1 Chronicles 26

nyankole

← Chapter 25 Jump to: Chapter 27 →

1Eby'embu z'abakumiirizi b'aha marembo: Omuri beene Koora ni Meshelemiya, mutabani wa Koora, ow'omuri beene Asafu.

2Meshelemiya akazaara abatabani aba: Zekariya omujigaijo, Yediaeli omushubiro, owa kashatu Zebadiya, owa kana Yatinieli,

3owa kataano Elamu, owa mukaaga Yehohaanani, owa mushanju Eliehoenai.

4Kandi Obededomu akazaara abatabani aba: Shemaaya omujigaijo, Yehozabadi omushubiro, Yoa omugati, owa kana Shakari, owa kataano Netaneeli,

5owa mukaaga Emieli, owa mushanju Isakaari, owa munaana Peuletai. Ahabw'okuba Ruhanga akaba amuhaire omugisha.

6Reero omutabani Shemaaya akazaara abatabani abaabaire abategyeki b'emiryango ya baishenkurubo; ahabw'okuba bakaba bari abashaija amamanzi.

7Beene Shemaaya nibo aba: Otini, Refaeli, Obedi na Elizabadi abu beene waabo Elihu na Semakiya nabo baabaire bari emanzi.

8Abo boona bakaba bari aba beene Obededomu, na batabani baabo, na beene waabo bari abashaija emanzi, abashemereire ogwo murimo. Aba Obededomu bakaba bari makumi mukaaga na babiri.

9Meshelemiya we akaba aine abatabani na beene waabo, abashaija emanzi ikumi na munaana.

10Na Hoosa, ow'omuri beene Meraari, akazaara abatabani; omukuru ari Shimuri. Ahabw'okuba ogu, nobu yaabaire atari mujigaijo, kwonka ishe niwe yaahindwire mukuru.

11Owa kabiri akaba ari Hilikiya, owa kashatu Tebaliya, n'owa kana Zekariya. Batabani ba Hoosa boona, na beene waabo, bakaba bari ikumi na munaana.

12Abo bakumiirizi b'aha marembo bakaba baine embu; na bakuru baabo baine emirimo y'okuheereza omuri Nyaruju ya Nyakubaho, nk'oku beene waabo Abaleevi baabaire bagiine.

13Kandi bakateerera enteenyu emiryango ya baishenkurubo, emito n'emikuru, kumanya amarembo gu baraarinde.

14Enteenyu y'eirembo rya burugwa-izooba yaakwata Shelemiya. Ku baateereire omutabani Zekariya, omuhanuuzi omunyabwengye, enteenyu yaamukwata kurinda eirembo ry'aha bukiizi-bwa-bumosho.

15Reero eya Obededomu yaija eri ey'aha bukiizi-bwa-buryo; kandi abatabani baakwatwa ey'okurinda eibiikiro.

16Shupimu na Hoosa bakakwatwa eya burengyerwa-izooba, aha irembo rya Shaleketi, ah'omuhanda gurikwinamukira; buri omwe naarinda okwe.

17Ahari burugwa-izooba hakaba hazaho mukaaga buri izooba; aha bukiizi-bwa-bumosho bana buri izooba; aha bwa buryo bana buri izooba; kandi aha ibiikiro babiri-babiri.

18Reero aha kibambaaza ahari burengyerwa-izooba aha muhanda, hakaba hariho bana, na babiri ahari ekyo kibambaaza.

19Ezo nizo zaabaire ziri embu z'abakumiirizi b'aha marembo omu Baakoora na beene Meraari.

20Reero omu Baleevi, Ahiya niwe yaabaire areeberera amabiikiro g'omuri Nyaruju ya Ruhanga, n'ag'ebintu ebihongirwe.

21Batabani ba Ladani baijukuru ba Gereshooni, abarikukomooka ahari Ladani, bakuru b'emiryango ab'omu Baaladani Omugereshooni omukuru akaba ari Yehieli.

22Beene Yehieli: Zetamu na Yoeli omurumuna bakaba bareeberera amabiikiro ga Nyaruju ya Nyakubaho.

23Omu ba Amuraamu: Abahizuhaari, n'Abaheburooni n'Abauzieli;

24kandi Shebueli, mwene Gereshomu, mwijukuru wa Musa, niwe yaabaire ari mukuru, naareeberera amabiikiro.

25Beene ishe abaakomookire ahari Eliezeeri, nibo aba: Eliezeeri akazaara Rehabiya, Rehabiya yaazaara Yeshaaya, Yeshaaya yaazaara Yoramu, Yoramu yaazaara Zikuri, na Zikuri yaazaara Shelomooti.

26Shelomooti ogu, na beeneishe nibo baabaire bareeberera amabiikiro goona, ag'ebintu ebi omugabe Daudi, n'abakuru b'emiryango ya baishenkurubo, n'abakuru b'engabo rukumi-rukumi, na igana-igana, n'abakuru b'eihe baahongyeire Nyakubaho.

27Omu bi baanyagire omu ngamba, bakagira ebi baakozireho, baabihonga kuguma nibikoresibwa ahabwa Nyaruju ya Nyakubaho;

28kandi n'ebintu byona, ebi omurangi Samueli, na Saulo mwene Kiishi, na Abuneeri mwene Neeri, na Yoabu mwene Zeruuya baahongire. Ebyo byona ebyahongirwe, bikaba nibireebererwa Shelomooti na beene ishe.

29Omu Baizuhaari, Kenaniya n'abatabani bakakwatsibwa emirimo y'abategyeki, kuba abakungu n'abaramuzi b'Abaisiraeli.

30Omu Baheburooni, Hashabiya na beeneishe, abashaija emanzi rukumi na magana mushanju, bakaba bareeberera Isiraeli y'oburengyerwa-izooba bwa Yorudaani, ahabw'emirimo ya Mukama yoona n'ey'omugabe.

31Omu Baheburooni, Yeriya niwe yaabaire ari mukuru w'Abaheburooni, nk'oku enzaaro zaabo n'emiryango ya baishenkurubo byabaire nibikuratana. Omu mwaka gwa ikumi n'ena ogw'omu busingye bwa Daudi, bakacondooza, baashanga abashaija emanzi omu Baheburooni abatwire Yezeri omuri Gileadi.

32Omugabe Daudi yaatoorana Yeriya na beeneishe, abashaija emanzi enkumi ibiri na magana mushanju, bakuru b'emiryango ya baishenkurubo, kureeberera Abaareubeeni n'Abaagaadi n'ekicweka ky'ab'oruganda rw'Abaamanaase, ahabw'ebintu byona ebikwatiraine na Ruhanga, n'ebikwatiraine n'omugabe.

← Chapter 25 Jump to: Chapter 27 →