bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
2 Kings 19
2 Kings 19
Nuer Bible © Bible Society in South Sudan 1998,2012
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 20 →
1
Kä min ci kuäär ni Ɣidh-ki-yaa jɛ liŋ cuɛ bieynikɛ rɛ̈t kɛ jiath lɔaac, kä cuɛ rɔ kum kɛ bieyni cuali kä cuɛ wä rɛy luaak Kuɔth Nhial.
2
Kä cuɛ Ɛl-ya-kim gui̱i̱c cieŋ, kɛnɛ Cɛb-naa in la bolith, kɛ bo̱o̱th palä mi di̱i̱t mi ci rɔ kum kɛ bieyni cuali jäk kä gök ni I-ca-yaa gat A-modh.
3
Kä cukɛ jɛ jiök i̱, “Ci kuäär nɛmɛ lar, ni̱n ti̱ti̱ kɛ ni̱n ti jiäk, kɛ ni̱n bɛɛlä, ti thil gɔy. Ce̱tkɛ kɛ ni̱n tin dap kɛ ni gaat, kä thilɛ buɔ̱m mi dap kɛ nikɛ.
4
Kä dɔ̱ŋ bi Kuoth Nhial Kuothdu rieet Rɛ̈b-ca-kee diaal liŋ, min ci kuäärɛ kuäär A-thi-ri-ya jɛ ja̱k bëë Kuoth in tëk ben kuëth, kä ci Kuoth Nhial Kuothdu kueth ti̱ti̱ mal liŋ, kä bɛ nɛy tin lat kɛ kɛ duäc. Kɛ kui̱c ɛmɔ pali kɛ kui̱ nɛɛni tin ci duɔth.”
5
Kä min ci la̱a̱t kua̱r ben kä I-ca-yaa.
6
Cu I-ca-yaa kɛ jiök i̱, “La̱rɛ jɛ kuäärun i̱ ci Kuoth Nhial wee, ‘/Cu dual kɛ ruac in ci liŋ, min ci raan kɔar kua̱r A-thi-ri-ya ɛ lat kɛ kui̱dä.
7
Nɛnɛ, ɣän bä moc yiëë, bɛ thuk lieeŋ kä bɛ loc wi̱i̱dɛ. Kä bä jɛ jak kä li̱w kɛ mut wi̱i̱dɛ.’ ”
8
Kä cu Rɛ̈b-ca-kee rɔ rit kä cuɛ kuäär A-thi-ri-ya jek ko̱o̱r kɛ Lib-na. Kɛ ɣöö cɛ liŋ i̱ ci kuäär jiɛn kä La-kic.
9
Kä mëë ci kuäär ɛ liŋ i̱, “Kuäär I-jëp ni Tir-ɣa-kaa, raan Kuc, cɛ ben raar bëë ben nyiëëny kɛ jɛ.” Cuɛ naath nyɔk kɛ jäk kä Ɣidh-ki-yaa wëë i̱,
10
“La̱tdɛ nɛmɛ Ɣidh-ki-yaa kuäär Juda i̱, ‘Ɛ Kuothdu ci ji̱ kaŋ i̱ /cɛ Jɛ-ru-tha-lɛm bi ka̱m kuäär A-thi-ri-ya.
11
Nɛnɛ, ci mëë ci kua̱r A-thi-ri-ya jɛ lät kä mun kɛɛliw liŋ, ca da̱k ni piny. Kä ji̱n bi kän?
12
Ci kuth döörkiɛn kän, döör tëë ci gua̱a̱ri kɛ däk, Go-dhan, Ɣa-ran, Rɛ-dhɛp, kɛ ji̱ E-dɛn tëë cieŋ kä Tɛ-lɛ̈-thar?
13
Kä kuäär Ä-math, kɛnɛ kuäär Ar-pad, kɛ kuäär wec Thɛ-par-wa-yim, kɛ kuäär Ɣenɛ̈, kɛ kuäär Iwaa ka nikä?’ ”
14
Kä cu Ɣidh-ki-yaa warɛgak ka̱n tetni ja̱a̱kni, kä cuɛ kuɛn. Kä cuɛ wä rɛy luaak Kuɔth Nhial, kä cuɛ jɛ wä ɣär nhiamdɛ.
15
Kä cu Ɣidh-ki-yaa pal nhiam Kuɔth Nhial wëë i̱, “Aɣ, Kuoth Nhial Kuoth I-thɛ-rɛl, min te kɔm kuäärädɛ nhial wi̱i̱ pua̱nyni jaakni, ɛ ji̱n Kuoth ni kä rɔa min ruaac kuäär wec muɔ̱ɔ̱n kɛɛliw. Kä cak nhial kɛnɛ piny.
16
Päli ji̱thdu piny lö Kuoth Nhial, kä li̱ŋni. Kä lɛp waŋdu lö Kuoth Nhial, kä guicni. Kä liŋ ruac Thɛ̈n-ke-rib, min kuethɛ ni Kuoth in tëk.
17
Ɛ thuɔ̱k lö Kuoth Nhial, kɛn kua̱r A-thi-ri-ya ca döör ti ŋuan däk kɛnɛ wi̱i̱kiɛn,
18
kä cikɛ kuthkiɛn yuɔr maac. Kɛ ɣöö thilɛ kɛ kuth, kɛ ti la̱tkɛ kɛ tet nath, kɛ jiɛn, kɛnɛ pääm. Kɛ kui̱c ɛmɔ ca kɛ däk.
19
Kä täämɛ lö Kuoth Nhial Kuothda kän nɛy tetkädɛ, la̱ŋä ni ji̱, kä ba cu ŋa̱c ɛ wi̱c muɔ̱ɔ̱n kɛɛliw lö Kuoth Nhial i̱ ɛ ji̱n la Kuoth ɔ ni kä rɔa.”
20
Kä cu I-ca-yaa gat A-modh Ɣidh-ki-yaa jäk kä raan wee i̱, “Ci Kuoth Nhial, Kuoth I-thɛ-rɛl wee, cä palu liŋ kɛ kui̱ kua̱r A-thi-ri-ya ni Thɛ̈n-ke-rib.
21
Kä nɛ mi ɛ ruac in ci Kuoth Nhial ɛ lat kɛ kui̱dɛ. “Ci nya dhuɔɔri Dha-yɔn ji̱ yɔŋ kä cɛ ji̱ lut. Kä ci nya Jɛ-ru-tha-lɛm wi̱cdɛ tiŋ kɔɔru min bari rɔ.
22
“Kä ɛŋa kuethi mɔ kä yɔŋi? Kä ɛŋa kapi jɔwdu nhial kɛ jɛ mɔ Kä ɣääri nyinku kä nhial kɛ jɛ? Ɛ jɛn duŋ I-thɛ-rɛl in rɛl gɔɔydɛ rɔ!
23
Kɛ ja̱a̱ku ci Kuoth Nhial kuëth, Kä curi wee, ‘Kɛ thurbiɛɛlikä tin ŋuan Cä wä kɔt ni wuɔ̱thni päämni, ni nhial päämni Lɛ-ba-nɔn. Kä cä luɔ̱ɔ̱rkɛ tin ba̱r ba̱a̱r jɔap piny, kɛnɛ mɛ̈ɛ̈k thëpnikɛ. Kä cä cop ni däärɛ, ni ruupdɛ min thi̱ŋ.
24
Cä jieer tɛt wi̱c mi dɔ̱ŋ, kä cä maath kɛ pi̱ thi̱n. Kä cä wäŋ diaal kä I-jëp ko̱t Kɛ pät cio̱kdä.’
25
“Kä /keni jɛ ku liŋ ni wal? Ɛn ɣöö cä la̱t ni wal Ɛ jɛn kua̱ lɛ jak kä tuɔ̱kɛ, Ɛn ɣöö bi wi̱i̱ ti buɔ̱m buɔ̱ɔ̱m jak kä di̱r mi jiäk,
26
Kä bi ji̱kɛ thil buɔ̱m. kä bikɛ ga̱a̱r kä bikɛ kɔ̱a̱c, Kä bikɛ ce̱tnikɛ juac dɔaar, Kä bikɛ ce̱tnikɛ jol mi dek dek, Kä bikɛ ce̱tnikɛ jol wi̱i̱ ti̱ec mi ŋot a ken ni do̱ny?
27
“Duundɛ ɣöö ɣän ŋa̱cä nyuuru kɛnɛ wädu raar kɛ bendu rɛc, gakdu kɛ ɣä.
28
Kɛ ɣöö cia gaak kɛ ɣä Kɛnɛ nɔ̱ɔ̱ndu kɛ rɔ cäkɛ liŋ, Ɣän bä cibatdä la̱th wumdu kä bä ciɛkdä la̱th thokdu Kä bä ji̱ luɔc jɔk kɛ jɛn duɔ̱ɔ̱p ëë wä kɛ yɛ.
29
“Kä nɛmɛ ba nyuuth kä ji̱. Ɛn waalɛ bi cam ni min ciɛk kä rɔa, kä kɛ ruɔ̱n in rɛwdɛ bia cam ni min ci duɔth thi̱n. Kä kɛ ruɔ̱n in diɔ̱ɔ̱kdiɛn bi pi̱eth, kä bi ŋɛɛr, kä pith dɛy wal kä cam dɛykiɛn.
30
Kä bi duɔth ji̱ dhɔaar Juda rɔ yiath piny kä bikɛ tekɛ kuay.
31
Kɛ ɣöö kä Jɛ-ru-tha-lɛm bɛ te duɔth ti bä thi̱n, kä bi buɔ̱n ben pääm Dha-yɔn. Bi tiɛɛl nhök Kuɔth Nhial ɛ la̱t.
32
“Kɛ kui̱c ɛmɔ ci Kuoth Nhial nɛmɛ lar kɛ kui̱ kua̱r A-thi-ri-ya i̱, ‘Cɛ bi ben ɛn wi̱c ɛmɛ, kä cɛ bäär bi yuɔr ɛn wa̱nɛ, kä /cɛ bi rët kɛ nhiamdɛ kɛ ko̱t, kä /cɛ jɛ bi go̱l.
33
Kɛ duɔ̱ɔ̱p ëë bäkɛ jɛ, ɛ jɛn bi loc kɛ jɛ jɔk ɔ, kä /cɛ bi ben ɛn wi̱c ɛ mi ruac ni Kuoth Nhial inɔ.
34
Kɛ ɣöö ɣän bä wec ɛ mi, gaŋ, kä bä kän kɛ kui̱dä, kɛnɛ kui̱ jäŋädä ni Dee-bid.’ ”
35
Kä kɛ jɛn wäärɛ mɔ cu jääk Kuɔth Nhial wä, cuɛ nɛy ti bathdɔɔri ti kuɔ̱r wi̱cdɛ jiɛn bädäk wi̱cdɛ dhieec näk rɛy wec ji̱ A-thi-ri-ya. Kä min ci naath keer kɛ runwaŋ, cua nɛy tɔ̱tɔ̱ jek ala ti ci li̱w, kɛn diaal.
36
Kä cu kuäär A-thi-ri-ya ni Thɛ-nɛ̈-kɛ-rib loc cieŋ, kä cuɛ wä cieŋ kä Ni-nɛ-be.
37
Kä min wëë kuothdɛ ni Nith-rok pal, cu gaatkɛ Ɛ̈d-rɛ̈m-mɛ-lɛk kɛnɛ Thar-ɛ-dhɛr jɛ näk kɛ mut, kä cukɛ rɔ bar ro̱o̱l Ä-ra-rat. Kä cu gatdɛ ni E-thar-ɣɛ̈-don ruëc kɛ gua̱a̱thdɛ.
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 20 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25