1 Chronicles 29

nyankole

← Chapter 28 Jump to:

1Daudi Omugabe akagambira abaabaire bateeraniire aho ati: Mutabani wangye Solomooni, ou Ruhanga wenka ayetooraniire, akiri muto, takahamire; kandi omurimo ni muhango; ahabw'okuba ekyo kikaari tikirikwija kuba eky'omuntu, kureka ekya Mukama Ruhanga.

2Nikyo nyeheereireyo, nk'oku ndikubaasa, kutungira Nyaruju ya Ruhanga wangye eby'okugyombekyesa: Ezaabu, ahabw'ebiraakorwe omu zaabu; efeeza ahabw'eby'efeeza; emiringa, ahabw'eby'emiringa; ebyoma, ahabw'ebiraakorwe omu byoma; emiti ahabw'ebiraakorwe omu miti; otabariiremu mabaare maingi g'amakangabuye, n'ag'okuhundisa, n'ag'emyengyengye n'ag'amabara, n'agandi g'obuguzi bwingi ag'emiringo yoona n'ag'emisoomore egumire.

3Okwongyera ahari ebyo byona, ebi naatungiire Nyaruju egyo erikwera, nyine bingi ebi ntungire ahabwangye, eby'ezaabu n'eby'efeeza. Ahabw'okugirira Nyaruju ya Ruhanga wangye rukundo mpango, mbwenu naabigiha:

4nibyo ebi: kiloguraamu z'ezaabu obukumi munaana n'enkumi ina, kandi ezaabu ya Ofiri; ez'efeeza akasiriira kamwe n'obukumi mwenda n'enkumi mukaaga, z'efeeza empuuhe, by'okushwekyesa ebisiika bya Nyaruju,

5n'ahabw'emirimo yoona eraakorwe abanyamyoga; ezaabu, ahabw'ebintu by'ezaabu; n'efeeza ahabw'eby'efeeza. Mbwenu omuriimwe n'oha eri izooba oraaheyo ebye ayekundiire naayehongyera Nyakubaho?

6Mpaho abakuru b'emiryango ya baishenkurubo, n'abeebembezi b'enganda, n'abategyeki b'engabo rukumi-rukumi na igana-igana, n'abakungu abareeberera omurimo gw'omugabe, baahayo emitoijo yaabo beekundiire.

7Ahabw'omurimo gwa Nyaruju ya Ruhanga, bakahayo ezaabu erikuhitsya kiloguraamu obukumi mushanju na rukumi na magana munaana na makumi mushanju na itaano; efeeza kiloguraamu obusiriira mukaaga n'obukumi mukaaga n'enkumi mushanju na magana ataano, emiringa ya kiloguraamu obusiriira mushanju, n'obukumi butaano, n'enkumi itaano, na magana ataano; n'ebyoma by'oburemeezi bwa kiloguraamu obukaikuru buna, n'obusiriira bubiri.

8Kandi omuntu weena owaabaire aine amabaare g'obuguzi bwingi akagahayo, baagata omu ibiikiro rya Nyaruju ya Nyakubaho, eryabaire nirireebererwa Yehieli Omugereshooni.

9Bwanyima abo bantu baashemererwa munonga, ahabw'okuhayo ebyabo beekundiire, bakabitoijera Nyakubaho baihire aha mutima. Omugabe Daudi nawe yaashemererwa munonga.

10Nikyo Daudi yaasingiriize Nyakubaho omu maisho g'abateeraniire aho boona, naagira ati: Ai Mukama Ruhanga wa Isiraeli tatenkuriitwe, osingizibwe ebiro byona.

11Ai Nyakubaho, niiwe ogira obukuru, n'obushoboorozi n'ekitiinwa, n'obusinguzi, n'obugabe; ahabw'okuba byona eby'omu iguru n'eby'omu nsi biba ebyawe. Ai Nyakubaho, niiwe oba Omugabe Rukiraboona.

12Obutungi n'ekitiinwa niiwe bikomookaho; ahabw'okuba niiwe otegyeka ebintu byona. Omukono gwawe gugira obushoboorozi n'amaani, kandi niiwe obaasisa abantu boona kugira obukuru n'amaani.

13Mbwenu, ai Ruhanga waitu, nitukusiima, kandi nitusingiza eiziina ryawe ery'ekitiinwa.

14Mbwenu nkaanye niinye oha, n'aba bantu bangye nibo baahi, kubaasa kutoija tutyo twekundiire? Manya byona niiwe birugaho. N'ebi twakuha, twakora aha byawe.

15Ahabw'okuba itwe omu maisho gaawe tituri ba kunu, turi abashuuhuuki; nk'oku baatatenkuriitwe boona baabaire bari. Ebiro bi tumara omu nsi ni nk'ekicuucu, tihariho matsiko g'okumereera.

16Ai Mukama Ruhanga waitu, ebi bintu bingi ebi twareeta kukwombekyera Nyaruju y'okwetererwa eiziina ryawe eririkwera, nibiruga omu ngaro zaawe, kandi byona n'ebyawe ahabwawe.

17Ai Ruhanga wangye, nimmanya ku oreeba ebiri omunda y'omuntu, kandi ku oshemerererwa amazima. Mbwenu nyowe omu mazima g'omutima gwangye, naakutoijera ebi bintu byona nyekundiire. N'ekindi, hati naareeba abantu bangye abari aha nibakutoijera batagyemirwe, haza bashemereirwe.

18Ai Mukama, Ruhanga wa baatatenkuriitwe, Aburahamu, Isaaka na Isiraeli, gumya ebiro byona rukundo n'ebiteekateeko nk'ebyo omu mitima y'abantu baawe; emitima yaabo ogihuguurire ahariiwe.

19Ha mutabani wangye Solomooni okuguma n'omutima gwe gwona naakuratira ebiragiro byawe ebi waahamize n'ebi waataireho, naabihitsya byona; haza abone kwombeka Nyaruju ei ntungiire eby'okugyombeka.

20Ebyo ku byahwaire, Daudi yaagambira abateeraniire aho boona ati: Nimusiime Mukama Ruhanga waanyu. Mpaho boona abaabaire bateeraniire aho baasiima Mukama Ruhanga wa baishebo, bainika emitwe, baaramya Nyakubaho; kandi baaha omugabe ekitiinwa nibamutangirira.

21Reero baatambira Nyakubaho ebitambo. Aha izooba ryakuratsireho baamutambira ebitambo bicwekize, enimi rukumi, empaya z'entaama rukumi, n'abaana b'entaama rukumi, bataireho emitoijo y'ebyokunywa n'ebindi bitambo bingi munonga ahabwa Isiraeli yoona.

22Ahari eryo izooba baariira kandi baanywera omu maisho ga Nyakubaho bashemereirwe munonga. Ebyo ku bwahwaire baayemeka Solomooni mutabani wa Daudi omugabe obwa kabiri. Baamusiiga amajuta kubategyeka omu iziina rya Nyakubaho; na Zadoki baagamusiiga kuba omuhongyerezi.

23Bwanyima Solomooni yaasingama aha kitebe ky'obugabe bwa Nyakubaho, yaaba omugabe omu mwanya gwa Daudi ishe; yaagogyeera, n'Abaisiraeli boona baamworobera.

24Abakuru boona n'amamanzi, na batabani ba Daudi boona, baahiga kuhamira ahari ogwo mugabe Solomooni.

25Na Nyakubaho yaarangaanisa Solomooni omu Baisiraeli boona, kandi yaamuha ekitiinwa kingi ky'obugabe ekitakagirwaga mugabe weena omu baamubandiize omuri Isiraeli.

26Daudi mwene Yese nikwo yaabaire atyo omugabe, akategyeka Isiraeli yoona.

27Akamara emyaka makumi ana ari omugabe wa Isiraeli; emyaka mushanju yaagitegyekyera omuri Heburooni, na makumi ashatu n'eshatu omuri Yerusalemu.

28Bwanyima yaafa, yaahikire omu ngingo za bukuru, ahangaire, atungire, kandi aine ekitiinwa. Reero Solomooni omutabani yaaza aha ngoma omu mwanya gwe.

29Mbwenu ebi Omugabe Daudi yaakozire, okwiha aha by'okubanza okuhitsya aha by'aha muheru, bihandiikirwe omu Kitabo ky'eby'omu Busingye bw'abagabe eby'omu biro bya Samueli omuhanuuzi na Natani omurangi na Gaadi omuhanuuzi;

30hamwe n'eby'obutegyeki bwe byona, n'eby'amaani ge, n'ebyamubaireho, n'ebyabaire ahari Isiraeli, n'ebyabaire aha bugabe obundi bwona obw'amahanga gamwehinguririize.

← Chapter 28 Jump to: