2 Kings 20

Nuer Bible © Bible Society in South Sudan 1998,2012

← Chapter 19 Jump to: Chapter 21 →

1Ɛn ni̱ni tɔ̱tɔ̱ cuɛ Ɣidh-ki-yaa moc kɛ juey mi guic ni näkdɛ. Kä cu gök ni I-ca-yaa gat A-modh ben kä jɛ, kä cuɛ jɛ jiök i̱, “Ci Kuoth Nhial wee, ‘Riali dhɔru ikä kɛ ɣöö bi li̱w, /ci bi tëk.’ ”

2Kä cu Ɣidh-ki-yaa wi̱cdɛ riet puɔ̱ny duëël kä cuɛ Kuoth Nhial pal wëë i̱,

3“Timɛ lö Kuoth Nhial, ɣän cä ji̱ guɔ̱ɔ̱r i̱di, kɛ lɔcdä kɛɛliw, kä cä la̱t ni gɔy waaŋdu.” Kä cuɛ wiee ɛlɔ̱ŋ.

4Kä a /ken I-ca-yaa där kal ni bäl, cu ruac Kuɔth Nhial ben kä jɛ i̱,

5“Locni kä Ɣidh-ki-yaa bo̱o̱th nɛɛnikä jio̱kni jɛ ci Kuoth Nhial Kuoth guur ni Dee-bid wee. Ɣän cä Palu liŋ, kä cä merku nɛn. Nɛnɛ ɣän bä ji̱ jak kä gɔaa. Kä bi wä luaakdä kɛ diɔ̱ɔ̱k ni̱ni.

6Kä bä ni̱n teekädu rep kɛ run wäl dhieec. Kä bä ji̱ kän yɛnɛ wec ɛ mi tetdä kua̱r Thi-ri-ya, kä bä gaŋ ɛn wec ɛ mi kɛ kui̱dä, kɛnɛ kui̱ jäŋädä ni Dee-bid.”

7Kä cu I-ca-yaa wee, “No̱o̱ŋni pat pat ŋɔ̱a̱p. Kä akɛ la̱th kɛ jɛ butdä, kä bɛ cu gɔaa.”

8Kä cu Ɣidh-ki-yaa I-ca-yaa jiök i̱, “Kä ɛŋu bia̱ nyuuth ɔ kɛ ɣöö bi Kuoth Nhial ɣä jak kä gɔaa, kɛnɛ ɣöö bä wä luaakdɛ kɛ diɔ̱ɔ̱k ni̱ni?”

9Kä cu I-ca-yaa jɛ loc i̱, “Nɛmɛ ɛ nyuuthdu kä Kuoth Nhial, ɛn ɣöö bɛ min cɛ lar la̱t. A bi ti̱eep ku wä nhiam kɛ ka̱a̱th da̱ŋ wäl kiɛ bɛ wä jɔk kɛ ka̱a̱th da̱ŋ wäl?”

10Kä cu Ɣidh-ki-yaa jɛ loc i̱, “Thia̱kɛ kä ti̱eep ɛn ɣöö bɛ wä nhiam kɛ ka̱a̱th wäl. Jak ni jɛ kä wä jɔk kɛ ka̱a̱th da̱ŋ wäl.”

11Kä cu I-ca-yaa Kuoth Nhial pal. Kä cuɛ ti̱eep luɔ̱c jɔk kɛ ka̱a̱th da̱ŋ wäl, kä ci cäŋ wä piny kä theem ca̱ŋ Ɛ̈-ɣan.

12Kɛ ɛn gua̱th ɛmɔ cu kuäär Bɛ̈-bi-lɔn ni Mɛ-ro-dak-bɛ̈l-ä-dan gat Bɛ̈l-ä-dan naath jäk kä Ɣidh-ki-yaa a te tetkiɛn kɛ warɛgak kɛnɛ muc. Kɛ ɣöö cɛ liŋ i̱ tëë kɛ juey.

13Kä cu Ɣidh-ki-yaa kɛ nyuɔ̱r, kä cuɛ kɛ nyuɔ̱th nyin dhɔaarɛ diaal, da̱a̱p ciɛk in bo̱r, liɛɛth in di̱t kökdɛ, kɛ wal tin ŋuäny, kɛ yio̱w ko̱o̱r rɛ̈mdɛ, kɛ tin diaal tin te tɔ̱wä dhɔrɛ. Cuɛ thil kɛl mi /ken Ɣidh-ki-yaa jɛ nyuɔ̱th kɛ kä nyin dhɔaarɛ diaal.

14Kä cu gök ni I-ca-yaa ben kä kuäär ni Ɣidh-ki-yaa, kä cuɛ jiök i̱, “Ɛŋu mi lat nɛy ti̱ti̱ jɛ? Kä bäkɛ nikä?” Kä cuɛ loc i̱, “Bäkɛ wi̱c mi na̱n na̱n, bäkɛ kä Bɛ̈-bi-lɔn.”

15Kä cu I-ca-yaa wee, “Kä ɛŋu mi ca guic dhɔru?” Kä cu Ɣidh-ki-yaa jɛ loc i̱, “Cikɛ tin diaal tin te dhɔrä nɛn. Thilɛ kɛl kä tin diaal tin te tɔ̱wä dhɔrä mi /ka̱n nyuɔ̱thkɛ.”

16Kä cu I-ca-yaa jɛ jiök i̱, “Liŋ ruac Kuɔth Nhial.

17Nɛnɛ ci ni̱n thia̱k kɛ ɣöö ba tin diaal tin te dhɔru, kɛnɛ tin ci guuri kɛ tɔ̱w amäni walɛ naŋ kä Bɛ̈-bi-lɔn. Kä thilɛ mi ba päl, laarɛ Kuoth Nhial.

18Kä ba tha̱a̱ŋ ganku ti da̱pkɛ ji̱ naŋ. Kä bi ka jio̱wni duëël kua̱r Bɛ̈-bi-lɔn.”

19Kä cuɛ I-ca-yaa jiök i̱, “Ɛn riet Kuɔth Nhial ɛ ci latdɛ gɔaaɛ.” Kɛ ɣöö caarɛ jɛ i̱, “Ŋumdä ŋu thi̱n, mi bi mal cak te thi̱n rɛy ni̱nikä?”

20Kä cua duɔth lätni Ɣidh-ki-yaa, kɛ ŋɛ̈ɛ̈nydɛ min di̱i̱t, kɛ lätnidɛ kɛ pul, kɛ tetdɛ kɛ waŋ mi no̱o̱ŋ pi̱w wi̱c, gɔ̱a̱r rɛy buɔk kuɛ̈ɛ̈ni kua̱ri Juda.

21Kä cu Ɣidh-ki-yaa li̱w. Kä cu Ma-na-thɛ gatdɛ ruëc kɛ gua̱a̱thdɛ.

← Chapter 19 Jump to: Chapter 21 →