛ-li-cä jiök i̱, “Thiec mɔ dëë lät kä ji̱ mɔ a /ka̱n ɣä ni naŋ kä ji̱.” Kä cu Ɛ-li-cä wee “La̱ŋä ni ji̱, a jekä buɔ̱m yieekädu.”

10Kä cu E-li-yaa wee, “Ci thiec ni mi bum. Kä ŋotdɛ mi wi̱i̱ ɣä nɛn naŋkɛ ɣä kä ji̱, ba duŋdu. Kä mi /ci ɣä bi nɛn, /cɛ bia duŋdu.”

11Kä min wäkɛ kä ruackɛ, nɛnɛ cu thurbil maac kɛnɛ jio̱o̱k maac kɛn da̱ŋ rɛw da̱a̱k. Kä cu E-li-yaa wä nhial kɛ ruɔth.

12Kä cu Ɛ-li-cä jɛ nɛn kä cuɛ wiee i̱, “Gua̱a̱r, gua̱a̱r! Thurbiɛɛli I-thɛ-rɛl kɛnɛ jiöŋköörikɛ!” Kä /kenɛ jɛ nyɔk kɛ nën. Kä cuɛ bieynikɛ rɛt kä rɛw.

13Kä cuɛ bi̱i̱ E-li-yaa min ci pɛ̈ɛ̈n kä jɛ kuany, kä cuɛ rɔ ri̱t cuɛ ben cuɔ̱ŋ thok yieer Jɔr-dɛn.

14Kä cuɛ bi̱i̱ E-li-yaa min ci pɛ̈ɛ̈n kä jɛ ka̱n, kä cuɛ pi̱ yɔ̱t wee i̱, “Kuoth Nhial a nikä Kuoth E-li-yaa?” Kä min cɛ pi̱ yɔ̱t cukɛ rɔ da̱a̱k cu ti̱ti̱ wä kui̱c ɛ mi kä cu ti̱ti̱ wä kui̱c in dɔ̱ŋ. Kä cuɛ jiɛth.

15Kä min ci dayömni göökni tin te kä Jɛ-ri-ko jɛ nɛn lotädiɛn, cukɛ wee, “Ci yiëë E-li-yaa jɛ nyuɔ̱ɔ̱r.” Kä cukɛ röm kɛ jɛ, kä cukɛ rɔ goŋ nhiamdɛ.

16Kä cukɛ jɛ jiök i̱, “Nɛnɛ, täämɛ te la̱a̱tku kɛ nɛy ti jiɛn dhieec ti buɔ̱m buɔ̱ɔ̱m. Akɛ wä kuääru go̱r. Dɔ̱ŋ ci yiëë Kuɔth Nhial ɛ naŋ nhial kä cɛ wä yuɔr wuɔ̱thni päämni kiɛ rɛy löli.” Kä cu Ɛ-li-cä wee, “/Cuarɛ naath jäk.”

17Kä cukɛ jɛ com amäni min cɛ pöc, cuɛ wee, “Ja̱k ɛ kɛ.” Kä cukɛ nɛy ti jiɛn dhieec ja̱k. Cukɛ jɛ go̱r kɛ ni̱n diɔ̱k kä /ka̱nɛ jek.

18Kä cukɛ luny kä jɛ. Kä cieŋɛ kä Jɛ-ri-ko, kä cuɛ kɛ jiök i̱, “/Ka̱n yɛ jiök ɛn ɣöö /cuarɛ wä?”

19Kä cu ji̱ wec Ɛ-li-cä jiök i̱, “Nɛnɛ kuäära, wec ɛ mi te guäth mi gɔaa, ce̱tkɛ mi guici jɛ mi. Duundɛ ɣöö jiäk pikɛ, kä /ci mundɛ ciɛk.”

20Kä cuɛ wee, “Nöŋɛ ɣä tuɔ̱k mi /ka̱n cam, kä muɔcɛ rɛydɛ milɛ.” Kä cua jɛ nöŋ jɛ.

21Kä cuɛ wä rɛy waŋ mi lo̱ny pi̱kɛ kä cuɛ milɛ wä yuɔr thi̱n, kä cuɛ wee, “Nɛmɛ laarɛ Kuoth Nhial i̱ cä pi̱ jak kä gɔw, thilɛ lia̱a̱ mi bi rɔ nyɔk kɛ ben kiɛ gat mi bi bath thi̱n.”

22Kä cu pi̱ gɔw amäni walɛ, nikɛ ruac ëë ci Ɛ-li-cä jɛ lat.

23Kä cuɛ jiɛn kä Jɛ-ri-ko cuɛ wä kä Beth-ɛl. Kä min tëë dup, cu dhɔɔl ti tiɛni ben raar rɛy wec, kä cukɛ jɛ yɔŋ wäkɛ i̱, “Wërkɛ lö wi̱c wuɔɔk! Wërkɛ lö wi̱c wuɔɔk!”

24Kä cuɛ liɛɛc, kä min cɛ kɛ nɛn, cuɛ kɛ lam kɛ ciöt Kuɔth Nhial. Kä cu ŋut kuaylɛtni da̱ŋ rɛw ben raar rɛy ruɔ̱p, kä cukɛ dhɔɔl ti jiɛn ŋuaan wi̱cdɛ rɛw cam.

25Ɛn wa̱nɔ cuɛ wä pääm Kar-mɛl, ɛn wi̱ni cuɛ loc kä Tha-mɛ-ria.

← Chapter 1 Jump to: Chapter 3 →