2 Kings 8

Nuer Bible © Bible Society in South Sudan 1998,2012

← Chapter 7 Jump to: Chapter 9 →

1Täämɛ cu Ɛ-li-cä ciek ëë cɛ gatdɛ tek jiök i̱, “Jiɛc rɔ kä wiaa yɛnɛ cɔwdu, wiaa guäth ɔ dërɛ wä thi̱nɔ. Kɛ ɣöö ci Kuoth Nhial buɔth lar, bɛ te wi̱c kɛ run bärɔw.”

2Kä cu ciek rɔ jiɛc, cuɛ la̱t ce̱tnikɛ ruac ran Kuɔth. Kä cuɛ wä kɛnɛ ji̱ dhɔaarɛ, cuɛ wä cieŋ mun ji̱ Pi-li-thɛt kɛ run bärɔw.

3Kä kɛ kɔr runi da̱ŋ bärɔw. Cu ciek luny jɔk muun ji̱ Pi-li-thɛt, cuɛ wä nhiam kua̱r kɛ kui̱ dhɔaarɛ kɛnɛ mundɛ.

4Kä täämɛ ruac kuäär kɛ läät ran Kuɔth ni Ge-ɣä-dhi wee i̱ “Lät ni ɣä tin buɔ̱m buɔ̱ɔ̱m diaal tëë ci Ɛ-li-cä kɛ la̱t.”

5Kä min lätdɛ kuäär ɣöö ci Ɛ-li-cä raan jiɛc li̱th, nɛnɛ, cu ciek ëë ca gatdɛ tek ben kä kuäär kɛ kui̱ dhɔaarɛ kɛnɛ mundɛ. Kä cu Ge-ɣä-dhi wee, “Kuäärä jɛn ɛn, ɛn ciek kɛnɛ gatdɛ mëë ci Ɛ-li-cä jɛ jak kä tëk.”

6Kä min ci kuäär ciek thiec, cuɛ la̱t jɛ. Kä cu kuäär raan kɔarɛ jiök i̱, “Luc ni jɛ nyinkɛ diaal, amäni tëë diaal tëë ci ciɛk muun nikɛ cäŋ ëë jiɛn kɛ jɛ muun amäni walɛ.”

7Täämɛ cu Ɛ-li-cä ben kä Da-math-kɛth. Kä Bɛn-a-dad kuäär Thi-ri-ya tëë kɛ juey. Kä min ca la̱r jɛ i̱, “Ci raan Kuɔth ben ɛn wa̱nɛ.”

8Cu kuäär Ɣä-dha-el jiök i̱, “Naŋ muc kɛ ji̱ kɛɛl, kä wër jekni kɛ raan Kuɔth, kä a jɛ thieec Kuoth Nhial i̱, ‘Ɣän bä rɔ jiɛc kɛ jɛn juey ɛ mi?’ ”

9Kä cu Ɣä-dha-el wä jëk kɛ jɛ, kä cuɛ muc naŋ kɛɛl kɛ jɛ ŋɔak diaal tin gɔw kä Da-math-kɛth ti kapkɛ ɛ thɔ̱a̱rɔa̱a̱li ti jiɛn ŋuaan. Kä min cɛ ben nyuur nhiam Ɛ-li-cä cuɛ wee, “Ci gatdu ni Bɛn-a-dad kuäär Thi-ri-ya ɣä jäk kä ji̱ i̱, ‘Ɣän bä rɔ jiɛc kä juey ɛmɛ?’ ”

10Kä cu Ɛ-li-cä jɛ jiök i̱, “Wër jio̱k ni jɛ i̱, ‘Bi rɔ jiɛc.’ Duundɛ ɣöö ci Kuoth Nhial ɛ nyuɔ̱th ɣä ɛn ɣöö bɛ li̱w.”

11Kä cu Ɛ-li-cä jɛ di̱el guic amäni min ci Ɣä-dha-el pöc. Kä cu Ɛ-li-cä wiee.

12Kä cu Ɣä-dha-el ɛ thiec i̱, “Ɛŋu wiee i̱ mɔ kuäärä?” Kä cuɛ loc i̱, “Kɛ ɣöö ŋa̱cä min jiääk in bi lät kä ji̱ I-thɛ-rɛl. Bi wi̱i̱kiɛn tin buɔ̱m buɔ̱ɔ̱m cua̱th, kä bi ŋuɛ̈tnikiɛn näk kɛ mut, kä bi nyin tiɛtnikiɛn thum, kä bi ruëtnikiɛn rɛt kä piny.”

13Kä cu Ɣä-dha-el wee, “Kä dëë lua̱ŋ mi la̱tdä mi ce̱tkɛ nɔ di̱i̱t ɔ jek nikä, kä ɛ ɣän ram mi jio̱k?” Kä cu Ɛ-li-cä jɛ loc i̱ “Ci Kuoth Nhial ɛ nyuɔ̱th ɣä ɛn ɣöö bia̱ kuäär kä Thi-ri-ya.”

14Kä cuɛ jiɛn kä Ɛ-li-cä, kä cuɛ ben kä cu kuäärɛ jɛ thiec i̱, “Ɛŋu ci Ɛ-li-cä jɛ la̱r ji̱ mɔ?” Kä cuɛ loc i̱, “Cɛ ɣä jiök i̱ bi rɔ jiɛc.”

15Duundɛ ɣöö mëë ruɔ̱ndɛ cuɛ pa̱ta̱n ka̱n kä cuɛ cua̱th rɛy pi̱i̱ni, kä cuɛ jɛ kum thok kua̱r amäni mëë cɛ li̱w. Kä cuɛ cua̱ kuäär kɛ gua̱a̱thdɛ.

16Kɛ dhieec runi ruec Yo-ram gat Ɛ̈-ɣab kuäär I-thɛ-rɛl, cu Yɛ-ɣo-ram gat Yo-ca-pat a kuäär kä Juda.

17Kä mëë tookɛ kuäär tëë kɛ run ti jiɛn diɔ̱k wi̱cdɛ rɛw, kä cuɛ ruec kɛ run bädäk kä Jɛ-ru-tha-lɛm.

18Kä cuɛ guɔ̱r ni duɔ̱ɔ̱p kua̱r thuk duëli kuec caam, ce̱tnikɛ mëë ca la̱t dhɔr Ɛ̈-ɣab, kɛ ɣöö cɛ nya Ɛ̈-ɣab kuɛn. Kä cuɛ la̱t ni jiäk nhiam Kuɔth Nhial.

19Kä cu Kuoth Nhial ŋot /ken nhiam Juda däk kɛ kui̱ jäŋädɛ ni Dee-bid, kɛ ɣöö cɛ la̱r ɣöö bi kuaykɛ a ruëëc amäni cäŋ kɛl.

20Kä mëë Yɛ-ɣo-ram, cu Ɛ-dɔm kac raar kä ruec Juda, kä cukɛ rɔ kuëny kuääriɛn.

21Kä cu Yɛ-ɣo-ram lɛni wä kä Dha-yir kɛ thurbiɛɛlikɛ diaal. Kä cu ji̱ Ɛ-dɔm jɛ go̱l ɛ, kɛ wäär, cuɛ rɔ jiɛc kɛnɛ bööth thurbiɛɛlikɛ, cukɛ ji̱ Ɛ-dɔm näk, kä cu rɛmdɛ rɔ̱ bar dho̱rikiɛn.

22Kä cuɛ kac ji̱ Ɛ-dɔm raar kä ruec Juda amäni walɛ. Kä cu Lib-na rɔ ri̱t bä kɛn cua̱ gua̱a̱th ɛ mɔ.

23Kä cua duɔth lätni Yɛ-ɣo-ram gɔ̱a̱r rɛy buɔk kuɛ̈ɛ̈ni jɛn kua̱ri Juda.

24Kä cu Yɛ-ɣo-ram li̱w, kä cua jɛ kony kɛɛl kɛ gua̱ni däärwec gua̱n ni Dee-bid. Kä cu gatdɛ ni Ä-ɣɛ̈dh-yaa ruec kɛ gua̱a̱thdɛ.

25Kɛ wäl rɛw runi ruec Yo-ram gat Ɛ̈-ɣab kuäär thuk duëli kuec caam, cu Ä-ɣɛ̈dh-yaa gat Yɛ-ɣo-ram a kuäär kä Juda.

26Mëë tokɛ kuäär tëë kɛ run ti jiɛn da̱ŋ rɛw wi̱cdɛ rɛw, kä cuɛ ruëc kɛ ruɔ̱n kɛl kä Jɛ-ru-tha-lɛm. Kä cɔalkɛ man i̱ Ä-thɛ̈l-yaa. Ɛ nya nya Ɔmri kuäär I-thɛ-rɛl.

27Kä cuɛ guɔ̱ɔ̱r ni duɔ̱ɔ̱p dhɔaar Ɛ̈-ɣab, kä cuɛ la̱t ni jiäk nhiam Kuɔth Nhial, ce̱tkɛ mëë ca la̱t ɛ dhɔr Ɛ̈-ɣab. Kɛ ɣöö ɛ cɔ nyal dhɔr Ɛ̈-ɣab.

28Kä cukɛ wä kɛɛl kɛnɛ kɛ ɣöö bikɛ wä nyiëëny kɛ Ɣä-dha-el kuäär Thi-ri-ya kä Ra-moth-gil-yad. Kä cu ji̱ Thi-ri-ya Yo-ram moc kɛ buɔ̱t.

29Kä cu kuäär ni Yo-ram loc kä Yidh-rɛɛl kɛ ɣöö bi buɔ̱t in ca ka̱m jɛ ɛ ji̱ Thi-ri-ya kä Rama. Mëë nyieenykɛ kɛ Ɣä-dha-el kuäär Thi-ri-ya wä gɔaa thi̱n. Kä cu Ä-ɣɛ̈dh-yaa gat Yɛ-ɣo-ram kuäär Juda wä wëë Yo-ram gat Ɛ̈-ɣab wä gui̱l kɛ buɔ̱tdɛ kä Yidh-rɛɛl.

← Chapter 7 Jump to: Chapter 9 →