1 Chronicles 12

nyankole

← Chapter 11 Jump to: Chapter 13 →

1Mbwenu aba nibo bashaija abaagiire Zikulaagi, bakakwatanisa na Daudi obu Saulo mwene Kiishi yaabaire atarikwenda kumucwa maisho. Abo bakaba bari ab'omu mamanzi agaamuhaire emikono omu bweme,

2bari abashaija enkwata buta, abarikumanya kurasisa emyambi, n'okurekyera enjungu z'amabaare na buryo nari na bumosho. Abo bakaba bari beene Benyamiini, abaine obuzaare na Saulo;

3mukuru waabo ari Ahiyezeeri, orikukurataho ari Yoashi, bombi bari beene Shemaaha owa Gibea. Taho Yezieli na Peleti beene Azimaveeti; Beeraka, Yehu owa Anatooti;

4Ishimaaya owa Gibeoni omushaija rugambwa omu mamanzi makumi ashatu, kandi omwebembezi waabo; na Yeremiya, Yahazieli, Yohaanani, Yozabadi owa Gedeera,

5Eluzai, Yerimooti, Bealiya, Shemariya Shefatiya Omuhaarupi,

6Elukaana, Ishiya, Azareeli, Yoezeeri na Yoshebeamu ow'omuri beene Koora;

7na Yoela na Zebadiya beene Yerooha owa Gedori.

8Omu Bagaadi haarugamu abarwani rugambwe enkwata-ngabo abamanyiriire kurwanisa amacumu; abu ahamaisho gaabo haabaire nihashusha ah'entare kandi nibairuka nk'esirabo z'omu nshozi, baashanga Daudi omu kigo ky'omu ihamba.

9Mukuru waabo akaba ari Ezeri, owa kabiri Obadiya, owa kashatu Eliyaabu,

10owa kana Mishimaana, owa kataano Yeremiya,

11owa mukaaga Atai, owa mushanju Elieli;

12owa munaana Yohaanani, owa mwenda Elizabadi;

13owa ikumi Yeremiya, n'owa ikumi n'omwe Maakabanai.

14Abaagaadi abo bakaba bari bakuru omu ihe, omuto omuribo naategyeka engabo igana, n'omukuru engabo rukumi.

15Abo nibo baayambukire Yorudaani omu kwezi kw'okubanza, obu yaabaire eijwire, eshandaire enkungu zaayo zoona, bakabinga boona abatwire omu mpanga za burugwa-izooba n'eza burengyerwa-izooba.

16Mpaho bamwe omu Baabenyamiini n'omu Baayuda baija, baashanga Daudi omu kigo.

17Daudi yaashohora kubabugana, yaabagira ati: Ku muraabe mwaija muri banywani bangye kumpa emikono, naanye niinyikiriza kukwatanisa naimwe. Kwonka ku muraabe mwaija kundeebya kundekurira abazigu bangye, haza ntaine ki nshobize, Ruhanga wa baatatenkuriitwe akireebe, haza akibature.

18Ahonaaho Mutima wa Ruhanga yaaza omuri Amasai, omukuru wa bari amakumi ashatu, yaagira ati: Nyaabura 'we Daudi, mwene Yese, itwe turi abaawe, kandi tukwataniise naiwe. Kagire obusingye! Kagire obusingye! N'abarikukuha emikono nibakagire obusingye! Manya Ruhanga waawe niwe arikukuhwera. Daudi atyo abaakiira, abahindura bakuru omu ihe rye.

19Abandi ab'omu Baamanaase bakaimuura, baayehongyera Daudi obu yaahurura n'Abafilisiti kurwana orugamba na Saulo. Kwonka Daudi abo Bafilisiti taine ki yaabahwereire, ahabw'okuba bakuru baabo bakamubinga, ahabw'okumutiina ngu naija kubareebya, agarukire mukama we Saulo, kibareetere okutemwaho emitwe.

20Daudi obu yaabaire naaza Zikulaagi, Abaamanaase abaamwehongyeire nibo aba: Adina, Yozabadi, Yediaeli, Mikaeli, Yozabadi, Elihu na Ziiletai, bakuru b'engabo rukumi-rukumi z'Abaamanaase.

21Bakaha Daudi emikono kurwanisa abazigu abaizire kumuteera, ahabw'okuba boona bakaba bari amamanzi rugambwa, kandi bari abakuru b'amahe.

22Mpaho buri izooba abantu baaguma nibaija kuha Daudi emikono, okuhitsya obu yaagizire eihe rihango ritakareebwaga.

23Ogu nigwo mubaro gw'emitwe y'engabo ezaashangire Daudi Heburooni, ziine eby'okurwanisa, kumukubuurira obugabe bwa Saulo; nk'oku Nyakubaho yaakigambire.

24Abaayuda, abaizire bakwaitse engabo n'amacumu bakaba bari enkumi mukaaga na magana munaana;

25Abaasimeoni, abashaija emanzi rugambwa abeeteekateekire kurwana, bari enkumi mushanju na igana rimwe;

26Abaleevi enkumi ina na magana mukaaga.

27Yehoyaada mukuru w'ab'omuryango gwa Arooni akaija n'abashaija enkumi ishatu na magana mushanju.

28Zadoki, omutsigazi emanzi rugambwa, akaija n'abakuru b'engabo makumi abiri na babiri ab'omuryango gwa baishenkuru.

29Abaabenyamiini abaine obuzaare na Saulo enkumi ishatu; ahabw'okuba abaingi omuribo okuhitsya ago magingo bakaba bakihamiire aha b'enda ya Saulo.

30Abaefuraimu obukumi bubiri na magana munaana, abashaija emanzi rugambwa abarikurangaanwa omu miryango ya baishenkurubo;

31ab'ekicweka ky'oruganda rwa Manaase akakumi kamwe n'enkumi munaana, abaagambirwe amaziina kuza kuhindura Daudi omugabe;

32Abaisakaari, abaabaire nibeetegyereza obunaku obu Isiraeli eshemereire kugira eki yaakora, abakuru magana abiri, hamwe na beene waabo boona abu baabaire nibategyeka;

33Abaazebuluuni, engabo entoore, obukumi butaano, abaine eby'okurwanisa byona eby'orugamba, abaizire n'omutima gumwe kuha Daudi emikono.

34Abaanafutaali abakuru orukumi rumwe, abaizire n'abashaija obukumi bushatu n'enkumi mushanju, abahagatiire engabo n'amacumu;

35Abaadaani obukumi bubiri n'enkumi munaana na magana mukaaga, abeeteekateekire kurwana.

36Abaasheri abarwani entoore, obukumi buna abeeteekateekyeire orugamba;

37Abaareubeeni n'Abaagaadi n'ekicweka ky'ab'oruganda rwa Manaase aba seeri ya Yorudaani, akasiriira kamwe n'obukumi bubiri, abaine ebintu byona eby'okurwanisa orugamba.

38Abo barwani boona abaizire batengire orugamba, bakahika Heburooni bamaririire kuhindura Daudi omugabe wa Isiraeli yoona, nk'oku Abaisiraeli abandi boona baabaire baine omutima gumwe kuhindura Daudi omugabe.

39Baaguma nawe okumara ebiro bishatu nibarya, nibanywa ebi beene waabo baabaire babateekateekyeire.

40Kandi na bataahi baabo abaarugire omu byanga bya hare, nk'eby'ab'enganda eza Isakaari, na Zebuluuni, na Nafutaali, bakaija bagyemwire ebyokurya aha ndogoya, aha ngamira, aha nyumbu, n'aha nte; ebyokurya bingi munonga: embumburi z'emitiini, emigimba y'emizaabibu eyomire, na viino, n'amajuta g'emioliva, n'ente n'entaama; ahabw'okuba hakaba hariho okushemererwa omuri Isiraeli yoona.

← Chapter 11 Jump to: Chapter 13 →