1 Chronicles 14

nyankole

← Chapter 13 Jump to: Chapter 15 →

1Omugabe Hiramu owa Tuuro akatuma entumwa ahari Daudi, yaamutwekyera emiti ya kaarwenda, n'abarikwombekyesa amabaare, n'ababaizi, kumwombekyera enju.

2Daudi yaamanyira aho ku Mukama amuhamize kuba omugabe wa Isiraeli, kandi obugabe bwe ku abantu be Abaisiraeli babuhaisize ekitiinwa.

3Reero okwo Yerusalemu Daudi yaashwererayo abandi bakazi, yaazaarirayo abandi baana b'aboojo n'ababaishiki.

4Aga nigo maziina g'abaana abu yaazaariire Yerusalemu: Shamua, Shobabu, Natani, Solomooni,

5Ibuhaari, Elishua, Elipeleti,

6Nooga, Nefegi, Yafiya,

7Elishaama, Beeliyaada na Elifeeleti.

8Abafilisiti ku baahuriire ngu Daudi asiigirwe amajuta kuba omugabe wa Isiraeli yoona, boona baahurura kumusherura. Daudi nawe ku yaakihuriire, yaaza kubarwanisa.

9Obwo Abafilisiti bakaba baizire, bateire ab'omu ruhita rw'Abareefa.

10Daudi yaayehanuuza ahari Ruhanga ati: Mpurure, nze kurwanisa Abafilisiti? Noija kubandekurira mbasingure? Mukama yaamugarukamu ati: Hurura ozeyo. Niinyija kubakurekurira obasingure.

11Daudi atyo ahurura, aza Baali-perazimu, abasingurirayo. Reero agira ati: Ruhanga ambaasiise kwataguza omu bazigu bangye nk'omwegyemure gurikwohoka. Omwanya ogwo nikwo kwetwa Baali-perazimu; amakuru ngu Ruhanga w'abarikwataguza.

12Abafilisiti baatsigayo baaruhanga baabo, Daudi yaaragiira, baabootsya.

13Ku haahingwireho ebiro, Abafilisiti kandi baahurura, baateera ab'omuri orwo ruhita.

14Daudi ku yaayebuurize ahari Ruhanga obundi, Ruhanga yaamugira ati: Otazayo kubakurata, kureka oyekiikuure, obashangye ahashungaine n'emiti y'emirama.

15Reero ku oraahurire ekirikukaabuuza aha mitwe y'egyo mirama, obwo ogyende obateere, ahabw'okuba nimba nkwebembeire kwita ab'omu ihe ry'Abafilisiti.

16Daudi atyo atwaza nk'oku Ruhanga yaamuragiira, haza baita ab'omu ihe ry'Abafilisiti, okwiha Gibeoni okuhika Gezeri.

17Okurangaanwa kwa Daudi kubuga ensi yoona, Mukama areetera amahanga goona kumutiina.

← Chapter 13 Jump to: Chapter 15 →