1 Chronicles 10

nyankole

← Chapter 9 Jump to: Chapter 11 →

1Abafilisiti bakarwana orugamba n'Abaisiraeli; Abaisiraeli baabahunga; banu baabaitira aha rushozi Giliboa.

2Abafilisiti baahambya Saulo n'abatabani, baita Yonatani na Abinadabu na Melikishua, beene Saulo.

3Ab'aha rugamba ku baafundiriize Saulo, ab'amata baamugwaho, baamurasha, yaahutaara.

4Saulo nikwo kugira omukwatsi w'eby'okurwanisa bye ati: Syorayo rurara yaawe ogintimbuze, aba batashazirwe batakaija bakanshungisa. Kwonka omukwatsi w'eby'okurwanisa tiyaakikora, ahabw'okuba akatiina munonga. Saulo nikwo kwihayo rurara ye ahabwe, akagyetungaho.

5Omukwatsi w'eby'okurwanisa bye ku yaareebire Saulo yaafa, nawe yaayetunga ahari rurara eye, yaafa,

6Okwo nikwo Saulo yaafiire, we n'abatabani bonshatu, n'ab'eka ye boona.

7Abaisiraeli abaabaire batwire omu ruhanga Yezereeli ku baareebire eihe ryahunga, na Saulo n'abatabani baafa, baatsigaho endembo zaabo, baahunga; Abafilisiti baija, baazituuramu.

8Omu kasheeshe Abafilisiti ku baizire kucwijura emitumbi, baashanga Saulo n'abatabani bagwire omu Rushozi Giliboa.

9Baamucwijura, kandi baamutemaho omutwe, baagutwara n'eby'okurwanisa bye. Reero baatuma entumwa omu nsi y'Abafilisiti yoona, kurangiririra ebishushani byabo ebirikuramibwa, n'abantu enkuru nungi.

10Baata eby'okurwanisa bye omu ndaaro ya baaruhanga baabo, kandi omutwe gwe baaguhanika omu ndaaro ya Dagoni.

11Kwonka Abayabeshi-Gileadi ku baahuriire ebi Abafilisiti bagiriire Saulo,

12abashaija amamanzi boona baimuka, baihayo omutumbi gwe n'ey'abatabani baagireeta Yabeshi. Amagufa gaabo baagaziika ahansi y'omuvule gwa Yabeshi, kandi baamara ebiro mushanju nibeesiibyakwo.

13Saulo yaafa atyo, ahabw'okutaba mwesigwa ahari Nyakubaho; ahabw'okuba tarakozire eki Nyakubaho yaamuragiire, yaataho n'okwehanuuza aha muntu orikugambisa abazimu kumuha obwengye,

14tiyaayehanuuza hari Nyakubaho. Nikyo Mukama yaamwitiire, obugabe bwe akabuha Daudi mwene Yese.

← Chapter 9 Jump to: Chapter 11 →