1 Chronicles 5

nyankole

← Chapter 4 Jump to: Chapter 6 →

1Beene Reubeeni omujigaijo gwa Isiraeli. Manya we akaba ari omujigaijo, kwonka ahabw'okuhagaza ekitabo kya ishe, obukuru bwe bukaheebwa batabani ba Yosefu, mwene Isiraeli; nikyo atarabariirwe kuba mukuru omu ruganda nk'obukuru bw'okuzaarwa oku buba.

2Nobu Yuda yaabaire ari ow'amaani omuri beene ishe, kandi yaakomookirwemu omutegyeki mukuru, kwonka obukuru bw'okuzaarwa bukaguma buri obwa Yosefu.

3Mbwenu aba nibo beene Reubeeni omujigaijo gwa Isiraeli: Hanoki, Paalu, Hezirooni na Karumi.

4Yoeli we akazaara Shemaaya, Shemaaya yaazaara Googi, Googi, yaazaara Shimei.

5Shimei akazaara Miika, Miika yaazaara Reaya, Reaya yaazaara Baali.

6Baali akazaara Beera, ou Tilugati-pilineseeri omugabe wa Asiriya yaazaahize. Beera ogwo akaba ari mukuru omu Bareubeeni.

7Omuri beene waabo omu miryango yaabo, nk'oku okukuratana kw'enzaaro zaabo kwahandiikirwe, abakuru bakaba bari Yeieli na Zekariya,

8na Beela mutabani wa Azazi; Azazi mwene Shema, Shema ya Yoeli, owaabaire atwire Aroeri, okuhikira kimwe Neebo na Baalimeoni.

9Kandi akaba atwire aha bukiizi-bwa-burugwa-izooba okuhika aharikutaahirwa omu ihamba, seenu ya Eufuraati; ahabw'okuba amasyo gaabo gakaba gakanyiire omu nsi ya Gileadi.

10Omu busingye bwa Saulo, Abaareubeeni bakarwanisa Abahagari, baabaita, baatuura omu mahema gaabo omu kyanga ky'aha bukiizi-bwa-burugwa-izooba bwa Gileadi.

11Beene Gaadi baatuura obuseeri bwa beene Reubeeni omu nsi ya Bashani, okuhika Saleka.

12Yoeli niwe yaabaire ari mukuru waabo, naakuratwa Shafamu; hataho Yanai na Shafati ab'omuri Bashani.

13Kandi beene waabo, nk'oku emiryango ya baishenkurubo eri, ni Mikaeli, Meshulamu, Sheeba, Yoari, Yakamu Ziya na Eberi; abantu mushanju.

14Aba nibo batabani ba Abihaili mwene Huuri, mwijukuru wa Yaroa mwene Gileadi, Gileadi ya Mikaeli, Mikaeli ya Yeshishai, Yeshishai mwene Yahido, Yahido mwene Buuzi.

15Ahi mwene Abudieli mwijukuru wa Guuni niwe yaabaire ari mukuru w'emiryango ya baishenkurubo.

16Bakaba batwire Gileadi omuri Bashani, n'omu birorero byayo, n'omu byanga bya Sharooni eby'amariisizo, okuhika ahi garikugarukira.

17Abo boona bakahandiikwa omu busingye bwa Yotamu omugabe wa Yuda, n'omu bwa Yeroboamu omugabe wa Isiraeli, nk'oku enzaaro zaabo zirikukuratana.

18Abaareubeeni n'Abaagaadi n'ekicweka ky'oruganda rwa Abaamanaase bakaba baine abashaija emanzi abahagatiire engabo na zaarurara, kandi abamanyiriire kurwanisa amata, bari abarwani rugambwa; abashaija obukumi buna n'enkumi ina, na magana mushanju, na makumi mukaaga, abeeteekateekire kurwana.

19Bakahurura baateera Abahagari, Abayeturi, Abanafishi n'Abanodabu.

20Kandi ku baatungire ab'okubaha emikono, baasingura Abahagari n'abaabaire bakwataniise nabo, ahabw'okuba omuri orwo rugamba bakatakira Ruhanga, nawe yaabaha eki baamushabire, ahabw'okuba bakamwesiga.

21Baanyaga amasyo gaabo: engamira obukumi butaano, entaama obusiriira bubiri n'obukumi butaano, endogoya enkumi ibiri, n'abantu akasiriira kamwe.

22Baita abazigu baingi, ahabw'okuba orwo rugamba Ruhanga akaba arurimu. Ebyo ku byahwaire, baatuura omu kyanga kyabo okuhitsya obu baazaahiibwe.

23Ab'ekicweka ky'oruganda rwa Manaase nabo bakatuura omuri egyo nsi bari baingi munonga, okwiha Bashani okuhitsya Baaliherumooni, Seniri n'Orushozi Herumooni.

24Aba nibo baabaire bari bakuru b'emiryango ya baishenkurubo: Eferi, Ishi, Elieli, Ezirieli, Yeremiya, Hodaviya na Yahadieli, abarwani b'amaani, abashaija rugambwa, kandi abakuru b'emiryango ya baishenkurubo.

25Kwonka bakacumura ahari Ruhanga wa baishebo, baahampukira ahari baaruhanga b'ensi egyo abu Ruhanga yaacwekyereize kubahigiza.

26Ruhanga wa Isiraeli nikwo kuta omutima gw'obuzigu omuri Puulo omugabe wa Asiriya, (niwe Tilugati-Pilineseeri owa Asiriya), akatwara Abaareubeeni n'Abaagaadi n'ab'ekicweka ky'oruganda rwa Manaase akabata Hala, Habori, Haara n'aha myegyeego y'omugyera gw'omuri Gozani, okuhitsya n'eri izooba.

← Chapter 4 Jump to: Chapter 6 →