1 Chronicles 20

nyankole

← Chapter 19 Jump to: Chapter 21 →

1Omuri katumba, obunaku obu abagabe bahururiramu kuza aha rugamba, Yoabu akaimuka n'eihe rye, yaacwekyereza ensi y'Abaamoni, yaija yaagota orurembo Raba. Kwonka Daudi yaaguma Yerusalemu. Yoabu yaateera Raba yaagihwerekyereza.

2Daudi yaiha omugabe waabo ekirunga aha mutwe; yaashanga kiine oburemeezi kwa kiloguraamu makumi abiri na munaana z'ezaabu, kandi kirimu eibaare ry'obuguzi bwingi; baakita Daudi aha mutwe. Yaiha n'omuri orwo rurembo eminyago mingi.

3Kandi yaarwihamu abantu, yaabakoresa emirimo y'amaani ey'emishumeeno n'eshuuruuru n'empango. Daudi yaaba nikwo yaatwaza endembo z'Abaamoni zoona. Bwanyima Daudi n'abantu boona baagaruka Yerusalemu.

4Ebyo ku byahwaire, haabaho orugamba n'Abafilisiti omuri Gezeri, Sebakai Omuhuushi yaita Sipai mwijukuru w'ebikaaka; Abafilisiti baagomooka.

5Haagaruka haabaho orundi rugamba n'Abafilisiti, Elihanani mwene Yairo yaita Lahimi murumuna wa Goliyaati Omugiiti, ou orubango rw'eicumu rye rwabaire ruri nk'empimbi i barukiraho emyenda.

6Reero kandi haabaho orundi rugamba n'Abafilisiti omuri Gaati. Okwo hakaba hariyo omushaija ekikaaka owaabaire aine enkumu mukaaga ahari buri kiganja, n'ebikumu mukaaga ahari buri kigyere; byona hamwe makumi abiri na bina. Nawe akaba ari mwijukuru w'ebikaaka.

7Mbwenu ku yaahayire Abaisiraeli, Yonatani mwene Shimea, murumuna wa Daudi, yaamwita.

8Abo nibo baabaire bari baijukuru b'ebikaaka bya Gaati, abaitsirwe Daudi n'engabo ze.

← Chapter 19 Jump to: Chapter 21 →